المشي على الحبال

السلام عليكم ورحمة الله

ممكن أبدا بالكومنت ده من واحد من اخواتي واصحابي بجد

رد بحبه أوي واتمنى تكون الفكرة دي مش عند احمد بس

الرد ده كان في بوست امتحان اجباري

لا طبعا مختلفين محمود فى الكليه مستعجل شويه حبايبه كتير مين زيه

انما هنا تحس انه صحبك انت لوحدك فهمك حسك ديما بيقول اللى نفسك فيه

بس ياجماعه دى ضريبة الشهره روح ياحوده ربنا يحبب فيك خلقه

بس تفضل برضه معنا دائم

اأحمد أنس

.............................................

انا محنوق اوي وحاسس اني محتاج اتكلم

ومن طول الحيرة اللي كنت الفترة اللي فاتت مالاقيتش حل

غير اني أحط كل الحيرة دي بين ايديكوا هنا

وكنت محتاج كلمة احمد دي ان هنا محمود صاحب كل واحد لوحده بس

ونفسي كل الناس تقرا الكلام اللي هكتبه دي-رغم اني مش عارف هكتب ايه-بالمبدأ ده

سؤال دلوقتي حاسس بيه وحااسس ان ناس كتير ممكن تسأله

انت عايز ايه تاني يا محمود

انت انسان ناجح ومحبوب من كل الل حواليك ويوم بعد يوم

بتاخد شهرة وناس اكتر بتحبك وتحب كلامك

اوعي تكون زعلت من خمس ست ردود جولك على المدونه من وسط

اكتر من ألف وخمسميت رد بيشجعوك لانك ساعتها تبقى ضعيف أوي

ويبقى كل الكلام اللي بتكتبه ده مالوش لازمة

لا والله أنا مش زعلان ولا حاجة

انا بس الردود البسيطة خليتني وقفت مع نفسي كتير وراجعت نفسي كتير

خفت يكون الكلام ده جوة ناس تانية وكانت خايفة او محروجة تقولهولي

انا والله عمري ما اتلكمت عن نفسي كويس قبل كده غير نادر جدا

والناس اللي حوليا يعرفوا كده

بس النهاردة محتاج ادافع عن نفسي ادام نفسي على الاقل

عارفين انا حاسس بإيه

حاسس زي ما اكون ماشي على حبل..والحبل رفيّع وطويل أوي

وواصل بين نقطتين بُعاد أوي عن بعض

مطلوب مني اكون طالب ناجح

وبعد كده دكتور ناجح أد أرواح الناس اللي هتبقى في ايده

وشاعر ناجح قادر يسعد بكلامه كل الناس اللي بتحب بكلامه

و أخ كبير ناجح أد المسؤليه اللي عليه ناحية اخواته

وابن ناجح يكون بار بوالدته وبروح والده ويقدر يعمللهم كل حاجة كان نفسهم فيها

وانسان ناجح أد ثقة الناس الكتيرة اللي بتحط ثقتها فيها وتحكيله او تطلب مساعدته

وصاحب ناجح قادر يكون وفي لأصحابه ويقدر يعملهم ترد جمايلهم عليه وتشجعيهم ليه

وكوني أجمع الحاجات دي كلها مع بعض شئ صعب على أوي

وكوني أتخلى عن أي حاجة منهم شئ مستحيل بالنسبالي

بقضي يومي كله وانا جوايا الحاجات دي كلها

مع ان ده ساعات كتيرة اوي بييجي على حساب نفسي بس انا مبسوط بالحياة دي

مبسوط اني قادر اعمل حاجة لحد او اكون حاجة في حياتة حد

ومش بإيدي اني اكون دايما مستعجل وواخد السكة رايح جاي

ومش بإبدي اني اكون جنب كل حد في كل وقت

والدايرة بتوسع مني وكل يوم بعرف ناس و كل يوم

ناس اكترربنا بيسوقني ليهم عشان امشي في مصالحهم

او مرضي من الناس الطيبة اللي عايزني اروح اكشف معاهم

أشهد الله اني مش بقول كده سمعه ولا رياء وهو وحده اللي يعلم

انا بقول كده لاني مش عارف اعمل ايه ومش عارف أخرج من الدايرة المفرغة دي

بس بحاول على اد ما أقدر اني أكون جنب كل حد محتاجني

وبزعل جدا جدا لما ألاقي حد عزيز على بيزعل لو شافني مستعجل

او ماقدرتش اقف معاه شوية او ماخرجناش سوا من مدة او ما مش قادر

أرد على رسالته على النت او مش لاقي وقت اتكلم اون لاين

لانه بجد بيبقى غصب عني وفي وسط الحياة المزحومة دي

ساعات مش بلقى وقت أقعد حتى مع نفسي

أنا مش بقول معلهشي ورايا حاجة

غير لحد انا متعشم فيه وكان ظني فيه إنه هيقدر الوضع اللي بحكم حاجات كتيرة اوي بتحط فيه

حتى بين اصحابي انا حاسس اني ماشي على حبل

لاني بحبهم كلهم جدا من اول اللي فيهم بيحششوا لحد ناس ماشفتش

زيها في التزامها واحترامها ومنهم ناس شيوخ كبيرة

مش عايز اي حد في دول يبقى زعلان مني ومش عايز حد منهم يعوزني ومايلاقينيش

نفسي أرضيهم كلهم وقبل وبعد دا كله ارضي ربنا

حتى في الشعر انا اشتغلت مع زمايلنا في الاتحاد و في الجمعية العلمية

وفي الأسر وفي الجمعيات و وزمايلنا من الإخوان وشيوخ الجمعية الشرعيه

ماكانشي قصدي أبدا اني العب على كل الحبال

بس انا من جوايا مصدق الناس دي من جواها وحااسس انهم نفسهم يعملوا حاجة

وحاولت على اد ماقدرت اني أعمل حاجة تشرفهم وتساعد ولو بقدر بسيط في نجاحهم

بس الحبل مابين كل الحاجات دي طويل اوي وصعب أوي

أنا حاسس ان انا ماشي على حبل وانا بحاول اكون نفس الشخص وانا قاعد

مع الناس الفلاحين البسطا اللي على فطرتهم او وانا قاعد في مؤتمر كبير مع شخصات كبيرة

أنا حااسس اني ماشي على حبل وانا بحاول أوفق بين وعدي لأهلي

اني ماأخليش الشعر يشغلني عن مذاكرتي ومابين ناس كتير متعشمة في

وطالبة مشاركتي معاهم في مؤتمرات او في ندوات واحساسي اني لازم اكون أد الثقة دي

اونا والله عمري ماطلبت اني اقول في حاجة زي كده بس احب لما ينطلب مني

اكون اد المسئولية والثقه دي

ومعرفتي بالدكاترة مش هدف ولا غاية بالنسبالي

و فيه ناس منهخم متابغعين المدونة ويشهدوا اني عمري ماتملقت حد فيهم

ولا طلبت من حد فيهم يوصي على في لجنة لاني برفض المبدأ ده

كل اللي عملته اني حاولت اكون واسطة بين الدكاترة دول

وبين ناس متاجة للعلاج ومش قادرة على تمنه

حتى على المدونه حاسس اني ماشي على حبل

عايز ارضي كل أذواق الناس وعايز ماحدش يدخلها ويخرج زعلان

ساعات بحس اني قدرت اعمل كده وساعات بحس انه صعب..دا لو ماكانشي مستحيل

وخصوصا ان المدونه بيدخل عليها ناس كتير من مختلف الانتماءات

ومن مختلف الأذواق والأفكار والآراء ومن وسط الناس دي

ساعات بيظهر ناس ممكن تقول كلام يجرح وهي مش حاسة

يمكن يكونوا واحد ولا اتنين ولا تلاتة من وسط ناس كتير اوي

ومنهم حد ولا اتنين مايعرفونيش ولا انا اعرفهم وجرحوا اهلى بكلام مش كويس

والكلام ده كان بعد بوست عيد ميلاد المدونة من حوالي اربع شهور

ولاني مافهمتش ليه فيه ناس كده جالي وقت وقلت طب

ما أنا اجنب نفسي واجنب أهلي حاجة زي كده

لاني عايش طول عمري بحلم اكون سبب في سعادة اهلي دول

و صعب على أوي اني اكون سبب في ان حد يجرحهم بكلمة لاني اتكلمت على طبيعتي زيادة شوية

ولو كانت المدونه سبب في كده

بس قبل ما اروح اقفل المدونة صليت ركعتين استخارة وكان معايا احمد..واحد من أصدقاء عمري

