اعزمنا انت

السلام عليكم ورحمة الله

ان القلوب التي لا تعرف معني الصيام تري فيه حرمانٌ من اللذه

أما القلوب التي تعرفه فتري فيه لذة الحرمان

أنا متشكر أوي على كل تعليقاتكم واختيارايتكم الموضوع اللي فات

حبيت استغل الوقت اللي دخلت فيه نت النهارده اني اعمل بوست جديد

بس البوست بتاع النهارده انتو اللي هتكتبوه

الفكرة جتني بقالها كتير بس ماكنتش عارف اعملها ازاي

كنت ماشي مع واحد من اعز اصحابي بعد درس قرآن

فجه على بالي السؤال ده

القرآن كله جميل طبعا

بس ايه اكتر آيه بتحبها في القرآن

وايه اكتر آيه لما تقراها بتخاف اوي

الآيه اللي كان بيحبها

كانت زي معظمنا

بسم الله الرحمن الرحيم

قل يا عيادي الذين أسرفوا على أنفسهم لا تقنطوا من رحمة الله

إن الله يغفر الذنوب جميعاً

...........

صدق الله العظيم

أما الآيه اللي كان بيخاف منها فكانت

بسم الله الرحمن الرحيم

أم حسب الذين اجترحوا السيئات أن نجعلهم كالذين آمنوا وعملوا الصالحات

صدق الله العظيم

وقال انه في كل حاجه صعبه تحصله بيخاف يكون ده عدم رضا من ربنا عنه

لانه من الذين اجترحوا السيئات

انا لما سمعت الايه حسيت اني بسمعها لاول مرة

وبقيت لما بقراها في المصحف بقف عندها كتير اوي

رغم اني قبل كده كنت بعدي عليها يمكن من غير ماخد بالي

من هنا بقيت بسأل السؤال ده لناس كتير

لانهم بقوا بيوروني آيات وتأملات في القرآن لأول مرة اشوفها

انا شخصيا بحب سورة الزمر جدا جدا جدا جدا

وأكتر آيه بحبها فيها وفي القرآن

وبقولها لنفسي كل ما حاجه تضيع مني

بسم الله الحرمن الرحيم

أليس الله بكافٍ عبده

صدق الله العظيم

اما أكتر آيه بتخوفني

فهي جزء من آيه بيخليني أرتعش من جوايا

بسم الله الرحمن الرحيم

أحصاه الله ونسوه

صدق الله العظيم

وآيات كتيرة تانيه

بس دلوقتي دوركم انتو تجاوبوا على السؤال ده

وتأكدوا ان الآيه اللي هتقولوها وتقولوا تأملكم فيها

يمكن تسيب أثر جوة حد فينا نؤجر عليه كلنا ان شاء الله

مستني اجاباتكوا كلكم

رمضان كريم..أول عزومه

متأسف أوي على تأخيري
يارب رمضان كريم عليكوا وعلى كل الناس اللي بتحبوهم
انا مش عايز اقول انه افطار روحاني
لان دي كلمة كبيرة اوي عليا وعلى الكلام اللي تحت
كان نفسي اكتب مقدمة طويلة
على الأقل اقول ايه علاقه الكلام اللي تحت ببعضه
بس انا عارف ان وقت اللي هيزورا المدونه من سنه خامسه مش هيسمح
انا بس كل يوم جمعه بروح اصلي في مسجد جميل اوي اسمه مسجد الرحمن
بيخطب فيه شيوخ ربنا يبارك فيهم بيأثروا في جدا
بعد كده بخرج انا واصحابي من الجامع نطمن على بعض
وبعد كده بروح المقابر ازور والدي الله يرحمه وكل الناس اللي بحبهم هناك
وبعد كده برجع من طريق وسط الاراضي وببقى قاصد ارجع منه رغم بعده
لان التلت ساعه اللي بسمشها فيه من اجل الاوقات اللي بقضيها واكثرها الهاما
وعلى بال ما اروح كانت دايما بتكوّن جوايا حاجه من الحاجات اللي تحت دي
بس من غبائي ماكنتش بسجلها وضيعت معظمها
هي يمكن فيها حاجات قديمه وحاجات كملت وبقت قصايد وحاجات جديده
المهم لي طلبين
الطلب الأولاني كالعاده انكم هتحتاروا جزء واحد بس من اللي تحت دول
اما الطلب التاني فانا نفسي كل حد اختار حاجه يكتبها في ورقه صغيرة
وما يكتبشي عليها اسمي ويحط الورقه دي تحت ازاز مكتبه او ينقلها
في كشكول محاضراته او باي شكل يفضل مهما حصل فاكر الجزء ده
ومهما حصل يفتكرني دايما بالخير


حينما أذكر اسم الله المنــــتقم أشعر بالخوف
و حينما أذكر اسم الله الرحمن أشعر بالأمل
و حينما أذكرهـــــــما معاً أشعر أنني مسلم

يارب
ماتخلـنّيش من ناس كتير... عاشت حيــاتها لنفسها
ماتخلنيش من ناس كتـير....دفنت حيــــاتها بنفسها
ماتخلينيش من ناس كتير...ماشية في جنازة نفسها

يا دنيا لن أخشى منكي.....مهما قلبي في حزنك ِ طافْ
الله ُ سيغنيني عنــــكي......من معَـه ُ الله فكـيف يخاف؟

قد تمنعونا أن نموت في سبيل الله ولكنكم أبدا لن تمنعونا أن نعيش في سبيله

أقولها بقلـــــــــبي.. ويقــولها لسـاني.....بك تستـــقر روحي... وتطمـئن ذاتي
وإذا غدَتْ ذنوبي..ظلماتٌ في كياني.....فرضاكَ أنت نور ٌ..ينساب في حياتي

وكيف يشق ّ آذاني أذان ٌ...و لـِي قلب ٌ على الدنيا أكبـّّـــا
فمهما كانت الدنيا تنادي....نـــداء الله أولــــى أن يلــــبّى
اتمني...أتمنى ..أتمنى أكون فعلا ً أد البيتين دول

يا هجرة المعصوم عودي واطرحي...في أمّة المخــــــــتار آيـــات الأملْ
ولتخـــــــــبريهم ْ أن دين محـــــمد ٍ....منـــــهاجه كان العــــمل ثم العملْ
من أجل دين الله ضحي المصطفي....وتحمّــل المخـــــــتار ما لا يُحتملْ
بعزيمة الإسلام أشــــــرَقتْ الــدُنا.... والنور شق الكون والصرح اكتملْ
بالصبر بعث المصطفى نور الهدي... للكون جمعا ً من على ظهر الجملْ



