هام جدا

السلام عليكم ورحمة الله

انا هنا انا وكتير من أوي من زمايلنا في مؤتمر كارديو ايجيبت

ربنا كرمني وعرفت أوصل لنت في المنطقة الغريبة دي

يمكن مش هعرف أكتب بس فيه حاجتين مهمين جدا لازم أقوللكم عليهم

يمكن مش هعرف أكتب بس فيه حاجتين مهمين جدا لازم أقوللكم عليهم

اول حاجة ان ربنا كرمني واتفقت مع واحد من شيوخ الجمعية الشرعية

ان لو اي حد مننا قابلته حالة محتاج تعمل أشعة رنين مغناطيسي فهمـّـا ان شاء الله

هيعملوهالها في مركز الأشعة في مدينة نصر

من كلامهم المركز مجهز جدا وموثوثق بيه جدا بس انا بصراحة مارحتش بنفسي

هو فيه كل الأشعة بس أشعة الرنين غالية جدا على ناس كتير

فلو الحالة مش حالة مستعجلة ومطلوب منها ده ومستعدة تستحمل مشاور مصر

حد يكلمني وانا هتفق مع الحالة وهقابلها في القاهرة وهروح معاها ان شاء الله

وهما هيعملولها الأشعة بالمجان ان شاء الله

............................................

تاني حاجة هي فكرة التبرع الدوري بالدم

الموضوع ده كنا اتكلمنا فيه قبل كده والحمد لله كنا وصلنا لأكتر من عشرين كيس دم

بس ربنا قدر ان الموضوع يتعطل لما حادثة أصحابي اللله يرحمهم حصلت

اللفكرة انطرحت من جديد في تجمع صغير كده كنا عاملينه

والفكرة دلوقتي ان الموضوع يبقى بشكل دوري كل أربع شهور

والحمد لله دلوقتي معايا عدد كويس من الأسامي

ولسة هينضاف عليه ناس ان شاء الله

واجمل حاجة في الموضوع ااننا هنتجمع على الخير وهنشجع بعض

ومش عايز الشيطان يدخل لحد من باب ان ده رياء أو أي مدخل تاني

مادام نيتنا خير ان شاء الله ربنا هيكرم

اللي عايز يشترك معانا بأي صورة يتصل بيا على نمرة من دول

0185856476

0199849267

أو على الميل

now_tears_smile@yahoo.com

وانا هكتب اسمه وهبلغه امتى هنروح ان شاء الله

.......................................................

حاجتين خاصين بيا

أنا ان شاء الله بنسبة تسعة وتسعين في المية هاخد امتيازي في القاهرة

الموضوع ليه أسباب كتير اوي وحاجات كتير اتدخلت فيه

المهم ان ربنا قدر ليا في ألآخر كده وانا حابب كده

ومش معني كده أبدا ان هسيب اخواتي واصحابي وزمايلي في طنطا أبدا

انا كان جوايا حلم بحاول انفذه ليهم وكنت زعلان اوي وانا ماشي

بس لقيت الجوهري وزمايلنا في أسرة الرأي بدأوا في تنفيذه وان شاء الله

هيعلموه أحسن مني مليون مرة وهو مشروع الفريق الطبي

اللي هو باختصار انهم هيحالوا يستفيدوا من فترة الامتياز ومن كل الدكاترة

ربنا يكرمهم وانا ان شاء الله هحاول أكون معاهم

ولسة برضو جوايا حاجات تانية نفسي أعلمها ليهم حتى وانا هنا

بس مستني أما المواضيع تكمل واقوللكم ان شاء الله

..............

آخر حاجة متشكر جدا لكل الناس اللي هنتني بذكري ميلادي على الفيس بوك

ربنا يكرمهم ويفرح قلبهم زي مافرحوني بمشاعرهم دي

.....

آخر حاجة مش عايز حد يتصدم في تقديري التراكمي....كفاية صدمتي

يمكن سنة اولي وسنة سداتة نزلوني كتير بس الحمد لله

وهو ربنا شاء كده عشان يوديني في مكان هو شايفه أحسن ليا...الحمد لله على كل حال

وألف مبروك لكل زمايلي اللي ربنا كرمهم

فرحتي ليهم تضيع اي حاجة

وزمايلي اللي زي حالاتي كده ان شاء الله نصبر ونحتسب وربنا هيعوضنا خير ان شاء الله

...........................................

دعواتكم

تهييس مذاكرة

السلام عليكم ورحمة الله

السلام عليكم ورحمة الله وبركاته

اني أكتب تاني يوم التلات دا شئ كنت مفقتده جدا

وعندي كلام كتير نفسي أقوله بخصوص مشاعري دلوقت

بس بلاش عشان انا عارف ان فيه ناس بتتضايق من المقدمات الطويلة

فكرت ازاي و ايه اول حاجة ممكن أكتبها بعد الغيبة الطويلة دي

لاقيت ان أنسب حاجة إني أكتب كل حاجة...لو تفتكروا موضوعين كنت

كتبتهم فيهم تهييس مذاكرة سنة خامسة,,,الحاجات اللي بقعد أهذي فيها وانا بذاكر

ولو إنه كان صعب عليا أوي أفتح كتبي في الوقت ده بس جمعت حاجة كام كده من شوية كتب

وامبارح وانا في الجامعة ضيعت الكشول اللي كنت كاتبهم فيه وضيعت معاه

نسخة كنت محتفظ بيها لحاجات كتير من اللي كتبتها رجاءا يا جماعة لو حد لقاهم

يجيبهم لإنهم غالييين عليا اوي...بس عشان ما أطولشي أكتر من كده

انا هحاول اكتب من الذاكرة على ما الاقي الكشكول وأكتب بقية الحاجات ان شاء الله

ومعلهشي هي حاجات مش على أد المستوي ...هي مجرد حاجات بطلع فيها همي وانا بذاكر

لحد هنا ممكن الناس تنزل تقري البوست وتفوّت الكلام اللي بألأحمر تحت ده

أنا بس حابب أعتذر مرتين يمكن أستريح شوية

بعتذر لناس كنت المفروض هنزلهم من اصحابي في بلاد تانية ومانزلتش

لأني اتجبست تاني امبارح...انا والله حاولت أتفادى مووضوع الجبس ده

وقلت هسيب صابعي ده يلم مع نفسه مع انه ماكانشي بدأ يلم لسه

حتى عشان ماحدش يسألني السؤال الي بيضيقني بتاع....كل ده عشان صابع

بس كنا في مصر أول امبارح و واحنا طالعين نركب على باب المترو

واحد من الناس اللي نازلة نزل على صابعي بكعب جذمته هرسه

والله حسيت بصابعي وهو بيتفلق وعلى ماورحت لاقيت كل رجلي من أدامي مورمة

وحتى وانا رايح الجامعة في الميكروباص

واحد فتح الكرسي اللي أدامي عشان يقعد وقام منزله على رجلي

أنا حسيت إن صابعي مستهدف ولاقيت انه مافيش حل غير ان رجلي تتجبس تاني...واتجبست

وتاني اعتذار لناس كتير منكم

في سنة تالتة كنت ناشر قصيدة الآن تيتسم الدموع في معرض الكلية

وربنا كرمني بنجاح كبير الحمد لله

ساعتها اختي الكبيرة قالتلي كلمة عمري ما بنساها...

قالتلي ذاكر يا محمود عشان كل حد هييجي يبص على شعرك هييجي يبص على نتيجيتك

بعتذر لاي حد جه يبص على نتيجتي ومالاقهاش زي ما بيمتتني ليا

أنا والله حاولت بس ربنا شاء كده و انا راضي الحمد لله

أسيبكوا مع النهييسات...ولازم كل واحد يختار واحدة أو اتنين

انا عارف ان فيه ناس بتستغلش موضوع الاخيتار ده بس هو بيمثلي معني محتلف

وانا كمان هختار بعد ما أكتبهم ان شاء الله

.............................................

عندما تكتشف في النهاية أن كثيرا ً ممكن تحبهم خانوك

ستحزن لأنك كنت تحبهم

وستحزن أكثر لأانهم خانوك

وستحزن أكثر...لأانك لم تكتشف هذا إلا في النهاية

...............................................

ايه يعني هنكسر

ما الكل بينكسر

مين فينا ما انكسرش

همشي و أكمل طريقي

دا اللي انكسر حقيقي

اللي انكسر ما ثارش

........................

سيعانون في حياتهم طويلا ً من لا يفهمون كل اللغات إلا لغة الكلام

................................

الهدية الوحيدة التي يمكن ان يقدمها لك من جرحك

هي ان يصل بك إلي الدرجة التي تجعلك لا تندم عليه أبدا

..........................................................

ما أجمل ان تملك حبيبا يجعلك تندم على كل الأيام التي عشتها من قبله

ولكن الأجمل ان تملك حبيا يجعلك لا تتذكر هذه الأيام مطلقاً

...............................................

نفسي أحب

بس أحب في يوم ما احب

اني أحب عشان بحب

مش بحب عشان أحب

................................

الشئ الأصعب من النجاح بعد الفشل....هو النجاح بعد النجاح

...........................................

لكي تنجح الحياة الزوجية لابد ان يكون الزوجين

نفس المبادئ ونفس الأفكار ونفس شبكة المحمول

.....................................

قمة الغباء ان تكون اأنت الوحيد الذي لا تدرك قيمة نفسك

.........................................

