أنا كمان قتلت عم المرسي

Tuesday, June 2, 2009

السلام عليكم ورحمة الله
مش لاقي كلام اقوله قبل الحكاية اللي هحكيهالكم دي غير إني أعتذرلكم
لو كنت هكئبكوا معايا بس على شهر فات حاولت كتيييييير
إني ما أكتبشي في الموضوع ده بس ماقدرتش لإن شبح اللي حصل دايماً
بيطاردني حتى و انا بحاول أضحك وأهزر عشان انسي الموضوع ده
وقلت يمكن لو جيت وحكيت أرتاح شوية من الإحساس ده
وعلى اد ما الموضوع ممكن يكون وطويل بس أتمنى كل الناس تكمله للآخر
وأتمنى يقراه كل حد في طب

القصة بدأت من زمان لما والدي الله يرحمه علمني انه لما يبقى فيه حد في ازمة
مجرد وجودنا جنبه بيبقى شئ كبير بالنسباله حتى لو مش قادرين نعمله حاجة
خصوصا لما يبقى الإنسان ده مريض وحاسس إن الدنيا مقفولة في وشه وإنه
ماعادشي ليه لازمة بعد ماصحته راحت منه وماعادشي حد محتاجه ولما والدي تعب
حسيت بقيمة الكلام ده وحسيت أد إيه والدي كان عنده حق وحسيت بقيمة إن حد جنبك
يسألك مش محتاج حاجة؟؟ حتى وانت عارف إنه مش هيقدر يعمللك حاجة..ولما دخلت
طب حاولت اعمل كده مع أي مريض اعرفه... جارنا أو من بلدنا أو جمعتنا الصدفة
بأي شكل،خصوصا لما لاقيت اخواتنا الكبار في الطب من بلدنا زي الدكتور هاني
والدكتور أحمد حسب الله بيعلموا كده وكمان في الوقت ده قابلت الدكتورة غادة وهي
كمان كانت بتعمل كده وأكتر من كده...ولما ابتديت اقول شعر في مؤتمرات و أعرف
دكاترة حاولت على أد ما قدرت أسخر ده في خدمة الناس اللي اعرفها دي واكون واسطة
مابين ناس معاها العلاج وناس محتاجاه وكان ربنا معايا دايما وكان بيوقفلي ناس
احسن مني هما كمان نفسهم يعملوا حاجة بس مش لاقيين الفرصة
الللي حصل المرادي إني من شهرين كنت رايح أركب أتوبيس بلدنا و عم ناجي سواق
الأتوبيس قاللي اللي قاعد في تاني كرسي ده عمك المرسي ورايح يعمل عملية في القلب
خلى بالك منه...رحت اتعرفت على عم المرسي وكانت معاه مراته
ناس من الناس الطيبة جدا اللي لسه على فطرتها...وعرفت إن عنده
ضيق شديد في الصمام الأروطي ومحتاج تغيير صمام في اسرع وقت،ولما نزلنا
رحت وصلتهم لمستشفي مبارك مطرح ماهيعملوا العملية وقلت وانا راجع هبقى أبص
عليهم تاني وانا راجع قالولي انهم خلصوا قرار العلاج وهسيتنوه يتمضي من مصر
وكنت ببص عليهم كل يوم وانا مروح لحد ما القرار طلع بعد حوالي عشر أيام
,, وخدت عم المرسي للدكتور
وطلب منه أشعة عشان يعملوا لعملية على أساسها وخدنا في موضوع الأشعة ده أسبوع كمان
كل يوم يروحوا يعملوا اشعة شكل... وفات أسبوع عشر أيام أسبوعين وعم المرسي

ماخدشي ميعاد بالعملية وانا زيي زي عم المرسي مستني الدكتور
يحن علينا بميعاد العملية وخصوصا إن حالة عم المرسي يوم عن يوم بتسوء جدا

وبعد أسبوعين رحنا سألنا وسمعت ردغريب جدا...
مافيش صمامات في الجامعة...يعني ايه مافيش صمامات...الصمامات اللي مقاس
عمك المرسي خلصت ولسه مستيين الجديدة تيجي
وخصوصا ان مافيش فلوس....بس يومين ولا حاجة
والصمامات هتيجي ماتستعجلوش ورجعت لعم المرسي
وقعدت أصبر فيه وكل يوم أروح اقول نفس الكلمتين
معلهشي يا عم المرسي إستحمل شوية ما أددمناش حل تاني إن شاء الله
الصمامات قربت تيجي مع اني حاسس من جوايا انها مش هتيجي...
فات كمان عشر أيام والصمامات ماجاتشي...وكان عم المرسي
بقى مش قادر ياخد نفسه ولا قادر يدوس على الأرض
وفي اليوم العاشر مسكني عم المرسي زعقللي وكان من حقه
وكنت مقدر خنقته وانفعاله عليا وحااطط وشي في ألأرض أدامه
وهو بيقوللي ياتشوفلي حل يا تخرجني من هنا.. انا عايز أورح
تعرفوا الحاجة الوحيدة اللي ماخليشتي عم المرسي يروح ايه
خاف لو روح وجه يشد العجلة الصغيرة اللي عنده
تشده هي و توقعه والناس تضحك عليه....
روحت من عند عم المرسي
وفي الوقت ده الموضوع بقى تحدي بيني وبين نفسي
ان عم المرسي لازم يعمل العملية
ولو ماعملهاش هنزل من نظر نفسي كتير أوي
و يبقى كان لازمته وأنا الدكاترة واخدني كل يوم أقوللهم شعر في مؤتمرشكل
وابتديت أكلم ناس ممكن يدخلوه معهد ناصر ان شاء الله
وبعتلهم الورق ورحت بشرت عم المرسي .. بس الورق اترفض
لأنه قرار العلاج مكتوب فيه تغيير صمام الأورطي بمستشفى مبارك الجامعي
و حاولت وكلمت ناس هنا وهناك بس ماكانشي فيه فايدة
ورجعت لعم المرسي وانا باصص في الأرض
وقلتله اننا غصب عننا هنستني الصمامات ...ولما فات يومين تلاتة
وماجاتشي الصمامات ...رحت للدكتورة فتحية رئيسة قسم القلب

وهي بتحبني جدا وحكيتلها على اللي حصل قالتلي ان الموضوع
مش بإيدها لإنها مسئولة عن العلاج انما جراحة القلب قسم لوحده
بس قالتلي ممكن تروح تغير القرار وتخليه مفتوح
وتكتب ان مافيش صمامات في طنطا و ساعتها ممكن يدخل
أي حتة وفرحت جدا ورحت بشرت عم المرسي وأهله
بس لما رحت أغيره... الدكتور قاللي ان ساعتها عم المرسي هيخرج
من اللسته هنا ومش هتعرف تحطه في اللسته هناك غير بعد شهر على الأقل
وان الصمامات كلها كام يوم وتيجي ورجعت لعم المرسي وانا وشي في الأرض
وقتلته هنستني الصمامات معلشهي غصب عني يا عم المرسي
وماجاتشي الصمامات ولما زهقت ولما صورتي أدام نفسي
ومعاني كتير جوايا ابتدت تتهز طلعت للدكاترة فوق وانا متعصب جدا
وقلتلهم هو بكام الصمام اللي احنا مستيينه ده...قالولي بخمس تلاف جنيه
ياااااااااااااااااااااااااااااااااه.....كل ده عشان خمس تلاف جنيه....
عيان بيموت في كل لحظة عشان خمس تلاف جنيه... وبمنتهى الحماس

