فرح الدكتوره غاده

Thursday, August 14, 2008

السلام عليكم ورحمة الله
اتمني يكون الجميع بخير اوي
المناسبه اللي هقوللكم عليها دلوقتي تخصني اوي
تقدروا تقولوا انه فرح اختي
يوم الاتنين الجاي ان شاء الله
فرح الدكتوره غاده
و انا مش هقدر اوصف الدكتوره غاده تبقى ايه باالنسبالي
كل اللي اقدر اقوله ان انا ووالدتي واخواتي بنعدها واحده منا
و عمري ما حسييت احساس الاخوه الصافي ده ناحية حد أد ماحسيته ناحية الدكتوره غاده
ويمكن الدكتوره غاده من اكتر الناس اللي علموني في حياتي
اتعلمت كتير اوي على مدي الخمس سنين اللي عرفت فيهم الدكتوره غاده
اتعلمت ازاي اعامل المرضي
ازاي ابقى كويس وفير من غير ما ازعل حد مني
ازايي اكون وقت الجد جد ووقت الضحك ضحك
وكنت فرحان اوي السنادي اني مش لوحدي اللي بقيت بعز الدكتوره غاده
لان ناس كتير اوي بقت بتعزها زييي
آخر مرة كلمت الدكتوره غاده بقوللها كويس انك هتجوزي الفترة دي
اصل الناس بتخاف منك في الاوسكي
قالت انا نفسي ادي درجه كويسه
وعشان ادي درجه كويسه لحد لازم اكون امتحنته صح
واحاول اطلع منه احسن ما عنده
تعرفوا..اليوم الوحيد اللي كانت الدكتوره غاده معايا في الامتحان
كان يوم امتحان الرواند
والناس قالت ايوه يا عم الدكتوره غاده هتظبطك
وفعلا دحلت الدكتوره غاده معايا الاوسكي
مش هقوللكم عملت في ايه في الاسئله
عمري ما حد سألني بالطريقه دي
ولما رحت على حاله من بتوع القاهره وابتدي يمليني الشيت
لاقيتها جت خدتني لواحد من عيانين المستشفي العاديين جدا
وقالتلي انا مش عايزاك تكتب شيت وخلاص
انا عايزاك تطلع دكتور صح
ولما جت وقت اللجنه راحت هي الرواند وسابتني دخلت للدكتور موسي لوحدي
و قالتلي ماتخليش حد يوصي عليك
اعمل نفسك بنفسك وماتخليش لحد فضل عليك طول العمر
ده موقف من مواقف كتير كان نفسي احكيها
بس عارف ان الوقت ضيق
عندي فكرة بس صغيرة
في خانه التعليق
كل واحد يكتب تهنئته للدكتوره غاده
وانا ان شاء الله هطبعها واخدهالها يوم ما اروح اباركلها في شقة عريسها ان شاء الله
يعني مش عايز حد يكتب في الردود كلمة محمود خالص
الردود تبقى للدكتوره غاده وبس
اتمنى آخدلها اكبر عدد من التهاني
لانها فعلا تستاهل
واتمني على ما تقدروا تبقى الردود بالاسماء
ربنا يكرمها ويكرمكوا ويكرمنا جميعا
انا مش هطول عليكوا اكتر من كده
وكفايه التوبيك ده النهارده
وان شاء الله قريب اوي ..ممكن يوم الاتنين..هيبقى فيه توبيك خاص جدا
بالتوفيق للجميع

43 comments:

اسلام الشاذلى said...

السلام عليكم

الف الف الف مليووون مبرروك للدكتورة غادة والله العظيم انا فرحان جداا
علشان انا كمان بعتبر الدكتورة غادة فى مكانة اختى الكبيرة مش مجرد دكتورة بتعملنى فى سنة من السنين اللى هنقضيها فى الكلية دى وخلاص

وانا حسيت دا اووى خصوصا لما كنا بنعمل البريزنتاشن ادام الدكتور عبد المطلب انا واسلام صاحبى وهى كانت موجودة وطلبت مننا البريزنتاشن بعد ماخلصنا تاخد نسخة لنفسها وقالت ان البريزنتاشن كان حلو جدااا
وقتها بجد انا شخصيا ومش عشان انا اللى كنت عامل البور بوينت لاء بجد مجرد انى حسيت انها فعلا عجبها الملف وعجبها طريقة عرض اسلام صاحبى وكمان تشجيعها
وقبلها بيوم قالت خلاص انتوا ماتشيتوش الحالة بتاعة بكرة