إن الله لم ينعم عليك نعمة ً اكبر من إنه تركك حيا ً حتى هذه اللحظة

فهو يعطيك مع كل ثانية ٍ يمدها في حياتك فرصة ً جديدة لكي تتوب

........................................................................

مش هطول عليكوا....مستني رأيكم

ومستني أشوفكم بتساعدوا المدونة عشان تقف على رجليها من تاني

أحبكم في الله

اللهم لك الحمد

كم من سنين ٍ في الذنوب أضــعتـُـها

وحويتُ في صدري فؤادا ً لا يـَـرقْ

وبرغم ذاك ستـــرتني و رزقــــتني

أعطيـــــتني يارب ما لا أستـــــحقْ

..........................

اللهم لك الحمد

اللهم لك الحمد

اللهم لك الحمد كما ينبغي لجلال وجهك وعظيم سلطانك

إن القلوب التي لاتعرف الله تري حتى في عطائه حرمانا ً من النعمة

اما القلوب التي تعرفه فتري حتى في حرمانه من النعمة عطاءاً

أنا الحمد لله يا جماعة جبت جيد جدا

1128

مش هكدب عليكوا وهقوللكم إن ده اقل بكتير من اللي كنت بتمناه واللي كنت مستنيه

ومش هكدب عليكوا أنا كان نفسي أوي أجيب امتياز السنادي بالذات

بس ربنا شاء كده وانا والله الحمد لله راضي ومتأكد إن ربنا ليه حكمة في كده

وكلمة قولتها قبل كده بس نفسي أفكر نفسي وافكركم بيها

خصوصا وانا شايف حالة الحزن اللي مسيطرة على ناس كتير من زمايلي وانا منهم

يمكن كان كل واحد مننا نفسه يجيب درجات معينة عشان توديه في مكان معين

هو مختاره لنفسه

بس ربنا إدي لكل واحد مننا ردجات معينة عشان توديه

في مكان معين ربناا مختارهوله

اكيد اللي ربنا مختاره لينا أحسن بكيتر من اللي احنا مختارينه لنفسنا

حتى لو احنا بنظرتنا الضيقة شايفين غير كده

وفيه ناس انا عارف انها تعبت اوي وماخدتش حقها في النتيجة دي

بس دايما بفتكر في الاوقات اللي زي دي موقف عمري ما بنساه

حصللي من حوالي خمس سنين

كنت على الكوبري في بلدنا وكان في جيبي اتنين جنيه ونص

وافتكرت إن عليا اتنين جنيه ونص للست بتاعت العيش لإني رحت اشتريت

منها مرة بإتنين جنيه ونص من شهرين وماكانشي معايا فكة وقتها

رحت إدتها الاتنين جنيه ونص رغم إنها ماكاتتشي فاكراهم

وروحت بس وانا في الطريق بعد الكوبري بحوالي ميت متر لاقيت

اللي شغال في محل بقالة هناك بينادي عليا يا دكتر استني يا دكتر

بصيت لاقيته جايبلي اتنين جنيه ونص وبيقوللي ان دول

بقية عشرة جنيه كنت خدت منها خدت حاجة منه بيها

والفكة معاه ماكملتشي الباقي

خدتهم وأنا فرحان جدا مش عشان الاتنين جنيه ونص ....عشان حسيت

ان كل حاجة في حياتنا ممكن تبقى زي الاتنين جنيه ونص دول

ممكن نعمل حاجة ونبقى مستنين مقابل وما نلاقيش المقابل ده ونزعل اوي

واحنا مش عارفين إنه ممكن ربنا يبى شايلهولنا في حاجات تانية

في صحتنا في مالنا في راحة بالنا في حب الناس لينا في بركة في رزقنا

حتى لو ماكانشي في ده ...اللي عملناه هيتشال لينا هناك في الآخرة

في اكتر وقث هنكون محتاجين فيه لكل حاجة حلوة عملناها

انا شخصيا كان ليا حلم في دماغي في الطب ليه قصة طويلة

يمكن الحلم ده بعد عني دلوقتي جدا

بس الحمد لله حتى لو الواحد راح في وحدة صحية في أبعد حتة

مادام الواحد نيته خير إن شاء الله يحاول يعمل حاجة وكل اللي ربنا كاتبه خير

فاضل كلمة نفسي اقولها رغم إني ماكنتش حابب اكتبها هنا

فيه حد عزيز عليا قاللي كلمة جرحتني اوي مع إني عارف إنه بيتكلم من خوفه عليا

أصل انت شاطر تشغل نفسك بالمشرحة والمراجعات والاسطوانات والحالات

وفي الآخر مافيش حد نفعك ولا إداك درجة

انا مش زعلان ولا ندمان على اي حاجة عملتها دا لو كنت عملت حاجة أصلا

ولو الأيام اتعادت وقدرت أعمل أكتر من كده ميت مرة هعمل

وحتى لو دفعتنا ستين وحشة رغم انهم مش كده أبدا برضو كنا هنحاول نعمل حاجة

انا بحب الدفعة وبعزهم جدا وبعتبر كل من فيها زي اخواتي

وهفضل دايما فخور اني واحد منهم

في النهاية ألف مبروك لكل زمايلي...إني أحبكم في الله

ومن يوم التلات اللي جاي ان شاء الله هترجع تدوينات التلات

يارب نتقابل دايما في الخير وعلى كل خير

مليون مبروك

السلام عليكم ورحمة الله

يرضو محمد جابني على الموتسيكل عشان أسلم على كل الناس

أولا انا متشكر جدا جدا لكل الناس هنا والناس اللي اتصلت بيا

او بعتولي على الميل او على الفيس بوك يسألوا عليا

ولو اني لاحظت ان كلهم يا إما بيسألوا ياإما على عبد الرحمن يا إما على رجل الكنبة

!!!!! مافيش حد بيطمن عليا انا خالص

ثانيا

مليون مبروك لمصر.....انا زي كتير منكوا بنحب البلد دي أوي

وعايز اقول كلام كتير أوي بس مش عايز أكرر كلام كتير قلته قبل كده

خصوصا في بوست عم بتاع الجوافة

http://journy-to-myself.blogspot.com/2009/11/blog-post.html

اللي بفضل ربنا ثم بفضل تشجيعكم اتشجعت وقدمته في مسابقة الجامعة

والحمد لله ربنا كرمني بيه بالمركز الأول في الزجل

وزيادة في فضل ربنا عليا كرمني كمان بالمركز التاني في القصة وشعر الفصحي

اللهم لك الحمد

وافتكرت جملة كنت كتبتها بعد ماتش السودان واللي حصل فيه

مصر ماوصلتشي كاس العالم بس كفاية إنها وصلت لينا

............................

حابب كمان قبل النتيجة لزمايلي في سنة سادتة

أنا راضي ان شاء الله بأي حاجة ربنا هيكتبها

وعارف ان كل زمايلي كده وأحسن ان شاء الله

يارب يكرم كل حد باللي بيحلم بيه

ولينا كلام كتير قبل الامتياز ان شاء الله

وبعتذر عن تقصيري الشديد في حق المدونة وفي حق ناس كتير منكم

مش عايز أطول عليكوا وهسيب التطويل لو ربنا كرمني ورجعت أكتب تاني كل تلات

.........................

ملحوظة

كل زمايلي معزومين عندي على عزومة فطير كبيرة في حالة لو جبت امتياز

لو ماجبتش امتياز من دلوقتي مافيش فطير..ادعوولي بقى

...................

أنا نسيت بقيت الكلام اللي كنت جاي أقوله النهاردة

بس تاني شكرا لكل الناس على كل حاجة

ألف سلامة عليكي يا رجلي

من جديد علي الفيس بوك

http://www.facebook.com/note.php?created&&suggest&note_id=276557698357

نشرة أخبار رجلين حوكشة

السلام عليكم ورحمة الله

يارب يكون كل الناس بخير...مععلهشي عودة متأخرة بس لما تعرفوا هتعذروني

أولا الحمد لله الذي بنعمته تتم الصالحات

انا بقيت دكتور بفضل الله بعد ست سنين ونص من المعاناة ربنا يجعلهم في ميزان حسناتنا ان شاء الله

وثانيا برضو الحمد لله ...أنا أول ماخلصت امتحان اتجبست الحمد لله

هي حاجة بسيطة الحمد لله ..كسر في صباع رجلي...بس كان لازم يتجبس

شكرا لكل الناس اللي اتصلت بي واللي بعتولي واللي سألوا على ربنا يكرمهم

ومعلهشي اني قصرت في حق المدونة بس غصب عني

انا كان في نيتي حاجت كتير عايز أكتبها بس قدر الله وما شاء فعل

انا حتى خليت محمد صاحبي جابني على الموتسيكل لحد السيبر هنا عشان أسلم عليكوا كلكم

وان شاء الله هحاول آجي تاني..ولما أفك الجبس هرجع اكتب كل تلات ان شاء الله

وبما إني جيت لازم أحاول اكتب حاجة برضو

فيه فكرة جت على دماغي دلوقتي

نشرة أخبار حادثة حوكشة

هو نفس الخبر بس هتخيل كل حتة هنذيعه إزاي

.........................................

