ومضات

Sunday, August 3, 2008

السلام عليكم ورحمة الله
يمكن كتير من اصحابي واخواتي في سنه خامسه مش هيقروا السطور البسيطة دي
ويمكن اكون بكتب بعد فترة من اصعب الفترات اللي عشتها في حياتي
مش بس عشان زحمة الامتحانات والضغط النفسي الفظيع ده
بس يمكن عشان اضطريت اذاكر وانا تعبان جدا
وعندو دور برد عمري ماشفته في حياتي
ماسابشي حاجه ممكن يعملها في جسمي الا وعملها
ولسه مأثر على لحد دلوقتي
شكل الامتحانات دمرت المناعه ولا ايه
بس وسط الجو ده ورغم نزيف الدرجات ده
ربنا بعتلي كام حاجه اديتني امل كبير اوي الكام يوم اللي فاتوا
مش مهم في حياتنا يبقى الامل ليه مبرر المهم يبقى ليه معني
انا مش هطول عليكوا عشان عارف الظروف
كانت اول حاجه سمعتها من الشيخ خالد الجندي بالصدفه
كان بيقول انه كل ماييجي يدخل امتحان او موقف صعب يقول الجمله دي
اللهم اني كفرت بنفسي و آمنتُ بك
ياااااااااااااااااااااااااااااه
الجمله دي أثرت في جدا
وبيتهيالي اي حد يفهمها هتأثر فيه
اما الباقي فكانت جمل صغيره كنت كتبتها في الكتب بتاعتي اول السنه
وبقيت بالصدفه كل ما افتح كتاب تقابلني جمله منهم
تنور جوايا
ورغم ان انا اللي كاتبها حسيت ان انا اول مرة أقراها
الجمل كانت بتقول
إذا خضتَ معارك الحياة وأنت مهزوم ٌ من داخلك فلا تتوقع ان يأتيك النصر يوماً ما
ان النمله اللي حفرت الصخر..ليست أكثر منا ذكاءاً ولا قوة ولكنها فقط كانت أكثر منّا صبرا
شئنا ام أبينا سوف تجري أيامنا..ولكننا نحتاج قليلاً من الحكمه
لا تمضي منّا..وكثيرا من الصبر لكي لا تمضي علينا
أحلامنا هي الوقود الذي نعطيه لقلوبنا..لكي تشعر..لكي تحب..لكي
تعيش.. تستطيع الحياة بدونها ولكنها ستصبح قلوباً تدق فقط
نسيت الجمله اللي فاضله
أخر حاجه هقولها بيتين طلعوا منا تلقائيا ساعه ماحطيت القلم بعد اول امتحان السنادي
وكان امتحان الاطفال و قبل ما افكر ضاع أد ايه وماذاكرتش ليه وكل الكلام اللي بقوله لنفسي دايما
لاقيت البيتين دول جوايا زي ما يكونوا كانو جوايا من زمان اوي
ثقـتي بأنـك خالقي دوماً معي....لا لمْ تدع للحزن في قلبي مكانْ
قد قلتها والقلـــب يملأه الرضا...الله شاءَ وما أراد الله كانْ
أنا متأسف أوي يا جماعه لكل الناس اللي قصرت في حقها
وما سالتش عنها
كان غصب عني
دعواتكم
تمنياتي بالتوفيق للجميع

17 comments:

Anonymous said...

السلام عليكم
ازيك يادكتر ومش هسأل عملت ايه ف الامتحان لان دى حاجه معروفه بس انت لحقت تكتب البوست امتى؟.
بجد كلماتك بسيطه ومؤثره وجات ف

ميعادها بعد الامتحان الجميل ده
n_e_m

Anonymous said...