المهم كل دا بجد وغير كدا خلانى اعزها اكتر واكتر واحس انها اكتر من اخت لنا كلنا

مرة تانية الف مليووون مبروك للدكتورة الغالية دكتورة غادة
ويارب التهانى دى توصلك ان شاء الله

شكرا جزيلا

.::The Exorcist MiDo::. said...

بسم الله الرحمن الرحيم
السلام عليكم
ألف مبروووووك للدكتورة غاده
وأتمني لها التوفيق في حياتها داخل الجامعه وحياتها الشخصيه وعبال ما تمسك قسم الباطنه ان شاء الله
تحيه للدكتورة غادة مرة تانيه
Tanta Doctors Group®

The Exorcist MiDo

Dr.ShaboMania™
Mo7amed Shalaby

dr_modymodak said...

جانا الخبر جانا
والدنيا مش سايعانا
يوم فرح اختنا يوم فرح من جوانا
عريس شياكه وخفه
مظبوط اوي في الزفه
وعروسه حلوه جميله
جمال وحسب واصيله
يا ابو العزم ياخو العروسه
يابو الرجال علي حق
الجدعنه من شيمتك
والمرجله علي حق

بجد عاوز اقول حاجه الدكتوره غاده بسم الله ما شاء الله لو فيه اتنين من نوعيتها عندنا في الكليه كان الواحد هيبات في الكليه والله

الف مبروك يا دكتورتنا ودعواتك ربنا يكرم الجميع

وعقبال بناتنا واخواتنا

hasna said...

الف الف مبروك ليكي يا دكتوره غاده انا مليش معاكي مواقف عن قرب بس انا فعلا بحبك جدا لانك فعلا دكتوره محترمه وبتحسي بالناس ومعالتك مع المرضى كويسه جدا كنت ببقى مبسوطه اوي اما بشوفك بتتعاملي مع المرضى كويس كانهم حد يخصك كنت برجع احكي لوالدتي عليكي واقولها ادعيلي ابقى زيها كده
بجد انا مبسوطه بيكي وليكي جدا يا دكتوره ويارب يباركلك و يكتبلك الخير والسعاده والرضا

أحمد سعيد بسيوني said...

بسم الله
الف الف مبروك يا دكتورة غادة
والله كلنا فرحنالك من قلبنا كاخت كبيرة لينا وكدكتورة تعلمنا منها الكثير
صحيح حضرتك لم تدخلي لنا في قاعة الدكتور محمد هجرس الكثير ، ولكن سمعتك الطيبة سبقتك وكنا نتمنى ان حضرتك تكوني من نصيب قاعتنا ، وصدقا قد حرمنا منك هذا العام
عجبني في الدكتورة غادة جملتها الرائعة " انك ماتخليش لحد فضل عليك طول العمر " وانك لازم تعتمد على نفسك وتكون نفسك بنفسك ولا تستولى على حق غيرك
اهنئك كما علمنا رسول الله " بارك الله لكما وبارك عليكما وجمع بينكما على خير " واسأله تعالى ان يزرقك العمل الطيب والذرية الصالحة
كلمة للعريس قبل ما اختم وهي " حقيقة لقد فزت بها فهنيئاً لك " وربنا يبارك لكم ويجعل حياتكم كلها حب وسعادة ورحمة ومودة
وعقبال ما نبارك لك يا دكتورة غادة على رئاسة قسم الباطنة ان شاء الله تعالى
اعتذر على الاطالة
تقبلي خالص تحياتي
احمد سعيد

semsema said...

ألف مليون مبروك ليكي يا دكتورة غادة
حضرتك من أحب الشخصيات لقلبي السنة دي لاني فعلا لمست في حضرتك الاحساس بالمريض وبالاخص يوم عمي ابراهيم مريض فشل عضلة القلب لما طلبتي منه يرجع للمستشفي لما جه الروند وهو من حبه لحضرتك مقدرش يرجع وحضرتك ممكن تكوني محتاجه ليه
يارب يسعدك يادكتورة غادة ويتوج كل ايامك بالود والسعادة

quiet_storm said...