على التليفزيون المصري...نشرة الساعة تسعة

يتابع الرئيس مبارك عن كثب... وهو مركز يعني...آخر تطورات الحادث الأليم

الذي ألم بالمواطن /حوكشة الطويل وقد أصدر السيد الرئيس توجيهاته إلى الحكومة بسرعة البدء

في التحقيقات للوقوف على ملابسات الحادث...في الوقت الذي صرح فيه

الوزير عمرو سليمان بإن الحادث حادث فردي ولا توجد

أي شبهة لأعمال إرهابية وأوضح أن الموضوع

امر داخلي بحت..داخلي آخر حاجة عني... وان مصر لن تسمح

أن يكون الحادث ذريعة...حجة يعني...للتدخل في شئونها الداخلية

هذا وسنوافيكم بالجديد في خدماتنا الإخبارية القادمة

...........................

الخبر على قناة الأهلي

في الوقت الذي كانت فيه تعقد...بتحط يعني...أملا كبيرا في لحاق

لاعب المنتخب /حوكشة الطويل...معلهشي هي وسعت شوية...بالمنتخب في دور الأربعة

في حال فوزه على الكاميرون ...عادوته الإصابة من جديد لتصيب ملايين المصريين

بخيبة الأمل وخاصة في ظل غياب أبوتريكة وبركات وعمرو زكي

وقد صرح الدكتور إيهاب على إن الإصابة ستتطلب البقاء في الجبس لمدة أسبوعين على الأقل

يبدأ بعدها اللاعب برنامج تأهيلي تحت إشراف الطبيب الألماني

وقد أعرب جوارديولا__دا مدرب برشلونة عشان فيه ناس في طب...عن خيبة أمله

وذلك لأن الإصابة سوف تحرمه من التعاقد مع اللاعب خلال انتقالات يناير

ليكون إلى جوار ميسي وابراهيموفيتش في هجوم النادي الكتالوني....اللي هو برشلونة عشان فيه ناس في طب

وبمناسبة الناس اللي في سنة سادتة اللي لسة مخلصين

منتخبنا هيلعب بعد بكرة ان شاء الله في بطولة اسمها كأس أمم إفريقيا

اللي لسة صاحي منهم يبقى يتفرج

.......................................

الخبر على قناة الجزيرة

كعادتها نفت الحكومة المصري وجود أيادي خفية...من تحت الحزام يعني...تقف

وراء حادثة صابع حوكشة التي أثارت الرأي العام المصري

في الوقت الذي تشير فيه أصابع الأتهام إلى ضلوع....يعني متورطة...قوي إقليمية

في ذلك الحادث ولم تستطع تصريحات الحكومة المصرية أن تخفي حالة الإحتقان

التي تسود الشاعر المصري إبان...يعني بعد...الحادث الأليم

.................................................

على فناة السي إن إن

تتابع الإدارة الأمريكية عن كثب...بتقلد الريس بتاعنا يعني...آخر تطورات

حادثة حوكشة الشهيرة وأبدت الإدارة الأمريكية قلقها إزاء العنف المتصاعد بالشرق الأوسط

وأوضحت انها لن تقف مكتوفة الأيدي...يعني ربنا يستر...إزاء الوضع المتدهور بالشرق الأوسط

خصوصا إن الحادث لا يعتبر الأول من نوعه ...كنت إنكسرت قبل كده السنة اللي فاتت برضو..

وحذرت مصر من مغبة...من البلاوي اللي هتحصل يعني إذا أصرت على تجاهل القضية

.......................................

كفاية عشان ما أطولشي عليكوا

ألف شكر لكل الناس على كل حاجة

لربنا يحميكوا ويوفقكوا كلكم ان شاء الله

مش انا كنت هشيل نسا وولادة

السلام عليكم ورحمة الله وبركاته

انا كنت ناوي النهاردة زي ما ناس منكم ربنا يكرمهم

قالولي لازم تكتب آفية عن الامتحان

بس قلت خليها للآخر بعد ما نخلص خالص ان شاء الله

بس حابب أحكيلكم عن موقف مموتني من الضحك من ساعة ما خلصت امتحان

الإمتحان جه زي ما انتو شوفتوه كده

وبدات أحل في النسا بعد الساعة اتناشر

وجيت عند سؤال

gynocoloical causes of urine retintion

mental block وكان فاضلي كتير وماعادشي وقت وحصللي

و حاولت أفتكر في الأسباب بتاع السؤال ده مافيش حاجة جاية على دماغي خالص

سبت القلم دقيقة وحاولت أركز

إيه ايه ايه ؟؟ ..أيوة إفتكرت ومسكت القلم بسرعة وكتبت

1-benign prostatic hyperplasia

2-cancer prostate

وكملت الاجابة عادي وبقية الأسباب

وانا في السؤال اللي بعده افتكرت انه امتحان نسا

قعدت ييجي خمس دقايق أشطب في السطرين دول

حسيت انهم لو كلمة منهم اتشافت هيسقطوني

وهيعلقوا الورقة على الباب الإزاز بتاع الكلية

أو يعرضوها في التليفزيون اللي في المدخل

بس الحمد ربنا ستر

وهعيش طول عمري أفتكر الموقف ده

..............................................

لو عايز أي حد في سادتة طب طنطا يرن عليك....أي حد

أضمنلك إنه يرن عليك بعد ما تبعتله الرسالة دي

ولو مامعهوش رصيد هينزل يشحن ويرن عليك

....

رنيت عليك و إنت مطنش.....وقالبني دايما بإستمرار

يارب بقى لو ما ترنش.....في الشفوي تدخل للعطار

آفية سنة سادتة

السلام عليكم وحمة الله

رغم أي وكل حاجة

حبيت أقدم لزمايلي في سنة سادتة ابتسامة بسيطة جدا

ياريت كل حد يختار أكتر جملة هو حسها على نفسه

ويجاوب على سؤال كمان

هتعمل ايه يوم ما تخلص سنة سادتة ان شاء الله؟؟؟؟

.......................................

Live attenuated..... الناس في سنة سادتة تشوفهم تحس انهم

Cosmotic disfigurement......تحس ان الجراحة عاملة في وشهم

capsulated......وتلاقي كل واحد منهم قاعد في قوضته.

anearobic......من كتر القعدة لوحده تحس انه بقى بيعيش

limited mobility........ودلوقتي خلاص بقى عنده في كل الاتجاهات.

since birth.......وبيحس انه موجود في سنة سادتة دي

forien body.......والناس بقوا بيعاملوه على إنه

ill defined edge...... المناهج عندهم تحس ان ليها

distal end مهما ذاكرت فيها عمرك ما توصل......للـ

low disk space......من كتر المعلومات تلاقي مكتوب على دماغهم

early satiety......بقي بيحصلهم من المذاكرة

short survival rate...و للاسف المعلومات بقي ليها في دماغهم

in trendlenberg position...و فيه ناس عشان المعلومات ماتقعش منهم بيناموا

cerclage..... بتاعهاforamen magnumوناس عايزة تعمل للـ .

Secondary survey..دلوقتي بعد الامتحان ماعادشي حد بيعمل في الكتب

inoperable.....وللأسف فيه ناس حاسة ان الموضوع بقى

palliative.......بس بيذاكروا

fungating mass......وتحس ان سنة سادتة عاملة جوة دماغهم

by drain.....طلبة سنة سادتة بيشربوا العصير

ligation....طالبات سنة سادتة لما بيحشوا المحشي بيعملوله

With inturrepted suture....ولما بيخيطوا الهدوم بيخيطوها

meshولو لقوا القطع كبير .......يحطوله

cautaryولو لفوا حنفية بتنقــّط........يعملولها

Internal fixation.....ولو كوباية اتكسرت منهم يعملولها

Only for local treatmen....مذكرة د/فتوح حلوة بس تحس انها

Poorly differentiated......مكتوب فيها كل حاجة بس تحس انها

asymmetrical....و كتب المندوه حلوة بس بالنسبالنا

crossed tanderness.....مابين الجراحة والنسا دايما تحس إنه فيه

filling defect.....والله والله والله بعد ما الدراسة تخلص ونتفارق هتسيبوا جوايا

عشان الخير ما يقفش

اللسلام عليكم ورحمة الله وبركاته

ماكنتش حابب ان علاقتي بالمدونة الفترة دي تبقى مجرد

ان كل شوية آجي أقوللكم فيه حالات كذا وكذا محتاجة فلوس

بس انا النهاردة اتعرضت لموقف محرج جدا جدا

انا كنت حكيتتلكوا عن الست بتاع التحاليل قبل كده

وآخر مرة كتبت هنا عنها

فيه ناس ربنا يجازيهم كل خير جابوا فلوس واتصادفت حتى يومها

ان الحالة كانت معايا وفرحت أوي ان لسة فيه ناس جواها خير كده

والحمد لله على مدار تلاتة وعشرين حقنة فاتوا كنا قادرين بفضل ربنا

اننا نسد دايما تمن التحاليل دي

وانا استئذنت من الحالة ان المبلغ ده يقضيها التحليلين بتوع الشهر ده

وقلتلها ان بعد ما أخلص امتحانات هتبقى ملزومة مني في كل حاجة ان شاء الله

بس تصبر على الفترة دي بس

وده اللي حصل..... بس من يومين لاقيتها بتتصل بي

وقالتلي كلمة وجعتني أوي

معلهشي يا دكتر انا ماعرفتش أطلب من حد تاني غيرك

وده لإن التحاليل الي بيتعمل كل شهرين بتاع البي سي آر بتاع فيروس سي

ده معاده ولازم تعمله عشان تكمل حقن الانترفيرون

بصراحة انا حسيت بالعجز والذنب مع اني عارف ان ده مش بإيدي

وقلت عشان ما أشغلكوش اكتر من كده بلاش اكتب على المدونة حاجة

انا هنزل بنفسي أحاول ألم الفلوس من الرواندات على اد ما اقدر

صحيح الموضوع ده بيبقى صعب عليا جدا بس المهم ان التحليل يتعمل

بس للأسف نزلت الكلية النهاردة لاقيت سنة سادتة الجديدة مابيجوش عشان امتحانانتا احنا شغالة