ويادوبك دخلت النت ساعتها النت قطع عن مصر بحالها لما اتقطعت الكابلات

حسيت ان مافيش علامة من ربنا أكبر من كده اني أكمل..وكملت

و قلت انه مهما يحصل هكمل على المدونة ...و استغرب بيني وبين نفسي من

انتشار المدونه بالشكل ده يمكن ماتحسهوش هنا بس انا حسيته

لما دخلت بيوت ولاقيتها كل اللي فيها متابعينها

ولما رحت بلاد زي المنصورة واسكندرية

في ملتقيات الطلاب ولاقيت ناس متابعاها وحافظة حاجات منها

وحسيتها لما بدخل اي نت في الكلية والاقي ناس فاتحاها

وحسيتها لما لاقيت نادر انه يوم يعدي من غير ماحد ييجي يعرفني بنفسه

انا فلان الفلاني متابع المدونة بس معلهشي مش بعلق

كنت بفرح لاني حاسس ان ده مش نجاح لي لوحدي دا نجاح للمدونة اللي

انتو اهم حاجة فيها وانت اللي عملتوها معايا

كنت بفرح لما اشوف زمايلي في اي حتة بيشجعوني واولهم الناس اللي بكتب شعر

زي فرج وعلام ونادر وراجح مع انهم يمكن محتاجين الفرصة اكتر مني

بس كانوا دايما بيشجعوني وهما اللي يطلعوني اقول شعر

بس زي مافرج قال ان نجاح اي حد فينا نجاح لينا كلنا

يمكن عشان كل الكلام ده كان صعب على اوي اني اقفل المدونة دي مهما حصل ومهما اتقال

لانها مش بتاعتي زي ماكلكوا قلتوا قبل كده

انا مش بدور على شهرة والله ولا الموضوع ده يعنيني في شئ

بس ساعات بحس اني كتبت حاجة تستحق انها تتقري حتى ولو الناس ماعرفتش انها بتاعتي

يمكن اكتب حاجة تتحط في ميزان حسناتي او اكتب كلمة ربنا يرحمني يها

ويعفرلي كلام كتير خايف أكون أغضبته بيه

انا جوايا كلام كتير اوي

بس انا حاسس ان دلوقتي ارتحت بشكل كبير

في النهاية انا ماكتبتش الكلام ده لاني زعلان من حد

انا كتبته عشان مش عايز حد مهما كان يزعل مني

لانه بجد دا أوحشش ئ ممكن يحصللي انه يبقى فيه حد زعلان مني

انا كتبته لاني كان نفسي الناس تعرف ان الدنيا بالسنبالي اوسع بكتير من المدونه

بس بقت الساعات اللي بقضيها على المدونه هي اجمل وأمتع حاجة في الدنيا دي

انا كتبت الكلام ده عشان زي ماقلت كده انه كل ما الناس تحترمنا اكتر بيبقى صعب اكتر

اننا نحافظ على كده لان ساعتها عيوبنا بتبان بسهولة اكتر

بس اللي جواه احترام وتقدير ناحية محمود او ناحية كلام محمود

وساب كلمة تغير اللي جواه ده....يبقى انا كمان في غني عن اللي جواه ده

انا كتبته لاني مرة سألت زمايلي هو انا احسن في ايه

قالوي انك على طبيعتك اوي

طب اوحش حاجة في ايه

قاولي انك على طبيعتك أوي

عشان كده هفضل زي ما انا وهكتب وهقول كل اللي انا حاسس بيه ايا كان

حتى لو الناس افتكرت ان ده شئ يشبه الشيزوفرينيا

انا كتبت الكلام ده لانه كان خانقني وكان لازم أحكيه

ولأول ولآخر مرة بطلب منك انكوا ماتعلقوش علي البوست ده

بس بعد الكلام ده فيه طلب اتمنى تعذروني فيه

من التلات اللي جاي ان شاء الله هيبقى البوست كل تلاتين مش كل تلات

الكتابة في السيبرات بقت صعبة على اوي

و نفسي أركز في مذاكرتي شوية عشان اعمل حاجة تشرفكم انتو قبل اي حد

ده مش قرار ده رجاء مني ليكو اتمنى ماحدش يزعل منه ولا يزعل اني خدته لوحدي
أتمنى من ربنا ما اكونشي قلت كلمة ضايقت حد

واتمنى تعذروني لو كنت كئبتكوا شوية النهادرة

شكرا لانكوا دايما مستحملني

إني أحبكم في الله

اعتذار

السلام عليكم ورحمة الله

أنا بس حبيت اعتذر عن اني ماكتبتش الاسبوع اللي فات

بسبب ظروف الامتحان ولاني مادخلتش نت من حوالي أسبوع

يارب تكون كل الناس بخير وربنا وفقها في الامتحان

ان شاء الله المعرض ممكن يكون الاسبوع الجاي

لو اي حد حابب يشارك ممكن يلحق ان شاء الله

متشكر اوي اوي اوي لكل الناس اللي بتعلق واللي متابعين المدونه دايما

مش عايز حد يزعل مني ان كنت مش برد على حد حد

انا بحاول استغل كل وقت ادخل فيه نت اني اكتب هنا على المدونه

بالتوفيق للجميع

وموعدنا بعد بكرة ان شاء الله

من أجندة تالتة ثانوي

السلام عليكم ورحمة الله

يارب يكون كل الناس بخير

مش هطول عشان عارف ان أصدقاء المدونه من سنه سادته مشغولين

هدخل في الموضوع علطول وهقول ان رد الفعل اللي لاقيته

على مواضيع قديمة لاقيتها ونشرتها هنا هو اللي شجعني اني أدور على حاجات تانية

والحاجات اللي لاقيتها النهاردة لاقيتها في أجندة زرقة صغيرة كنت واخدها

هدية من الأستاذ أشرف اللي ان شاء الله يكون بيقرا الكلام ده دلوقتي

كنت بكتب فيها الأفكار والمشاعر اللي كانت بتيجي في بالي أيام تالته ثانوي

حتى كان جميل اوي اني ألاقي فيها أول جملة كتبتها في حياتي

هو الكلام مش شعر ومش جمل ومش أي حاجه خالص

هو مجرد خواطر وتأملات عادية جدا وماكنتش اتخيل انه ممكن

ييجي يوم يكون حد مهتم يقراها

ومش هقدر أقول انه كلام جميل انا بس هقول انه كلام حسيت فيه بالبراءة

وده اللي خلاني مصمم آجي أنشره النهاردة

ندخل في الموضوع

...................................

أول جملة كتبتها

إن أكثر ما أخشاه على قلبي

ان تأتي اللحظة التي لا يجد فيها من يحبه فيحب مضطراً من سيجده

..............................

فيه ناس في حياتنا نورهم زي نور الشمس

نورهم عالي اوي وبيملى حياتنا كلها بس بيسيبنا في الليل

في اكتر وقت احنا مجتاجينه فيه

وناس نورهم زي نور القمر

يتعب اوي عشان يجيب لنا شوية نور من الشمس ينورلنا بيهم الليل ده

بس لما بتيجي الشمس مش بيلاقي لنفسه مكان فينسحب من حياتنا بالراحة

وناس نورهم زي نور بيتنا

ينورلك وقت ما انت عايز

بس للأسف الشديد لازم انت اللي تئيده بإيدك

وللأسف الأشد لازم تدفعله تمن مقابل ده

وناس نورهم زي نور التلاجة

ينورلك وقت ما انت عايز من غير ما تئيده

بس في الحاجة اللي تخصه بس ويسيبك في أي حاجة تانيه

وناس نورهم زي نور الشمعة

يجيلك في عز الضلمة لما كل الانوار تسيبك

بس عشان ينورلك بيحرق نفسه وعشان كده بينتهي في وقت قصير اوي

بس يفضل نور ربنا هو النور اللي ممكن يفضل معاك في أي وقت

وفي أي مكان..و من غير تمن

التمن الوحيد انك تختاره وتبقى مستعد تسيب اي حاجة عشان يفضل معاك

...............................................

شئ غريب أوي انه لما يبقى لينا صاحب قريب اوي منا

نقول عليه دا مش صاحبي بس.. دا زي أخويا

ولما يبقى لينا أخ قريب أوي مننا

نقول عليه دا مش بس أخويا دا احنا اصحاب

!!!!!!!!!!!!!!!!!!!!!!!!!!!!!!!!!!!!!!!