السلام عليكى دكتوره غاده
بجد فرحتنا بالخبر الجميل ده لا توصف
ده لانك فعلا انسانه تستحق كل احترام وحب وتقدير وخير
واكيد ربنا بيحبك....لان اللى ربنا يحبه ..يحبب فيه خلقه
وحضرتك شايفه الاجماع ده كله..بسم الله ما شاء الله انا مش بحسد ولا حاجه
ربنا يحفظ عليكى نعمته ويزيدك يارب الف مبروك دى قليله اوى علي حضرتك
مليار مبروك وربنا يتتم بخير
ونسمع احلى الاخبار كده دايما
خالص دعواتى بالتوفيق وكل السعاده فى حياتك العلميه والشخصيه

حنـــــان

DoctorAllam said...

ألف ألف مليون مبروك ليكي يادكتورة غادة
والله فرحت لحضرتك قوي وأهو خبر مفرح في ظل القصف العشوائي المكثف من الإمتحانات ولجان الدمار الشامل المسماه مجازاً بلجان الشفوي
مش عارف بقى حضرتك حتعرفيني ولا لأ بس أنا أطول واحد في قاعة صيدناوي وحضرتك كنتي معجبة قوي بالطول بتاعي
مش حطول كتير في موضوع الشكر في حضرتك لإن مهما قلنا مش حنقدر نعبر عن اللي في قلوب كل الدفعة تجاهك وكفاية الحلويات اللي كان حضرتك بتوزعيها
بإذن الله نبارك لحضرتك بعد أول مولود بس يكون إسمه محمد على إسمي ويبقى قصير زيي بالظبط
وفي النهاية أقول بارك الله لكما وبارك عليكما وجمع بينكما في الخير
وأوصيكي بتقوى الله في زوجك وفي بيتك فما صلاح البيوت إلا بصلاح الزوجات
تقبلي تحياتي أخوكي الصغير الطويل محمد فتحي علام
(ملحوظة: مش تنسي حضرتك الملبس والشيكولاتات ولوازمهما أول ما ترجعي الكلية تاني)

محمد عبدالعال said...

ألف مبروك يادكتوره غاده
وبادعيلك إن ربنا يوفقك فى جوازك بجد لأنك تستاهلى كل خير ..
وكمان لأن مهمتك صعبه جدا جدا !
دكتوره شاطره زى حضرتك وكمان ساف جامعه يعنى وقتك هيبقى غالبا مش ملكك وهتحتاجى مجهود بدنى وعصبى كبير علشان تنجحى بإذن الله فى بيتك وتكملى نجاحك فى شغلك
ربنا يقدرك ويسعدك ويقدرنا نكون دكاتره شاطرين تفرحى بمستواهم وبإنك كنتى سبب فى شطارتهم بإذن الله

ألف مبروك تانى وتالت وعاشر وشكرا يامحمود علشان الخبر الجميل ده فى وسط القصف العشوائى على رأى علام :)

Anonymous said...

بسم الله

اولا اقول الف الف مبروك للدكتورة غادة

سبحان الله عمرى ما اعرفها ولا شوفتها لانى لسه مدخلتش سنة خامسة بس من كلام الجميع عليها حبيتها جدا.

ربنا يكتبلها السعادة في الدنيا والاخرة
ويكون زواج مبارك

وربنا يرزقك بالذرية الصالحه

pure blue

fatma said...

الف مليون مبروك لاحلى اخت واخف دم واطيب قلب شفناه فى الكليه انت طبعا مش حتفتكرينى بس انشاء الله انا اباركلك بنفسى وافكرك وربنا يوفقك ويباركلك في حياتك الجديده على فكره احنا شله كبيره اوى بنباركلك مش واحده بس (ياترى ايه اخبار البونبونى بعد الجواز مفيش بقه ولا ايه هههه)

Anonymous said...