السلام عليكم ورحمة الله وبركاته
الف سلامة عليك يا محمود
معلهش
بس تاكد ربنا هايعوضك بخير كبير جدا ان شاء الله
ثق بالله
لان ربنا اللي بيختبرك بالبرد ده
هو اللي هايجزيك عنه
والكلام ده عن تجربة شخصية انا مريت بيها
في سنة برده كنت تعبانة جدا ومش كنت بقدر اذاكر
وتصدق بالله
كان اعلي مجموع حصلت عليه في السنين اللي فاتت
كان في السنة دي
وربنا ده اللي حصل
بس انت اعمل اللي عليك وربنا هايوفقك
وينولك اللي في بالك ان شاء الله
علي فكرة ...الجمل اللي انت كاتبها مؤثرة فعلا
وخرجتني من المود الكئيب اللي احنا عايشينه
ربنا يكرمك يارب

Anonymous said...

بسم الله

خضتَ معارك الحياة وأنت مهزوم ٌ من داخلك فلا تتوقع ان يأتيك النصر

صح..

الف مليون سلامة

عندك حق في كل كلمة قلتها

ربنا يكتبلك النجاح والفلاح

اسأل الله العظيم رب العرش العظيم أن يشفيك

pure blue

عمر said...

أسأل الله العظيم رب العرش العظيم أن يشفيك
لا بأس طهور إن شاء الله يامحمود

ألف سلامه عليك ، والله الواحد مقصر معاك كتير ، لكن هقول ايه بس ظروفك ظروفي

بس انا مش عارف ايه حكاية التعب ده سبحان الله ، كل ما أقابل حد انهارده من زمايلنا في الامتحان يقوللي انه كان بيتصارع مع اتنين في اليومين اللي فاتو دول ، المذاكره والمرض ، أسأل الله تعالى أن يمن على الجميع بالشفاء والتفوق

بس بأذكرك يا محمود إن المرض ده ابتلاء من عند ربنا - وكذلك المذاكرة في طب طبعا - وأشد الناس بلاء الأنبياء ثم الأفضل فالأفضل ، لذلك أبشر يا محمود فإنما هو تكفير للذنوب وزيادة في الحسنات إن شاء الله

وأخيرا .. اشتقت إليك كثيرا يا محمود

Anonymous said...

السلام عليكم ازيك يا دكتور محمود بجد الف سلامه عليك اسأل الله ان يشفيك ان شاء الله
انا المره دي مش هقولك غير الله عليك بجد كلام رائع جدا وجمل مؤثره ورائعه ربنا يكرمك ويوفقك ويحفظك علي هذا الكلام الرائع وربنا يوفقنا في امتحاناتنا اللي جايه ان شاء الله ويعديها علي خير ان شاء الله من غير اي اثار جانبيه

إذا خضتَ معارك الحياة وأنت مهزوم ٌ من داخلك فلا تتوقع ان يأتيك النصر يوماً ما
بجد الجمله دي رائعه عجبتني جدا جدا جدا
لانها فعلا حقيقه يجهلها الكثيرون
جزاك الله كل خير علي كلامك الرائع

واستعن بالله ولاتعجز
Amert Alhozn

Anonymous said...

السلام عليكم
شفاك الله وعافاك ويتم شفاك عاجلا باذن الله.الحقيقةكلماتك في موضوعك الاخير بجد رائعة جداجزاك الله بهاخيراعنا. ومتزعلشي على اللي حصل معاك لكن كن على يقين أنه الخير من عند الله.وعلى فكرة الامتحان كان مش كويس للجميع بس الحمد لله على كل حال وربنا يعوضهالنا جميعا في اللي جاي ان شاء الله .أعتذر للاطالة وفي النهاية أسأل الله العظيم رب العرش العظيم أن يشفيك وجميع مرضانا ومرضى المسلمين

Anonymous said...

السلام عليكم
شفاك الله وعافاك ويتم شفاك عاجلا باذن الله.الحقيقة كلماتك في موضوعك الاخير بجد رائعة جداجزاك الله بهاخيراعنا. ومتزعلشي على اللي حصل معاك لكن كن على يقين أنه الخير من عند الله.وعلى فكرة الامتحان كان مش كويس للجميع بس الحمد لله على كل حال وربنا يعوضهالنا جميعا في اللي جاي ان شاء الله .أعتذر للاطالة وفي النهاية أسأل الله العظيم رب العرش العظيم أن يشفيك وجميع مرضانا ومرضى المسلمين

باجوجو said...