قتلتهم يكتبولي اجيبه منين وانا هجيبه بأي طريقة
وكتبولي رقم الشركة وعنوانها في مصر ونزلت لعم المرسي و بشرته
رغم انه كان فقد الامل في كل حاجة ولاقيت معاهم نص المبلغ
وماكنتش عارف هعمل ايه في النص التاني بس لازم الصمام ييجي...
وكلمت مدير الشركة قاللي طب وليه تكلف نفسك وتكلف العيان
أنا كل اللي عايزه ورقة من القسم عندكوا تطلب تغيير
المقاسات اللي عندكوا ومش محتاجينها بالمقاسات دي وانا قلتلهم
عندكوا في طنطا بس ماحدش بعت حاجة.
ورقة؟؟....كل العيانين اللي عايزين صمامات وبيموتوا ..بيموتوا عشان ورقة؟؟
لييييييييييييييييييييه؟؟..احنا بقينا فين... وايه اللي حصل لضماير الناس ..
كل ده عشان ورقة؟؟؟
ورحت للدكاترة وقلتلهم انتو مابعتوش ليه ؟؟؟؟
قالوا احنا بعتنا والتوريدات بعتت فاكس ومش مشكلتناإنه ماوصلشي
و اتحايلت عليهم يدوني الورقة في إيدي و أنا هروح بيها القاهرة بس رفضوا
أصل كل حاجة لازم تمشي قانوني
ولما لاقيتهم بيشقطوني لبعض حلفت لأروح بعد امتحان التخدير
واجيب الصمام بأي شكل بورقة بفلوس بأي حاجة بس لازم ييجي.
بس الساعة حداشر وربع يوم الامتحان اتصل بي ابن عم المرسي
وقاللي إنهم روحوا لإن الدكتور لما شاف آخر سونار على القلب
قاللهم إن خلاص العملية ماعادتشي تنفع لإن كل الصمامات باظت
وضغط شريان الرئه دلوقت بقي مستحيل يسمح بالتدخل الجراحي
وروح عم المرسي...ابنه شاله على كتفه وروحه...
روحوه وقعدوا جنبه مستيينه يموت..أصعب شعور ممكن
تحسه في الدنيا إنك تقعد جنب اعز الناس عندك..مستنيه يموت
عم المرسي روح لإن الفلوس اللي فاضلة معاه يادوبك هتقضي خارجته
يوم امتحان المسالك...عم ناجي قاللي ان عم المرسي مات امبارح واندفن
و كان راكب معانا ابن عم عم المرسي...قاللي هو انت بقي الدكتور محمود
قلتله آه وسألته ليه...قاللي لإن الكلمة اللي عمك المرسي فضل يقولها
وكانت آخر كلمة قالها قبل ما يموت.....أنا عايز أشوف الدكتور محمود
وياريته ما كان حكالي لإن الكلمة مش عايزة تسيب وداني
حتى و انا بحاول أضحك وأهزر و أروح و آجي
بس بالليل لما آجي انام الكلمة ترن في وداني
وصورة عم المرسي مش بتروح من بالي
أنا مؤمن بقضاء ربنا وعارف ان عم المرسي كده كده كان هيموت
بالقلب او من غيره....بس انا حاسس ان عم المرسي مات مقتول...
لما حد يبقى بيموت أدامك وفي إيدك الدوا
وماتديهوش الدوا يبقى انت كده قتلته
تعرفوا ..ساعات بحس عن عم المرسي كان عايز يشوفني عشان يسلم عليا
وساعات بحس إنه كان عايز يتف في وشي
أنا حاسس إني كنت واحد من اللي قتلوا عم المرسي
قتلته لإني رضيت واستسلمت زيي زي أي حد
وفضلت مستني الصمام وانا عارف إنه مش هييجي
كنت دايما بختار الحل السهل و أرجع واقوله نستني يا عم المرسي
قتلته لإني كنت بديله الأمل و بمنتهى الإستسلام آخده مني تاني
قتلته لإني حاسس أني كنت بخدره وبديله مسكنات لحد ما يموت
قتلته يوم ما سكت على حقه وقلت ما باليد حيلة نستني
ولو كان الصمام جه من يومها ولو بالفلوس
كان عم المرسي هيموت برضو في الوقت اللي ربنا كاتبه
بس كان هيقدر ياخد نفسه ويقدر يدوس على الأرض ويقدر يروح البلد
ويسحب عجلته الصغيرة من غير ما يخاف .إنها تشده وتوقعه والناس تضحك عليه
قتلت عم المرسي لإني من سنتين اتعرفت على دكتور قلب من
اكبر دكاترة القلب في القصر العيني واداني رقم موبايله وايميله
و آخر مرة كان مجدي يعقوب في مصر شفته في الفريق اللي معاه
ولما جت حالة عم المرسي قلت يااااه معقول دكتور زي ده يفتكرني
وكإني كنت بدور على حجة عشان ما احرجشي نفسي
و في آخر محاولاتي اليائسة بعتله ولما وصلتني رسالة منه
قاللي فيها انا في مصر دلوقتي.هاتلي الحالة وانا هعملها اللازم
بس للأسف...كان عم المرسي مات
احساس فظيع بالذنب
انا عارف إني قاسي على نفسي اوي بس أنا للأسف من الناس
اللي بتقضي نص حياتها تلوم نفسها على اللي عملته في نص حياتها التاني
بس لما عيان يموت عشان ورقة يبقي فيه حاجة غلط
لما عيان يموت عشان صمام بخمس تلاف جنيه يبقى فيه حاجة غلط
لما كلبة زي هيفاء وهبي تعلمها فرحها بملايين وتعمل فيلم تاخد عليه ملايين
والعيانين دول بيموتوا عشان مامعهمش حق الدوا يبقى فيه حاجة غلط
لما يندفع لتامر حسني ومحمد منير وايهاب توفيق ملايين عشان ييجوا يغنوا
في جامعات زي المنصورة وعين شمس يبقى فيه حاجة غلط
لما لاعيبة الكورة يندفعلها ملاييين والناس دي بتموت عشان ممعهاش حق الدوا
يبقى فيه حاجة غلط
يبقى احنا مش مجتمع مسلم ولا احنا حتى مسلمين..الإسلام عمره ما كان كده
لما الناس تموت أدامنا واحنا مش قادرين نعمللهم حاجة يبقى
فيه حاجة غلط ويبقى كل الطب اللي بندرسه مالوش لازمة
لما نشوف كل ده ونسكت يبقى فيه حاجة غلط
أنا حاسس ان كل واحد في البلد دي من أول رئيسها لحد أصغر واحد فيها
هنتحاسب على عم المرسي و آلاف زي عم المرسي
حاسس ان كل بيت في بلدنا بقى عبارة عن غزة صغيرة
..ناس محاصرها الفقر والمرض وبيصرخوا ماحدش بيسمعهم
والناس اللي المفروض انهم اخواتهم بيتفرجوا عليهم ومابيعملوش حاجة
حاسس إننا شوية خرفان جابوا عليهم شوية ديابة يحرسوهم
وطبعا الديابة بتاكل أكلهم بحجة ان هما بيحرسوهم
بس الخرفان ساكتة ...لإنها خرفان
ومش بس كده دا لما الديابة بتجوع زيادة بتدبح واحد مننا وتاكله
لما بشوف الملايين اللي بتتصرف على تحسين شكل المستشفيات
والناس الللي جواها بتموت بحس ان احنا زي واحد زرع شوية ورد
وكل يوم يجيبوله شوية مية على أدهم بس هو يقوم
راششهم أدام الشارع عشان الناس تشوف الشارع كويس
مع إنه شايف الورد بيدبل أدامه بس المهم الشارع يبقى شكله كويس
على أد ما موت عم المرسي علم فيا بس علمني حاجت كتير
وخوفني من حاجات اكتر..خوفني على نفسي وعليكوا من الدايرة المفرغة دي
خايف ان الدايرة دي هي اللي تغير طموحنا إننا نكون دكاترة بجد
ومانقدرشي احنا نغيرها ونخليها زي ما احنا عايزين
موت عم المرسي علمني إننا لازم نجتهد على اد ما نقدر عشان
نوصل لمكان نقدر نخدم منه الناس اللي زي عم المرسي
مكان نقد منه نغير من غير مانتغير
عم المرسي علمني إنه مادام رضينا نبقى دكاترة يبقى لازم نبقى أد المسئولية دي
لإننا هنتحاسب عليها.................. أدام ربنا
عم المرسي علمني اني لما أبقى دكتور ويجيلي حد زي عم المرسي مرضه ليه علاج
يبقى لازم ياخده
لإنه لو فيه علاج وماخدهوش يبقى انا مقصر وهتحاسب على تقصيري
ولو فيه علاج وانا ماعرفهوش يبقى هتحاسب على تقصيري برضو
لإني كان المفروض أتعلم واكون اد المهنة اللي ربنا اختارها ليا
احنا اختارنا مهنة مافيهاش وسط
يا إما في ميزان حسناتنا يا إما في ميزان سيئاتنا
يإما المريض هيدعيلنا يا إما هيدعي علينا
بفضل الله المدونة بيتابعها ناس من دفعتنا ومن دفعات أكبر و اصغر مننا
يعني بعد خمستاشر عشرين سنه هنبقى احنا المسؤلين عن المستشفيات دي
ياتري هنقدر نعمل حاجة ولا الدايرة هتاخدنا
احنا مش تجار ومش جزارين
بس انا دايما مؤمن ان اللي عايز يغير بيغير
الفرق مابين قسم الاطفال وقسم الباطنه عندنا مش امكانيات ولا فلوس
الفرق في نية التغيير مش اكتر
وماكنشي قصدي أبدا اني أقول ان الصورة وحشة اوي كده
انا قابلت دكاترة تانية اد المسئولية زي الدكتور احمد لطفي
والدكتور أشرف الدسوقي والدكتور عادل حجاج
كفاية أقولكم ان حد بحجم وقيمة الدكتور أسامة عبد رب الرسول
استقبلني انا والحالة في مكتبه ولحد دلوقتي هو بيعمل كل حاجة للحالة شخصيا
من غير ماحد يطلب منه كده
الفرق في نية التغيير ونية العمل لوجه الله أولا وأخيرا
أتمنى النية دي تكون موجودة جوة كل حد مننا
على الأقل عشان ماحدش فينا يعيش طول عمره
وهو حاسس انه ظلم ناس مالهاش أي ذنب زي عم المرسي