يمكن يكون ده لان احساسنا بالبشر أكبر من انه يتصنف أو يتقسم

وان الناس لما بتدخل قلبنا مش شرط يبقى معاها بطاقة هوية

مش شرط نعرف هو ليه دخل ولا هيدخل تبع أنهي مجموعه

المهم انه موجود جوانا

وكإن قلبنا بيت كبير اوي بس مافيهوش قوض من جوة

فيه ناس ممكن تدخله بسنين من العشرة وناس ممكن تدخل بكلمة واحدة

حتى مش بنختار الوقت اللي بيدخلوا فيه قلوبنا ولانعرف سبب لكده

وياما ناس معانا كل يوم ومش قادرين يدخلوا قلوبنا لحد اللحظة دي

وياما ناس شفناهم مرة واحدة بس عمرهم ماخرجوا من جوانا

وياما ناس بنرتاح بس لمجرد اننا نشوفهم من غير حتى مانعرف هما مين

لماذا نحب...سؤال ٌ أمتع ما فيه أن يظل بدون اجابة

...................................

الاسلام عمره ماكان ضد العقل ولا ضد التفكير

بس احنا لما بنشتري تليفزيون جديد من المصنع

بناخد معاه كتالوج يقولنا بينطفي من هنا ..نطفيه من هنا

الصوت بيعلى من هنا.. نعليه من هنا

حطوه بعيد عن الحيطة عشرة سنتي نحطه بعيد عن الحيطة عشرة سنتي

من غير مناقشة ومن غير مانفكر

لانه اكيد المصنع اللي عمله أدري بيه وبإيه اللي يفيده وايه اللي يضره

واحنا ربنا هو اللي خلقنا وقالنا نعيش ازاي ونعمل ايه عشان نعيش صح

وادانا عقل عشان نفكر بيه وندور على اللي يفيدنا ..بس احنا

اول ما استخدمنا العقل ده اتجرئنا بيه على اللي خلقه

وحسينا اننا نقدر نعمل كتالوج لنفسنا ونمشي بيه

مع اننا من جوانا مرتاحين للكتالوج الصح

بس ربنا كان أرحم بينا كتير من المصنع بتاع التليفزيون

لإنه خلقنا و إدانا الكتالوج بتاعنا وساب حسابنا كله للآخر

.......و ورانا احنا بنئيد منين ونطفي منين ونغير منين و

وساب لينا سؤال كبير أوي...احنا هنشغل قناة ايه؟؟؟

........................................................

ساعات بيظهر في حياتنا انسان

يمكن لو الظروف كانت غير الظروف والمكان غير المكان

كان بقى أهم انسان في حياتنا

بس بيبقى صعب علينا اوي نرتبط بيه لأسباب

ممكن ماحدش يفهمها غيرنا احنا بس

وبيبقى الموضوع أصعب لما تلاقي الانسان ده جواه مشاعر ناحيتك

وبيقى الموضوع أصعب كمان لما تكون خارج من تجربة جرحتك أوي

في وقت انت مش محتاج فيه مجرد انك تحب وبس

انت محتاج تتحب

محتاج تحس ان فيه حد شاريك وباقي عليك ومستعد يعمل اي حاجة عشانك

بس تبقى خايف اوي تقرب من الانسان ده

مع انك بتسأل نفسك ليه لأ..ليه ماتخوضشي التجربة

بس ترجع وتخاف

تخاف ان الشعور اللي جواك يبقي شعور بالاحتياج مش شعور بالحب

تخاف انك تعلق الإنسان ده بيك وفجأة تكتشف انك مش بتبادله نفسه المشاعر

لانه ساعتها هيكون بيحبك اوي ولما هينجرح هينجرح أوي

وخصوصا انك لسه دايق مرارة الجرح ده بتبقى عاملة ازاي

ومش هيبقى ادامك احتيار غير انك تبعد حتى لو بعدك ده هيجرحه

حتى لو كرهك.. حتى لو عينيه بكت عليك

بس الجرح القريب احسن بكتير من الجرح البعيد

والجرح اللي ماتقدرشي تخيطه.. لازم تكويه

يمكن ساعتها تشوف في عينيه نظرة لوم

بس كفاية انك هتكون أدام نفسك حافظت عليه لحد آخر لحظة

..........................................

أصعب لحظة

لما تحس انك بتنزف أوي لان حد طعنك في ضهرك

وتبص حواليك تلاقي كل الناس بينزفوا زيك فتضطر تداري جرحك

و تبقى خايف تبص وراك عشان خايف يكون اللي طعنك حد قريب منك

يمكن مايموتكشي جرحه أد ماتموتك صدمتك فيه

بس الأصعب من ده كله

انك تلاقيك انت اللي من غير ماتقصد طعنت نفسك بنفسك

أصعب لحظة

لما تعمل حاجة كبيرة اوي عشان تسعد بيها حد بتحبه أوي

بس الحاجة دي تكون سبب في حزنه

وبدل نظرة الفرحة اللي مستني تشوفها في عينيه

تلاقي نظرة عتاب

أصعب لحظة

لما تقع وتلاقي نظرة الشماتة جاية من أقرب الناس ليك

أصعب لحظة

لما تكون في قمة الحيرة وتوصل لقرار

بس ماتعرفشي اذا كان قرارك وحي من ربنا ولا وسوسة شيطان

فتكون حيرتك أصعب و أشد

أصعب لحظة

لما حاجة تجرحك اوي وانت سعيد أوي

لان المسافة اللي هتقع منها هتكون كبيرة اوي

أصعب لحظة

لما تضطر تضحك وانت مدبوح من جواك

لانك ساعتها هتكون رضيت كل الناس

بس دبحت نفسك زيادة

....................................

لو قعدنا نحسبها مع نفسنا عشان نعرف من اكتر حد اديناله وعود وأخلفناها

هنلاقي ان الجواب هيكون....ربنا

بس ربنا مش زي البشر وحاشاه انه يكون زيهم

لان اي حد في البشر لو اديتله ميعاد وأخلفته

مش هييجي تاني مرة

وان جه تاني مرة وأخلفت الوعد مش هييجي تالت مرة

انما ربنا مهما اخلفنا وعودنا معاه

بنرجع ونلاقي الباب مفتوح

وكإننا ماأخلفناش ولا وعد

عشان كده هو ...ربنا

.................................................

آسف اني طولت عليكوا

بس في قمة سعادتي اني كتبت البوست ده

في انتظار تعليقاتكوا دايما

محمود أبوالعزم

على السريع...تحديث

السلام عليكم ورحمة الله

انا متشكر جدا لكل الناس اللي دعيتلي

يمكن بفضل الدعا ده ربنا كرمني آخر كرم يومها

بجد متشكر جدا

وبالنسبة للملتقى فهتلاقوا الفيديوهات هنا

على مدونه محمود فرج

http://qasaed.blogspot.com/

بجد بجد محمود تعب جدا سواء في الملتقى نفسه او في الفيديوهات دي

وهو اكتر حد تعب وكلنا نيجي بعده

بس بلاش حد يشوف الفيديو بتاع الدبانة لاني ماقلتهاش حلو

عشان ماكنتش حافظها وانا ان شاء الله ممكن اقولها في الرواند

بعد الامتحانات اللي جاية قريب دي

بالنسبة للبوست انا ماكانشي قصدي الاختيار من الجمل دي بس

انا اقصد الجمل كلها على المدونه

على العموم انا شفت كل الاختيارات اللي كانت قبل كده وهنشر منها

ان شاء الله..ومتشكر اوي اوي كل الناس اللي ردت

جزاهم الله كل خيرويارب دايما منورني كده

وان شاء الله انزل الكلام اللي كان في الفيديو قريب

....................................................