ألا يا ظالـــــمي مهلاً.......أنا ما جئـت ُ فيك ألومْ
كفي يا ظالــــمي أني ......شكوت ُ الظــلم للقـيومْ
وحتى لــــو ستقتـلني......ستحيا دعوة المظــلومْ

لن نستطيع ابدا أن نغير القدر ليرضى بما تريده قلوبنا ..ولكننا
نستطيع دائماً أن نغير قلوبنا لترضي بما يريده القدر

سوف يأتي النصر يوما...كي نحلق في ضــــياهْ
لا اري في النصـر شكاً....إنــّه وعــــــــــد الإلهْ
ان ّ ما يخــــــــشاه قلبي....أن أمــــوت ولا أراهْ

ان القلوب التي عاشت حياتها طولا وعرضاً ولم تعرف الله
هي قلوب ٌ لم تعرف معني الحياة...انها كعيون ٍ تري جيدا ولكنها
اختارت أن تعيش كل عمرها في الظلام

عن القدس قلنا كثير الأغاني......متى عن كثـير الأغاني نكفْ
بحد الســـلاح تعــود الأماني.....ولا ..لن تعــودَ بمـلـــيار دُفْ

يا نفس لا تستصـــغري ذنبا ً فما....ذنبا ً مع الاصرار قد يحيا صغيرْ
لا تذكري الذنب الضغير وتجهلي...أن ّ الـذي تعصــينه ُ ربـّـا ً كــبيرْ

قصةٌ قصيره.. ( وُلِد َ ...مات )؛؛؛ملحوظه.. في هذه القصه.. كلنا أبطال

فلتـُحـيني يارب حتى أنتــــــقم ْ....من كل جـــبار ٍعلى ديــــني أغارْ
و إذا رحلت ُ الآن فاشهدْ أنــني...عمري مضى و أنا على ديني أغارْ


يارب
يمكن العـــمر القصـــيّر.... يوهـم الناس إني طاهر
و إن قدرت إني أغــيـّر.... نظرة النــاس بالمظاهر
تفضل إنت يارب عالم.... باللي باطن واللي ظاهر
يارب
يا اللي عمر ما حد جالك...يطلب الغــفران وخابْ
رحمتك فوق كل حــاجة...والدعـاء عندك مجــابْ
لو حسبـــناها بذنـــــوبي...يبـــقى مكتوبلي العذاب
وان حسبناها بعظمتك...يبــــقى ده.. أرحم حساب

ما أجمل أن تملك قلبا ً إذا لم يستطع ان يحب فهو على الأقل لا يستطيع ُ أن يكره

ومن يا نفس غـــــير الله يبقى...إذا كـــــل العظام غدوْا عظاما
و إن نامت عيون الخلق دهراً...فعــــين الله حاشا أن تنـــــــاما
إذا ما حاجةٌ يا نفس نــــــادت...ففي الحاجات لن نرجو الأناما
كرامُ الناس قد أعطوا وزادوا....فما بـــــال الذي خـلق الكراما


تكاثرت الذنوب ُ على ّ يا ربي....فهبْ للقلب من تلك الذنـوب خلاصْ
وان يحلو لعيني زخرف الدنيا....خذ الدينا ..و هبْـني نعمة الاخلاصْ



و أخيرا ً الابيات دي ...اللي على اد ماهي قديمه جدا على اد ما بعتزبيها جدا
ياخالقي
ماكنت يومـــــــا ً يائسااااا
رغم الضني..رغــم الأسى
رغم الجـــــــراح الماضيهْ
مادام نــــــــــــورك داخلي
مادام حبــــــــــك شـــاغلي
والننفس نفـــــــسٌ راضيهْ
سيظل قلــــــــبي باســــماً
وتظل روحــــي دائــــــماً
في درب حبتتتك ماضيهْ
ياخالقي
تمضي السنين ولا اتوبْ
وغرقت في بحر الذنوب
والعمر يمضي في كـبَــدْ
لكـــــن ّ روحـــي لم تزًلْ
تأتي رحـــــابك فـي املْ
والقلب غيــــرك ما عبَـدْ
وبرغم عـــمـــــر ٍ فاتني
سأظــل اعــــــــلن أنــني
سأظــــل عبـــــدك للأبدْ
سأظــــل عبـــــدك للأبدْ
سأظــــل عبدك.. ..للأبدْ

محتاج دعواتكم

اخوكم اللي فخور انه واحد منكم

محمود ابوالعزم

حتى نلتقي

السلام عليكم ورحمة الله

انتظروني ان شاء الله بعد اول صلاة تراويح
يعني قبل ما اي حد يفطر
ييجي ياخد الهديه بتاعتي هنا ان شاء الله
ويعزم كل اصحابه وحبايه كمان
ولحد الوقت ده ان شاء الله
دي تدوينه جميله جدا جدا جدا
لاخي وصديقي محمود فرج
اتمنى اللي ماقراهاش يقراها
لانها جميله جدا
http://qasaed.blogspot.com/

نلتقي على خير ان شاء الله
ولحد ما نلتقي
ده اخر سطر كتبته
وهيبقى أول سطر في تدوينه رمضان ان شاء الله


الصوْم الحقيقي...هو أن تشبع الروح من جوع الجوارح

ألف سلامه عليكي يا رجلي

السلام عليكم ورحمة الله

بالنيابه عن الدكتوره غاده أنا بشكر كل الناس اللي هنيتها هنا على المدونه

وبتعهد ان أنا ان شاء الله اوصلها التهاني الجميله دي

ويمكن ماتسمحليش الظروف اروحلها غير بعد امتحان الاطفال النظري

يعني لو فاضل حد نفسه يهني تاني مافيش مشاكل

اسمحولي النهارده اخرج من كل مود وحش ومن كل ضغط عصبي مريت بيه الفتره اللي فاتت

وآسف ان كان الاحساس ده اتسرب مني للمدونه هنا

النهارده هكتبلكم عن حدث من الاحداث الجاريه المهمه في مصر دلوقتي

كلنا سمعنا عن قانون المرور وتدعيم الخبز و حريق مجلس الشورى

بس مش كلنا سمعنا عن الحدث المهم ده

ومعلهشي انا كالعاده نسيت ربع القصيده


في عهد السيد الرئيش محمد حسني مبارك
أكيد طبعا في عهده هو احنا شفنا عهد غيره

وفي عهد دكتور حاتم الجبلي وزير الصحه
فيه وزير يبقى اسمه الجبلي!!...أهو راخر .....وقعد على تلها