وكذلك سنة خامسة عشان عندهم امتحان رواند او حاجة زي كده

ولاقيتني ماعرفتش أجيب ولاجنيه والست كانت جاية في الطريق

وآخر ميعاد للتحليل النهاردة

وماكانشي ينفع بعد ده كله اروح أقوللها انا ماقدرتش أتصرف

بس ربنا كرمنا وعرفنا نتصرف في الفلوس من حد ربنا يجازايه كل خير بشكل مؤقت

عى بال ما نعرف نلمهم ونردهم ليه تاني ان شاء الله

انا حكيتلكم رغم ان عارف ان معظمكم مشغول جدا

وعارف كمان اني تقلت عليكم في الموضوع ده

وفيه ناس منكم تعبت معايا جدا فيه

بس حكيت عشان لو حد يقدر يعمل أي حاجة يعملها

ولو حد قادر يدفع مبلغ مهما كان صغير أكيد هيفرق

وعشان مايبقاش فيه احراج لاي حد

اللي حابب يشارك معانا في المبلغ ده

يا إما يتصل بيا وأنا هنزله مخصوص

0185856476

أو ممكن يسيبه مع دكتورة سماح مطرح ما كلكم رحتوا زرتوها

ربنا يجازي الجميع كل خير

والوقت مفتوح من دلوقتي لحد ما نخلص امتحانات خالص ان شاء الله

ألف مليون سلامة

السلام عليكم ورحمة الله وبركاته

ماكانشي ينفع بأي شكل

اني ما أجيش النهاردة و أقول ألف سلامة

لحد من مـُـلاك المدونة دي.. مش بس من اصدقائها

دكتورة سماح

أو زي ما بتكتب اسمها في عالم المدونات...دكتورة سمسمة

ألف مليون سلامة عليكي

يارب تفكي الجبس قريب ونسمع عنك كل خير

والمرة الجاية نبقى بنبارك في فرح اتنين

من أعز اخواتنا و أكثرهم احتراما ...دكتور أحمد/دكتورة سماح

ألف مليون سلامة

ودعواتكم ليها ولينا في بقية الامتحانات ان شاء الله

.......................

ملحوظة

الامام الغزالي بيقول

ان الخيل إذا شارفت نهاية المضمار بذلت قصارى جهدها .. لتفوز بالسباق

شدوا حيلكوا

only a ward

كلمة لا قيتني كاتبها في أحد كتبي المهجورة

اللي كان مفروض تتذاكر بدري شوية بس إديتني أمل أوي

ودخلت نت مخصوص عشر دقايق عشان أكتبها

الكلمة بتقول

we lose the chance only when we feel that we lost it

فهمتوني...مش عارف؟؟؟

خلونا نحاول لحد آخر لحظة

انا ناوي احاول لحد آخر لحظة....خلونا نحاول سوا

لو كانت كل لحظة في حياتنا مالهاش فايدة ماكانشي ربنا مدها في عمرنا

شكرا لكل الناس الي اتصلت او بعتولي عشان يطمنوا عليا

وشكرا أكتر للناس اللي اتصلت عشان الحالات

انا مستني أكتر من كده بخصوص الحالات بس بعد الامتحانات ان شاء الله

وبعتذر لو كنت لضيق الوقت مارديتشي على الرسايل اللي جاتلي

ولو حد عايز مني حاجة يتصل بي يوم الامتحان لإني بمشي علطول غالبا

0185856476

ربنا يوفقنا كلنا

كان الله في عون العبد

السلام عليكم ورحمة الله
يارب تكون كل الناس خير
انا جاي اكتب النهاردة لسببين
اولا وده السبب المهم انا كنت حكيتلكم قبل كده هنا عن حالات محتاجة مساعدة
بفضل الله انا وزمايلي لاقينا تعاون غير عادي من ناس كتير منكم
أكتر مليون مرة من اللي بنحلم بيه
وفي الفترة اللي فاتت قبل ما نقعد من الدراسة انا وصلت كل الفلوس مطرح ما كل واحد طلب مني
واللي ماحددوش حاجة معينة كان فيه تلات بنات بيتجوزوا لميت كل المبالغ اللي جاتلي
وحطيتها في جهازهم وربنا بارك في الفلوس الحمد لله والتلاتة اتجوزوا العيد ده
ماقدرتش احضر أفراحهم للأسف بس امهاتهم اتصلوا بي وبيدعيلكوا كلكم
لإنكم كنت سبب في فرحة بناتهم - وجبر خاطرهم - ودي حاجة انا بشوفها كبيرة أوي
المهم فاضل حالتين انا كنت من الناس اللي مسئولة عنهم بس دلوقتي ماعادشي معايا فلوس باقية
والحالتين اتصلوا بينا وللأسف ماقدرناش نعمللهم حاجة وده شعور صعب جدا عليا
الحالة الأولى حالة الست بتاع التحاليل اللي حكيتلكوا عنها قبل كده
والحالة التانية أسرة من الأيتام عايشين مع جدهم
بالنسبة للحالة الأولي انا بفكر في حلين إلى جانب أي مبلغ ممكن أي حد يساعد بيه
أول حل لو حد هنا يقدر يدّخل معايا ونقدر نخلي موضوع التحاليل ده ببلاش
يعني حد يكون ليه معرفة او حاجة في العلاج على نفقة الدولة او وزارة الصحة
ويكون يعرف طريقة نخللى التحاليل دي مجانية يبقى جزاه الله خيرا
وعشان يعرف يسأل ..هي التحاليل المطلوبة اللي بتنعمل كل أسبوعين
للناس اللي بياخدوا حقن انترفيرون بميتين وأربعين جنيه والتحليل اللي بينعمل
كل شهرين بربعمية وخمسين جنيه لو حد يقدر يحاول وانا هحاول وربنا ييسر
والحاجة التانية هي ان مافيش اي جهة اتصال بيني وبين الست دي
وبستني كتير على ما هي بتعرف تتصل بي و كمان بيبقى فيه ناس حابة تساعدها
ويمكن يبقوا محروجين مني او مش عايزين يبانوا في الصورة بأي شكل
ففكرنا لو أي حد معاه عدة موبايل قديمة مستغني عنها ممكن يجيبهالنا
تكون يادويك بس شغالة على اد الاستقبال مش لازم تكون عدة كويسة المهم تكون شغالة
بحيث لو أي حد عايز بيها يتصل بي او يبعتلي وانا هبعتله نمرتها ويبقى منه ليها علطول
انا عارف اني طولت اوي بخصوص الست بس ده يمكن عشان انا ارتبطت بيها جدا
وهي كمان ست عفيفة أوي وبتتحرج أوي تطلب من أي حد تاني
وبالنسبة للأيتام برضو اللي ربنا يقدره بأي حاجة ولو بسيطة واحنا هنوصللكم للشخص
المسئول عنهم وان شاء الله ربنا يجعله في ميزان حسناتكم
ويمكن حد يقول انه مش وقته بس يمكن لما نفك كرب ناس زي دي
ربنا ساعتها يفك كربنا احنا كمان
زمايلي في سنة سادتة كفاية عليهم لحد كده عشان ما أعطلهمش
حابب أقوللهم بس ماحدش يقول شكرا على أي حاجة بالعكس
انا اللي على جميل ليكم كلكم لإنكم كنتم السبب ان يبقى ليا
اسم وسمعة انا بجد ما استحقهمش وانتم اكبر سبب ان المدونة دي
لسة موجودة لحد دلوقتي ..انا بس حاولت أقول شكرا بطريقة عملية
ومش شايف - بدون مبالغة - إني عملت حاجة لسة
كل واحد بس يركز في مذاكرته دلوقتي وهنخلى الكلام ده لبعدين
ربنا يوفقكم وينول كل حد فيكم اللي بيتمناه ان شاء الله
آخر حاجة عايز أطلبه منكم انكم تدعولي يا جماعة
ادعولي بجد
انا بعيش فترة صعبة جدا مش عشان الامتحانات ولا حاجة
انا بقالي فترة طويلة يمكن أكتر من سنة بعاني من حالة أرق مزمن
بيعدي على ايام طويلة مابعرفشي انام فيها خالص
وخدت كل الأدوية والمنومات وعملت كل حاجة ممكت تتخيلوها ومفيش فايدة
انا عارف انه مش صح ان الواحد يقول حاجة أدام الناس كده
بس اتفاجئت بناس كتيرة جدا من أصحابي بيقابلوني ويتصلوا بي
وبيسألوني نفس السؤال محمود هو انت زعلان مننا في حاجة...شكلك زعلان؟؟
انا والله مش زعلان من أي حد بس الحكاية هو التوهان اللي بعاني
منه بسبب الموضوع ده ..وده شعور ماحدش يعرفه بجد غير اللي جربه
لدرجة ان النهاردة خارج مخصوص عشان اجيب حاجات الدكتور جمال
لإني رغم ان كان معايا حوالي مية وخمسين اسطوانة وزعتهم كلهم ونسيت أخليلي واحدة
ادعولي مش بس ان موضوع النوم ده ينتظم
ادعولي ان مايتسربشي لي أبدا شعور بالزهق او بالسخط من الموضوع ده
لإن لو ده حصل هكره نفسي جدا
وادعوا لكل زمايلي في سنة سادتة لإن معظمهم بيمر بنفس الظروف بصورة او بأخري
ادعولي

عم بتاع الجوافة

السلام عليكم ورحمة الله

انا مش هتكلم عن المدونة وعن أد ايه هي وحشاني

انا جاي أكتب حاجة كتبتها النهاردة

هي مش شعر ومش قصة ومش أي حاجة

بس كتبتها وكنت حابب أوي الناس تقراها

أتمن تكملوها للآخر

ولو عجبت حد فهي متاحة للنشر باسمي او من غير اسمي في أي حتة

وعلى فكرة أول تمن سطور فيها حصلوا فعلا أدام عيني

..........................................