السلام عليكم ورحمة الله
بسرعة جدا
انا اتسرقت من مؤتمر الكلية عشر دقايق عشان ماكانشي

ينفع اسيب التلات ده كمان من غير ما اكتب فيه
زمانهم بيدورا على هناك.. بس انا كنت لازم آجي واكتب النهاردة
ادعولي يا جماعه ربنا يوفقني في اللي هقوله النهارده هناك
اما هنا فانا اولا بشكر كل الناس اللي جاوبت على البوست اللي فات

وزعلان جدا من الناس اللي ماردتش
والتعليق علي الردود واجاباباتي انا كمان هسيبها لبوست لوحدهم
ومتشكر اوي اوي للناس اللي حضرت الملتقى
بجد الملتقى كان رائع بيهم قبل مايكون بالناس اللي قالت
وناس بتطلب مننا نعمل واحد كمان بس مش عارف الظروف هتبقى ايه
وان شاء الله الفيديوهات تنزل قريب على النت
المهم انا النهاردة في الوقت ده هكتبلكم شوية جمل صغيرين كده
عشان ابقى تقريبا كتبت كل الجمل اللي عندي
عشان معايا هدية صغيرة جدا ليكو
احنا عندنا معرض الكلية الاسبوع اللي جاي ان شاء الله
ومن الجمل دي او من الجمل اللي فاتت على المدونه

من بعد بوست همسات من رحيق الماضي
ممكن كل حد لو حاابب يختار جملة واحدة وانا هنزلها في المعرض ان شاء الله
يعني ورقة الجمل دي انتو اللي هتختاروها ان شاء الله
...................................
ليس كل من ينظر اليك ينظر لكي يرى عيونك...كثيرٌ من الناس
ينظر لكي يرى نفسه فيها
..........................
ليس معنى أننا معا أننا قد أصبحنا أصدقاء
كم من السنين قضاها السجين مع سجـّانه

ولم يشعر كلاهما بما انطوى عليه صدر الآخر
..............................
اترك الحب حتى يأتيك في موعده وذلك لأن من يحاول أن يحب قبل هذه اللحظة
كمن حاول أن يفتح قلبه بالسكين
سوف ينفتح القلب.. ولكنه سيظل طول حياته ينزف
.................................
لا أدري لماذا نلوم الحب نفسه بعد كل تجربة ٍ فاشلة
ليس ذنب النهر أبدا أن من سقط فيه لم يكن يستطيع السباحة
................................
أن تملك قلبا ً جميلا ولا تملك صديقا فأنت كمن يملك وجها جميلا
ولا يملك مرآة ليراه فيه
أما أن تملك صديقا جميلا ولا تملك قلبا
فأنت كالأعمي يقف أمام المرآة ويعلم أن صورته فيها ولكنه لا يستطيع أن يراها
....................................
كم هو مظلوم ٌ انسان ذلك العصر.. فقد عاش قبله عدد ٌ لا يحصى من البشر
في عدد ٍ لا يحصى من السنين ورغم ذلك فعليه دائما أن يفعل جديدا
................
في حياتنا بشر لم نفعل لهم شيئا لنستحق منهم كل ذلك الحب
ولكن علينا أن نفعل الكثير لكي لا نفقده
............................
ليست الهزيمة أن يجرحك شخص ٌ ما ان الهزيمة الحقيقية
هي أن يجعل حياتك تتوقف عند جرحه
...............................
أحيانا نضطر أن ندفن حبنا فينا وذلك لأننا نعلم جيدا أنه سيموت إذا رأي النور
............................
لا تفقد ثقتك في نفسك عندما تري بعض الناس
يديرون وجوههم عنك.. فقد يكونوا فعلوا ذلك خوفا من مواجهتك
و لا تظن من يكلمك واضعا يده في جيبه يضعها تكبرا عليك
فربما يكون وضعها ليخفى رعشته منك
...................
أحيانا نضطر أن نقول" نعم" رغم كل ما بها من تضحيات
و احيانا نضطر أن نقول" لا" رغم كل ما بها من ألم
ولكنهما في الحالتين أفضل من حيرتنا طويلا بين"نعم " و"لا

امتحان اجباري

السلام عليكم ورحمة الله

انا ضيعت البوست كالعاده من على الفلاشة

ربنا يعيني بقى والحق اكتبه تاني في النص ساعة دي

أولا متشكر اوي لكل الناس اللي ردت على البوسست اللي فات

وعشان ما اطولشي عليكوا انا رديت في آخر رد هناك

ثانيا..متشكر جدا بجد لكل الناس اللي افتكرت 22/2

عيد ميلادي-خليها ذكرى ميلادي أجمل- وخلت ليه طعم

وعاذر كل الناس اللي نسيته ..مافيش مشاكل يعني

انا اصلا مش بحتفل بيه خالص بس قلت بمناسبته

لازم اعمل حاجه مختلفة على المدونه فقلت ياواد يا حودة

لازم تروح ترخم على الناس الموجودة على المدونه...هو دا التجديد بقى

طب ما انت طول عمرك رخم يا محمود..ده رد مجموعه من اصحابي كده انا عارفهم

بيتهيألي كل حد زارني على المدونه دخل في حياتي اوي وعاش معايا تفاصيلها

فقلت لازم النهاردة انا اللي ادخل في حياتكم شوية..بس من بعيد

انا كنت كاتب كل الناس اللي المفروض تشارك النهاردة بس ضيعتها كالعادة

بس الناس دول هما انتو....يعني انتو الللي هتجاوبوا

بمعني تاني كل حد هيدخل تبقى الاجابة اجباريه عليه

و في اقرب فرصة ان شاء الله انا هجيب الاسامي تاني لاني كان نفسي اشكرهم واحد واحد

وهزعل من كل حد دخل وماشاركشي..هزعل بجد

كله جاهز

اللي معاه كتاب او مذكرة يشيلها عشان هنبدأ

...............................................

تخيل انك بعد بكرة ان شاء الله مسافر القمر...تخيل

وفاضلك بكرة ان شاء الله تقضيه على سطح الأرض

فيه عشر أسئله لازم تجاوب عليهم

.......................................

مين أكتر حد نفسك تسلم عليه غير والدك ووالدتك واخواتك..حد واحد

ولو ليك حق تاخد حد معاك هتاخد مين...الاجابة مفتوحة

.........................................

السؤال ده صعب وعشان كده هو اختياري بس ممكن الناس تجاوبه ولو من بعيد كده

حد نفسك أوي تعتذرله قبل ما تسيب الأرض؟؟؟؟؟؟؟؟؟

..................................................

بما أنا بحب الأكل شوية...هتقولهم يعملوا ايه تاكله قبل ما تسافر..وجبة ولحدة

.............................

واحد من الصحابة كان نفسك تقعد معاه شخصيا على الأرض

وشخصية تاريخيه بعد النبي صلى الله عليه وسلم طبعا كان نفسك تقعد معاها شخصيا

......................................................

هما هيدولك وانت طالع القرآن وكتب الاحاديث و ليك الحق في اختيار كتاب واحد كمان

هيبقى كتاب ايه او لمين

................................................

بعد شرايط القرآن طبعا ايه الشريط اللي ممكن تاخده او لمين...شريط واحد

........................

لو ادولك ميكروفون تقول فيه حاجة وكل أهل الأرض يسعموك قبل ما تمشي

اختار آية قرآنية تقولها

واختار حكمة بتحبها ومؤمن بيها تقولها

.....................................

حاجه كان نفسك تشوفها واقع على الأرض قبل ما تمشي

او حاجة كان نفسك تنتهي وما تشوفهاش قبل ماتمشي

........................................

لو ادولك ساعه فاضية بكرة تعمل فيها حاجة انت بتحبها

وخايف ماتعرفشي تعملها على القمرهتعمل ايه

.......................

انا نسيت سؤال

انا شكلي لازم أغير الميموري بتاعتي

..................................................

انتهت الأسئلة

خالص التمنيات بالتوفيق

دايما تلاقي الواحد يقوم خابطنا امتحان تمام ويكتبلنا كده في الآخر

.............................................

بالمناسبة بوست التلات اللي جاي مش هيبقى هنا

هيبقى مذاع أرضيا في قاعة ابن سينا عندنا في الكليه

في الدور التالت في كليتنا من الساعه واحدة للساعه تلاته

يوم التلات 3/3

انا هكتب الاسامي في اقرب فرصة تاني ان شاء الله

عشان ابقى دعيت كل حد باسمه وازعل بقى من كل حد مش هييجي

......................................