قام الدكتور أحمد عبد الباري أبوالعزم
ابن عمي يا جماعه

بتجبيس رجل المواطن
محمود سليمان أبوالعزم

وذلك في يوم الجمعه الموافق
8/8/2008
يا سلام..حتى التاريخ فيه شعر

هذا ولم تعلن أي جهه مسئوليتها عن الحادث وان كانت أصابع

الاتهام تشير نحو النادي الأهلي خصوصا بعد توراد الأنباء

عن قرب انتقال اللاعب لنادي الزمالك

هذا وبهذه المناسبه فقد تلقى السيد الرئيس برقيات المواساه من الساده أصحاب الفخامه والسمو
ملوك ورؤساء وأمراء الدول العربيه

ومن رئيسي مجلسي الشعب والشورى وعدد من رجال الدوله



ألف سلامة عليكي يا غاليه
استـــحملي ...أيام وتفوت
ألف سلامه عليكي يا رجلي
my footربنا يشفيكي يا

طول عمرك وانتي يا رجليّ...هاديه وراسيه ما بين اخواتك
اه يا اميرة يا طيبه يا اللي....ماضربتيش شلوت في حياتك
كنت زمـــــــان بتمشّي عليكي....دلوقــــــــتي مقضّيها تكاتك

كنتي زمان في الجذمه السمرة
تمــــشي سريع ولا حدّش أدّك
بـــــعد الجبس يا عيني عليكي
مابقاش فيه ولا شوز على أدك

بلبس فرده وفرده عشانك ...وعشانك غيرت في لبسي
وبقيت لما أنزل في الشارع....الناس تتريأ علي جبسي
ويقولوا امتحانات الباطنه ...خلت عضمنا زي الشيبسي

كنت هروح في ريال مدريد
بس الحظ ماجاش مظبوط
وماعدتش هلعب في نوادي
ولا حتي في بترول أسيوط

بعد ما كان الأهلي عايزني...عدلي الــــــــــقيعي هيدّيني سكه
بعد الجبس خلاص يا جماعه....آخري يادوب هلعب في السكه
راحــــــت فين أيام الكوره؟؟؟؟؟؟....أنا دلــــــــوقتي أسير الدكه

ألف سلامه عليكي يا رجلي

رغم ان ماحــــــــدّش عـبـّــرني...بهدية ولو ربطة فجل
يوم ما يفكوا الجبس أنا لازم...هعمل حفله وهدبح عجل
علشان بعد الجـــبس خلاص....أنا حسيت ..بغلاوة الرجل