السلام عليكم ورحمة الله وبركاته
ألف ألف مبروك لدكتورة غادة اللي هي بجد اخت كبيرة لينا كلنا وكانت اقرب دكتورة لينا في قسم الباطنة كله
وأنا فاكرالها كذا موقف معايا كده :مرة لما طلعتني اعمل اوسكي في الراوند ومعرفتش اعملها صح وقالتلي انا زعلانة عشان انتى كنتى كويسة اوي ومينفعش منك كده وبصراحة الكلمة دي أثرت فيا وخلتني اهتم بالمذاكرة وبالعملي أكتر . كمان لما محمود اخويا تعب هي الي أنا لجأتلها ومحستش بأي إحراج وانا بتكلم معاها وبطلب منها اعمل ايه بالظبط وكنت فرحانة جدا لما هي اللي كتبتله الروشتة بنفسها
ربنا يسعدك يا دكتورة غادة ويفرحك دايما يارب ويرزقك الذرية الصالحة وتكوني دايما قريبة من الطلبة بتوعك اللي بجد بيحبوكي وفرحانين جدا لحضرتك
نهى اليماني

شق القمر said...

احساس غريب جدااا انك تسمع أغنية
My Heart Will Go On and On
ومعاها تقرا الخبر الجميل دا
بجد احساس البكاء من الفرحة احساس جمييل
الف مليوووووووون مبروك يا دكتورتنا
فعلا قلقت عليكى جداااا لانى لاحظت عدم تواجدك فى امتحانات الشفوى والعملى
بس قلقنا زال بقى بالخبر الحليوة دا
عقبال اخواتك البنات الاول طبعا قبل الاولاد :))

بجد انا فاكرة كويس اوى ولا انسى انى دخلت فى الاند راوند اوسكى لدكتورة غادة
فقالتلى هو انتى
طب تعالبلى
وطحنتنى كام سؤال اعملهم
واظنها كانت بتختبرنى انفع دكتورة ولا لا
مش بالامتحان بقدر ما كانت بتختبر جرأتى


اد ايه كنا مستنيين اليوم دا
بس كده احنا زعلانيين
لان حضرتك وافقتى يكون فى فترة امتحاناتنا

بس ولا يهمك
هنيجى ونسلم على حضرتك ونقبلك كالعادة أختنا الجميلة
بس السنة الجاية بقى
او لو لحقتينا بعد الاجازة واحنا بنمتحن الاطفال


يبارك الله لكما ويبارك عليكما ويجمع بينكما فى خير أبدا

وتجيبوا عفاريت صغننه ونجيبلهم حلويات كتييييييييييييييير

GEHAD said...

ألف ألف ألف مبروووووووووك

********************
بـــــارك اللـــــه لكمــــــا وبـــارك عليكمــا وجمع بينكمــا في خير

*************************
ربنـــــــا يتمملك بخير
**************
جزاكِ الله عنّـــــــا جميعا خيرا
وبارك الله فيك
*******
خالص دعواتي و تمنياتي لكِ بحياة سعيدة مديدة في طاعة الله وفي ظل من تحبين
********
ربنا يجعل حياتك مليئة بالحب
حقيقة سعيدة جدااا لأن الفرصة أتاحت لي أن أهني وأبارك
خالص تقديري وامتناني
نحبكِ في الله
جهـــــــاد

محمد مؤمن هيكل said...

مهما قلت مبروك شويه عليكي يا دكتور غاده
انا فرحان عشان حاجتين
اولا:عشان الدكتوره غاده دي الدكتوره بتاعتنا اقرب حد لينا في كل الاستاف
ثانيا :انا فرحان لعريس الدكتوره غاده لان بصراحه دا من حسن حظه ونصيبه انه يتجوز الدكتوره غاده انا مش هحسده بس هاغبطه

natural magic said...

بـــــارك اللـــــه لكمــــــا وبـــارك عليكمــا وجمع بينكمــا في خير

الف مبروك ويا رب يتمم بخير

سارة said...

