في الشارع الضيق أوي
يمكن تحس ان البيوت
هي ّ اللي ولدت بعضها
وتلاقي شباك كل بيت
ماسك في شبابيك البيبان بيعضــّها
يمكن تحس ان البيوت
هي ّ اللي ولدت بعضها
وتلاقي شباك كل بيت
ماسك في شبابيك البيبان بيعضــّها
مكسوفة من بعض البيوت
لو في السما....حبة سحاب اتجـّـمعوا
شكل السحاب بيخضـَـها
جدرانها تبدأ ترتعش
وتداري طولها في عرضها
خايفة المطر....ينزل يدوّب سترها
ويبيـن الحزن اللي هاتك عرضها
في الشارع الضيق اوي
فيه ناس كتير
هربانة..أو...متهرّبة
مدّربة
إزاي تعيش وسط انكسار...وماتنكسرش
إزاي تعيش في الذكريات....وما تفتكرش
و إزاي بترضي بلقمة ناشفة وحتتين طرشي جزر
ولا إنــّها
من مال غلابة تربّي كرش
و إزاي وهي ّ مافيش في جيبهااا.. قرش ساغ
لازم يعيش جوة القلوب معني الشرف
مع إنه مابيعملشي قرش
و إزاي يسوقهاااا كل شئ
علشان تموّت نفسها....وما تنتحرش
في الشارع الضيق أوي
صوت طرطشة مية حـُما الواد ابراهيم
يخرق ودان كل الجيران
والكل فرحان ليه عشان
الأخ هيما من زمان
كان ناسي ايه طعم الحـُما
كان كل يوم
يرجع من البنزينة لابس بدلته....متشحمة
كالعادة دايما ً ينسى يقلع جذمته
يدخل ينام زي القتيل
أو ربما
لو في السما....حبة سحاب اتجـّـمعوا
شكل السحاب بيخضـَـها
جدرانها تبدأ ترتعش
وتداري طولها في عرضها
خايفة المطر....ينزل يدوّب سترها
ويبيـن الحزن اللي هاتك عرضها
في الشارع الضيق اوي
فيه ناس كتير
هربانة..أو...متهرّبة
مدّربة
إزاي تعيش وسط انكسار...وماتنكسرش
إزاي تعيش في الذكريات....وما تفتكرش
و إزاي بترضي بلقمة ناشفة وحتتين طرشي جزر
ولا إنــّها
من مال غلابة تربّي كرش
و إزاي وهي ّ مافيش في جيبهااا.. قرش ساغ
لازم يعيش جوة القلوب معني الشرف
مع إنه مابيعملشي قرش
و إزاي يسوقهاااا كل شئ
علشان تموّت نفسها....وما تنتحرش
في الشارع الضيق أوي
صوت طرطشة مية حـُما الواد ابراهيم
يخرق ودان كل الجيران
والكل فرحان ليه عشان
الأخ هيما من زمان
كان ناسي ايه طعم الحـُما
كان كل يوم
يرجع من البنزينة لابس بدلته....متشحمة
كالعادة دايما ً ينسى يقلع جذمته
يدخل ينام زي القتيل
أو ربما
فعلا ً قتيل
يصحي من النوم الطويل
من غير مراية يحط جل على العمي
بس المهم يحط جل
مع إنها نفس الهدوم...متشحمة
يمشي بعينيه المكسورين
و كإنها ...ممنوعة تحلم بالسما
وبرغم دا
بيعلـّـمك معني الرضا
ساعة ما ما مرسيدس جديدة تفوت عليه
ساعة ما يملي تانكها
دخانها بيعفــّر عليه
لحظتها بس عيونه تضحك للسما
ويلاقي صوت جوّاه يقول
يصحي من النوم الطويل
من غير مراية يحط جل على العمي
بس المهم يحط جل
مع إنها نفس الهدوم...متشحمة
يمشي بعينيه المكسورين
و كإنها ...ممنوعة تحلم بالسما
وبرغم دا
بيعلـّـمك معني الرضا
ساعة ما ما مرسيدس جديدة تفوت عليه
ساعة ما يملي تانكها
دخانها بيعفــّر عليه
لحظتها بس عيونه تضحك للسما
ويلاقي صوت جوّاه يقول
أرزاق وفوق....متقسمة
في الشارع الضيق أوي
حنفية واحدة للجميع
حمام موّحد للجميع
والضحكة واحدة للجميع
والدمعة واحدة للجميع
الهم واحد في القلوب
فيه شئ غريب بيصعبّه ...ويهوّنه
إنه بيسكـُـن.... في الجميع
في الشارع الضيق أوي
هتشم ريحة غريبة جداً تدهشك
في الشارع الضيق أوي
حنفية واحدة للجميع