33 comments:

شباك موارب said...

اول تعليق محجووووز

شباك موارب said...

وتاني تعليق كماااااااااان

شباك موارب said...

حكايه عم مرسي يامحمودمنها كتير اوي
واللي زي عم مرسي الزمن وقله الحيله هو اللي عمل فيه كدا...
طبعا العمر واحد بس مفروض من ابسط حقوق البني ادم انه يعيش لاخر لحظه في عمره حاسس انه بني ادم....

ماتزعلشي نفسك اوي
انت بجد عملت اللي عليك...
ولو كان بايديك حاجه تعملها كنت عملتها ......

بس الموضوع كبير وانا ولا انت قده..

التغييير لازم يبقى من فوق..
ربنا يرحمه ان شاء الله ويسكنه فسيح جناته..

فجر اخر said...

السلام عليكم ورحمه الله
متاخره كعادتي اني اقولك الف مبروك علي التدوينه 100 بس كالعاده برضه قلبك كبير يادكتور
وطبعا فاتتني فرصه اني اسالك حبه اسئله بس متعوضه في بوست صراحه تاني ان شاء الله

البقاء لله في موت عم المرسي زي مانت قلت هو مات لانه ده اجله بس هي المشكله في مين كن السبب انه هو يموت
دايما الدكاتره بيقولولنا ان احنا واجبنا نخلي العيان حتي لو عارفين انه هيموت انهdie in peace not die in pieces
هو مات عشان كل واحد في البلد دي مش بيراعي ضميره في شغله ومش بيحط نفسه مكان اللي قدامه اكيد كل واحد كان مسئول عن موضوع الصمامات ده لو مكان عم مرسي مكانش يتمني انه يعيش اخر ايامه ويموت وهو مش قادر يتحرك ولا ياخد نفسه
متحملش نفسك اكتر من طاقتك يادكتور محمود ده قدره وانت اكيد مش مسئول عن موته انت حاولت علي قد ماقدرت وانت اصلا مكنتش مطالب انك تحاول لان دي مش مسؤليتك انت قابلته صدفه وكان ممكن متقابلوش اصلا المشكله في اللي ده كان واجبه وللاسف مقامش بيه هو اكيد مكانش عايز يشوفك قبل مايموت عشان يلومك اكيد هو مات وهو بيدعيلك لانه نادرا مالواحد بيلاقي حد يقف جنبه من غير مقابل زي حضرتك
ربنا يكرمك و يكتر من امثالك ويقدرك علي مساعده الناس والتخفيف عنهم
ويقدرنا علي اننا نحاول نغير في اللي احنا فيه ده ويغفرلنا تقصيرنا
اسفه للاطاله وجزاك الله كل خير

عصفور الشتا said...

هون على نفسك يا محمود
وانت كنت هتعمل ايه أكتر من اللي عملته؟؟؟؟
والله يا محمود مش عايز يبقى في أول تعليق لي على المدونة مجاملة ليك
بس بجد بقول من وراك انه شئ جميل يكون في حياة أي حد ولو من بعيد شخصية بحجم وتأثير وطيبة قلب محمود أبوالعزم

المشكلة مش مشكلتك لوحدك
دي مشكلتنا كلنا
ربنا يعينا ونقدر نغير نفسنا عشان ربنا يساعدنا
أخوك
M

د.ميريهان said...

السلام عليكم...