السلام عليكم
ألف مليون مبروك ليكي يادكتورة غادة وربنا يتمم بخير .بجد أنا فرحانة جدا ومهما كتبت عنك مش هقدر أوفيكي حقك لكن أعتقد ان كلمة أخت تعبر عما نحسه تجاهك بكل ما تحمله الكلمة من معاني جميلة بجد انتي كنتي قريبة جدا مننا كلنا. فعلا كنتي أخت كبيرة لماكنا بنحتاج أي حاجة كنتي أول حد بنفكر فيه وعايزة أقولك انك مثل أعلى لي في تعاملك مع المرضى وطريقة ممارسة الطب وتعاملك معانا جميعا.أنا اتعلمت منك حاجات كثيرة بالرغم من أنك مكنتيش بتدخليلنا كثير في قاعة د/محمد هجرس ويمكن برده لاتتذكريتي .لكن والله انت حد جميل جدا بنحبه جداجدا ربنايكرمك و يوفقك . بارك الله لكما وبارك عليكما وجمع بينكما في خير ورزقكما الذرية الصالحة ان شاء الله ويارب دايما في خير وسعادة _اني أحبك في الله
أعتذر للاطالة
السلام عليكم ورحمة الله وبركاته

nehal said...

الف مبروك يا دكتورة غادة كلنا بنحبك ونتمنالك كل خير

نهي يوسف said...

السلام عليكم ورحمة الله وبركاته
الف مليار مبروك ليكي يا دكتورة غادة
بجد والله انا مش عارفة اقول ايه
لو قلت لحضرتك ان انا سعيدة
فالسعادة دي كلمة بسييييييييطة جدا
حضرتك والله اكتر من اختي
يمكن مش كان في مواقف كتير بتجمعني بحضرتك
بس فرحتي لما بقابلك كانت لا توصف
افتكر لما راوند الباطنة خلص
قابلت حضرتك مرة وقولتلك ان الحاجة اللي مزعلاني ان خلاص
دكتورة غادة مش بتدرسلنا
قولتيلي (يا بكاشة...بس انت شدي حيلك وعايزينك معانا في الباطنة


قد ايه حضرتك بتتمتعي بروح جميلة مع الطلبة والمرضي وكل الناس
ياريت كل الدكاترة يبقوا زي حضرتك


دعوة من قلبي في هذه الايام المباركة
يا رب يسعد ايامك وتبقي كلها خير وبركةو يرزقك بالذرية الصالحة
ااااااامين يا رب
نهي يوسف

Anonymous said...

alf mabrok le okhty w okhtena kollena dr ghada
ana bgd fakhora en 7adretek darresteny w fakhora bgd enny a3raf bane2adma bel gmal da
msh bs gmal el shakl lkn kman gmal el ro7 w el2akhla2
bgd 7adretek masaly el 2a3la w nefsy kol elnas tet3allem mn 7adretek el mo3amla eltayeba
rbna yekrmk ya rab w yekteblk ma feh elkher w ye7a2a2lek kol ma tetmanneh w te3eshy ayyamk kollaha fe sa3ada ya rab

barak allah lakoma w barak 3alaykoma w gama3 baynakoma 3ala khayr

{H}

Anonymous said...

السلام عليكم بجد انا زعلانه جدا اني تهنئتي لحضرتك جت متأخره لاني للاسف مكنتش اعرف بس علي العموم
الف الف الف مليووووووووووووووووووون مبروك لحضرتك يا دكتوره غاده يا احب الناس الي قلبي يا من احب ان اكون مثلك ولو نصفك في اي شئ لو حضرتك تعرفي انا بحبك قد ايه وكلنا بنحبك قد ايه لان بجد حضرتك انسانه جميله جدا جدا وتستاهل انها تتحب ربنا يتمملك بخير ويجعل ايامك وحياتك كلها فرحه وسعاده ان شاء الله

يوم زواج حضرتك ده ان شاء الله كان فرحه واحده دلوقتي بقي فرحتين كبار جدا عليه لان زواج اعز اصحابي واللي بعتبرها اختي هو يوم زواج اغلي الناس عندي في الكليه ومثلي الاعلي اللي يارب اكون زيها ان شاء الله مع بعض ربنا يسعدك ان شاء الله
انا هدعي لحضرتك دعوة ماما بتدعيهالي دايما
ربنا يحبب فيكي خلقه والحصي في ارضه
ويارب كلامنا ده يوصلك ان شاء الله وتهانينا ليكي بكل الخير والحب والف مبرووووووووووووك


Hadir Amer

Anonymous said...