حمام موّحد للجميع
والضحكة واحدة للجميع
والدمعة واحدة للجميع
الهم واحد في القلوب
فيه شئ غريب بيصعبّه ...ويهوّنه
إنه بيسكـُـن.... في الجميع
في الشارع الضيق أوي
هتشم ريحة غريبة جداً تدهشك
وتخربشك
ريحة عرق
على ريحة الحبر اللي مسجون في الورق
على ريحة الحلم اللي مـ ِالقلب اتسرق
مع صورة عايشة على الجدار
لمحمد اللي اختار يسيب
الشارع الضيق أوي
ويروح بعيييييييييييييييييد
لكن محمد للأسف
الحلم في البحر اتنسف
علشان محمد لمّا خاف
مـ ِالجوع يموت ...مات بالغرق
في الشارع الضيق أوي
فيه ناس غلابة كتير أوي
بيسَنــّدوا اليوم الطويييييييل....علشان يفوت
ويعلموك
إزاي تموت من غير ما احساسك يموت
و يخلوا قلبك يسألك
ساكنة البيوت جوة البشر
ولاّ البشر جوة البيوت؟
و إزاي جميع كتب الحساب والهندسة
فشلت تحل إزاي يعيش ألفين نفر
في بيوت آخرها 200 يادوب
ومايعرفوش إن البشر
في الشارع الضيق أوي
فعلا ً بيوتهم ضيقة
بس الوَسـَع جوة القلوب
في الشارع الضيق أوي
الناس بحالها بيسألوا
فيه زحمة ليه واستعدادات
فيه إيه جري....ليه شقوا جدران السُـكات
طلع الرئيس و ذوي الفخامة والسّمُــو
هيعدّوا بكرة من هنا
رايحيين هناك...في الشارع الواسع أوي
فيه افتتاح متحف جديد
وقصور قديمة اتجددت
وهتتفتح من تاني في العصر الرشيد
لكن أكيد
لو عدّوا ممكن يلمحوا
الشارع الضيق أوي
أو ريحته ممكن تزكم الجمع السعيد
إيه يعلموه
في الشارع الضيق أوي
علشان عن العين يحجبوه
أو يدفنوه
ملعون أبوه
لو كان يوحـّـش اسم مصر
يصْحَـي البشر
في الشارع الضيق أوي
يلقوا على ناصية شارعهم سور كبير
عالناحيتين
مكتوب في وشه بخط يبْسط كل عين
الحي بيرحب أوي بالزائرين
مكتوب في ضهره بخط يجرح كل عين
من بكرة لازم كلكم تـِخلـُــوا البيوت
من بكرة فيه..قرارات إزالة لكل بيت
و ابكي براحتك لو بكيت
لو لسه فيه في عيونكوا دمع
أو لسة فيه لدموعكوا عين
طب ليه وإمتي...إزاي...منين
ومافيش جواب
و يصرّخوا
ليه تحبسونا فـ حلمنا
طب فهمونا عملنا ايه
خلاكوا سيبتونا في عذاب
والله ما سرقنا البلد
ولا جينا ناحية حلمها
مع إنه بإيدينا اتولد
متأسفين
على ايه ما نعرفشي إنـّما متأسفين
يا موكب الجمع السعيد
يااللي جايين تتفرجوا
على مصر مصر ماهيش هناك
مصر اللي عايزينها هنا
محبوسة ويانا هنا
الصبح تاكل لقمة حاف
بالليل تنام من غير لحاف
و نقع تشيلنا في قلبها
وتقع نشيلها على الكتاف
ونخاف عليها من الهوي..مع إنها
ما بقيتشي دلوقتي علينا خلاص تخاف
يا موكب الجمع السعيد
إمتي تهدّوا السور هنا
وتهدوا وياه ألف سور
بانيينه من طوب حزننا
عايزين نعيش زي البشر
أو حتى مش زي البشر...لكن نعيش
راضيين بمصر بحزنها
وبدمعنا...وبدمعها
لو فيها قوتنا....أو مافيش
يمكن حياة الحلم جوانا انتهت
لكن أكيد
حلم الحياة مابينتهيش
ياموكب الجميع السعيد
حوّد هنا
يمكن مافيش
في شارعنا متحف ولاّ قصر
لكن قلوبنا بتوعدك
في الشارع الضيق أوي
هتلاقي مصر
24 comments:
يا الله با محمود
مش عارفه او\قول ايه بجد
رائعه وتحفه ورهيبه وكله
لو كل ماتغيب عننا هترجع بملحمه كدا
ممكن نسامحك علي الغياب
ربنا ييسرلك حالك يارب
يا الله.............تصويييير راااائع يادكتور محمود......بس تصوير في نفس الوقت مبكي بجد....