هون على نفسك يادكتور...
انت عملت اللي عليك..وزيادة..وربنا شاهد انك حاولت بقدر استطاعتك... بس القضية هي وجود عوائق كانت اكبر منك...والقضية زي ماقلت انه البني آدم فقد آدميته هنا..فقد قيمته..والقضية انه الفلوس بقت هي كل حاجة..بقت اهم من الانسان..والقضية ان ارواح الناس بقت اد ايه رخيصة ومش مهمة عند الكتير..امور كلها مش مش تحت سيطرتنا...لانه في حكم بيحكمها...بس كمان احنا لازم نغير في نفسنا...لأن(ان الله لايغير مابقوم حتى يغيروا مابأنفسهم)..اللي حصل في غزة كان بسبب ذنوبنا..واللي بيحصل هنا مع الفرق الشاسع في الاحداث كمان بسبب ذنوبنا...(ربنا سلط علينا من لايخافه ولا يرحمنا)..بسبب اعمالنا...اكيد لو غيرنا نيتنا زي محكيت حاجات كتير هتتغير...لو كل واحد غير نيته من دلوقتي وعرف انه مسؤول عن الناس اللي ربنا هيحطهم في ايده والارواح اللي هيوكل لها..كل حاجة بالتأكيد هتتغير..لانه الناس اللي بلا ضمير مش دايمة..ولو طلع جيل جديد بضمير يقظ..هتفرق كتير..
بس تعرف انا عايزة اقلك على شعوري لما قرأت قصة عم مرسي..بجد اد كده بقت حياة انسان تساوي خمسة الاف جنيه...تعرف اد ايه قلبي بيتحرق لما بشوف الفرق بين شأن موتانا في غزة او شهداؤنا..وشأن الأسير الاسرائيلي حي او ميت..شفت اسرائيل عملت ايه مع جثمان الاسير الاسراائيلي (شاليط)..بدلته بأسرى احياء..ميت واحد امام عدد من الأحياء...ولكنهم عرب...ده الفرق...فمتى يتحول الشلوط العربي الى شاليط؟؟؟؟

ربنا يعيينا..
وشعورك يادكتور بقدر انه على شأن كبير من تحمل المسؤولية والشهامة والوفاء للمهنة..بقدر انه مش لازم تشد على نفسك...انت تعلمت من اللي حصل حاجات وعلمتنا حاجات...وحاولت وفضلت قدام نفسك الشخص اللي حاول ...وبداية النجاح دائما محاولات..وانشاءالله ناجح في حياتك المستقبلية..

جزيت خيرا..وصبرك الله

شق القمر said...

فى الغالب يا محمود ناس كتير هتدخل تاخد بايدك
وتقولك معلش انت عملت اللى عليك
مش عليك ذنب
انت حاولت ومقدرتش
والمفروض انى كمان اكون منهم
لكن لأول مرة مش هقول كده
أنا آسفة .. بس انت كنت أنانى يا محمود
عارف ليه ؟؟؟
لأنك قدرت الناس الكبار والدكاترة ومقدرتش دفعتك
محاولتش تقولنا يا جماعة عايزين نتصرف ونساعد.. واكتفيت بدا على نفسك وبس
لها حق نفسك تلومك أو انت تلومها
بس حتى انت بتلومها ملامة غلط
دكتور جمال موسى وغيره قالها عن دفعتنا .. انها دفعة نادلة ... بس برغم كده يا محمود الا انهم وقت المساعدة مبيتأخروش.. نفسهم يبنوا جواهم حاجة كويسة من دلوقتى .. لكن للأسف مفكرتش حتى تتكلم معاهم
افتكر كويس كتير جدا مجموعة الشعرا واصحابك يبقوا واقفين ونلمحك او تيجى تسلم وتمشى نقول ماله محمود حزين ليه .. مالك يامحمود ؟؟ ... تبتسم وتمشى ... حتى مفكرتش تحكى يا أخى عن الراجل دا ولا عن غيره
-----------------------

واحدة ست انتشر فيديو ليها من برنامج واحد من الناس عن فقرها ورضاها
فكانت بتقول بيجيلها ستين جنيه فى الشهر

واحد من الشباب الصغير عمل كومينت كان أحلى وأحسن رد

قال " والله مانا رايح السينما تانى " ... فاهم دا معناه ايه ؟؟؟

معناه ان وقت الأزمة كل واحد بيقدر يساعد بحل وموقف واحد ممكن يغير من رؤيته للحياة والاستفادة من امكانياته صح

فعلا يا محمود
دفعتنا أسوأ دفعة

حتى الناس الطيبين فيها واللى عايزين الخير.. بيحتفظوا بقدراتهم لنفسهم ومبيحاولوش يسألوا الاخرين يد العون


ومن الآخر ... دا كان درس لك .. ولغيرك
تبنى منه مبادىء المستقبل ... لكن متنساش تدور على الأسباب اللى كانت من الحاضر



عملت تحدى مع نفسك تساعد المريض
وقلت ازاى اسمح لنفسى الدكتور يبعتلى وألبيه ولما أستدعيه لمريض ميلبنيش


مرة تانية يا محمود
فكر كويس
لو فى حد كده ادامك انت او غيرك
احنا اخوات ياولاد ويابنات
احنا الشباب نقدر نساعد
متستقلوش ازاى هنساعد
ولو نقف على ابواب المجمع ونجمع من الناس محدش هيقول لا فى عمل الخير
ونقدر نعمل بطاقتنا وبنوايانا كتيييير مما لا يتخيله الآخرين أن نقوم به أو نقدر عليه

ربنا يجمعنا على الخير خير زملاء وخير اخوات وخير الناس للناس
وخير من يتقبل عتاب الآخرين وتوجيههم لينا

وردة said...

لا حول ولا قوة الا بالله
اولا البقاء لله لله م ا خذ ولله ما اعطي
متحملش نفسك يابني باللي اكتر من طاقاتك
انت عملت كتيير صدقني
في شباب كتيير بتشوف الغلط بعينها ومتحولش تغير
انت بذرة دكتور ناجح وطيب القلب ربنا يوفقك
بس لو انت قضيت نص عمرك تلوم نفسك علي النص التاني مش حتساعد حد
واللي زي عم مرسي كتييييير اوووي ونفسهم في دكتور زيك
ساعد عم مرسي اللي عايش وده مش واحد دول ملايين علي قد ما تقدر
بذرة الخير اللي جواك تعذيب الضمير ممكن يموتها
ربنا يكرمك ويخلص البلد ديه من الروتين اللي حيموت الشعب كله
بجد انت انسان وانسان كبيييير جدا بأنسانيتك
ربنا معاك
سلام

semsema said...

ازيك يا محمود
البقاء لله في موت عم المرسي
أعتقد يا محمود ان انت لو كنت حكيت لكتير من زمايلنا كانوا هيعملوا حاجة ليه وزي المثل ما بيقول ايد علي ايد تساعد
أنا مع رنا في كلامها
انت دايمن مش بتحب تشرك حد فينا ليه مع ان ده مش هينقص من ثوابك شيئا
بالعكس ممكن تلاقي عند غيرك حل مكنش في دماغك وبدال ما تجهد نفسك اكتر هيكون فيه حد بيساعدك وده مش هيخليك ترمي اللوم علي نفسك كده زي ما بتعمل
اصحابك واللي حواليك مش ناس تقولهم ازيكم وتهزروا وتضحكوا مع بعض وخلاص
والحمد لله كتير اوي من دفعتنا ناس محبة للخير
وعلي كل انت عملت اللي تقدر عليه وربنا يسهل اننا نكون اداة من ادوات الاصلاح والتغيير
دمت بكل الود

شق القمر said...