ألف مبروك يا دكتورة غادة
انا مبسوطة جدا ليكى
بس انا زعلانة منك علشان مكنتيش بتدخلي لنا فى قاعة د محمد هجرس
ربنا يبارك لك ونشوفك على خير
و الباطنة


تبقى ذكرى كويسة يار ب ايناس

Anonymous said...

ألف مبروك يا دكتورة غادة
انا مبسوطة جدا ليكى
بس انا زعلانة منك علشان مكنتيش بتدخلي لنا فى قاعة د محمد هجرس
ربنا يبارك لك ونشوفك على خير
و الباطنة


تبقى ذكرى كويسة يار ب ايناس

Anonymous said...

الف مبروك لحضرتك يا دكتورة غادة ربنا يوفقك يارب ويسعدك ويرزقك الذرية الصالحة
بجد انا من الناس اللى بيحبوكى جداجداجدا ومن الناس اللى ابتسامتك فى وشهم هونت عليهم حاجات كتير قوى
بارك الله لكما وبارك عليكما وجمع بينكما فى خير

خير الناس أنفعهم للناس said...

بارك الله لكما وبارك عليكما وجمع بينكما في خير

ألف ألف مبروك وربنا يرزقكم الذرية الصالحه
.................................
تقبلي تهاني جميع الزملاء في سنة خامسه ، عنهم مدونة - الرأي- مدونة سنة خامسة

عمر said...

ألف ألف مبروك د غادة
وعقبال ما نشوف عيالك إن شاء الله بيطنططوا في قسم الباطنة - طبعا دكاترة - وربنا يبارك لحضرتك في زوجك ،ويجعله بيت سعيد دائما .. اللهم آمين

بارك الله لكما وبارك عليكما وجمع بينكما في خير

هبهوبه said...

السلام عليكم
الف مليون مبروك ليكي يا دكتورة غادة
ربنا يوفقك في حياتك الجديدة
ويرزقك الذرية الصالحة
ويارب يبقى في الدنيا ناس كتير زيك يعرفوا ازاي يعلموا اللي حوليهم
وازاي يبنوا حياتهم بنفسهم من غير مايعتمدوا على حد
انا هدعيلك تبقي احلى عروسة يوم فرحك وقلبك يبقى اسعد قلب في الدنيا الفرحة ملياه طول العمر
مبروك

Anonymous said...

احلي زغروتة
لاحلي عروسة
لولولولولولولولولييييييييييي

حلوة من برة
وحلوة من جوة

ربنا يتمم بخير
يا ارق قلب
و اجمل روح

Dr. Flavio said...

ها قد أتى يوم السعاده .. فلتهنئي يـا خيـر غـاده
ولتعلمي أنَّا نحبك دائما .. يا أجمل النسمات يا سكر زياده

********************************

مبارك زواجك وبإذن الله يتم عليك وعلى زوجك كل الفرح والهناء

اللهم بارك لكما وبارك عليكما واجمع بينكما في خير

لا تنسِنا من دعائك في الأيام القادمه نظرا ً لإستمرار القصف العشوائي لمادتي الباطنه والأطفال

كل التحية والحب


محمود فرج أحمد

ترررررب said...

سلام عليكم
الف مبروك يا دكتوره غاده
انا فرحت جدا لحضرتك وحاسه بفرحه زمايلى ليكى
حضرتك بجد انسانه محترمه وعلى خلق ودمك خفيف وووو وحاجات كتير اوى
ربنا يفتح عليكى وعلى عريسك ويفتح مبينكم
ويرزقكم الذريه الصالحه يارب
بجد
اتشرفت بمعرفتك
دينا

little angel said...

الف مبروووووووك د غادة .. انا واحدة من البنات اللى علمتيهم واتمنوا يبقوا زيك .. ما شاء الله على حضرتك خلقا وعلما .. بالرفاء والبنين وتمنياتى بحياة سعيدة ان شاء الله

محمد عبد الباسط said...