مستني اجابتكم بفارغ الصبر

سؤال لكل اصحابي اللي هيردوا النهارده

سؤال اجباري

هو محمود اللي بتقابلوه في الكلية هو نفسه محمود اللي بتقابلوه في المدونه

مش هزعل من اي رد

إلى أن أراكي..إلى أن أراك

السلام عليكم ورحمة الله
حاجة غريبة أوي بتدفعني اني أأجل كل الكلام اللي كنت جاي أكتبه التلات ده
عشان أنشر البوست ده اللي برضو حاجة غريبة خليتني أدرو عليه بعنف في
كل أدراج مكتبي وكتبي القيدمة ومشاعري
واكسر حالة الجمود اللي بمر بيها عشان آجي أنشره النهارده
البوست ده اهداء لمعنى الحب اللي شفته بيتهان باسم الحب
اهداء لكل حد جواه مشاعر شايلها للانسان اللي ربنا سبحانه وتعالي كاتبهوله
اهداء لكل حد نفسه يحب..يحب بجد ...يحب صح..يحب بصدق
يحب من غير ما يغضب ربنا
بس عشان كل الناس تحس القصيدة زي ماكتبتها
القصيدة عامية,انا عملت همزة على كل ألف بتتنطق وماعملتشي
على اللي المفروض ماتتنطقش ومديت اللي المفروض يتمد
عشان مافيش حتت موسيقاها ولا احساسها يقع من حد

وبـاسف لو كنت طولت وكتبت قصيديتين

بس كنت بحلم ان كل حد هيدخل التلات ده

يحس قصيدة مكتوبة على لسانه وقصيدة مكتوبة ليه

البوست ده من البوستات اللي مستني رد فعل الناس عليها جدا
وبدعي بجد يكون ربنا وفقني فيه
..........................................
إلى أن أراكي
...............
شئ غريب اني أحبك
رغم إني.. ماشفتكيش
واللي أغرب إن حبك
رغم ده ..قادر يعيش
بس عارفة
رغم احساسي بهواكي
عمري مارسمتك في صورة
بس راسمك يا ملاكي
قلب صافي وروح طهورة
روح هموم الدنيا ديّة
لسة مامليتهاش دموع
شايلة أحلامها الأبيـّة
رافضة تسليم أو رجوع

انت مين... مااعرفشي لسة
انت فين...مااعرفشي لسة
بس حاسس قلبي بيكي
وانتي رغم البعد..حاسة
يمكن المسافات ما بنّا
خطوة واحدة
ولا يمكن ألف ميل
بس في الحالتين بحبك
بس في الحالتين لا يمكن
سكتي لغيرك تميل
يمكن الزمن اللي بنا
ثانية واحدة..أو سنين
بس مش ممكن لغيرك
قلبي هيحس بحنين
انتي عارفة
كنت ماشي زمان بدوّر
انتي فين وسط الوشوش
كنت خايف لما اقابل
وشك الصافي البرئ
يستخبي ومااعرفوش
بس قلبي..بطل التدوّير خلاص
أصله بقى دلوقتي عارف
انه لمّا يحين لقانا
اللـُقا هيكون يا عمري
غصب عنا وبرضانا
انتي عارفة؟؟
انتي علمتيني..أمشي
والعيون للأرض ناظرة
زي ماتكون العيون
حوشتلك كل نظرة
حلمها لو يبقى أول
حاجة تلمحهااا..ضياكي
حتى قلبي
من زمان لملم مشاعره
لفـّها وحوط عليها
في انتظار لحظة لقاكي
انتي عارفة؟؟

لو ألوف حوليـّـا غيرك

عند قلبي مايفرقوش

مهما لف ومهما شاف

لما حط في عشي طيرك

حبك اللي ماشفتهوش

علم القلب العفاف

انتي عارفة؟؟
اني مش خايف تضيعي
انه مهما هيجرى هفضل
في انتظار أزهار ربيعك
تيجي يوم تحضن ربيعي
عارفة ليه
أصلي حاسس
ان ربنا ليّ شايلك
حتى لو خطواتي بعدت
عن مكانك..برضو جايلك
قلب مطمن عشان
ربنا وحده اللي عالم
أد ايه محتاج لحب
حب يملى القلب حب
شئ يخلي القلب قلب
حب يقدر
ينزع الشوك اللي ساكن بين ورودي
شئ يحلي الدنيا من تاني في عينيّا
شئ يحسسني بوجودي
حب يمسح
دمعتي القاسية اللي عاشت
من زمان تحرق خدودي

شئ يزلزل أرض خوفي
يفتح البركان لنار
من سنين جوايا عايشة
نفسها تفارق حدودي
حب بيه أكسر خيوط
عنكبوت حزني اللي عشش
من سنين جوة المشاعر
وارسمك ألحان تخلى
عزف عودي يشد عودي
حب فيه الرقة تقدر
بالحنين تكسر قيودي
حد جنبي
حتى لو ماعملشي حاجة يبقى جنبي
هو عامل كل شئ بوجوده جنبي
شفتي ليه مستني قلبي
ياللي مارحلتيش تعودي
كل دي أحلام ولكن
عشتها معاكي بفؤادي
ساكنة في ّ وفيها ساكن
كنت بيتها..بقت بلادي

كل أحلامي ومشاعري

في انتظار اللحظة ديّة
كل يوم أحاسيسي تعمل
عيد ميلاد
والشموع ما بتنطفيش
واللي فاضل حاجه واحدة
اللي هدّيها الهديّة
اللي فاضل هو إنتي ..وانتي فيّا
اللي فاضل بس اشوفك
يرتوي خوفي بأماااانك
يرتوي بأمااااني خوفك
والحنين حوايا يصرخ
ضمي أحلامي بكفوفك
اللي فاضل بس اشوفك
فين وليه وازاي وامتى
أسئلة من غير اجابة
عايشة تستني الاجابة

اللي فاضل بس اشوفك

وانتي هتكوني الاجابة

والمشاعر يومها تكتب

قصة خالدة ماتتنسيش

بس حتى لحد لمـّا

تيجي بكرة الحظة ديّة

ماتخافيش

قلبي هيصون ليكي حبه

رغم اني ماشفتكيش

......................................................

........................................................

إلى أن أراك

.................