محمود خلينى أقولك جملة

You are stucked in blaming yourself

And You have to move forward

عارف يا محمود الرسول عليه الصلاة والسلام علمنا ايه ؟؟

علمنا ان النفس اللوامة أفضل نفس
وأفضل إنسان اللى لما نفسه تلومه يستغفر ربنا ويتوب وينوى الخير ويدعى وهو واثق بقبول الله عز وجل لنيته انه يكون أفضل

معلمناش اننا نقف على خط اللوم .. وناخد وقت كبير نقول احنا غلطنا

التفاؤل مش مجرد انك متفائل لعمل معين
ولكن التفاؤل الصح والأساسى هو تفاؤلك فى رضا الله عنك لأنه نابع من إيمانك

كل إنسان بيحمل كثيييييرا من اللوم
لكن اللى فعلا صح هو الإنسان اللى لوم يوم واحد كفيل يحركه كتيييير للأمام بعيد عن خط اللوم

وأكثرهم بؤسا هو من يحمل اللوم على عاتقه كلما ناشدته قدماه ليأخذ خطوة

وكما قلت لك هيبقى
Stucked

يارب تشوف الحياة الصح على محمل أوسع وأصح
الخطوة لازم تاخدها, بس عشان تاخدها اوسع شوية لازم تزيل الأحمال اللى على كتفك

ومتفتكرش انه صح انك تلوم نفسك او نفسك تلومك على مدى طويل

الصح انك تصادقها ولما تلومك توريك مع اللوم طريقك الصح

والأصح أن تثق برحمة الله فوق كل ذلك
وأن تعلم أن كل ما يحدث هو تجربة فى مختبر ضخم اسمه الحياة
ولا بد أن تحسّن النتائج
ولا يلزمك ذلك إعادة التجربة ولا النظر على أضرار الخطأ فى التجربة السابقة طويلااااا
ولكن يلزمك أن تعرف الخطأ وأى خطوة يمكنك التغيير أو الإصلاح فيها وعلى أى أساس
حتى تصنع معادلة الحياة الصحيحة
وفى ناس بيصنعوا المعادلة دى بدرى أوى وبيعيشوا حياتهم على مبادىء صح

يعنى مش صعبه ولا مستحيلة
كان الله بالعون يا محمود

د/عرفه said...

هوم على نفسك يا محمود
انا معاك جدا ان الواحد طالما ارتضى لنفسه انه يبقى دكتور لازم يكون قد المسئولية
ومعاك اوى فى كلمة نية التغيير والاصلاح
فى فعلا ناس معندهاش النية دى وللاسف عاجبها الاهمال اللى موجود عندهم
بس هيروحوا من ربنا فين

بس هون على نفسك محمود
واظن انك حاولت كتير

وربنا هيحاسب المسئولين اكيد
واهو كل يوم هتتعلم كتير وهتكتسب خبرات كتير
احنا لسه فى اول الطريق
ولسه ما شوفناش حاجة كمان


ان شاء الله
انا متاكد انك هتطلع دكتور انسان
واظن انها اهم صفة لازم تكون موجوده فى الدكتور

۩۝۩ Dr. Flavio ۩۝۩ said...

هقتبس بعض من كلمات رنا

"تيجى تسلم وتمشى نقول ماله محمود حزين ليه .. مالك يامحمود ؟؟ ... تبتسم وتمشى ... حتى مفكرتش تحكى يا أخى عن الراجل دا ولا عن غيره"

انا مش عارف ارد عليك اقول ايه يا حوده

بس اسمح لي ارد على اتنين علقوا عندك

شباك موارب ... مفيش تغيير بييجي من فوق ... ربنا قال في كتابه العزيز
(( إن الله لا يغير ما بقوم ٍ حتى يغيروا ما بأنفسهم )) صدق الله العظيم


شق القمر ... بجد بجد احنا أسوأ دفعه طول ما احنا عارفين بعض كتير وناسيين بعض أكتر

صانعة الحرية said...

لأم استطع الا البكاء
شعرت بكل كلمه كتبت وبكل حرف
حسيت اوى بعم مرسى
----
ان الله لا يغير ما بقوم حتى يغيروا ما بانفسهم
مش حاسه ان حضرتك قصرت
تقبل الله جهدك وجعله فى ميزان حسناتك
--------
لو فى اى مشكله فى اى طلب علاج تغيير المكان او ما الى ذلك
او فى طلب علا مستعجل وعاوزينه بسرعه
فقط ارسل لى رساله وربنا ييسر

متمنية الجنة said...

السلام عليكم
انا بجد زعلانه جدا انى اتاخرت كده لكن امرى الى الله .
والله ياحودة مش عارفه اقولك ايه لكن بجد الذنب مش عليك لانك عملت اقصى ما يمكن لطالب انو يعمله وبجد انت مش قصرت فحاجه استغليت كل علاقاتك بكل الطرق وان كانت موضوع احراجك من الدكتور اللى كان ممكن يحل المشكله ده شىء طبيعى لكن بجد الذنب مش عندك الذنب على روتين غبى وحياة اغبى
لما نعيش فمجتمع حياة فرد فيه فرد ايه حياة افراد تتوقف على ورقه او 5000 جنيه يبقى الذنب مش عندك خالص
الذنب عند مكاتب وقرارات وجار مسلم مش حس باخوه المسلم وحاجات كتير جدا
فتحت جرح كبير اوى يا حودة بس بالله تهون على نفسك انت فعلا عملت اقصى ما يمكن لك انك تعملها
وبالاخير (كل نفس ذائقة الموت )وانا لله وانا اليه راجعون ده قدر ولازم نتقبله الى ان يمن الله علينا بحياة اصلح ومجتمع احسن
مش قادرة اهزر معاك زى كل مرة لكن فعلا خد بالك من مزاكرتك عشان تصبح انت الطبيب اللى بيساعد مش تستنى انو يكون معاك ارقام حد
F.A

natural magic said...

ياااااااااه كل دا بيحصل واحنا مش عارفين
اه انا معاك ان وضع صعب جدا
وانت حاولت علي قد ما تقدر
وبحد انت قوي اوي علشان تستحمل كل دا
بس بردو مش عايزين يبقي كلمنا كله مدح يا محمود
بالرغم ان رد رنا كان صريح اوي بس بصراحه كلامها صح
مش صح انك تشيل مسئوليه زي دي لوحدك
مش صح انك تحاول تبان قوي قدام نفسك
لازم تتكلم وتاخد راي غيرك اصحابك يا سيدي لازمتهم ايه
ومتهيقلي دفعتنا مش نادله للدرجه دي يا جماعه
لو حد عرض حاله زي دي علينا كنا حولنا باي طريقه ان نساعد
وبعدين هون علي نفسك محمود احنا في المجال دا هنشوف حاجات صعبه كتير
وبجد مش عارفه اما عن نفسي هتعامل معاها ازاي
ربنا ييسر لنا الحال ويجعلما سبب في شفا الناس
وعايزين تبقي دي صفحه حياتك وتنتهي وتتعلم منها مش تقف عندها بقي
ملحوظه اخيره بقي
ايه الناس المهمه دي كلها اللي تعرفها يا محمود
دا الشعر مفيد والله اهوه
هتخليني افكر في موضوع الادب بقي وانافسكوا
علي راي رنا ان كل واحد فينا جواه اديب
علي كدا بقي يا دكتور لما نعوز حاجه من الجامعه نبقي نجيلك
واللي ساعتها تقولي انا بساعد ولاد بلدي بس
انا بس مش عايزه كلامنا دا يزود لومك لنفسك والله انا لو مكانك مش كنت هعمل اكتر من اللي عملته بل هيكون اقل كمان
يلا ربنا يهدينا للطريق الصح بعد كدا
سلام

د/محمد الخطيب said...