حط بتاع الجوافة
علمك وسط الجوافة
شفته وسألت نفسي
هو بتاع الجوافة
بيحب مصر ليه؟؟؟؟
طب ليه كان دمه فاير
علشان ماتش الجزاير
مع إنه بيبقى ماشي
!!!! وفي جيبه اتنين جنيه
عم بتاع الجوافة
مضايق النهاردة
أصله ماباعشي النهاردة
بس الماتش النهاردة
يبقى هيستني ليه
هيشوف الماتش فين؟؟
أصله ماعندوش ريسيفر
طب ليه هيجيب ريسيفر
والتليفزيون ماجاش
ممكن على قهوة يقعد
بس القعدة بفلوس
ومافيش قهوة ببلاش
عم بتاع الجوافة
وياه اتنين جنيه
و استلف اتنين جنيه
راح في القهوة ودفعهم
وقعد على نص كرسي
وبعلوْ صوته قال
ان شاء الله هنوصل
أملنا ماانتهاش
عم بتاع الجوافة
ماسكتشي لحظة واحدة
وفضل من قلبه يُصــْرُخ
وينادي مصر مصر
عاش منتخبنا عاااااااااش
واتحمس لما شافنا
كل الجماهير علينا
وبنلعب تحت ضغط
ونسيت أقوللكم
عم بتاع الجوافة
كان أصلا عنده ضغط
عم بتاع الجوافة
عديت تاني يوم عليه
في مكانه مالاقيتوش
قلـقـتني أوي الحكاية
وسألت عليه قالولي
ده محجوز في العناية
حودت عليه وشفته
كان راقد في السرير
و معاه قفص جوافته
ولاقيت قفص الجوافة
لسة العلم عليه
ماسألتش عامل ايه
أو حتى جراله ايه
كان عندي سؤال كبير
محتاج جواب عليه
لما انت بتاع جوافة
ومادام مش لاقي تاكل
بتحب مصر ليه؟؟

بتحب مصر ليييييييييييييييييييه؟؟؟
طلـّع قفص الجوافة
إدّاني جوافة منهم
قاللي اسأل الجوافة
هوّ انتي يا جوافة
جواكي بذر ليه؟؟
لو عايز يا ابني تعرف
بنحب مصر ليه
روح إسال القمر
بينور ليلنا ليه
إسال شمس الصباح
بتجيلنا الصبح ليه
روح إسأل الزهور
جواها عطر ليه
روح إسأل كل أم
بتحب وليدها ليه
حب البلد دي يا ابني
شئ مفطورين عليه
احنا بنعشقها عشق
ومادام القلب يعشق
يبقى ما تسألشي ليه
عم بتاع الجوافة
علمني حاجات كتير
علمني يا مصر انك
مش نيل وهرم وسد
علمني يا مصر إنك
ناس بتحبك بجد
علمني …إن علمك
هيعيش يامصر عالي
غصبا ْعن أي حد
مصر قلوب بالمحبة
زرعت في الأرض حبّة
طرحت روحنا اللي حابة
حتى الحزن اللي فيها
مصر في ضلمتنا شمعة

واحنا في ضلمتها شمعة

وبترسم فوق خدودنا

في كل لحظة دمعة

لكن علشان خاطرها

دمعتنا بنداريها
هيعيش يا مصر علمك
هيعيش برغم ألمك
رغم عذابنا وعذابك
هيعيش دايما مرفرف
علشان الدنيا تعرف
اننا عاشقين ترابك
حبك مش ماتش كورة
حبك جوانا صورة
مرسومة بلون دمانا
لو يوم هيحبسوكي
في قفص حزن سابوكي
هترفرفي في سمانا
ارفعي راسك لفوووووق
ارفعي راسك لفوووووق
أرواحنا بتـنـتميلك
دمّها دايب في نيلك
ولا شئ في الدنيا ممكن
يغير انتمائنا
وقت الجوع بـيكي نشبع
وقت العطش انتي مائنا
احنا ببساطة انتي
وانتي ببساطة احنا
وسوء عايشن في عشة
ولا عايشين في قصر
برضو هتفضل قلوبنا
دايما تحب مصر
ارفعي راسك لفوق
حتى في زمن الدموع
حتى في زمن السخافة
ارفع راسي لفوق
وكفاية إن فيكي
انسان بيموت عشانك
انسان عاشق كيانك
زي بتاع الجوافة

أستودعكم الله

السلام عليكم ورحمة الله وبركاته
كنت حابب اخلى الخبرين دول آخر خبرين في البوست
بس هبدأ بيهم عشان ما أطولشي عليكم رغم انهم خبرين رخمين جدا
الخبر الأولاني انه للأسف وغصب عني ده هيكون
آخر بوست على المدونة لمدة أربع شهور جايين ان شاء الله

وعشان كده لو البوست ده طويل شوية بس أتمنى تكملوه للآخر
والخبر التاني اني للأسف ماقدرتش أكتب هدية لليلة القدر زي السنة اللي فاتت
دعواتكم يا جماعة
والله انا حاولت كتير بس لسة القلم مش مطاوعني رغم اني كنت قربت أخلصها
ربنا وحده اللي يعلم ان الواحد بيروح وييجي
ويضحك ويتكلم بس من جوايا عامل ازاي بس الحمد لله على كل حال
وبتأسف لكل زوار و اصدقاء المدونة اني مش هكون معاهم الفترة اللي جاية دي
رغم انهم وقفوا جنبي في محن و أوقات صعبة كتيرة
كفاية أقول اني يوم ما ماكتبت عن اصحابي لاقيت بسام بيتصل من الامارات
واتصال جالي من اخ في الكويت ورسالة جاتلي من السعودية ربنا يكرمهم
بشكرهم كلهم لو كانوا بيقروا دلوقتي هما وكل الناس اللي اتصلوا بس وبعتولي
لإن اهتمامهم و ووقفتهم دي فرقت معايا جدا وخرجتني بسرعة من الحالة دي
وحتى آخر بوست كان عن جهاز القلب على المدونة اتفاجئت بالمبالغ اللي لميناها
ربنا يكرم كل حد دفع ولو جنيه واحد منها لإنها بجد هتفرق جدا
بس آن الأوان اني أنفصل عن كل حاجة و أحاول أركز في المذاكرة بس
انا والله حاولت السنادي واجتهدت في دراستي

وواثق ان ربنا مش هيضيعني ان شاء الله
وراضي بأي حاجة هتحصل في الامتحانات اللي جاية ان شاء الله
المفروض ان فاضل شهرين والمدونة تتم سنتين من عمرها
بس مش هقدر أكون موجود للأسف عشان كده من دلوقتي
كل سنة وانتوا والمدونة طيبين وبكل خير ان شاء الله
يارب تكون المدونة قدمت أي حاجة أسعدتكم أو عبرت عنكم في الفترة دي
ومعلهشي لو جت فترات كانت المدونة فيها كئيبة شوية بحكم ظروف صعبة حصلت
واتمنى ما اكونشي زعلت ولا ضايقت حد بأي حاجة كتبتها فيها
فيه حاجة لازم أقولها يمكن حد يقدر يساعد فيها رغم اني كنت
احب تفضل بيني وبين ربنا بس عن تجربة فيه ناس من اللي بيقروا
دلوقتي جواهم وبيعلموا خير كتير اوي و اكيد هيساعدوا الحالات دي
فيه تلات حالات انا كنت من فقضل ربنا عليا من الناس اللي مسئولة عنهم

وكنت بوصلهم الفلوس اللي كانت بتجيلي من الناس بنية مساعدة الناس برة موضوع الجهاز
على حسب حاجة كل واحد منهم هحكيلكم عليهم اذ ربما حد منكم يحب يساعد
وخصوصا اني خلصت كل الفلوس اللي معايا واللي وصلتني من الناس
أول حالة أربع أطفال اتيتموا مرة واحدة لما ابوهم وأمهم توفوا ورا بعض
وعايشين مع جدتهم الكفيفة وماعادشي فيه مصدر دخل