لحد بكرة ان شاء الله

انا مش هنزل موضوع النهارده ان شاء الله

لو فاضل اي حد ماهناش الدكتوره غاده

لسه فاضل وقت ان شاء الله

انا هطبع الدرود بكرة الضهر ان شاء الله

لو فاضل حد عايز يهنيها

يدخل دلوقتي ان شاء الله

فرح الدكتوره غاده

السلام عليكم ورحمة الله

اتمني يكون الجميع بخير اوي

المناسبه اللي هقوللكم عليها دلوقتي تخصني اوي

تقدروا تقولوا انه فرح اختي

يوم الاتنين الجاي ان شاء الله

فرح الدكتوره غاده

و انا مش هقدر اوصف الدكتوره غاده تبقى ايه باالنسبالي

كل اللي اقدر اقوله ان انا ووالدتي واخواتي بنعدها واحده منا

و عمري ما حسييت احساس الاخوه الصافي ده ناحية حد أد ماحسيته ناحية الدكتوره غاده

ويمكن الدكتوره غاده من اكتر الناس اللي علموني في حياتي

اتعلمت كتير اوي على مدي الخمس سنين اللي عرفت فيهم الدكتوره غاده

اتعلمت ازاي اعامل المرضي

ازاي ابقى كويس وفير من غير ما ازعل حد مني

ازايي اكون وقت الجد جد ووقت الضحك ضحك

وكنت فرحان اوي السنادي اني مش لوحدي اللي بقيت بعز الدكتوره غاده

لان ناس كتير اوي بقت بتعزها زييي

آخر مرة كلمت الدكتوره غاده بقوللها كويس انك هتجوزي الفترة دي

اصل الناس بتخاف منك في الاوسكي

قالت انا نفسي ادي درجه كويسه

وعشان ادي درجه كويسه لحد لازم اكون امتحنته صح

واحاول اطلع منه احسن ما عنده

تعرفوا..اليوم الوحيد اللي كانت الدكتوره غاده معايا في الامتحان

كان يوم امتحان الرواند

والناس قالت ايوه يا عم الدكتوره غاده هتظبطك

وفعلا دحلت الدكتوره غاده معايا الاوسكي

مش هقوللكم عملت في ايه في الاسئله

عمري ما حد سألني بالطريقه دي

ولما رحت على حاله من بتوع القاهره وابتدي يمليني الشيت

لاقيتها جت خدتني لواحد من عيانين المستشفي العاديين جدا

وقالتلي انا مش عايزاك تكتب شيت وخلاص

انا عايزاك تطلع دكتور صح

ولما جت وقت اللجنه راحت هي الرواند وسابتني دخلت للدكتور موسي لوحدي

و قالتلي ماتخليش حد يوصي عليك

اعمل نفسك بنفسك وماتخليش لحد فضل عليك طول العمر

ده موقف من مواقف كتير كان نفسي احكيها

بس عارف ان الوقت ضيق

عندي فكرة بس صغيرة

في خانه التعليق

كل واحد يكتب تهنئته للدكتوره غاده

وانا ان شاء الله هطبعها واخدهالها يوم ما اروح اباركلها في شقة عريسها ان شاء الله

يعني مش عايز حد يكتب في الردود كلمة محمود خالص

الردود تبقى للدكتوره غاده وبس

اتمنى آخدلها اكبر عدد من التهاني

لانها فعلا تستاهل

واتمني على ما تقدروا تبقى الردود بالاسماء

ربنا يكرمها ويكرمكوا ويكرمنا جميعا

انا مش هطول عليكوا اكتر من كده

وكفايه التوبيك ده النهارده

وان شاء الله قريب اوي ..ممكن يوم الاتنين..هيبقى فيه توبيك خاص جدا

بالتوفيق للجميع

ومضات

السلام عليكم ورحمة الله

يمكن كتير من اصحابي واخواتي في سنه خامسه مش هيقروا السطور البسيطة دي

ويمكن اكون بكتب بعد فترة من اصعب الفترات اللي عشتها في حياتي

مش بس عشان زحمة الامتحانات والضغط النفسي الفظيع ده

بس يمكن عشان اضطريت اذاكر وانا تعبان جدا

وعندو دور برد عمري ماشفته في حياتي

ماسابشي حاجه ممكن يعملها في جسمي الا وعملها

ولسه مأثر على لحد دلوقتي

شكل الامتحانات دمرت المناعه ولا ايه

بس وسط الجو ده ورغم نزيف الدرجات ده

ربنا بعتلي كام حاجه اديتني امل كبير اوي الكام يوم اللي فاتوا

مش مهم في حياتنا يبقى الامل ليه مبرر المهم يبقى ليه معني

انا مش هطول عليكوا عشان عارف الظروف

كانت اول حاجه سمعتها من الشيخ خالد الجندي بالصدفه

كان بيقول انه كل ماييجي يدخل امتحان او موقف صعب يقول الجمله دي

اللهم اني كفرت بنفسي و آمنتُ بك

ياااااااااااااااااااااااااااااه

الجمله دي أثرت في جدا

وبيتهيالي اي حد يفهمها هتأثر فيه

اما الباقي فكانت جمل صغيره كنت كتبتها في الكتب بتاعتي اول السنه

وبقيت بالصدفه كل ما افتح كتاب تقابلني جمله منهم

تنور جوايا

ورغم ان انا اللي كاتبها حسيت ان انا اول مرة أقراها

الجمل كانت بتقول

إذا خضتَ معارك الحياة وأنت مهزوم ٌ من داخلك فلا تتوقع ان يأتيك النصر يوماً ما

ان النمله اللي حفرت الصخر..ليست أكثر منا ذكاءاً ولا قوة ولكنها فقط كانت أكثر منّا صبرا

شئنا ام أبينا سوف تجري أيامنا..ولكننا نحتاج قليلاً من الحكمه

لا تمضي منّا..وكثيرا من الصبر لكي لا تمضي علينا

أحلامنا هي الوقود الذي نعطيه لقلوبنا..لكي تشعر..لكي تحب..لكي

تعيش.. تستطيع الحياة بدونها ولكنها ستصبح قلوباً تدق فقط

نسيت الجمله اللي فاضله

أخر حاجه هقولها بيتين طلعوا منا تلقائيا ساعه ماحطيت القلم بعد اول امتحان السنادي

وكان امتحان الاطفال و قبل ما افكر ضاع أد ايه وماذاكرتش ليه وكل الكلام اللي بقوله لنفسي دايما

لاقيت البيتين دول جوايا زي ما يكونوا كانو جوايا من زمان اوي

ثقـتي بأنـك خالقي دوماً معي....لا لمْ تدع للحزن في قلبي مكانْ

قد قلتها والقلـــب يملأه الرضا...الله شاءَ وما أراد الله كانْ

أنا متأسف أوي يا جماعه لكل الناس اللي قصرت في حقها

وما سالتش عنها

كان غصب عني

دعواتكم

تمنياتي بالتوفيق للجميع

sorry

معلهشي يا جماعه انا مش عارف الموضوع اللي تحت ليه اتلخبط كده لما حطيته
بس اكيد هتعرفوا تقرو ان شاء الله

خلطبيطه

السلام عليكم ورحمة الله

ازيكم يا جماعه

يارب يكون الجميع بخير

والناس اللي من سنه خامسه يكونوا ماشيين كويس في الامتحانات

انا كنت داخل النهارده عشان ارد على ردود الموضوعين اللي فاتوا لاني حاسس بالتقصير

مع اني كنت بدخل نت باستمرار عشان اقراهم

المهم انا قررت دلوقتي اني ممكن اكتب حاجه جديده في الوقت ده

خاصة وان جوايا رغبة شديده جدا اني اكتب

وبما ان البوست ده ممكن يكون أخر بوست لحد اول رمضان ان شاء الله

فانا نفسي أعمل بوست مختلف

فقلت انه ممكن اكتبكلم اخر حاجه كتبتها من كل حاجه

ازاي يعني؟؟؟وبعدين انجر عشان ورانا امتحانات

حاضر...أنا جاي في الكلام اهو

ندخل في البوست علطول احسن

بس معلهشي لو فيه أخطاء املاءيه كتير شويه ومش مكتوب حلو

زنقه امتحانات بقى

هبتدي بنكته ضحكتني اوي وزعلتني اوي لما قريتها على النت

نكته سياسيه بعيد عنكم وعن السامعين

بتقول كان فيه زعيم عربي"بدون ذكر أسماء يعني وربنا عالم اللي في بالي"المهم الزعيم ده

دخل لقى بوش قاعد مع اولمرت والاتتين قاعدين يفكروا ومتحيرين اوي

قاللهم ايه يا جماعه مالكم

بوش قاله اصل احنا بنعمل خطه صعبة شويه

عايزين نقتل ستين مليون عربي وواحد عجلاتي

قاله طب وليه العجلاتي

ضحك اولمرت اوي وبص لبوش وقاله

مش قلتلك كلهم هيسئلوا عن العجلاتي

..................................

حد فهم حاجه

انا بس هسأل سؤال

يارتي كام واحد مننا مشغول بالعجلاتي

وياتري كام واحد مننا بقى عجلاتي

...................................

هقوللكم فزروه بقى

قريتها بالصدفه واكتشفت اني عمري مافكرت بيها

يعني عرفتهاوكل ما اقعد مع ناس اقولهالهم ويقعدوا يفكروا وماحدش يحلها

رغم انها سهله جدا

انا بصراحه مش عارف الحل

كل واحد ليه تلات دقايق بس للتفكير

واحد نقاش بيخلص القوضه في تلات ساعات

والتاني بيخلصها في ساعتين اتنين

لو الاتنين اشتغلوا سوا في قوضه واحده

يخلصوها في اد ايه؟؟؟

دي فزروه بجد

ماحدش دماغه تروح بعيد بقى ويقعد يقول حلول غريبه

عايز رقم يعني

............................

أخر حاجه كتبتها من شعر الفصحي

مقطوعه صغيره جدا

ماحدش سمعها غير مصطفي علام النهارده الصبح

بتقول

يا من تركت على خدودي دمعتينْ

أين الهوي...بل أين أنت الآن..أينْ

جرت اليدين الي الدموع تزيلها

فوجدت دمعي قد تضاعف مرتينْ

لم أدر ِهل جعل الهوي للعين عينْ

ام أن دمع العين قد أبكي اليدينْ

..............................................