أنااا حاساك

وليه بتقول أنا بعيدة

بعيد جسمي و روحي معاك

أنا حاساك

صحيح الذكريات بتكون

لناس في الماضي شفناهم

وانا من غير مااشوف قلبك

بشيل في القلب نور ذكراك

أنا حاساك

هنااا روحك ومش عارفة

حبيبي ازاي تكون روحك هنا وهناك

أنااا جنبك...أنااا حواليك

أنا الوردة اللي مزروعة في نور قلبك

وفاضل بس تقطفها في يوم بايديك

وتزرعها في قلبي البـِكـْر من تاني

عشان تطرح ورود في هواك

أنا حاساك

وفارد قلبي جناحاته

ومستني

يادوبك كلمة المأذون

عشان يقدر يطير في سماك

وأول ايد هتلمسني

تكون ايدك

ونهر الحب من قلبي

يصب الحب في وريدك

وتشبع من دفااا قلبي

يضمك قلبي ويزيدك

وترتاح غربتي في مرساك

وقلبي يبوووووووح

بشوق طول السنين مداريه

حنين الروح

يدوب فينا ندوب حواليه

و أي جروح

مادام مع بعض تفرق ايه

مادام الحب يا عمري

ملاني بالأمل وملاك

مافيش في الكون دموع يا ملاك

ومش فارقة..ولا أطيان ولا أملاك

مادام حاساك

تكون كوني هكون كونك

يكونلك قلبي ويكونك

ولو فكر في غير يومك

هيبقى كإنه بيخونك

لاني قفلته من قبلك ومن بعدك

عليك انت

ومفتاح قلبي سبته معاك

بلاش الحيرة في عيونك

لان ملامحك المرسومة فوق لوحتي

لا يمكن يوم يلوّنها

ولا يكملها غير لونك

لإني بضحكتك راسماك

أكيد الصورة مش زيك

ونورها شوية من ضيك

دي صورة بنت تلميذه

في مدرستك

وقاعده لوحدها في الفصل

بترسم فيك

ومش خايفة على الصورة

مادام هيكون معاها الأصل

لكن حاولت يكون وياها لو صورة

لحد ما ييجي وقت لقاك

وماتخافشي

لإن عينيا مهما تشوف

مابين العين ونظرتها أنا شايلاك

أنا حاساك

ومش زي البنات بحلم

تشيل قلبي على حصانك

أنا كل اللي بحلم بيه

أشوف في عينيك بصيص فرحة

بقلبي عشان

سنين رغم الجراح..صانك

وكان وياك ومش وياك

وبدعيلك

في كل دقيقة بدعيلك

ولو بإيديا والله

لكنت هجيب ضيا نهاري

وهغسل بيه ضلام ليلك

واكون نجماية مالية سماك

أنا حاساك

وقلت كتير وعدت كتير

وكل كلامي يا حبيبي

خلص في الحب ولا كفـّى

ميزان قلبي

في بعدك عني مستني

مشاعرك تعدل الكفة

سفينة قلبي بر وبحر ماشيالك

وعملت من هواك مجداف

وعملت ضحكتك دفــّة

وتفرح قلبي يفرح بيك

يكون زي الحصون حواليك

عشان تحميك

تكون على ضحكتك لافــّة

هتبكي..القلب هييشيلك وهيضمك

كإنك نونو في اللفة

وعفة قلبي هغسلها

في بحر هواك تزيد عفة

و أجمل زفة لما تكون

واقفلي امام

وانا واقفة بصلــّي وراك

وطايرة ملايكة حوالينا

أكيد في الكون مافيش أحلى

ولا اجمل من كده ..زفـّة

عشان كده هفضل استناك

يفوت العمر ولا بنساك

بلاش يقلق على الزمن الي جايْ بالك

أنا جايّة وجايبالك

حنين قلبي ينور بالأمل دنياك

وبكرة الدنيا تجـْمعنا

عشان تتفسر الأحلام

ماتستعجلشي يااا عمري

مافيش أقرب من الأيام

مادام ربك كتبنا لبعض

فمهما يكون هنبقى لبعض

لا ممكن تبقى لسوايا

ومش ممكن هكون لسواك

صحيح أنا لسة مش عارفاك

لكن حاساك

وهفضل مهما كان حاساك

أناااا حاساك

مش أنا كتبت قصة؟؟

السلام عليكم ورحمة الله

أنا كنت داخل أعتذر عن بوست بكرة ان شاء الله

عشان مش هقدر أدخل نت

بس قلت مادام دخلت نت ولو خمس دقايق لازم اكتب بوست

ومالاقيتشي حاجه أنشرها غير القصتين القصيرتين دول

هو الموضوع والله يا جماعه جه صدفة

أنا لا بكتب قصص ولا لي فيها

بس وانا رايح أقدم في مسابة الزجل بتاع السنادي سمعت عن مسابقة القصه دي

وكان في دماغي فكرة كده قلت طب ما أكتبها ..هخسر ايه

وكتبتها وسبحان الله ربنا كرمني بالمركز الأول في الزجل والتاني في القصه

سبحان الله أنا أكتر واحد مستغرب من موضوع القصة دي..دا فضل من ربنا والله

اما القصة التانية فكانت مسابقة عن التضامن مع غزة على هامش اسبوع شباب الجاماعت السنادي

ماعرفتش اي حاجه غبر القصة دي برضو

انا بس بأكد تاني اني مش بفهم في الققص ولا اسلوب كتابتها

بس كتبت وقلت هتستحملوني المرادي ان شاء الله

......................................

بائع العسلية

لا أدري كيف إستطاع أن يقفز في الأتوبيس أثناء سيره
ربما كانت مسألة تعود أكثر منها مسألة لياقة
إنه بائع العسلية
ولم أعلم أيضا كيف استطاع أن يشق بجسده الضعيف كل ذلك الزحام داخل الأتوبيس
ربما كان ذلك لأنه اعتمد على لسانه وليس على قوته البدنيه
فهو دائما ما يكرر.....
"على جنب كده يا أستاذ....لو سمحتى كده يا أبلة...عديني يا باشمهندس"
وغريب ٌ أنه كان يكرر نفس الكلمات رغم اختلاف الشخصيات التي أماه في نوعها وهيئتها
ولكن الأغرب كان ذلك الانصياع اللا إرادي من كل ركاب الأتوبيس
وكأننا كنا جميعا ضيوفاً في ممكلته الصغيره
ومن قبل ان تطأ قدم بائع العسلية الأتوبيس كانت عروضه المغرية تتوالي
"الواحدة بربع..الخمسة بجني....العشرة باتنين جني"
و تخيلت للحظه أنه من طول ما كرر هذه العروض فهو يقولها حتى حينما يذهب إلى سريره
هذا إذا سمحت الظروف وامتلك سريراً
و رغما ً عني أخذني تفكيرى للقيام بدراسة جدوى لمشروعه الصغير
ولكنني وبعد تفكير ٍ طويل ٍ لم أستطع أن أصل إلى هامش الربح الذي
يرسم في عينيه كل هذه السعاده مع كل عسلية واحده يبيعها
ولم أستطع أيضا أن أكتشف مدى تأثير الأزمه الاقتصادية العالمية على مشروعه الصغير
أم أن مثله وأمثالنا كنا أضئل من أن تؤثر علينا؟؟؟
ترى هل سمع أصلاً عن الأزمه الاقتصادية أم أنه لا يجد وقتاً بعد يوم ٍ طويل ٍ من العمل
ليفتح التلفاز ويسمع النشرة
هذا إذا سمحت الظروف وامتلك تلفازاً
ولكن بائع العسلية لم يشغل باله بالتفكير مثلي
فقد بدأ توزيع العلسيه بأقصى سرعه ..وأخذ يرميها بدون توقف إلى زبائنه
أو بمعى أصح على زبائنه
غير مهتم ٍ بأولئك الذين رفضوا استلامها منه
فهو يريدنا جميعا- على حسب قوله- أن نأخذ فكرة
وهو دائما ما يقدمم مبرراته واغرائاته لنا لنتشتري العسليه
"حلى بؤك يا أستاذ..نشط مخك يا أفندي..فرحي بنتك يا أبلة"
أخيراً انتهى بائع العسليه من توزيعها
والآن عليه ان يعود إلى مقدمة الأتوبيس من جديد ليجمعها
أو يجمع ربع جنيه مقابل كل عسلية فارقت كيسه
لفت نظري بشدة أن كثيرا ً من الركاب لم يلتفت إلى البائع
لا عندما رمي عليه العسليه ولا عندما إلتقطها من "حجره"
ربما لم نعد نبالي بكثير ٍ مما يجري لنا تحت شعار"ماجاتشي على العسلية"
و رأيت كيس العسليه يمتلأ من جديد
و أحسست وكأن العسليه قد تدربت على عملية مفارقة الكيس والعوده إليه من جديد
فهي تعود بخفة ٍ ورشاقة ٍ وتنظم نفسها بدون أدنى تزاحم مروري
و تخيلت أن كيس العسلية قد انقسم نصفين
قسم ٌ يحتفل بزفاف إحداهم إلى معدة الزبون تاركة ً لهم مساحة أكبر في الكيس
وقسم ٌ يتقبل التعازي في فقد إحداهم بعد فترة ٍ طويلة من العشرة في نفس الكيس
وبعد إتمام المهمه بنجاح قبل بائع العسليه ما جمعه من جنيهات ٍ معدودة وهو يردد..الحمد لله
وكان عليه أن ينزل بأقصى سرعة ليقفز في الأتوبيس المقابل
ولكنه للأسف الشديد لم يقفز فيه و إنما... قفز أمامه
ليموت بائع العلسيه ضحية ً للعسلية بين حزن وحسرة كل ركاب الأتوبيس
لكنني ورغما عني ابتسمت
لأنني تذكرت أن آخر كلمة ٍ رددها كانت
الحمد لله

............................

تحت الأنقاض
خطوتان بعد المعبر و بدأت رائحة الموت تشق أنفي شقا ً
لم تكن رائحة الجثث ولا رائحة الدم وقنابل الفسفور
إنها رائحة الدم التي امتزجت بها رائحة الدموع وبخرتها حرارة القلوب التي رفضت الإستسلام
ورغم لهفتي الشديدة أن أفعل شيئا أعيد به شيئا من الحياة لذلك الحطام
إلا أنني لم أكن أدري أين أترك خطواتي المتلهفه تنساب
فقد كان كل ماحولي حطام
ورغم ذلك فإني لا أري ولا أسمع أشخاصا ً تطلب تضميد الجروح
ولا تتهافت على شنطة المضادات الحيوية في يدي
ومضيت خائفا ً أراقب خطواتي كي لا تدوس على الأشلاء التي أراها في كل مكان
وساقتني خطواتي دون قصد نحو سيدة ٍٍ تبحث بكل لهفة ٍ تحت الأنقاض
رغم أنهم أخرجوا زوجها و أولادها الخمسة شهداءا ً من تحت هذه الأنقاض
وكل من حولها يتعجبون من هذه اللهفة الشديدة وكأنها ظنت

ان أرواحهم لا تزال تحت هذه الانقاض و تعجبت مثلهم وسألتها
أمي عما تبحثين-
لن تفهم-
بالله عليك قولى فقط....فأنا طبيب ٌ مصري أرسلونا لكي نساعدكم..بالله عليك قولي-
- إن الأمر أكبر من أن تفهمه عقولكم أو تقدره قلوبكم-
و أخذت أبحث معها ولا أدري عما أبحث
ربما تبحث عن نقود ٍ أو ذهب؟! ولكنها لم تلتفت إلى أسورة ٍ ذهبية ٍ برقت لعيونناا
ولم تلتفت حتى حينما إلتقطتها وناديت عليها لكي تأخدها مني
ولم يكن يعنيها أي شئ من حطام البيت
إن الأمر إذن أكبر من أن أفهمه حقاً
ولم أكن وحدي فالكل بدأ البحث معنا سواءاً ممن تعاطفوا مع لهفتها أو ممن دفعهم
الفضول ليعرفوا أي كنز ٍ ذاك الذي الذي شغلها عن جثث زروجها و أطفالها
وبعد ساعتين من البحث بدأت ألمح على شفتيها إبتسامة ًبطعم