كده يا حوده تبقى تعبان ومتقوليش
إمال أنا داخل الكلية دي ليه بقى
كنت طبعا هجيب دكتور وهجيلك
بس إيه الكلمات الطحن دى(جميلة طحن يعنى)
مكنتش عارف تجبها قبل الإمتحان
يمكن كانت صبرت الواحد على الليلة
يارب تخف كده وتبقى 64 حصان
معلش على التأخير إنت عارف إن مكنش ليه فى موود المدونات
وعموما ملحوقة

quiet_storm said...

الف سلامه عليك يامحمود
متأخره لنظرا لان النت كان فاصل عندى- -
يعنى دور برد محترم ورجلك كانت بتوجعك وامتحانات باطنه
والدنيا معاك زى الفل

ربنا يعينك ويوفقك فى الجاى ان شاء الله

بس حبيت اسجل اعجايى بالبيتين اللى كتبتهم بعد الامتحان مباشره دول

ثقـتي بأنـك خالقي دوماً معي....لا لمْ تدع للحزن في قلبي مكانْ ***قد قلتها والقلـــب يملأه الرضا...الله شاءَ وما أراد الله كانْ


ربنا معاك وبالتوفيق ان شاء الله فى الباقى

حنان سعيد said...

محمود سليمان ..
ده اول مرور لي بمدنتك
وانا فعلا سعيده بمروي جدا
مدونتك جميله جداا
والف سلامه عليك
وربنا يجعله في يمزان حسناتك
.....
الموضوع ده بجد جميل جدااا
بتقول إذا خضتَ معارك الحياة وأنت مهزوم ٌ من داخلك فلا تتوقع ان يأتيك النصر يوماً
ان النمله اللي حفرت الصخر..ليست أكثر منا ذكاءاً ولا قوة ولكنها فقط كانت أكثر منّا صبرا

شئنا ام أبينا سوف تجري أيامنا..ولكننا نحتاج قليلاً من الحكمه لا تمضي منّا..وكثيرا من الصبر لكي لا تمضي علينا

أحلامنا هي الوقود الذي نعطيه لقلوبنا..لكي تشعر..لكي تحب..لكي تعيش..
تستطيع الحياة بدونها ولكنها ستصبح قلوباً تدق فقط

بجد كلهم تحفه جدااا ..زوالواحد متهيقلي كل يوم قبل اي حاجه لازم يقرئهم عشان يبدا يتعامل مع يومه صح

تحياتي لك
وتمنياتي لك بالشفاء ودوام الصحه باذن الله

هبهوبه said...

السلام عليكم يادكتور محمود
الف مليون سلامة عليك وربنا يبعد عنك كل مرض وكل شر
حقيقي كلامك الجميل ده كان واحشنا جداً كانت في حاجه كبيرة فحياتنا ناقصة
انا فرحت جداً جداً اما فتحت ولقيت كلامك منور المدونه
ياريت تكون دايماً موجود معانا
ويارب ربنا يوفقك في الإمتحانات
كل الجمل جميلة والبيتين تحفة فنية رائعة معناهم جميل جداً
ياريت دايماً تطمنا عليك
ربنا يوفقك

Anonymous said...

elrousha
السلام عليكم يا دكتور محمود
الف سلامه على حضرتك واكيد طبعا كان مجهود كبير على حضرتك انك تكتب وانت تعبان بس بجد الجمل حلوة اوي وبيتين الشعر اكتر من رائعين ويارب حضرتك تكتب لنا كده علطول وربنا يوفقك في الامتحانات