انا قرأت وقلبي فعلا بيبكي على الي بتحكيه وللاسف ده حال ناس كتيييييير في مصر عايشين تحت مستوى الصفر...الله يرحمنا برحمته.....
تسلم الايادي يادكتور...,انا فعلا ابداء اعجابي في كلمات عاجز حاليا لاني متأثرة جدا بالكلمات دي ومش عندي القدرة اني اطلع كلمات اعبر عن اعجابي بيها....او يمكن كلماتي لن تصل لمستوى ما كتبت
لا فض فوك دكتور محمود
دكتور محمود بجد مش قادرة الاقى كلام يوصف روعة ماكتبت
ماشاء الله ايه الاحساس ده
احساسك بالانسان المصرى البسيط ده رهيب بجد
قدرت تعبر عنه كويس جداااا.....تقريبا ماخلتش فكرة اللى ماكتبت عنها كأنك عايش معاه وعارف ايه جواه
بجد كلماتك دى تحفة فنية مش قادرةاقول غير ربنا يحميك وان شاء الله ترجع تنور المدونة تانى بأحلى اشعار
لما الشارع الحساس أوي
يكتب عن الشارع الضيق أوي
لازم يطلع قصيدة جميلة أوي
ربنا يحميك
ااااااااااه يا محمود طبيب فعلا لما وضعت يدك على الجرح النازف ومعه الحلم والامل .. الله يبارك لك ويحفظ موهبتك وتسلم يمينك ولا انت بتكتب بالشمال ..فعلا مش لاقية كلام يوصف ندرتها وصدقها غير انها اشعرتنى وكانى ارى رسمت بالقلم لوحة من الواقع الميرير ..ادام الله عزك وقلمك ..تحياتى ويار تكون بخير وكل طنطا والغربية بيسلموا عليك ..هههههههه طبعا مش انت متغرب عننا
فعلا من أفضل ما قرأت لك يا محمود
زادكم الله من فضله
..اسعدتنا
لما عرفنا انك كتبت
..وجرينا نقرا
لقينا دمع عيونا سال
ماهو اصل جوه نفوسنا كبت
كل الشوراع ضيقه
وقلوبنا لسه رقيقه
..رغم اننا
بنتوه ونكبر ف الزحام
..لكننا
أبدا في يوم ما نقول حرام
..أصل الايمان سكن القلوب
وملى البيوت الضيقه
السلام عليكم ورحمة الله وبركاته
ازيك ياد/محمود واهلا بعودتك للكتابة مرة تانية بجد افتقدنا كلامك
القصيدة بجد جميلة ومعبرة جدا جدا جدا لأن ده واقع ملموس كلنا بنشوفه بس صعب انه حد يحس بيه اوي الا اللي عايش فيه او اللي احساسه مرهف زي حضرتك
احنا مستنيينك دايما كل تلات وربنا يوفقك دايما ويكرمك
بسم الله
بجد مفيش كلام يوصف جمال القصيدة
بارك الله فيك
في الشارع الضيق أوي
فيه ناس غلابة كتير أوي
بيسَنــّدوا اليوم الطويييييييل....