وبدأت يديها تتسابق لتزيل كل ما يمنعها من الصول إلى ذلك الشئ الذي لمحته
إنه مجرد دمية
دمية!!!!كل هذا من أجل دمية؟1
سؤال ٌ دار في عقولنا جميعا ولكن لم يجرؤ أحد ٌ منا أن ينطقه
ولكنها بادرتنا بالإجابة على ذلك السؤال الحائر في عيوننا جميعا
إنها دمية طفلتي الصغيرة إسراء
من شهرين كنت معها في عودتها من المدرسة ورأينا هذه الدمية معاً

وطلبت مني ان أشتريها
ولم يكن معى حتى ثمن الطعام فإعتذرت لها

و أنا اتمزق من داخلي فلم يكن ذلك حقا ًبمقدوري
وأخذت اجمع الشئ القليل إلى الشئ القليل حتى جمعت ثمنها
وخرجت رغم القصف حتى أشتريها لها فكم كنت أخشي ان يصيب
القصف إحدانا ولم احضر لها دميتها
ورأتني من بعيد ٍ وفي يدي الدمية فحاولت أن تخرج فناديت عليها وطالبتها بالبقاء
وحينما إقتربت طالبتني ان أقذفها لها فقذفتها وحين فتحت ذراعها إحتنضت الصاروخ
وماتت أمام عيناي ولم أكن لأحرمها من دميتها التي تمنتها حتى ولو بعد موتها
ووسط دموعنا جميعا قامت فقبلت أولادها ووضعت الدمية في أحضان إسراء
وقالت الآن يمكن أن أصلي عليهم
أما أنا فحينها فهمت لماذا وبعد ستون عاما ً مازال نفس الصمود باقيأً
وتأكدت ان قنابل الصمود أقوى مليون مرة من قنابل الفسفور
و أن مثلهم سوف يعيش شاء أم أبى اعدائهم

وان مثلي وبعد عشرون عاماً من التعليم لازال بحاجة ان يتعلم الكثير

ولكن هنا..في مدرسة الصمود

خربشات

السلام عليكم ورحمة الله

احترت كتير جدا ايه اللي ممكن أكتبه النهارده بعد شهر كان صعب علينا كلنا

خصوصا اني بقيت دلوقتي بحس اني يوم التلات ده كإني

خارج من البيت ورايح أزور خمسين بيت مثلا لان فيه ناس هنا

ربنا يكرمهم بيوروا البوست لاخواتهم او لأبهاتهم وامهاتهم ربنا يبارك في عمرهم جميعا

وده بيصعب على المهمه اكتر لاني بتمنى عمر ماحد يدخل المدونه ويخرج منها زعلان

مالاقيتشي أدامي النهارده غير اني أرجع بجزء من أجزاء تهييس مذاكرة لو فاكرينه

أنا بصراحه بحب الخلطبيطه دي أوي..بحس انها بترسمني

مش هطول في المقدمه زي كل مرة

وكالعاده انتو لازم تختاروا ..بس خربشتين أو تهيسيتين المرادي

..........................................

إن القلوب التي تحب تستطيع أن تغفر كل الخطايا التي أرتكبت

في حقها إلا الخطايا التي أرتكبت نحو ما بداخلها من حب

.............................

‘ان المعادلة الصعبة في معاملة زوجتك أن تشعرها بأنوثتها في

نفس الوقت الذي لا تنسى فيه أن تشعرها برجولتك

........................

وكيف النصر إن كانت مساجدنا...غدت تشكو إلى الرحمن طول الهجرْ

سيأتي النصر إن صارت مساجدنا...بنا ملئى صفوفاً في صلاة الفجر

................................

يرى الأعمي أفضل منا جميعا إذا أطفئت الأنوار

ولمقطوع اليدين قدمان أقوي من أقدامنا جميعا

ليس العجز ان يكون لك نقطة ضعف..ان العجز ألا تسطتيع أن تجعلها أقوى مافيك

.................................

غصب عني لاقيتني راجع...ليك ورافع ألف راية

قلبي ما استحملشي بُعدك...والحنين احتار معايا

حتى لما داريت في نفسي...نفسي حنت من ورايا

.............................

إذا رأيت المرأة ولم تكلمها فأنت لم تراها بعد

.............................

حينما تيأس من وحود الخير في هذه الدنيا فحاول أن تصنعه بنفسك فربما

تأتي اللحظه التي ييأس فيها إنسان ٌ مثلك فيجد فيك ذلك الخير الذي افقتده

........................................

أهـــــــواك مهما حاولوا تفريقنا....لا تيأسي فالوعد لن أنساهْ

وهواك باق ٍ في ضلوعي ما بقى....بين الضلوع يدق نبض حياه

........................

كلما زادت نظرة الناس لنا احتراما ً كلما كان صعباً ان نحافظ عليها

وذلك لأن الخط الأسود يظهر بسهولة كلما زادت الصفحة بياضاً

..................................

من شعر الفخر

أنا واد رجــــــولة وواد خطر...والسمعة زي البنسلين

insulin أنا قلبي يبقي الـ....sugarولو الجروح هتكون

ودفنت كل الخوف زمان...وعملت دمعي الفورمالين

ما اقبلشي حد يدوس على....قلبي ولا يخليه حزين

واللي هييجي يهدني....لازم يشوف هيهد مين

spleenتبقى massمش كل طير لحمه طري...ولا أي

ايييييييييييييييييييييييييييييييه..فين أيامك يا عنترة تشوف شعر الفخر وصل لحد فين

.............................

تمهل كثيرا قبل حبك الأول فنحن بدون حب كتائه ٍ في صحراء يبحث من سنين

عن شربة ماء وفجأة ً وجدها أمامه

فقد يكون حظه سعيداً ليجد مائه نقياً منذ البداية وقد تعميه شدة العطش عما بذلك الماء من سموم

............................................................

جميعنا ظلمنا الحب حينما اتهمناه أنه أعمى...فعيون الحب ترى أفضل منا جميعا وليس

ذنبه أبداً أنه أسلم نفسه لقلوب ٍ تهوى أن تجرّه نحو الظلام

...................

حتى لو احنا سنين ضايعين..بين إحساس الجوع والقهر

مع اننا دايـــــــما شايلين...حمل تقيل يقطم في الدهر

مع ان الدمع لو اتجــــــــمّع...ممكن يعــــــمل مليون نهر

مع ان الـــــــــكل بيتعذب .......وبيتــــــألم سر وجهر

حتى لو احنا قبضنا مرتب...يخلص يوم واحد في الشهر

لكن قلبي يا مصر هيفضل...برضو يحبك طول الدهر

...................................................

ان أصعب أنواع الحب ان تحب من لا يحبك..ولكن الأصعب أن

يحبك من لا تحبه بعد أن تكون قد تذوقت مرارة النوع الأول

...............................

لا تكن كالكومبارس الذي أتته الفرصة لأداء دور أكبر فحاول

أن يخرج فيه كل قدراته التمثيله ففشل

ولكن عليك ان تعلم أن البساطة التى تؤدي بها دورك الآن سوف تعطيك في المستقبل أدوارا ً أكبر

........................................

ولدنا وداخلنا فراغات ٌ كثيرة ..فراغ ٌ يملأه الحب وفراغ ٌ تملأه الصداقة وفراغ ٌ يملأه النجاح

ولكن يبقى ايماننا بالله هو الشىء الوحيد القادر على ملئ كل هذه الفراغات في وقت ٍ واحد

.........................................