لإن أبوهم كان صنايعي علي باب الله ومافيش أي مرتب ولا حاجة
تاني حالة ست غلبانة من بلد غلبانة هي بتصرف علاج على نفقة الدولة
حقن الانترفيرون بتاعة فيروس سي بس المشكلة انها لازم كل أسبوعين
تعمل تحليل كل أسبوعين بيتكلف مية وعشرين جنيه وهي ست غلبانة جدا
وأكتر حاجة صعبة في الموضوع انها عايشة ولحدها وابنها الوحيد سايبها
والست دي أكتر حد انا شخصيا متعاطف معاه لدرجة اني لما لقيتها
مستنية وبحسبها مستنية صجفة طلعت من تلات أسابيع بيتجي وتستني
في نفس الحتة اللي كنت قابلتها فيها قبل كده وادتلها فلوس كان حد مديهالي
واللي خلاني أتعاطف معاها أكتر انها دعت على ابنها أدامي وبعيدن عيطت
بس ماعيطتشي عشان هو سايبها عيطت عشان وصلها للدرجة انها تدعي عليه
انا خليتها تسأل لو كان ينفع تعمل التحاليل برة الجامعة

وساعتها ممكن أتفق مع أي معمل يبقى بنص التمن
بس لو حد من اللي بيقروا ليه حد في المجال ده ويقدر يساعدها
بفلوس او بالتحاليل يبقى جزاه الله كل خير
تالت حالة هي ست تعبانة وليها ابن تعبان جدا وبنت تانية بتتجهز
انا أعرف زمايل لينا ربنا يكرمهم بيساعدوها على أد ما يقدروا
بس هي الدايرة واسعة عليها جدا ومحتاجة لكل جنيه
هما دول التلات حالات اللي نفسي حد ربنا يكرمهم ويقدر يساعدهم
أقوللكم على موقف مش عارف يضحك ولا يبكي بس هيوريكم

أد ايه الناس دي طيبة وتستحق المساعدة
بالصدفة لاقيت تاني حالة اللي محتاجة تحاليل دي مستنية وصعب على
انها جت قبل كده تلات مرات وماشفتهاش لإنها ماكنتش معرفاني انها محتاجاني
واتعاطفت معاها جدا وكان معايا مبلغ صغير كانت الناس مأمناني عليه لحالات محتاجة
ادتهولها واديتها آخر فلوس كانت معايا ومشيت بعدها بعشرين متر قابلت الحالة التالتة
وقلتلها والله انه ما عادشي معايا فلوس خالص وكنت محروج منها جدا
حلفت ميت يمين لازم آخد منها اتنين جنيه أروح بيهم ...وروحت على حسابها؟؟
مش بقوللكم هم يبكي وهم يضحك
يارب ما يكونشي زمايلي في سنة سادتة زعلانين مني في أي حاجة
أنا بحبهم في الله والله وبقدرهم وبحترمهم وشايل تشجعيهم
لي جميل فوق راسي طول عمري وده اللي كان بيخليني دايما
بحاول أفيدهم بأي حاجة أقدر أعملها ليهم في الكلية
يمكن ربنا وفقني في حاجات وخاني التوفيق في حاجات تانية
أتمنى دي تعوض دي وأكون قدرت أعمل أي حاجة تفيدهم
أنا طولت أوي أوي وده يمكن عشان مش هاين عليا أسيب المدونة و امشي
كل سنة وانتم طيبين وبخير وبكل صحة وسلامة
بجد دعواتكم لي ولكل زمايلي لإننا محتاجين دعائكم جدا
أستودعكم الله

ودول ايميلي ورقم تليفوني لو أي حد عاز اي حاجة في أي وقت أنا تحت أمره

now_tears_smile@yahoo.com

0185856476
وقبل ما امشي انا قلت أسيبلكم هدية صغيرة اوي أوي
أنا قلت أضرب عصفورين بحجر واِشارك معاكم في ملحمة الـتأمل
اللي كانت على المدونة الفترة اللي فاتت دي
بجد والله انا استفدت واتعلمت من آيات كتيرة حسيتها لأول مرة معاكم
وقبل الـتأمل هسيبكلم هدية تانية صغيرة

بشري لكل الناس اللي كانت تعرف أصحابي ربنا يرحمهم
ولكل الناس اللي إتأثرت بالبوست اللي كتبته عنهم
انا شفتهم في رؤية أثلجت صدري وهي اللي خلتني أرجع لحياتي من تاني
واتزامن ده مع كذا حد من أصحابنا شافوهم في نفس الوقت في رؤى جميلة جدا
و أنا بقول كده مش عشان بس أطمن الناس عليهم
أنا بس حابب أقول ان ربنا رحيم أوي يا جماعة...رحيييييييييييييييييييييييم اوي
ربنا يلحقنا بيهم على خير ويسكنهم الفردوس الأعلى إن شاء الله
الهدية التانية حاجة بدور عليها من اكتر من عشر سنين ولسة لاقيها حالا
حلقة كنت سمعتها للشيخ الشعرواي حكي في أولها حاجة مش عايز أحرقهالكم
وبعد عشر سنين انتظار اني اسمعها تاني لاقيتها دلوقتي بالصدفة على اليو تيوب

ده جزء صغير منها وياريت لو حد عنده بقية الحلقة يبعتهولي

لإنها حلقة يقشعر لها الجسد وتدمع لها العيون والله
وده اللينك بتاعها....رجاءا تسمعوها....رجاااااااااااااااااااااااءا

http://www.youtube.com/watch?v=15KgflZq10Y
أنا بحب الراجل ده جدا...من الشخصيات اللي بتمثل حاجة كبيرة في حياتي
ورجاءا تسمعوا كمان النشيد ده لإني بحب أسمعه جدا

http://www.youtube.com/watch?v=z2bJLHBwfEA
و أخيرا انا كمان لي الشرف إني أتأمل معاكم وأشارككم في حاجة
من اجمل الحاجات اللي حصل على المدونة
انا هاخدكم لسورة أنا مش بس بحبها انا بعشقها
وبعتبرها من أعز أصحابي ولما أكون مخنوق أو مبسوط لازم أقراها
أكيد لو من أصحابي بيقرأ هيعرف اني أقصد سورة الزمر
أنا لو اتكلمت عن سورة الزمر وارتباطي بيها هتكلم كتير

وهحكي عن كل آية فيها بس عشان مش عايز أطول عليكم
في سورة الزمر قضية بحسها من تاني آية...قضية الإخلاص
.........................................
إنا أنزلنا إليك الكتاب بالحق فاعبد الله مخلصا ً له الدين
.......................................
كان ممكن ربنا يقول فاعبد الله وخلاص

بس العبادة من غير اخلاص ماتساوش حاجة
حتى ربنا بيقولهلنا في الآية اللي بعدها علطول.....ألا لله الدين الخالص
ونفس القضية في الآية رقم أربعتاشر.... قل الله أعبد مخلصا ً له ديني
ومن أكتر الحاجات اللي بحسها في سورة الزمر
انها بتححسنا يعني ايه ربنا
لإننا لو حسينا يعني ايه ربنا حاجات كتيرة في حياتنا اوي هنتغير
تخيلوا معايا وخلوا قلوبكم تحس بربنا وهو بيتكلم عن نفسه
سبحانه هو الواحد القهار
ألا هو العزيز الغفار
ذلكم الله ربكم له الملك لا إله إلا هو فاني تصرفون
إنه عليم بذات الصدور
قل اللهم فاطر السموات و الأرض أنت تحكم بين عبادك
طب محتاجين ايه اكتر من إن ربنا يقولنا
وماقدروا الله حق قدره والأرض جميعا ً قبضته يوم القيامة
والسموات مطويات ٌ بيمينه سبحانه وتعالي عما يشركون
ياتري فعلا احنا حاسين بعظمة ربنا وجبروته
طب تخيلوا ان مع العظمة والملك والجبروت دول ربنا بيقولنا
وإن تشكروا يرضه لكم...فيه فضل أكتر من كده
ربنا مش جزء من حياتنا ربنا هو كل حياتنا
ولإن فيه حاجات كتيرة اوي وربنا عارف ان فيه
ميت طريق بينادينا بعيد عنه ربنا بيسألنا سؤالين في السورة دي
كل واحد يسألهم لنفسه
........................
أليس الله بكافٍ عبده
أو لم يعلموا أن الله يبسط الرزق لمن يشاء ويقدر
لو الأجابة آه يبقى ايه في الدينا هيخوفنا تاني
ولو الإجابة لأ يبقى احنا مانستحقش لقب مؤمنين
عشان كده ربنا من حقه بعد ما بين لينا كل ده انه يقولنا
في كملتين بعتبرهم من أصعب الكلام في القرآن
ياعباد ِ فاتقون
من حقه يقولنا
إن تكفروا فإن الله غني ٌ عنكم
أليس في جهنم متوىً للكافرين
فويل ٌ للقاسية قلوبهم من ذكر الله
وبدا لهم من الله ما لم يكونوا يحتسبون
ولإن ربنا عارف ان الحياة هتاخدنا
من رحمته بينا دايما يفكرنا بآيات ممكن تبان صعبة
بس انا بشوفها من أرحم الآيات بينا
إنك ميت ٌ وهم ميتون
أن تقول نفسٌ يا حسرتي على ما فرطت في جنب الله
عارفين ان ربنا خلى في الدنيا جزء واحد من ميت جزء من الرحمة
بالجزء ده بتلاقي كل أم وكل ابن بيرحموا ولادهم ولو لقوهم في طريق غلط
بيحاولوا يرجعوهم
ولإن ربنا أرحم بينا من كده بكتير برضو بيحاول يفوقنا
وينبهنا من الغفلة اللي احنا فيها ويفكرنا بيه وبإننا هنموت
ومن رحمته انه مهما نعمل مهما نعمل فاتحلنا بابه دايما
لدرجة ان ربنا بيقولنا
ليكفر الله عنهم أسوأ الذي عملوا
يعني مش بس اللي عملوه لأ دا أسوأ اللي عملوه
لإن ساعات لما بنقعد مع نفسنا بنفتكر ذنوب لينا صعبة جدا
و نسأل ياتري ممكن ربنا يغفرهالنا
وربنا بيرد على سؤالنا....أسوأ الذي عملوا
وشوفوا قمة الفضل في بقية الآية لما ربنا بيقول
ويجزيهم أجرهم بأحسن الذي كانوا يعملون
يعني في المغفرة هييفرلنا أسوأ وفي الجزاء هيدينا على قدر أحسن
حاجة كنا بنعملها....فيه فضل أكبر من كده؟؟؟؟
أنا طولت أوي رغم اني لسة عندي كلام كتير عن سورة الزمر
بس كفاية اختم بآيتين كل الناس بتحبهم
قل يا عبادي الذين أسرفوا على أنفسهم لا تقنطوا من رحمة الله
إن الله يغفر الذنوب جميعا ً
.........................................
و آخر آية اللي ياريت كلنا ندعي نكون منهم
إنما يوفي الصابرون أجرهم بغير حساب
عرفتوا ليه انا بعشق سورة الزمر؟؟؟
كل سنة وانتم كلكم طيبين
دعواتكم لي ولكل زمايلي ان شاء الله
أستودعكم الله وأسيبكم مع آخر جزء وأروع جزء من سورة الزمر