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير وألف سلامة ويارب تكون بقيت كويس دلوقتي اما الامتحانات فربنا يوفقكم ومعلش الصبر الصبر هانت
يمكن يكون البوست المرة دي بسيط في عدد كلماته واحرفه لكن معانيه كبيرة لأن الكلمة مش بعدد حروفها بس بتأثيرها وخلودها في النفس طبعا جملة الشيخ خالد الجندي مفيش نقاش على ان اللي بيؤمن بيها فهو مؤمن بالمعنى الحقيقي لهذه الكلمة
اما الجمل اللي حضرتك كتبها فأي كلام مش هيديها حقها بجد جميلة وياريت كلنا نفكر فيها ونحاول نوصلها لكل اللي بنحبهم عشان نديهم شوية امل ونديهم المفتاح والسر لحل مشاكل الحياة
اما البيتين فكلهم ثقة بأنه انا اريد وانت تريد والله يفعل ما يريد وان الله اذا اراد شيئا فانه يقول له كن فيكون اخيرا اتمنى لكم التوفيق والنجاح وخلي ثقتكم في ربنا كبيرة وخلوا اللجوء لربنا والدعاء له هو ما يريح صدوركم وينير قلوبكم ويبعث في نفوسكم الامل وربنا معاكم والف سلامة مرة تانية واحنا دايما منتظرين منك كل جديد

semsema said...

شفاك الله وعفاك محمود
ايه حكاية التعب مع الامتحانات ؟؟؟هي متلازمة ولا ايه؟؟
انا كمان كنت تعبانة قبل الباطنة بس الحمد لله ربنا بييسر
ويارب تكون رجلك دلواتي بقت احسن
وتذكر ان ما من شوكة يشاكها المسلم الا كفرت من سيئاته
مبروك علينا الحسنات المضافة والسيئات
المكفرة باذن الله
طبعا كلمات رائعة وبوست معبر كالعادة
عذرا لتاخر الرد بس النت كان مفصول
دمت سالما
وحفظك الله
تحياتي

Anonymous said...

السلام عليكم
ازيك يا د/محمود الف سلامة عليك
دي أول مرة لية أدخل علي المدونة لكنها بجد ماشاء الله جميلة جدا وكلماتك جميلة جداجدا .بجد مش هقدر أقول غير ماشاء الله لاقوة الا بالله موهبة رائعةربنا يديمها عليك ويزيدها ويباركلك يا رب
وبالرغم من اننا في فترة امتحانات الا اني لم أقدر أغلقها دون المرور تقريبا على كل الموضوعات وكان نفسي أكتب تعليق على كل موضوع على حدة لكن الوقت لم يمكنني من ذلك.لكن متعوضة بعد كدة ان شاء الله
وفي النهاية أدعو الله أن يوفقنا جميعا في امتحاناتنا ويعديهالناعلى خير ان شاء الله
السلام عليكم ورحمة الله وبركاته

محمود سليمان ابو العزم said...

الله يسملكم كلكم يا جماعه
جزاكم الله خيرا
شكرا ليكوا كلكم على شعوركم الجميل ده
والله مش عارف اقول ايه
يارب تكون كل الناس ماشيه كويس في الامتحانات
واستنوا الاسبوع الجاي ان شاء الله
قصيده عن رجلي المجبسه دي
لو ربنا يسر

تمنياتي بالتوفيق للجميع
أخوكم
محمود ابوالعزم

رحيل said...

الف سلامه يادكتور محمود ولو انها متاخرة قوي بس معلش اختك لم تكن بافضل منك حالا من اول الامتحانات وانا في ابتلاءات سبحان الله وآخرها دور البرد اللي بتتكلم عنه اللي ملازمني في ذات اللحظه اللي بكتبلك فيها الكومنت ده بس الحمد لله قدّر الله وماشاء فعل ...

الاهمّ بقى اني كل ماادخل اقرأ كلماتك ورغم انها بسيطه فعلا ز ي ماوصفها الزملاء والزميلات الا ان اكثر مافيها واقعيتها فعلا حقيقية قوي وصحيحه جدا وللاسف المفروض اننا مانعرفش نعيش من غيرها بس لغط العالم من حولنا بينسينا قدر كبير ليس منها فقط بل من انفسنا ايضا وايمانا بذواتنا...

في الختام تقبل انحناء قلمي المتواضع امام شموخ كلماتك الراقيه والانيقة فانت رائع دوما كما عودتنا ...

تحياتي ...