في انتظار تعليقاتكم واختياراتكم

كي لا تذوب الشمس

السلام عليكم ورحمة الله

يارب تكون كل الناس بخير

انا متشكر أوي لكل الناس اللي وقفت جنبي الفتره اللي فاتت

ولكل الناس اللي طلبت مني اني أكتب النهارده

بجد جزاهم الله خيرا

وكلمة الشكر اللي كان ممكن أقولهالهم ان أرجع و أكتب النهارده

وآسف ان كنت لضيق ذات النت مش برد على ردودكم رغم اني بقراها كلها

ولا سألت عن الناس اللي غابت عن التعليق ولا رحبت بالناس اللي علقوا هنا لأول مرة

بس أكيد انتو عاذرني ان شاء الله

أنا هكتب النهارده شويه خواطر من مواقف حصلتلي من التلات اللي فات لحد التلات ده

وليه لأ

أكيد كلمة حالة اختلفت بالنسبالنا كتير-اقصد طلبة الفرقه السادته-عن قبل كده

لان الحالات ماعادتشي بروفيشينال زي عز ورجب وصابر والحزب ده

واكيد نفس الشعور ده يحسوا الناس اللي في الأطفال في خامسة

الأسبوع اللي فات كان عندنا حاله في الرواند

ست كبيره-حوالي خمسه وأربعين سنه مثلا- عندها فتاق

بسم الله ماشاء الله وشها مليان طيبه كده تشوفها تحس انها خالتك او عمتك

خرجت من الرواند لاقيتها واقفه ومش عارفه تروح فين

مشيت معاها أوصلها وجينا في نص السكه ولاقيتها بتبكي بحرقه وبشده أوي

وسألتها كتير عن السبب وكانت مابتردش وتبكي زياده

وفي الآخر طبطبت على وسابتني و أصرت انها تمشي لوحدها

بصراحه كنت عاذرها مع ان زمايلي كلهم ربنا يكرمهم كانوا بيعاملوها كويس جدا

وماحدش حط ايده غير لما استئذن منها بس أكيد مهما عملنا الموضوع كان صعب عليها

يوم الأربع أنا اللي كان على الحاله واستئذنت منها وكانت بنت أكبر مننا بحاجه بسيطه

وشيتنا الحاله ورحت يوم الخميس أوزر عم أحمد- ده واحد جاري وقريبي-في عنبر الرجال

و شاء ربنا انهم كلهم كانوا مجعمين وبيشربوا شاي وعملولي معاهم

وقعدت في وسطهم...كانت كوباية شاي جميلة جدا

مش في طعمها على أدم ما القعده معاهم ببساطتهم وطيبة قلبهم والدم الفلاحي الخفيف ده

والاهم كان فرحتهم بالواحد لمجرد اني شربت معاهم شاي

عارفين الحاج فارق بتاع الباروتيد تيومر اللي عنده ييجي خمسه وسبعين سنه ده

كنت بهزر معاه واقوله البنات عندنا ماعادشي ليهم سيرة غيرك يا عم فاروق

احنا رايحين عند الحاج فارروق ابو عينين زرقه جايين من عند الحاج ابو عينين زرقه

يتبسط أوي ويقول هما اللي بييجوا والله أنا ماقلتلهمش ييجوا

ويطلعلي الصور اللي لسه متصورها ويوريهالي ويقوللي شوف أنا طالع حلو ازاي

اقوله زي العسل يا عم الحاج بس دي أكيد صور ابنك ويضحك اوي

بعدها وقبل ما أروّح قلت أبص على الحاله اللي كنت مشيتها امبارح

فرحـِت جدا اني رايح أبص عليها عادي كده مش عشان آخدها الرواند

واللي كانت فرحانه جدا برضو حاله اسمها نوال

عشان زميلنا محمد رسلان-حد من الناس المحترمه والطيبه جدا-جه زارها مخصوص امبارح

وقعدت كلت معاهم...انا كنت جعان بصراحه

أنا حكيت كل ده عشان تفهموا منين جاتلي الفكرة اللي هقولها دي

انا بقترح اقتراح بسيط جدا

ان كل اتنين تلاته أربعه خمسه شيتوا حاله علاقتهم ماتنقطعشي بيها بعد الشيت

لان الحاله ده انسان زيه زينا ومربيين ناس زينا واحسن مننا كمان

لان الحاله مش مجرد آلة زي الترمومتر والسرنجه بنستعملها ونرميها

وناخد منها كلمتين ونعمل عليها اكسامسنين ولا كأن اللي معانا ده بني آدم

اللي شيتوا الحاله بس كل يوم يروحوا يبصوا عليها بس...يبصوا بس

مش هتكلفنا أي حاجه..خمس دقايق كل يوم..بس حاجه كبيرة أوي عندهم

ونكسر الحاجز اللي بنا وبينهم ونخفف من الألم النفسي اللي احنا بنسببهلهم في الرواند

ولو الحاله مش مقتدرة ماديا احنا ممكن نساعدها بصورة شيك اننا ندفعلها تمن الأشعه مثلا

زي ما أي حد بيدفع لحد أجرة المواصله مثلا..من غير مانحرجهم

وده مش تواضع مننا أبدا يا جماعه واللي يفتكر انه كده يبقى مايعملشي كده أصلا

الناس دول مش أقل مننا أصلا عشان يبقى تواضع

دول زي ما قلت زينا و أحسن مننا كمان

هو مجرد اقتراح أتمنى كل الناس تساعدني في توصيله

يمكن تكون حاجه كويسه لما نعلمها بنية زيارة مريض وادخال السرور على قلب مسلم

وتكتب في ميزان حسناتنا كلنا ان شاء الله

وليه لأ؟؟؟

.......................................

انا عايز أكتب كلام كتير تاني بس أنا طولت أوي في النقطة اللي فاتت دي

هخلي كل الكلام لمرة تانيه ان شاء الله بس حابب بس أحكي

عن موقف شفته في أحداث غره دي كلها

قبل أي حاجه عايز اقول ان وقف اطلاق النار ده اختبار لينا

ياتري كل المشاعر دي كانت شوية هيجان وهيخلصوا دلوقتي؟؟؟

ياتري قدروا فعلا يشغلونا بغرة وينسونا ان القضيه قضية فلسطين كلها

وان الحفر تحت المسجد الأصى مستمر لحد اللحظه دي

كلنا لازم نسأل نفسنا السؤال ده

....

الست دي أبكتني أكتر من أي صورة ومن أي مشهد ومن أي كلام

رغم انها هي ما بكيتشي

كان المراسل بيسألها عن تلاته من ولادها ماتوا وهي تقول

الحمد لله

عن جوزها اللي لسه تحت الأانقاض تقول..الحمد لله

عن مصير ابنها اللي في بطنها تقول ..الحمد لله

صمود وعزة وصبر ماشفتش زيهم

صمود بيبعت رساله تتفهم من غير كلام

صمود قدر يستفزني اني أكتب بعد عجز تام عن مجرد التفكير في الكتابة

على لسانها كتبت هذه الكلمات البسيطه جدا

واللي ماتجيش أي حاجه جنب الاحساس اللي وصلتهولي

كي لا تذوب الشمس

....

لا تذرفوا دمعا ً على ّ فإنني
قد ضقت ذرعا ً بالبكاء وبالعويلْ
لا تحسبوا قلبي تجمّد داخلي
إن فارقــَت خدي الدموع فإنها
شقت بقلبي ألف نيل
لكنني أعلنتها
ً ًمن جاء يطلب في دموعي ذلــّـة

فأنا بصبري سوف أجعله ذليل
ارجع بجيشك خائبا ً يا أبرهه
أنا لن يـُـلين عزيمتي مليون فيل
لا لن يسيل الدمع من عيني أنا
لن أنحني..فائذن لدمعك أن يسيلْ
اقتل وليدي..سوف يحيا داخلي
وتعيش ترشـُف أنت طعم الموت في أوطاننا
أعلمت يا رعديد من فينا قتيل؟

يا أمة ً باعت ضياها للدجى
ودليلها لا زال يبحث عن دليل
لا تيأسوا فأنا هنا
رمز الكرامة في بقايا امتى
و أنا برغم الحزن فارسها النبيل
رغم العطش
قلبي أنا سيظل للعطشى سبيل
نفسي تهون لأجل شبر ٍ واحدٍ ٍ
فالشبر في وطني وطنْ
وجميع ذاك الكون لا يكفي بديل
لو أنجبت بطني هنا
في كل ثانية ٍ بطلْ
سيسوقهم قلبي ضحايا للوطن
وبرغم ذاك أراه ما ردّ الجميل
لو فقد قلبي كل من سكنوا به
ففداك يا أقصى قليل
فليقصفوا وليغلقوا كل الحدود
يبقى سلاح ٌ لن يلين لقصفهم
هو ذلك الصبر الجميل
ويظل في رحمي الصغير معسكرٌ
تتعلم الأطفال في أرحامنا
حمل السلاح وكيف يُنتزع الفتيل
لا يأس لا أحزان َ لا دمعا ً هنا
فهنا الأمل
هل يستطيع عدوّنا قصف الأمل؟
لا بل سيحيا نابضا ً جيلا ً فجيل
أجساد شهداء الكرامة أصبحت
سدا ً منيعا ً سوف يبقى شامخاً
كي لا تذوب الشمي في بحر الأصيل
مادام للأقصى جنود ً مثلنا
فسقوط وطني
مستحيلٌ مستحيل ٌ مستحيل