والله العظيم انا مبسوط
يمكن تستغربوا
بس بجد احنا مختلفين عن الجيل اللى فات
مننا ناس كتير اوى بتحب الخير وبتحب تخدم الناس

الطب رسالة ياجماعة
واشرف مهنة بعد الدعوة هى الطب
لازم نعرف كده
كل اللى اقدر اقولة
انى بدعى ربنا انه ميموّتش الحماس ده فينا
لحد لما نبقى فى وضع نقدر نخدم فية كل الناس

عندما تنهمر الدموع said...

السلام عليكم ورحمة الله وبركاته
بصراحة انا مش عارفة اقول لحضرتك انا لماقريت البوست بجد اتأثرت جدا مش لأني اول مرة اسمع حاجة زي دي بس لأن الموضوع ده انتشر جامد بسبب الروتين بسبب اهمال الموظفين بسبب انعدام الضمير لأي سبب كان المهم انه لحد دلوقتي ملقيناش حل مناسب واذا كان عم المرسي كان معاه نص تمن الصمام ففي ناس معهاش تمنه كله وفي ناس بتموت كل يوم الف مرة من الالم ومستشفاياتنا مليانة حالات زي دي طب ايه الحل مهو مش كل مريض ممكن يقع في ايد حد ابن حلال زي حضرتك ولا كل مريض ممكن يلاقي حد يساعده ويوفره تمن العلاج يعني المشكلة مش جديدة والحل مش سهل الموضوع محتاج تغيير يبدأ من جوانا الاول لوكل انسان وفر ولو ربع ساعة من وقته يروح يزور فيها مستشفى معينة يشوف المرضى يحاول يخفف عنهم ولو بكلمة طيبة ويحاول يعرف ازاي ممكن يساعدهم لأن الناس الغلابة بيبقوا معروفين ممكن يوفر لهم الدوا او يتوسط لهم عند دكاترة يعرفهم على اعتبار اننا دكاترة مش بس كده ده لازم واجباري ان يقول لكل حد يعرفه عشان كل واحد يعمل اللي يقدر عليه وايد على ايد تساعد ويبقى كده هو فعلا عمل اللي عليه
مرة جت اختي من الدرس وقالت ان المدرس حكالهم عن مريض في مستشفى الجامعة لازم يسافر عشان يتعالج واهله مش معاهم يسفروا ابنهم وطلب منهم المدرس ان كل واحد يعمل اللي يقدر عليه وكمان كلم اصحابه المدرسين والولد سافر واوراقه خلصت بسرعة لأن كل واحد عارف دكتور كلمه شوف بقى المدرس قدر يعمل ايه لأنه امن بان ايد على ايد تساعد
متزعلش مني انا يمكن اصغر من حضرتك بس انا اول لما قريت وعرفت انه كان فاضله بس نص تمن الصمام جه في دماغي انه ليه انت مقولتش لصحابك وهما اكيد مش هيتأخروا حتى لو كان الموضوع موضوع روتين وورق متعطل فأكيد حد فيهم كان ممكن يتصرف يعني حضرتك كلمت ناس كبار هم كمان كانوا ممكن يكلموا ناس وبكده يفضل الموضوع حي يعني في ناس كتير مهتمة بيه مش واحد بس
صحيح حضرتك عملت كتير بس مقدرتش بس غلطتك انك كنت اناني في رغبتك انك تساعده لوحدك
في الاخر الاعمار بيد الله وده قدره لكن برده ادينا بنتعلم وكل مرة بنحس ان مسؤوليتنا اكبر مما نتخيل ولازم نكون ادها
على العموم بلاش تلوم نفسك لأنك حاولت ومستسلمتش بسرعة وكفاية انك على الاقل حاولت تساعده في كتير غيرك مش في دماغهم المهم انك اتعلمت ازاي تكون اكتر مرونة وحكمة في موقف زي ده ولو عايز تبطل تحس بالذنب ففي كتير محتاجين مساعدة زي عم المرسي واكتر حاول تساعدهم وشارك اللي حواليك في مشاكلك مش دايما بينفع الكتمان ومعلش تكئبهم بس تساعد في علاج شخص محتاج وتأكد انهم عمرهم ما يلوموك عشان حكيت لهم وكده يزيد ثوابك ويتضاعف لأنك ساعدت على عمل خير ونشرته
بجد انا اسفة لو كنت ضايقت حضرتك متزعلش مني وان شاء الله ربنا هيوفقك ويكرمك عشان تساعد ناس كتير واكيد عم المرسي هيسامحك لأنه كفاية شعورك بالذنب ورغبتك في ان الامر ميتكررش وتستفيد من تجاربك

Soul.o0o.Whisper said...

السلام عليكم و رحمة الله و بركاته

بجد بجد مش عارفة اقولك ايه

خلتنى اعيط طول البوست

بجد باحس اد ايه ثقل الامانة
و اد ايه ناس بتستهر بحياة الناس

دا لو ان حد قريبهم ماكنوش سابوه كدا

و كله روتينيات و قرف

بجد نفسى نتعدل لنفسنا والله مش لحد تانى

بس انا لو مكانك بتهيألى كنت عملت زيك
خاصة و ان انت كمان كنت متعلق بالامل اللى بيرسموه


ربنا يعفو عنا جميعا

بس الواحد مش بيتعلم بالساهل
و لازم يتقرص كل قرصة و التانية عشان يتعلم



ربنا يحفف عنك يارب
و يقدرنا على المسئولية



دمت بود

ايوشة said...

السلام عليكم ورحمة الله وبركاته
القصة مؤلمة فعلا والالاف من عم المرسى بموتوا كل يوم بسبب الاهمال الروتين الانانية التكاسل كل سلوك سئ فى البلد
بلاش تقسى على نفسك اوى الموت مقدر ومكتوب بالساعة والثانية ويمكن موته هيكون سبب للناس تصحى وتفوق وتبطل تقول انا مالى وتبطل الامبالاة


بس انا دايما مؤمن ان اللي عايز يغير بيغير


وخلى دايما الكلمة دى قدامك لو كل الشباب بيفكر زيك كده البلد هتكون احسن واحسن الشباب لسه فيهم الخير وعايزين البلد تكون احسن وباذن الله الحلم ده هيتحقق ودم عم مرسى مش هيكون راح هدر

Anonymous said...