و آخر حاجة أحب اختم بيها الفترة دي على المدونة

بسم الله الرحمن الرحيم

وسيق الذين اتقوا ربهم إلى الجنة زمراً حتى إذا جاؤوها

وفتحت أبوابها وقال لهم خزنتها سلام عليكم طبتم فادخلوها خالدين

وقالوا الحمد لله الذي صدقنا وعده وأورثنا الأرض

نتبوأ من الجنة حيث نشاء فنعم أجر العاملين

صدق الله العظيم

هام جدا

السلام عليكم ورحمة الله
أولا البوست ده بوست اعتراضي والبوست اللي تحت مستمر بإذن الله
بالمناسبة الردود غاية في الروعة والجمال
أنا مستمتع وفخور بيها جدا وانا كمان هشارك فيها ان شاء الله
بس عشان التأمل بتاعي طويل شويه سيبه للآخر شوية
مستني ردود اكتر ان شاء الله
الحاجة المهمة جدا
ان الدكتورة مي سلامة
في قسم القلب مسؤلة عن جهاز الـ
DEFIRILLATOR
والجهاز ده هيتجاب بالجهود الذاتية
هو فعلا اندفع فيه مقدم واتجاب عشان هو مهم جدا وعيانين كتيرة بيحتاجوه
واتمضي عقد ان بقية المبغ هيندفع في مدة تلات شهور
المبلغ خمسة وتلاتين ألف جنيه
هي الدكتورة مي بتلم في المبلغ ده دلوقتي
واحنا قلنا اننا ممكن نشارك باي مبلغ حتى ولو صغير جدا
أكيد مهما كان هيفرق
لو أي حد عايز يشارك
ممكن يوصل الفلوس لأي حد فينا واحنا نوصلها بإذن الله
أو ممكن هو يسال على الدكتورة مي ويشارك معاها
محمود ابوالعزم
0185856476
محمد مغاوري
0124777838
معانا كمان دكتورة هالة رفعت ودكتورة أميرة الهواري
مهما كان المبلغ صغير أكيد هيفرق
أتمنى نقدر نعمل حاجة

انا حسيت بالآية دي النهاردة

السلام عليكم ورحمة الله

مشروع صغير أوي ممكن نعمله سوا على المدونة

من غير ما يكلفنا وقت ولا مجهود ان شاء الله

احنا كلنا الحمد لله بنقرأ وبنختم القرآن في رمضان

والقرآن لإنه كلام ربنا مهما قرينا فيه دايماً فيه جديد

انا بتمني اننا نقدر مش بس نقرأ...احنا كمان هنقرأ بتدبر

زي ما ناس كتيرة مننا بتعمل بفضل الله

المشروع اللي هنعمله هنا ان شاء الله

كل واحد هيمشي في الختمة اللي هو فيها

سواء جزء او جزئين او زي ما ربنا ييسرله

بس يختار لينا أكتر آيه حس بيها في اللي هو قراه النهاردة

آية حس انه بيقرأها لأول مرة

أية ممكن إدته أمل أو خوفته أو حس بيها بطريقة مختلفة

أو يمكن سمع تفسيرها أو قراه وحابب يقولهولنا

او عرف قصة نزولها و حس انه هيفيدنا وهيوضح لينا الآية

او لقى خاطرة جت في دماغه بخصوص الآية دي

ممكن يكتب الآية واللي هو حس بيه وممكن حتى يكتبها بس

ويسيبنا احنا نحاول نحسها زي ما هو حسها

دي دعوة للتدبر اتمنى صدي عند الناس

وأتمنى ماحدش يتردد يشارك فيها واتمنى كل حد يكتب

وهو واثق انه بفصل الله فيه ناس كتيرة بتقرأ اللي هو بيكتبه

وممكن كلمة تغير حاجة جوة حد او تلفت نظر حد لحاجة ماكنشي واخد باله منها

الحمد لله وبفضل الله أولا و أخيراانا أعرف شخضيا أكتر من 200حد

المدونة باستمرارغير الناس اللي انا ماأعرفهاش

صحيح ان معظمهم اختاروا يكونوا من الحزب الصامت وأنا بحترم ده وقدره

بالمناسبة انا عمري ما بزعل لما اكتب قصيدة او قصة مثلا

و أطلب رأيكم فيه وتيجي الردود قليلة شوية

بس بزعل بجد لما يبقى فيه حاجة زي كده

ناس محروجة تشترك او خايفين من الرياء

لإن بحب أحس اننا لسة قادرين نجتمع على الخير

الإجتماع على الخير نفسه نية كبيرة اوي

بناخد عليها ثواب كبير اوي يمكن زيها زي الخير نفسه

وتكثير سواد المسلمين في أي حاجة صح بيعملوها

برضو نية كبيرة أوي بس احنا مش بناخد بالنا منها

اتمنى كل الناس يقدروا يشاركوا معانا كل يوم أو مع كل آية يحسوها

ولو حتى مرة واحدة بس

حتى يمكن احسن يكون من غير الأسامي للي يحب كده عشان

شبهة الرياء تبعد عن أي حد

في الحق قل لا تخش َ شيئا ً...فعلي يديك الآن قد يأتي الهدى

سبأ ٌ هـــــــداها هدهد ٌ لإلهها...أفلا تســـاوي عند ربك هدهدا ؟؟

وهيبقى فيه مسابقة صغيرة كده لإختيار اجمل تأمل او اجمل احساس اتقال في آية

هيكون لجنتها من الشيوخ اللي بتصلي بينا في المساجد ان شاء الله
إبدأ دلوقتي بأكتر آية علقت معاك في الكام يوم اللي فاتوا
ماتحرمشي نفسك ولا تحرمنا من الأجر

...................................................

كل سنة وانتو طيبين مرة تانية

اتمنى ربنا لما ينظر لينا في الايام دي

يلاقينا اتغيرنا أو على الأقل بنحاول نتغير

اتمنى على مدار أكتر من عشرين يوم ان شاء الله نقدر نعمل ده

ويمكن ربنا يكرمني و اقدر بعدها أكتب هيدة ليلة القدر لو ربنا يسر ان شاء اله

ربنا يوفقنا كلنا لما يحبه ويرضاه

الله أكبر...في رمضان

السلام عليكم ورحمة الله
رمضان بدأ
كل سنة و انتم كلكوا طيبين
قبل أي وكل حاجة النهاردة اول ليلة من رمضان
ربنا بينظر لينا الليلادي وبيباهي بينا الملايكة
حاسين دي؟؟؟؟؟
مااعرفشي ليه عز عليا أوي إن رمضان يبدأ من غير ما أكتب فيه حاجة
رغم اني عارف ان معظم الناس اللي متابعة المدونة مشغولين جدا
انا هكتب موضوعين يعني فيه كمان موضوع تحت ده ان شاء الله
اللي خلاني آجي واكتب اني حاسس اننا – اللي في سنة سادتة واللي مأجلين

الدفعات التانية يعني- مضغوطين أوي
كلنا عايزين نعمل حاجات كتيرة أوي في رمضان
بس ظروف الامتحانات والدراسة غصب عننا واخدانا وخصوصا اننا المفروض
نلم السنة كلها في الشهر ده
وحاولت أفكر ازاي احنا وحتى الناس اللي مش معانا
نقدر نستفيد من خير وثواب رمضان واحنا ماشيين في دراستنا عادي
كنت سمعت كلمة قريب من شيخ عجبتني أوي
بيقول فيها ان النيات تحارة العلماء
يعني فيه ناس كتير بتعمل نفس الحاجة بس مش كلهم بيؤجروا عليها
لان فيه ناس بتعمل الصح بس من غير نية صح
عشان كده عايزين نعمل كل حاجة في رمضان بنية صح
يعني هنذاكر وهنروح الكلية بنية اننا ننفع المسلمين ونكون دكاترة كويسين
وعشان نجيب درجة كويسة تودينا لمكان كويس نقدر نخدم منه الناس
حتى الأكل والنوم هنعملهم بنية انها حاجة بتساعدنا على العبادة وعلى المذاكرة
و لو كان الوقت مش سامحلنا نعمل حاجات كتيرة كويسة
فاحنا نقدر من غير ما نضيع وقت نسيب حاجات كتيرة مش كويسة كنا بنعملها
لإن من وجهة نظري اننا لما نسيب حاجة بتغضب ربنا عشان ربنا
بيبقى ثوابها كبير اوي عنده ان شاء الله وخصوصا لما نبقى متعلقين بالحاجة دي
هقوللكم تجربة مريت بيها بس مش عايز الناس تتصدم فيا
انا أكتر حد فيكم كلكم كان بيسمع أغاني وده مش جهر بالمعصية والله
بس انا من تانية اعدادي مش بذاكر ولا بنام غير والردايو مفتوح جنبي
بكل الحلو والوحش اللي فيه لدرجة ان كل الأغاني القديمة
كنت أعرف مين اللي لحنها و ألفها وتغنت امتى وقصتها ايه
الحمد لله ماكنتش بتفرج على اي كليبات بس كنت مدمن أغاني