الف مبروك يا دكتورة غادة
بارك الله لكما وبارك عليكما وجمع بينكما في خير
طبعا بعد كل كلام زمايلى وزملاتى مش هقدر اقول الا انك فعلا دكتورة بجد بكل ما تعنيه الكلمة وربنا يبارك فيكى ويكتر من امثالك
شكرا لمن اتاح لنا الفرصة

باجوجو said...

الدكتورة غادة دى أختنا كلنا
وكلنا اتعلمنا منها صح
لسه طعم الفراولة اللى أخدتها منها ف الروند
فى بقى
ألف ألف مبروك ليكى يا دكتورة
وربنا يديكى ويكرمك ومهما قلت مش هوفى جزء من حقها عليا
صحيح عقبالك يا حودة

Anonymous said...

elrousha
السلام عليكم ورحمة الله وبركاته
انا حبيت اكون واحده من اللي بيباركوا لكي يا دكتورة غاده ربنا يوفقك و يهنيكي ان شاء الله
الف مبرووووووووووووووووك

ايناس said...

الف الف مبروك لدكتورتنا الجميله الدكتوره غاده بجد انا فرحانه اوووووووووي ليكي انتي مش دكتورتنا بس انتي اختنا الكبيره
والله بجد يمكن حضرتك مدخلتلناش كتير في قاعه د/محمد هجرس بس انا بحب حضرتك جدابجد كل حاجه فيكي حلوه شخصيتك معاملتك معانا ومع المرضي شدتك وضحكك
حضرتك حد جميل اوووي صعب يتكرر تاني و انا مبسوطه اني قابلته واتعلمت منه وبجد الخبر ده فعلا احلي خبر سمعته في الفتره المأساويه الاخيره
اسفه للاطاله وشكرا ليك يادكتور محمود
بارك الله لكما وبارك عليكما وجمع بينكما في خير

عندما تنهمر الدموع said...

السلام عليكم ورحمة الله وبركاته
ألف ألف مبروك يا دكتورة غادة وربنا يتم لك على خير ويسعدك ويوفقك .
أنا يمكن معرفش حضرتك بس فعلا نفسي اتعرف عليكي لأن من كتر ما سمعت عن حضرتك حسيت انك هتكوني المثل الاعلى ليا في طريقة تعاملك مع المرضى وفي مبدأك بأن الاعتماد على النفس هو افضل طرق النجاح.ربنا يكرمك ويعينك دايما على مساعدة الناس ويرزقك بالذرية الصالحة .آمين

أحمد عبد الناصر فليفل said...

ألف مليون مليون مليون مبروك ليكي د غادة
بارك الله لكما وبارك عليكما وجمع بينكما علي خير
أنا سعيد جدا وفرحان بالخبر الحلو ده
وكان نفسي انا وكل زمايلي نحضر ونبارك بنفسنا بس نعمل ايه وسط القصف المسلح من الامتحانات
ومنتظرين البونبوني اللي حضرتك كنتي بتوزعيه علينا في الروند وبتمزجي جو العلم بجو جميل من المرح
ربنا يسعد حضرتك ويرزقك الذرية الصالحة
واوصيكي بطاعة الزوج فهو جنتك ونارك وان شاء الله يكون جنتك دائما وابدا

Anonymous said...

الف مبروك يااجمل دكاترة الباطنة حقيقى انا مبسوطة لانى واصحابى اول من قابل حضرتك فى المحلة وحضرتك راحة تشترى الفستان اكيد حضرتك كنتى منورة المحلة ويارب نكون متوهناش حضرتك بس اكتر حد بباركله هو خطيب حضرتك اللى اكيد عرف يختار الف مبروك مرة تانية بارك الله لكما وبارك عليكما وجمع بينكما فى خير سارة_المحلة

lamia said...

الف الف مبروك يا اطيب اخت ربنا يوفقك ويجزيك خير عن اللى عملتيه معانا كلنا ويرزقك بالزريه الصالحه اللهم امين

Anonymous said...