أخى وحبيبى دكتور محمود .. لا عليك ..و رأيى بصراحه وبدون مجاملة ،أنك لم تقصر فى شئ ، وان شاء الله مأجور لا موزور ، وغفر الله لنا جميعا ، لكن نتعلم جميعا مما حدث ان نعيش جميعا بعضنا لبعض فإن كانت الحكومات والهيئات والمؤسسات أهملت حق أبناءها ، فلا نهمل نحن أنفسنا بأنفسنا

و أحب أنقل لك حاجه عجبتنى ، خليها قدامك يا حوده يا حبيبى

فلتمدحْني

أو تلْعني

أو حتى تتبرأ مني

لستُ أبالي

فأنا قد عاهدتُ ضميري

وأذانَ البيتِ المعمورِ

وغصونَ الشجر الزيتونِ

ودموعَ الشعب المطحون

سأظل بروحي وبفني

للشعب المكدود أغني

*******

كلماتـي ستظلُّ سلاحًا

كالسيف البتار القاصمْ

وتفيضُ لهيبا لا يُبقي

أثرا للملحد والظالمْ

وتكونُ ضياءً وعبيرًا

يبعثُ في الشعب المطحونِ

صبرًا..

وفداءً..

وعزائمْ

فله قلمي

وله فني

وسأبقي ليلي ونهاري

للحقِّ المبرورِ أغـني


من شعر الدكتور جابر قميحه

فمتزعلش يا حوده من كلام اللى بيحبوك لانى لاحظت شئ من القسوة شويه ، فياريت ماتزعلش يا حبيبى

أخوك بسام

عمر said...

بسم الله الرحمن الرحيم

حكاية " عم مرسي " تتكرر في بلادنا مئات المرات يوميا ، فهناك الكثير والكثير من أمثال " العم مرسي " والكثير الكثير من قتلة " العم مرسي "

هذه القصة مر بها أخونا الحبيب محمود أبو العزم ، وأبكى بها كل زوار مدونته – رحلة إلى نفسي – لأجد كلمات " محمود " تصل إلى أعماق قلبي لينفطر صارخاً ببعض الكلمات التي تعبر عما بداخله ..

أترككم مع

– دمعة .. بتنعي عمِّنا مرسي-

على - بحب النور www.bahebelnor.blogspot.com

...........................

تحياتي لك يا محمود

هبهوبه said...

السلام عليكم ورحمة الله وبركاته
وحشتونييييييييي كتيييييييييييير
انا عارفه اني مقصرة جداً جداً في حقك
واكيد انت زعلان مني
بس والله ربنا عالم ان طول فترة غيابي كنت بتابع أخبارك وبسأل عنك باستمرار
بس والله غيابي ده كان غصب عني اكيد مدونة محمود ابو العزم مفيش حد في الدنيا ممكن يفارقها بمزاجه
واما رجعت لقيتك لسه زي ماانت ارق واطيب قلب في الدنيا انسان بكل معاني الكلمة
بس انا متأكده ان عم المرسي الله يرحمه كان عايز يشوفك عشان يشكرك
انت وقفت جنبه وحاولت تساعده بس ربنا كاتب النهايه من قبل البدايه
انت كلامك كله رائع يا محمود بس انت عارف المستشفيات العامه فيها كام عم المرسي لازم البداية تيجي من فوق تيجي من المسؤلين انت واصحابك شئ جميل انكم تفكروا في التغير بس على ماانتم تقدروا تغيروا كمان 20 سنة يبقى راح كام الف عم المرسي انا مش بحبطك والله يامحمود بس انا بفهمك ان الناس اللي المفروض انهم يتحركوا هما المسؤلين الكبار انت بتعمل اللي تقدر عليه والله يامحمود انت مش مقصر ابدا بس خليك ماشي في طريقك استكمل المسيرة وربنا هيكرمك بإذن الله انا متأكده ان كمان كام سنة هتبقى انت من اشهر الدكاتره وهتقدر تساعد ناس كتير لانك تستاهل كل خير ولانك بتتمنى بجد من قلبك انك تعمل الخير والي بيتمنى حاجه من قلبه ربنا هيحققهاله
انا اسفه طولت عليك بس لانك وحشني وعايزة اتكلم معاك كتير
ربنا يكرمك يا محمود ويباركلك في صحتك وعمرك يارب ويقدرك على فعل كل خير
انا بعد ماقريت القصة دي اتمنيت لو كنت دكتوره كنت هحط ايدي في ايدك وايد اصحابك ونساعد كل اللي محتاج مساعده بس الحمد لله ان لسه في ناس قلبهم طيب زيك البركه فيك وربنا يكرمك يارب

Anonymous said...

معذرة لو كلامى ماكانش واضح ،بس اللى كنت عاوز أقوله باختصار ( والمؤمنون والمؤمنات بعضهم أولياء بعض ، يأمرون بالمعروف وينهون عن المنكر) قصدى اننا لو ماخفناش على بعض ماحدش هيخاف علينا ، ولو ماخدناش بإدين بعض ماحدش هيساعدنا
فكل واحد فينا يحاول يساعد الناس على قد مايقدر فى مجال عمله ،


والله الموفق

بسام

Anonymous said...

أجمل شئ فى الدنيا بحالها

ذكر المولى ،وعقل وفهم

صحبة جميلة تعينك لما

القلب يكون حيران م الوهم

وأنا فى الدنيا لقيت احبابى

وكل اصحابى راجل شهم

فى الغربة دايما فاكريننى

وليهم عندى فضل وسهم

وآخرهم كان الدكتور

حبه ف قلبى زى الوشم

شعر وحكمه وقلب كبير

وكمان رقة وخفة دم

كلمة أخيرة مثيرة خطيرة

نورت حياتى يابو العزم



بسام

Anonymous said...

يااااااااااااااااااه يامحمود
كل ده في قلبك ياراجل وساكت
انت بجد يامحمود بهرتني جدا جدا
وبجد ماشاء الله عليك انت عندك حماس كبير اوي اوي بس المشكله ان الدنيا صعبه اوي اوي...
يعني مش كفايه حد واحد
افتكر الحديث الشريف(المؤمن للمؤمن كالبنيان يشده بعضه بعضا)
ماتزعلشي نفسك خالص من الكلام اللي وصلك.....هما برضو معاهم حق
بس انت مشكلتك اللي هتفضل معاك طول عمرك انك مش بتشرك حد معاك ابدا....

انت بجد عملت اللي عليك واكتر..
وعم مرسي اكيد مات ونفسه يشوفك عشان يودعك ويسلم عليك....ز

استمر يامحمود بقلبك الطيب
بقلبك الكبير
بحماسك الرائع
بايمانك القوي
وان شاء الله تبقى انجح دكتور يارب
وربنا يكتبلك التوفيق يارب


متشكره اوي على الاجابات اللي في البوست اللي فات...
انا كنت مراهنه نفسي انك هتتهرب من بعضهم واجابات كتير اوي اتوقعت اجاباتها فعلا زي ماكتبت


حتى السؤال اللي متاكده انه صعب عليك ومش هتجاوبه سبتلك فيه حريه الاختيار
.....
اكيد وصلك على الميل انا مين
....

سلام
@@@@@@@@@@@@@@@

Ramy Seada said...

إحنا أصبحنا دولة رأسمالية لا وجود لعم مرسى أو غيره فيها

أنا شايف إنك عملت اللى عليك يا محمود

العيب فى النظام

بس هى رسالة كويسة ربما توصل لحد بكرة ممكن يبقى مسئول ويراعى ربنا فى شغله

اللهم ارحم العم مرسى رحمة واسعه واسكنه فسيح جناتك

تقبل تحياتى

Anonymous said...