علشان يفوت
ويعلموك
إزاي تموت من غير ما احساسك يموت
و يخلوا قلبك يسألكساكنة البيوت جوة البشرولاّ البشر جوة البيوت؟
من أجمل ما قرأت
مافيش عودة للمدونة أروع من كده
هنستناك
ماشاء الله ولا قوة إلا بالله
ربنا يبارك فيه يادكتور محمود ويبارك فى موهبتك ، ويحفظك من كل سوء ، ويرضى عنك ويرضيك
ماشاء الله عليك يا حودة ياحتة سكرة.ربنا يحميك
إزاي تموت من غير ما احساسك يموت
و يخلوا قلبك يسألك
ساكنة البيوت جوة البشر
ولاّ البشر جوة البيوت؟
بجد حلوه اوي كلماتها
وحسه بيها جدا
اول مره هنا وبأذن الله موش اخر مره
وبجد كلمات معبره جدا
تقبل مروري وتحياتي
ما شاء الله يا د. محمود عودة ولا اروع :)حوّد هنا
يمكن مافيش
في شارعنا متحف ولاّ قصر
لكن قلوبنا بتوعدك
في الشارع الضيق أوي
هتلاقي مصر
انــته اسطـــــــــــــوره اسطووووره يعني ... لا بجــد أسطوووووره
أخويا العزيز
مشفتكش فى المطرية,, أظنك كنت فى الصيدلية وقتها
تعليقى الوحيد عليها هو تصفيقى الحاد
وبأيد رأى محمود فرج انك من يوم ما بعدت عن نمط الرومانسى اللى هو فكرة واحدة من زمااااااااااااان أوى وهى كلام العشق للمعشوق
انت دلوقتى بتسجل أفكار خاصة جدااا
( استثناء )
وعلى رأى محمود برده أقولك دا كله عايز ديوااان
دلوقتى فى احتمال أقول انى احاول اغير تعليق كان من يومين بس عنك
قلت فيه انى بتجنب اشوف محمود لآن الايتسامة اللى اعتدناها منه واللى كانت بتحررنا من حزننا بقت كما القيود بتحبسنا فى الهموم
دلوقتى يا محمود هحاول أصدق انك بدأت تملك ابتسامة من جواك فعلا مش ابتسامة بتدارى الهموم
ربنا يسعدك ويبارك فيك ويجعلك سبب فى نشر أفكار بعيونك لقلوب الناس وعقولهم
هقول ايه بس؟!!عظيمه يا مصر
عظيمه بقوتك وبصبرك وبولادك
اللى بيستمدوا عظمتهم منك
وانت يا د محمود اكبر مثال على كده
ربنا يكرمك ويقويك
دوك ميرو
ياااااااااا ربي
ايه الكلام الجميل دا
تصوير رائع .. تعبيرات تحفة بجد
ماشاء الله بجد عليك
انصحك تبخر نفسك
:D
تقبل مروري
" دي اول زيارة ليا ويارب تتقبلها وان شاء الله هكررها كتير وياريت نظل علي تواصل "
في الشارع الضيق أوي
فيه ناس غلابة كتير أوي
بيسَنــّدوا اليوم الطويييييييل....
علشان يفوت
ويعلموك
إزاي تموت من غير ما احساسك يموت
و يخلوا قلبك يسألكساكنة البيوت جوة البشرولاّ البشر جوة البيوت؟
من رأيي
انها أصدق ما قيل في وصف المصريين
السلام عليكم ورحمه الله وبركاته
ازيك يادكتور يارب دايما بخير يمكن معلقتش علي حاجه ليك من زمان بس متابعه بس مكنتش لاقيه حاجه اقولها لكن كلامك في القصيده دي ينطق الحجر مش يخليني اتكلم بس بجد روعه تحفه مفيش كلام يوصف روعه اللي انتي كاتبه هي دي مصر وهما دول المصريين الي بنشوفهم كل يوم بيتداس عليهم من مصريين زيهم للاسف مش من حد من بره ياااااااااااه لو كل الناس تحس ببعضها زي الاحساس اللي في القصيده دي مكنش ده بقي حالنا ربنا يرحمنا جميعا وماتغيبش عننا تاني بجد بكلامك الجميل ده الي بيثبتلي ان في ناس في الدنيا دي لسه بخير
قمه الروعه والاحساس دكتور محمود
تسلم الايادي
وربنا يبارك في حضرتك يارب
الصبح تاكل لقمة حاف
بالليل تنام من غير لحاف
و نقع تشيلنا في قلبها
وتقع نشيلها على الكتاف
ونخاف عليها من الهوي..مع إنها
ما بقيتشي دلوقتي علينا خلاص تخاف
ما أروعها..من أروع ما قرأت لك يا شاعر
تحفة بكل المقاييس
سلمت يداك
بجد روعة روعة
مصر اللي عايزينها هنا
محبوسة ويانا هنا
الصبح تاكل لقمة حاف
بالليل تنام من غير لحاف
و نقع تشيلنا في قلبها
وتقع نشيلها على الكتاف
ونخاف عليها من الهوي..مع إنها
ما بقيتشي دلوقتي علينا خلاص تخاف
:::::::
بجد يا محمود ربنا يباركلك
حلوة قوي
قمة العبقرية
أنا شوفت الشارع قدام عينى و شوفت الناس و البيوت و ابراهيم و محمد شوفت القصيدة كلها
ربنا يكرمك
Post a Comment