اما من الشعر العامي

مراتي في مرة سألتني

سؤال كان طعمه حلو جميل

قالتلي حبيبي مين فينا

سهر في الحب طول الليل

ومين بيحب مين اكتر

ومين في الحب داق الويل

أنا قولتلها مش عارف

لان قلوبنا لمّا تميل

بيبقى الحب في قلوبنا

مافيش فيه.." أفعل التفضيل

مش عايز حد يسالني سؤال ذكي ويقوللي

مراتك ايه ..انت مجوز؟؟؟؟

بتخيل يعني يا جماعه..يعني هيبقى لاحقيقه ولا خيال

...........................

ومن الشعر الديني

مقطوعه كنت ناوي انزلها مع تدوينه اسمها ايحاءات الجمعه

هحكيلكم قصتها بعدين

المهم اني كتبتها بعد صلاه الجعه قبل اللي فاتت

حمدت ُ الله.. قالوا لي علاما!!...وذاك الحزن مدفونٌ بقلبي

فقلت ُ حمدته والقلب ُ راض ٍ ....كفي أنْ صار نحو الله دربي

وخالـــــقنا يحـــــبُ من ابتلاهُ....فرغم الحون يا أهلا بكربي

إذا ماضــــــاع منّــــي كل شئ ٍ ...سيكفي القلب ان الله ربي

.......................................

ومن الجمل اللي فيها سخريه شويه صغيرين كده

ماتعرفوش الواحد بيخطرف من الامتحانات ولا ايه

المهم الجمل دي فيه شويه سياسه

بس حابب جدا اني اقول

في وسط الظروف اللي احنا عايشنها دي

اوعي حد يقول انا بكره مصر

مصر مالهاش ذنب في الي احنا فيه

فرق كبير بين انك تكره مصر وبين انك تكره حكومه مصر

يعني مثلا

انا لما بكتب عن الطب

مش بيقى قصدي اتريأ على الطب

انا ممكن اضايق من نظام التدريس مثلا

ممكن اكلم عن المعاناه اللي احنا فيها

انما بحب الطب نفسه جدا

يارب تكونوا فاهمايني

هي نفس الفكرة اللي في الكلام ده

مش عن مصر ..عن...المهم يعني

لكي تسفيد من النتخابات فعليك أن تكون صاحب رأي..أو صاحب مطبعه

من حق لاعب الكرة أن يحصل على كل هذه المبالغ الرهيبه فهو أكثر الناس في مصر تعرضا للشتائم من جمهور فريقه ان أضاع الهدف ومن جمهور الفريق المنافس اذا احرزه

ما أرحم هذه الحكومه بنا فهي عندما وجدت ان الشعب أصبح على الحديده رفعت له أسعار الحديد

سألني أحدهم لماذا نحيي ذكري انتصار اكتوبر بالرقص والغناء

فقلت ليه لأنه انتصار ٌ"هز" العالم

بما أن الشعب المصري يعاني من أنيميا نقص الحديد وبعد رفع أسعار الحديد ..من حق الشعب المصري أن يدخل موسوعة جينس العالميه

فهو الشعب الوحيد الذي لا يمتلك الحديد داخل جسمه..ولا خارجه

بعد حيرة طويل من وزاره التموين هل يحذفون الأرز ويضعون العدس أم يحذفون الزيت ويضعوا الشاي

فقدر قرروا ان يحدفوا النون الأخيرة من" التموين" ويضعوا مكانها هاء

لقد أصبح الفرق في مصر بين من يمتلك المال ومن يمتلك شهاده العلم ان الأول يمتلك سياره فاخره..أما الثاني فهو الذي يمسحها له

بعد سنين طويله من استخدام سكر التموين لم ادري لماذا يكتبون عليه سكر فاخر الا بعد تم القبض على" فاخر"

يستطيع الشاب المصري أن ينتقل ألى اي مكان في العالم بتكلفه أقل من التكلفه اللي تنتقل بها الدبله من يده اليمني الي يده اليسرى

اذا كنت قوي البنيان..سريع الغضب...لا تجيد التفاهم..تطيع الأوامر..فهنيئا لك العمل في قوات الأمن المركزي

اذا كانت معظم المنتجات ترتفع لاننا نستوردها فان الحديد والبترول والاسمنت تعلو لسبب ِ آخر..انها منتجات من أرضنا ولذلك فهي منتجات "غاليةً " علينا

أعان الله أعضاء مجلش الشعب فهم من شدة انشغالهم لا يجدون وقتا ً ولا مكاناً ينامون فيه..الا في المجلس

و أخيرا...ليه اي حد أجنبي يشرب من النيل لازم يرجعله تاني؟؟عشان يعمل تحليل بلهارسيا

أنا شكلي هروح في داهيه قريب

.......................................................

ومن الجمل اللي معلهش فيها مسحة حزن شويه

ما أصعب أن تفقد نفسك دون أن تدري لتظل تبحث عنها دون ان تدري لتكتشف في النهاية أن عمرك قد مرّ دون ان تدري

ما أصعب أن تملك احساسا في عالم ٍ تتسابق خطواته لتدوس ذلك الاحساس

ما أصعب ان تظل دائما تلوم نفسك حتي حينما يخظئ الآخرون في حقك

ما أصعب أن تكتم احساسك للدرجه التي تجعله يسيل من كل ذرةٍ في كيانك الا من فمِك

ما اصعب أن ياتي الواقع ليهدم كل القصص التي بنينها في قلوبنا ولكنه كان خطأنا حينما لم نشركه في بنائها منذ البدايه

ما أصعب أن يقتلك القلب الذي كنت تتمنى ان يحيي فيك الأمل من جديد

ما أصعب أن تكون لا شئ في حياة من تراه كل شئ

ما أصعب أن تحب انسانا لا يحب أن يري نفسه الا في دموع الآخرين

ما أصعب أن يجرحك القلب الذي كنت تري فيه دوائك الوحيد

ما أصعب ان تبكي فيري دموعك كل الناس الا من كان سببا فيها

ما أصعب تفارق بجسدك من تلقاه بقلبك في كل لحظة ٍتمر

ما أصعب أن يأتي يوم على القول التي "تحب" لتكون قلوباً..."كانت" تحب

ومن الجمل اللي فيها مسحة امل

ما اجمل أن تملك حبيبا تحب ان ترى عينيه ولكن الأجمل أن تملك حبيبا تحب أن تري بعينيه