بص يادكتور انا اعرف عم المرسى واعرف اولاده كلهم بس مش معرفه سخصيه الراجل ده بجد من الناس اللى كنت بستريح لها ومعرف ايه السبب خلاصه الموضوع يعنى هو ماكنشى بيسال عليك الا عشان هو اعتبرك ابن من ابناء اللى هم كانوا بيجروا برضو عشان يساعدوه انه يعمل العمليه اللى كانت من الممكن انها بفضل ربناتساعد انه يتخلص من تعبه --- وقد تكن دى اول موقف تتحط فيه من النوع ده عشان كده فكره انك تسال الدكاتره وتروح لهم وكده جت متاخره شويه لكن نرجع ونقول الاعمار بيد الله ومتصعبش الموضوع على نفسك ---- وحكايه دكاتره بجد انت اللى تقدر تعملها وانا معرفش الدكاتره الافاضل اللى انت زكرت اسمائهم بس اعرف واحد زى الدكتور انور سالم ده دكتور من البلد واظن انك عرفه --الناس اللى كانت بتروحله من البلد -ده قبل ما يجى فى العيادة اللى الجمعية عاملها-- بيعملهم احسن معامله ودكتور شاطر فى تخصصه والناس كله بتحترمه- الى حد علمى- وغيره كتير اقصد برضو بكده ان اللى عايز يوصل انه يبقى دكتور بجد ان شاء الله هيكون------ وعلى فكره انت لما تبقى دكتور شطور فى تخصصك انا هجى اكشف ببلاش الا انت عايز تتخصص ايه ------------- امضاء انسان

محمد عبد الباسط said...

مش عارف اقول ايه يا محمود

ساعات الواحد بيقف مكتوف الايدى اما حجم الفساد والرشوة والمحسوبية فى البلد دى

بس مافيش قدامنا الا اننا نواجه الظلم ده وان شاء الله يكون جيلنا افضل بكتير من الجيل السابق

الامل معنديش كلمة غيرها اقولها لبلدنا

حلم كبير

kalam said...

اولا البقاء لله
وانا اسف ان اول بوست اعلق عليه هنا يكون البوست المؤلم ده
احييك علي المدونه الرائعه وعلي موهبتك الحراقه جدا

محمود ابوالعزم said...

السلام عليكم ورحمة الله وبركاته
اتمنى يارب تكون كل الناس بخير
أنا متشكر بجد لكل الناس اللي ردت
شكرا لكل الناس اللي قالت اني عملت اللي على و أثنت عليه
رغم ان شايف ان ده ماحصلشي
وشكرا لكل الناس اللي وجهتني لحاجة ممكن تكون كانت غايبة عني
أنا والله كنت سعيد بكل كلامكوا سواء كده أو كده
وانا بعترف بتقصري في النقطة اللي معظمكوا غلطتني فيها وهي اني ماقلتش لزمايلي
كلمة واحدة هي اللي زعلتني
أنا كوني ماقولتش لزمايلي على موضوع عم المرسي أو المواضيع اللي زي دي
ده مش أنانية ومش استئثار بالثواب أبدا والله الموضوع مش كده
أولا الموضوع ماكانشي عم المرسي بس
كل أسبوع بفضل الله بيبقى فيه حالة واتنين وتلاتة وانا مش بقول اني بعمللهم حاجة غير اني معظمهم يادوب ببص عليهم مش أكتر ..فكرة انك تحسسه انه لو احتاجلك هتلاقيك
وحسيت انه صعب آجي كل يوم واقول ده فيه حالة فلان وفلان
لإن طبيعي الناس هتزهق مني وطبيعي كمان ان فيه ناس هتفهم ده على انه رياء او سمعة
وبعدين انا جربت قبل كده اني آخد زمايلي معايا وشفت أد ايه كانوا بيحسوا بالعجز ادام حالات منهم
وانا مش بحب حد يحس بالاحساس ده
بس لما احس ان الحالة بتفرح بزيارة الناس كنت باخد ناس معايا ومنكوا ناس جت معايا قبل كده
وطول ما المواضيع كانت ماشية كنت بقول بلاش أشيل الناس فوق طاقتهم لإن كل واحد أكيد وياه اللي يكفيه
وحتى حالة عم المرسي لما اتعقدت أوي كده
كنت هقول لزمايلي أكيد أمال كنت هلم الفلوس منين ..أكيد منهم
بس كنت بحاول أسابق الزمن و ألاقي أسرع حل
حاجة كمان نفسي أقولها
أنا كان صعب عليا حتى أحكي عن عم المرسي ولا اني أقول انا بروح وباجي
لأغني كنت بشوف حاجة زي دي المفروض تفضل بعيد عن عيون الناس
لإن تقريبا بحس ان دي الحاجة الوحيدة اللي لسة ربطاني بربنا
بحس ان دي الحاجة الوحيدة اللي ربنا بيكرمني وبيوفقني عشانها
يارب تكونوا فهمتوني وقدرتوا احساسي في النقطة دي
بس أوعد كل الناس اني يوم ما هلاقي أي مشكلة تلقائيا هاجي وأقول هنا
اتمنى ماتكونوش زعلانين مني
ومتشكر ليكوا كلكم
أنا هكتب البوست بكرة ان شاء الله
متشكر تاني لكل الناس
متشكر أوي لبسام وعصفور الستا على كلامهم اللي أنا مااستحقوش
وفرحان أوي بعودة هبهوبة للمدونة
وشكرا بجد لكل كل الناس اللي علقت
ربنا يجمعنا على الخير دايما
احتمال يبقى فيه بوست بكرة ان شاء ا

عندما تنهمر الدموع said...

السلام عليكم ورحمة الله وبركاته
معلش يا د/محمود انا بكتب للمرة التانية بس كنت عايزة اعتذر لحضرتك ان كنت قلت عليك من غير قصد انك كنت اناني في رغبتك انك تساعده لوحدك انا مكنش قصدي المعنى اللي حضرتك فهمته وانا فعلا مقدرة سبب سكوتك وليه محكتش لصحابك عشان ميتفهمش الموضوع على انه رياء وسمعة
معلش انا بعتذر مرة تانية واسفة اني ضايقتك من غير قصد

BUTTERFLY said...

السلام عليكم
طبعا يادكتور احنا متأكدين انها مش انانية..ومقدرين حفاظك ع اللي بينك وبين ربنا..ربنا يوفقك ويقدرك على فعل الخير..وطول ماربنا موجود هيفضل امل التغيير للأفضل موجود..يمكن ييجي اليوم اللي نقدر نعمل فيه حاجة اللي بيها ربنا يرضى عننا ونقدر نساعد الناس دي بجد

محمود ابوالعزم said...

عندما تنهمر الدموع

أنا مش زعلان من كلامكوا أبدا
وكنت فاهم قصدكوا انا بس حبيت أوضح موقفي
أنا عمري ما أزعل منكوا أبدا
ربنا يكرمك ويوفقك يارب

BUTTERFLY
منورة المدونة من تاني بجد
وشكرا لكلامك الجميل وآمين لدعاكي
..............
امضاء انسان
عندك حق في كل كلامك
والدكتور أنور رمز كويس جدا
نورتي المدونة من جديد والله
شكرا ليكي