الف مبروك ليك يا د غاده
بجد فرحت جدا لما عرفت
كنت ديما ببص لحضرتك انك حاجه كبيره اوي نفسي ابقي زيها في العلم والاخلاق والجمع بينهم وطريقه المعامله مع المرضي والدكاتره والطلبه كنت باجي احضر مع حضرتك في اي قاعه اول ماعرف انك هتدخليها واسيب قاعتي علي فكره انا كنت بدعيلك ربنا يرزقك بالزوج الصالح مع اني عمري ما كلمتك بشكل شخصي كنت بس بشوفك من بعيد
بارك الله لكما وبارك عليكما وجمه بينكما في خير
واحب افرح حضرتك وابشرك ان الرسول عليه الصلاه والسلاه قال (اقربكم مني مجلسا يوزم القيامه احاسنكم اخلاقا)ربنا يزيدك ومتتغيريش بالزمن

R.H.A said...

ألف ألف ألف مبروك لأحلى وأغلى دكتورة ربنا يسعدك ويوفقك ويباركلك في حياتك الجديدة يارب دايما نعرف عنك أخبار حلوةكتييييييييييييير ونفرح كدة من قلبنا بجد بجد بنحبك قوي وبجد بجد بجد يابخته اللي القمر دة هاينور بيته
R.H.A

Anonymous said...

الف الف الف مليوووووووووووووووووون مبروك يادكتوره غاده

بجد انا بعذك جدااااااا وبحترمك اكتر واكتر

انتي بجد من الناس اللي عمري ماهنساهم في حياتي لانك علمتيني كتير

ودايما كنت تحبيني اكون احسن واحسن

وقت ازماتي كنت بلاقيكي من غير اي كلمه كنتي بتحسي بيه وتاخديني خارج الروند وماكنتيش بتسبيني الا وانا بضحك

عمري ماحسيت معاكي انك دكتوره والمفروض اتعامل معاكي باسلوب معين بالعكس

انتي كنتي بحق ومازلتي اكتر من اخت ليه اخت بعتز بجد باخوتها وحبها الكبير ليه ولغيري

وقت فرحي كنتي معايا ووقت زعلي بردو كنتي معايا

عارفه اني اثرت في حقك كتير الفتره الاخيره وكان واجب عليه احضر فرحك واكون اول المهنئين ليكي

بس والله غصب عني وظروفي ربنا مايكتبها على حد وخصوصا الوقت الصعب ده في امتحاناتنا

عارفه انك هتقدريني لانك عارفه اد ايه معذتك عندي واد ايه انا بحبك

ربنا يبارك ياااااااااااااااااااااااارب دايما ويوفقك دنيا واخره ويرزقك بالذريه الصالحه اللي بيها تدخلك الجنه

بجد فرحتلك كتيررررررررررررر بس فعلا اللي مابيدخلش على النت اليومين دول كانه غايب عن الدنيا ومافيها ومايعرفش الاخبار الحلوه دي

نفسي اشوفك عشان التهنئه دي اكيد ماتنفعش

اشوفك بالف خير قريب باذن الله

وحشااااااااااااااااااااااااني

اختك الصغيره

سالي ابو الاسعاد

أحمد محمد عامر said...

بسم الله الرحمن الرحيم
السلام عليكم ورحمة الله وبركاته
بصراحة والله أنا مش عارف أبدأ كلامي بإيه !! هل أبدأه بإن أنا أهني ؟ ولا أبدأه بإن أنا أعبر عن الفرحة الغامرة اللي أنا حاسس بيها وأنا باكتب الكلام ده ؟
بصراحة والله وبدون مبالغة أنا مش قادر أوصف فرحتي لأن بصراحة دكتورة غادة تستاهل أكتر من الكلام بكتير وبيتهيألي الواحد لما دخل الكلية شاف دكاترة كتير اوي لكن صعب إن الواحد يقابل حد يأثر فيه زي دكتورة غادة بكل ماتتمتع بيه من أخلاق وطيبة واحترام و تقدير للانسان اللي بتكلمه سواء كان مريض أو طالب أو زميل بصراحة عملة نادرة صعب أوي ان الواحد يلاقيها اليومين دول
وأعتقد ان ده مش رأيي لوحدي يمكن ده لسان حال أي حد يعرف الدكتورة غادة أواتعامل معها أو حتى سمع عنها وده اللي شفته في وجوه كل اللي في الفرح
ألف مليون مبروك يادكتورة غادة وبارك الله لكما وبارك عليكما وجمع بينكما في خير
أحمد محمد عامر