ما اجمل أن يكون لك حبييا يأخدك اليه..ولكن الأجمل أن تجد حبييا يأخذك اليك

ما اجمل أن تملك كرامة ًلا تخضع أبدا لغرور الأخرين ولكنها أيضا لا تحب ان يخضع الأخون لها

ما أجمل أن تملك قلباً لا يستطيع فقط أن ينسي جرحه ولكنه ايضا يستطيع ان ينسي من جرحوه

ما أجمل أن تملك قلبا يتمني أن يأتي بأحلامه الى الواقع ولكنه لا يهرب من الواقع الى أحلامه

و أخيرا

ما أجمل ان تملك ذكري تعيش بداخلك حتى ولو لم يعد لها مكانٌ في كل العالم الا بداخلك

دماغ امتحانات

السلام عليكم ورحمة الله

طـَموحاً و رغم دموع المآقي...سيبقى فؤادي طـَموحاً جرئْ

إذا كان حـُلم القـلوب اتـّهاما...أنا لست أرضي بقائي برئْ

لأن الحـــــــياة بدون الأماني...ودون الطموح انتحارٌ بطئ

ازيكم يا جماعه؟؟؟

أخباركم ايه؟؟؟؟

في اللحظه اللي انا فيها دي

انا مش عارف اكتب ايه

انا بكتب النهارده بعد امتحان الباطنه

انا مش عارف ان كنت حليت حلو ولا وحش في الامتحانين الي فاتوا دول

وعمري ماحاولت اراجع بعد اي امتحان

لان اللي حصل في الامتحان والدرجات اللي جبتها او فقدتها

هي في الاول وفي الآخر رزق من عند ربنا سبحانه وتعالي

انا زعلى من نفسي على تقصيري طول السنه وكل سنه

اللي مش عارف كان غير مبرر ولا كان غصب عني

تعرفوا

يمكن لما دخلت الطب كنت داخل مع الناس اللي داخله من غير ما اكون حابه ولا كارهه

بس دخلته بنية انها حاجه ممكن أرضي ربنا باني اخفف آلام المسلمين

واني ارضي والدي ووالدتي لان ده كان شئ يسعدهم

بس حصل موقف غير جوايا حاجات كتير اوي وغير نظرتي للطب

كنت في العنايه مع والدي الله يرحمه

وكان فيه مريض عنده غيبوبه كبد

والمرضي اللي في الغيبوبه دي غصبا عنهم بيضربوا ويزعقوا وهما مش حاسين

بس المريض ده كان الموضوع زايد عليه اوي

وكان بيزعق وبيكسر جامد جدا

والدكتوره مش عارف تعمله ايه

فقالت للمرضات يدّوله حقنة مهدأ

وفعلا ادوله حقنة مهدأ

مع ان كل الناس عارفه ان المهدأ غلط في الحالات دي

دخل بعدها في غيبوبه كامله لمده اربع ايام

انا شفت الدكتوره دي وهي واقفه جنب المريض ده وهي بتبكي وبترتعش

يمكن أهل المريض ماكانوش فاهمين ايه اللي حصل وماكانشي حد هيقولها حاجه

بس الخوف كان من جواها انها تكون سبب في ان حاله زي دي تتدهور بالشكل ده

وخايفه تفضل طول عمرها حاسه بالذنب في حق مريض مالوش اي ذنب

ويوم ما العيان ده فاق من الغيبوبه بعد اربع ايام

شفت الدكتوره دي وهي واقفه جنبه

بيتهيالي كان ممكن توطي علي ايده تبوسها وتقول سامحني على اللي عملته واللي كنت هعمله فيك

أد ايه صعب ان كلمة تقولها يبقى ليه تأثير في حياة انسان

واد ايه صعب انك تؤتمن على صحة انسان وماتقدرشي تعمله حاجه

واد ايه صعب ان العيان يتألم أدامك و ماتقدرشي تعمله حاجه

يمكن خرجت من الفتره دي وانا كل حلمي في الدنيا اكون دكتور

دكتور بجد

انا مش عارف ايه اللي خلاني اقول الكلام ده دلوقتي

الواحد مش في حالته خالص بعد الامتحان النهارده

مع انه كان كويس الحمد لله

النهارده وانا مروح

كنت راكب الجلاء ...وجينا في نص السكة

والراجل اللي جنبي كان هينزل فنزلت انا عشان انزله واركب تاني

ولما نزلت افتكرت حاجه كانت جايه في الامتحان وقعدت افتكر انا حليتها ايه..ايه....ايه

ببص مالاقيتشي الميكروباص

استني يا عم الحاج....انا كنت راكب معاكو

وهاتك جري ورا الميكروباص لحد ماحصلته

وسألني السؤال الشهير..ايه يا عم انت شارب حاجه

وجاوبته الاجابه الشهيره...لامؤاخذه أصل انا في طب

حتى وانا جاي دلوقتي واحنا المغرب كده

وقابلت عم ماجد اللي سبقني كالعاده وقاللي

سلامو عليكو...ازيك يا دكتر

وانا بكل براءه..اهلا يا عم ماجد صباح الخير

صباح الخير!..زمانه دلوقتي بيقول ايه الواد الأهطل ده

الموقفين دول فكروني بآخر مواضيع أحمد سعيد على مدونته الجميله أنا البحر

يبقى انت أكيد في طب

http://ana-elbahr.blogspot.com/

في النهايه

دعواتكم لينا يا جماعه

ومش عارف في النهايه انشر ايه

آخر حاجه كتبتها كانت جمل بس كانت حزينه شويه

وانا عارف ان الدنيا مش ناقصه اليومين دول

اسمحولي بس انشر جملتين منهم

فيهم معنيين نفسي اقولهم

أحيانا كثيرة نري كل الكون من حولنا ظلاماً فنظل نبحث عن السبب

طويلا ولا نجده...لنكتشف في النهايه انه كان خطأنا حينما نسينا أن نفتح أعيننا لتري النور

...............................................