ومابين فترات ببطل فيها وفترات برجع أسمعها تاني
و انا زي ما بيتهيالي معظمنا كده عارف من جوايا ان الأغاني حرام
و حتى لما سئلت لاقيت ان الموضوع مافيهوش خلاف أصلا
ولاقيت كل العلماء تقريبا ً ما أجازوش الموضوع حتى النسبة القليلة اوي
اللي أجازت الموضوع مااجازوهوش بالشكل اللي هو موجود دلوقتي ده
وكلنا عارفين كده بس كلنا وانا اولكم بنكابر
انا عارف ان كلامي دلوقتي بقى تقيل على قلب ناس منكم والبوست بقى رخم
بس انا عن تجربة بعد ما بطلت أسمع
حسيت ان بجد مافيش حاجة اكبر من رضا ربنا وحسيت
ان ديننا ده كله وعقيدتنا بتتلخص في كلمتين اتنين...الله أكبر
ربنا أكبر من اي ومن كل حاجة
وده اللي خوفني وزعلني اوي من نفسي اني حسيت بتفاهة نفسي
وانا قاعد بسمع كلام انا عارف انه بيغضب ربنا ويوم بعد يوم بتلعق بيه زيادة
وبحب اللي بيعملوه ولولا تثبيت ربنا يمكن كنت بقيت واحد من اللي بيصنعوه
عمري ما هنسي لما كنا في اسبوع شباب الجامعات في المنصورة
وجت حفلة تامر حسني ومارحناش انا واصحابي الحمد لله بس واحنا
رايحين نتعشي لاقينا زحمة ووش وعربيات اسعاف وخدنا الفضول
اننا نشوف ايه اللي بيحصل ورحنا خمس دقايق شفت فيهم كتير أوي
بس اللي مش هنساه اني شفت بنت كانت عايزة تطلع على المسرح بتاعه
والبودي جارد بتاعه كل ما تيجي تطلع يدوس على راسها برجله
وهي عمالة تعافر وبتحاول تحوش رجله عشان تطله
ليه؟؟؟؟؟؟؟؟
ساعتها افتكرت حديث النبي صلي الله عليه وسلم يحشر المرء مع من يحب
واحنا للأسف قلوبنا اتعلقت بالناس دي مع اننا عارفين اننا ما اتخقلناش لكده
احنا قلوبنا اتعلقت بالحاجت دي لاننا علقنا قلوبنا بيها
يعني زي ما احنا بنعودها هي ببتعود
فيه راجل احيانا بيركب معانا في مواصلة السنطة طنطا ومن ساعة مايركب لحد ما ينزل
تلاقيه بيدندن بالقرآن وصوته جميل أوي ربنا يبارك فيه هو عود قلبه على القرآن
فبقى حتى لما ييجي يدندن بيدندن بالقرآن وحتى احنا لما بنركب معاه
بنرمي ودانا عشان نسمعه ونسمع القرآن بصوته
آخر موقف هحكيه عشان انا طولت عليكم بس الموقف ده علمني كتير
وإداني كمية ثبات جامدة جدا في الكلام اللي فوق ده
امبارح رحت الساعة اتنين كده أصلي الضهر في المسجد اللي برة الكلية
اللي قصاد مكتبات الشرقاوي الناحية التانية
ولاقيت راجل كبير اوي في السن ماسك مصحف صغير أوي وبيقرأ فيه
بس بيقرأ بمشقة شديدة ومقرب المصحف لعينه اوي فقلت يمكن مايعرفشي
ان المسجد فيه مصاحف كبيرة وخدتله مصحف كبير.. الراجل طبطب على
وقاللي يا ابني انا مابقراش غير في المصحف ده من تلاتين سنة
ومش هرضي أغيره أبدا لإنه بقى أعز صاحب لي
وحاسس ان المصحف ده بالذات هو اللي هيشفعلي يوم القيامة
بجد علمني كتير أوي وخلاني أخجل من نفسي وخلى الشعور اللي جوايا
ناحية المصحف اللي بشيله يتغير ده مش بس مصحفي ده صاحبي
لو عودنا قلبنا على كلام ربنا هيتعود عليه
زي ما احنا عودناه يسمع أغاني فاتعود عليها وخلى اننا نبطل نسمعها
بقى شئ صعب علينا وشئ كلنا بنكابر فيه مع اننا عارفين انه غلط
حتى لو مش حرام كفاية نسيبها لإنها شبهة والمسلم لازم يتقي الشبهات
انا بتكلم الكلام ده و هو أصعب عليا من أي حد فيكو
بس زي مابنسمع في كل وقت وفي كل أدان....الله أكبر
خلونا نبطل بس التلاتين يوم دول...نجرب...يمكن نحس فعلاً
اننا لما نبقى مع ربنا بقلوبنا مش هيبقى ناقصنا حاجة
معلهشي انا طولت في النقطة دي اوي بس زي ما قلتلكوا قبل كده
ان ربنا كتبلي اني أشوف النبي صلي الله عليه وسلم أكتر من مرة
وكانت كلها في فترات كنت مبطل فيها أسمع الاغاني دي
تخيلوا لو حاجة زي كده ممكن تكون مانعة عننا خير أد ايه
وتخيلوا واحنا محتارين هي حلال ولا حرام وطلعت في الآخر حرام
متخيلين العداد هيبقى عد علينا أد ايه
مش بس الأغاني ... السجاير كمان
اعرف نسبة قليلة أوي من اللي متابعين المدونة بيدخنوا
وعارف انهم لو عايزين يبطلوها هيبطلوها...بس ده لو كانوا عايزين ده
بس لو ماقدروش وما حلموش يبطلوها في رمضان هيبطولها امتى
هما كمان محتاجين يحسوا بنفس الكلمة ......... الله أكبر
احنا كمان نقدر نعمل حاجة مش هتكلفنا أي حاجة
احنا نقدر نخلي رمضان هو أطول فترة صمت في حياتنا
يعني هنسكت على اد مانقدر
مش هنتكلم كتير بنية اننا مش عايزين نقول أي كلمة تغضب ربنا
مش هنجيب سيرة حد بـحاجة هو بيكرهها حتى لو بنقدر نقولهاله في وشه
حتى المتعة اللي بنلاقيها في الكلام ده محتاجين برضو نحس فيها ان الله أكبر
وحتى لو الوقت مش سامحلنا اننا نعمل حاجت كتير في رمضان
كفاية لو قدرنا في الصمت ده وفي الوقت اللي بيعدي مابين الحاجات اللي بنعملها
واحنا في الكلية واحنا في الطريق واحنا في البيت
نملى الوقت ده مله بالباقيات الصالحات
سبحان الله والحمد لله ولا إله إلا الله والله اكبر ولاحول ولاقوة إلا بالله
مش هتكلفنا وقت ولا مجهود بس ثوابها كبير اوي عند ربنا
أنا نفسي أقول كلام كتير أوي بس انا طولت عليكوا أوي
في النهاية كلنا لازم ندخل رمضان واحنا حاسين انه آخر رمضان في حياتنا
لو ما اتعلمناش كده من كل الظروف اللي فاتت يبقى مش هنتعلم ابداً
وفي آخر رمضان في حياتنا ماينفعشي ربنا يبصلنا يلاقينا في حتة
هو مش عايز يشوفنا فيها
ماينفعشي يبصلنا يلاقينا بنسمع أو بنشوف حاجة بتغضبه
مش عايزين نضيع ثانية واحدة في رمضان في اي حاجة غير رمضان
رمضان اللي ربنا اداهولنا هدية عشان يغفرلنا فيه

ينفع نرد هدية ربنا عشان أي حاجة

أول حاجة لازم نعملها بسرعة

كل واحد يطلع قايمة الأسماء في محموله ويجيبها من الأول للآخر

يشوف مين اللي هو مقصر في حقه أو مزعله ويعتذرله

أو حد هو زعلان منه ويسامحه

خلنا ندخل رمضان واحنا مش مزعلين ولا مزعلين حد

يمكن ربنا يسامحنا وبعفر لينا تقصيرنا عشان النقطة دي

انا كده طولت أوي

كل سنة وانتو كلكم طيبين

فيه بس هيبقى مشروع صغير كده على المدونة طول رمضان

اتمنى كلكم تشاركوني فيه هنا ان شاء الله

ربنا يتقبل منا جميعا ان شاء الله

كل سنة وكلكم بخير