ما أصعب أن تملك عينين لم يعرفا طعم الدموع

وما أصعب أن تملك عينين لا يكفان عن البكاء

وما أجمل أن تملك عينين لم يحرمهما الله من رحمة الدموع ولكنه أعطاها يدٌ

تستطيع أن تمسحها وقلب ٌيستطيع أن ينساها

واخيرا وبالصدفه وانا فاتح صفحة رسايلي

ايدي جت على ايقونه جابت اول الرسايل المبعوته من ايميلي

لاقيت فيه رساله اسمها عداد المية

فتحتها وافتكرتها

كان انسان عزيز على ناويين يفتحوا صيدليه

وفضلوا كام شهر متعطلين عشان عداد الميه ده

فحاولت أكتب وكانت من اول محاولاتي في كتابة الشعر ..العامي بالذات

خدتها كوبي من الرساله زي ما هي

عداد المية
يا ما فيـــــه حاجات غريبه.........في بلدنا الصعبة ديّه
عـــــــــــــــــداد الميه يقدر............يعطل صيدليه
.....................................
هو احنا في دوله ناميه
ولا احنا في دوله باميه
ولا احنا بقينا فين
موظف الحكومة
تلاقيه يسمع في ثومة
و يقولك الروتين
و فوت علينا بكره
و كأنه يا عيني يكره
في شغله يكون أمين
و موظفات كلامها
عن أكلها وهدومها
و في الشغل مطنشين
قاعده زي الجبلـّه
بتفرط في البسله
و تفكر في العجين
و طبعا الحقيقه
لو شئ عايزدقيقه
ياخدله جمعتين
تلاقيه مجعوص تمام
و يبلطج في الكلام
و يقولك انت مين
اقولك ابقى مين

.................................
انااااا يا مصر مش خوفو......... ولا خفرع ..ولا رمسيس
لكن مصري وليّ حقوق .....ومن حقي ما اروحشي فطيس
صحيح مش بيه ولا ابن وزير
ولا لي ّ ابن عم سفير
لكن بحلم وحلمي كبير
ومن حقي تساعديني
و آه لو كنت انا روبي
هتيجي وتمسكي في توبي
لكن علشان انا جيوبي
بقت فاضيه بتنسيني
أنا أوْلي ابشر فيكي

وليه حقي يضيع فيكي

لتوتو وسمسمه وميكي

وانا الغلبان بترميني

بحق غرامك السامي

خديني لبر أحلامي

وكوني الشمس أدامي

بلاش يا مصر تنسيني

بلاش يا مصر.. تنسيني

محمود سليمان ابوالعزم

now_tears_smile@yahoo.com

احنا ...بتوع الفرقه الخامسة

السلام عليكم ورحمة الله

في البداية أنا بعتذر عن تقصيري الشديد في حق المدونه

المشكله مش بس في الامتحانات

المشكله اني مش عندي نت في البيت

ومش بعرف ادخل نت في البلد لان النت بعيد جدا عني

والمشكلتين دول سببهم ان احنا بيتنا آخر بيت في الأراضي

بس دايما بحاول أدخل نت بأي طريقه

و أحاول أقري الردود

بس الوقت والظروف اليومين دول مش بيمهلوني اني أرد

وكمان بعتذر لـهبهوبه ومحمد مغاوري بالذات عن القصيدة اللي كنت قلت اني هحطها على المدونة

بخصوص فرح أختي

انا بجد كان نفسي اكتب حاجه مخصوص واقولها في الفرح

لان حنان مش بس اختي الكبيرة

دي توأمي

بس ماكانشي في دماغ خالص في الوش بتاع الفرح ان اكتب اي حاجه

وحتي لما كنت بلاقي الدماغ ماكنتشي بتيجيجي مظبوطه

انا بس كان فيه شويه ابيات جٌم في دماغي

كانوا محتاجين يظبطوا

واضيف ليهم اللي كنت هكتبه مخصوص لاحمد وحنان بس الوقت ما امهلنيش

الابيات كانت بتقول

الجواز مش لبس دبلة

أو غوايش في الايدين

مش ورقتين عقد رسمي

عند مأذون مكتوبين

absolutly

الجواز مش بت حلوة

خدها واد أمور جميل

مش هدوم مغسوله حلوة

ويّا أكل لذيذ جميل

absolutly

الجواز رحمة ومودة

زي رب الكون ما قال

مهما فيه العمر عدي

كل يوم بيزيد جمال

الجواز يا جماعه رحلة

كلـــــــها حب وتفاهم

واللي بيخليها أحلى

لمّة الأطفال معاهم

الجواز اتنين قلوبهم

ضمها ..احساس برئ

الجواز اتنين حياتهم

ضمها...نفس الطريق

الجواز اتنين لبعض

بالقلوب.. عايشين لبعض

بالقلوب.. عايشين في بعض

بالقلوب ..عايشين ببعض

حتى لو هيكون طريقهم

فيه مطر أو حتى رعد

مش هيمنع يوم طموحهم

شئ عشان.. بيحبوا بعض

في النهايه انا هدعي لكن

نفسي كله يقول آمين

من هنا وكل الأماكن

كل قلب يقول آمين

ربنا.. يفضل حاميهم

ربنا يبارك عليهم

ربنا يطرح بركته

والأماني الحلوه فيهم

يملى بيتهم بالأمان

جنبهم أجمل جيران

يحمي بيتهم مالناموس

والعناكب والفيران

ربنا يبارك في مالهم

ربنا يكتر عيالهم

مهما في الدنيادي يجري

ربنا مايشغلشي بالهم

ربنا يزيدهم سعاده

كل يوم تكبر زياده

يفضل الشربات في ريقهم

مايدوقوش ولا قهوة سادة

تبقى عين الناس بعيد

والأمل يفضل يزيد

يمشي قطر العمر بيهم

والجميع راضي وسعيد

...........................................

يارب كل الناس تكون قالت آمين بجد

أما قصيدة المدرج

فأنا مش عارف أشكر زمايلي ازاي

بجد مش عارف

وبالذات احمد الجوهري

اللي كان نفسه اوي يطلعني اقول

بيتهيألي لو هو اللي هيقول ماكانشي هيعمل كده عشان نفسه

لما احمد قاللي انت هتقول بعد المحاضرة

بقيت خايف اوي الناس تمشي

مش عشاني

خفت ان احمد يتحرج عشان هو اللي مطلعني

بس لاقيت رد فعل من زمايلي ماكنتش متوقعه خالص

لدرجة ان لما طلعت ولاقيت الناس كلها مامشيتشي انا خفت وارتبكت

ونسيت ربع اللي كنت هقوله تقريبا

متشكر على تشجعيكم دايما لي

والثناء اللي انا بجد وبصدق لا أستحقه

ومش لاقي اي رد على التشجيع الجميل اللي كان في المدرج

غير اني انزل القصيده هنا

ومعلهشي ان القصيده صعبة في قرايتها للناس اللي مش من سنه خامسه

احنا بتووووووووع الفرقه الخامسه

غـــــم تلاقي .......و هـــــم تلاقي

كل ما اقابـــــــــــل حـــــــــــد يقوللي

أنا ماذاكــــــــــــــرتش حاجه نهائي

عيني عليكي يا فرقه يا خامسه

فين أيــــــــــــــام بس الثانوية

والتســــــعه وتسعين في المية

دلوقتي العشـــــــرين في المية

diarrheaجايبه لكل الناس

عيني عليـــــــــكي يا فرقه يا خامسه

كل ما أقــــــــــــــــــــــابل حد يقوللي

أنا عقــــــــــلي في سنه خامسه اتخم

ازاي الأطــــــــفال تتـــــــــــــــــــــلم

وأنا مزنـــــــــــــوق في الباطنه ياعم

ماذاكرتـــــــــش امـــــــــراض الـــدم

والجلديه...... تجـــــــــــــــــيب الغم

و هــــــــم في هــــمheartوchest

مـِالعصـــــبيه أنا دمّــــي اتــــــــــــسم

أنا قلـــــبي اتغمnephrologyمـ الـ

أنهي أســـــــــــيبه؟؟ و أنهي أهم؟؟؟

وابتـــــــــــدت الإشـــــــــاعات والنم

عيني عليـــــــــكي يا فرقه يا خامسه

بــــــص يا عــيــــني في وش الناس

toxic look و apathyهتشوف

همّا يا دوب بــــــــــــــــس امتحانين

shockوالدفـــــــــــــعادي تخش في

عيني عليـــــــــكي يا فرقه يا خامسه

واللي يقـــــــــــــول أنا شكلي مضيع

انا يا اخوانـّـا خـــــــــــلاص كبرت

واللي يقـــــــــــوللي أنا قلبي خلاص

elarged tender heartبقـــى

عيني عليـــــــــكي يا فرقه يا خامسه

واللي متنـــــــــــــــشن أوي والخوف

hyper toniaو rigidity جابله

واللي يا عينـــــــــــي عليه مــِالخوف

aphoniaفقد النـــــــــــطق وجاله

عيني عليـــــــــكي يا فرقه يا خامسه

واللي يقــــــــــول شوفي يا محمود

severe episodeأنا هيجــيلي

واللي يـــــــقول شوفني يا ابوالعزم

broncospasmأنا هيجــــــيلي

عيني عليـــــــــكي يا فرقه يا خامسه

واللي يقوللي حـــــــــالات الباطنة

واخده جمــــــــيع الإحتــــــياطات

مش في فلــــــــــــوس انما ناويين

ياخدوا غـــــــــــوايش وموبايلات

عيني عليـــــــــكي يا فرقه يا خامسه

واللي يقـــــــــــول الجدول زانق

blackومخلـّــيـــلنا الدنــــــــــيا

وانا بالذات جـــــدول مجموعتي

anginal attackبيجــــــيب

عيني عليــــكي يا فرقه يا خامسه

واللي يقــــــــــــول أنا زي النملة

أما المنــــــــــــــــــــهج زي الفيل

dyspropotionومادام يحصل

لازم نلــــــــــــــــــــــجأ للتأجيل

عيـــــني عليكي يافرقه يا خامسه

عيــــــــــــــني علينا وكل الناس

في امتحــــــانات علطول مهريّه

مش عــارفين يا اخوانا نشوف

كأس الأمـــــــــــــــــم الأوربيه

عيني عليـــكي يا فرقه يا خامسه

عيـــــــــــني علينا كده وجدولنا

مزنــــــوق ولا علبة بولوبيف

كـــــل الناس بتأجـّـــــز واحنا

امتحـــــاناتنا في عز الصيف

عيني عليـــــــــكي يا فرقه يا خامسه

سنه كامـــــــلة رايحين جايين

كل الطــــــلبه يا عيني بتسعى

وازاي بـــــــس يا عالم ندرس

سنه كاملة مـــــن تسعه لتسعه

عيني عليـــــــــكي يا فرقه يا خامسه

تيجي الصـــــــبح تلاقي الناس

كله بيـــجري في ساعته يبص

أقصى منـــــاه في الدنيا بحالها

يوصـــــــــل قبل تمانيه ونص

عيني عليــــكي يا فرقه يا خامسه

بس ان شــــــــــــاء الله هتعدي

وماحــــدش مــــــــــننا هيموت

زي ما اولــــــي وتـــانيه وتالته

ورابعه ما فاتوا ماخامسه تفوت

ربنا هيســـــهلها علــــــــــــــــينا

مــــش هيشمّــــــــــــت أبدا ً فينا

مش هيضـــــــــيع يوم مجهودنا

و أكـــــــــــــــــيد هيحقق أمانينا

ادعوا مـــــــــــعايا ان شـاء الله

ربـــــنا هيـــــــــــــــعديها بخير

مهما يكـــون صعب الموضوع

احنا أملـــــنا.... في رب كبير

في النهايه أنا نفسي أقول

أنا كنت أجلت امتحان الأطفال بتاع الرواند وامتحنته النهارده وامبارح

وخلال اليومين بتوع الامتحانات دول

دخلت نت ساعه كل يوم عشان أكتب البوست ده

لاني بجد بحبكم في الله

ويعز على ان حد يقول اكتب حاجه يا محمود وماكاتبهاش

ولاني بستكتر على نفسي الكلام الجميل اللي بسمعه وبقراه هنا

ومش بلاقي رد غير اني اكتب من جديد

وان شاء الله الايام الجايت تمهلني أرد على ردودكم اللي بعزها أوي

سواء على الموضوع ده

او الكام موضوع اللي قاتوا

كل اللي طالبه منكم دعواتكم

لاني بجد محتاجها الفتره الجايه

ربنا يوفقنا ويكتبلنا الخير جميعا

ودلوقتي مع صورتين من صور الفرح

طبعا واخدين بالكو ... أنا الواد الطويل أبو بدله سمرا ده .. أحسن واحد بيسقف في مصر

أنا برضه

فاضل بس بيتين كان نفس اوي اقولهم بعد ماخلصت القصيده في المدرج

بس ماجاتشي فرصه

إذا أخطـــــــــــأتُ أو خانتني كلماتي

فإنّ العيب في نفسي .. ومن نفسي

وان وُفّـــــــقت في شـــــئ ٍفتوفيقي

بفضل الله ليس الفــــضل من نفسي