أقصر بوست

قديما كنت أري أصعب لحظات الحياة....
هي اللحظات التي نشعر فيها بقمة الحزن
ولكنني اكتشفت أخيرا ان أصعب لحظات الحياة
هي اللحظات التي لم نعد نجد فيها فرقا ً بين الفرح والحزن
..........................
قديماً كنت أتلهف لأنظر خلفي لكي أري ذلك الذي طعنني في ظهري
أما الآن فلم أعد أملك هذه اللهفة ... وذلك لأنني أعلم جيدا
أنني لن أموت بنزيفي من الطعنة ولكنني سأموت بصدمتي في من طعنني

بتحبها؟؟؟؟؟

السلام عليكم ورحمة الله

يارب تكون كل الناس بخير

بدون مقدمات هكتب القصيدة علطول

زمايلي في سنة سادتة ليهم بوست اضافي تحت ده

وطلبي من الناس اللي هتقرا القصيدة

تحطوا نفسكوا مكان الانسان اللي كتبت على لسانه ده

ياترى هو كان صح في اللي عمله ولا لأ

..........................................

بتحبها؟؟؟؟
طلع السؤال منـّي بمرارة طفل بيخبّي الدموع
لما حكي
ما أعرفشي ليه قلبي اتقبض

مع إني عارف من زمان

إن اللي كان جوانا... كان

وإن الطريق اللي مشيناه...مافيهوش رجوع

كان جوة قلبي سؤال غريب

إزاي يعيش فيّا اللهيب

من بعد ما طفيت الشموع

شئ صعب لو تيجي الرياح

وتهد عش جميل بانيه

وتلاقي طيرك ساب فروعك وافترق

وتعيش سنين العمر بتدور عليه

فجأة تلاقيه

واقف على ...أقرب فروع
وبرغم شوقك ناحيته

هتخاف تقرب ناحيته

وساعتها بس هتكتشف

إنه عشان تشبع قلوب بنحبها

احنا ساعات ..لازم نجوع

لما لمح في عيوني شوقهم للبـُـكا

شفت في عيونه الهاربنين

نظرة ندم...إنه حكي

ورسمت فوق وشي إبتسامة بطعم خوف

وبدأت ألملم في الكلام

وكإني طفل يتيم نزل

للدنيا بس ماكانشي حد
ويّـاه يعلم قلبه ايه معنى الحروف
وكإني أعمي قالوله شوف لكن عشان
كان خايف النور يحرقه
غمّض عينيه الدبلانين ورفض يشوف
طب أقولّه ايه
احكي على الماضي اللي كان؟؟؟
طب هحكي ليه؟؟؟؟
أفتح طوفان الماضي ليه ؟والماضي راح
ليه لو هيبدأ قصته
يبدأها من وسط الجراح
ليه أحرم الليل الطويل
اللي بروحي غرقت فيه
يطلع عليه صبح يداويه
حتى ولو على ارضهم طلع الصباح
إيه ذنبه..طب ايه ذنبها
مش غلطته ولا غلطتي
ولا حتي غلطة قلبها
لو كنا – كنـّا – من سنين
بتحبني.....وبحبها
وحلمنا نبقي لبعضنا
وحاولنا لكن حبـنا
أدّام واقعنا المر تاه
والحزن داس على حلمنا
وحلفنا نبعد من سكات
من غير دموع...من غير آهات
لو حتى أجمل حب مات
ساب لينا أجمل ذكريات
ومشينا في دروب الحياة
تايهين وبنحاول نفوق
ونشوف لليلنا القاسي ضي
وبرغم إحساسنا اللي تاه
كان لسة جوة قلوبنا شوق
دافنينه جوة في روحنا حي
لما حكي ..فجأة اكتشفت
ان اللي عاش جواه حبيب
مهما حصل مابينسهوش
وكإن عمري طريق طويل
مشيت سنين العمر فيه
والقلب لسة ..مامشيهوش
وكإني ميـّـت سابوا روحه تعيش معاه
ولا طال يموت ولا طال يدوق طعم الحياة
وياريت قدر حتى يعيش بالشكل دا
فجأة لقى..وردُه بيغرق بين نداه
لما أعز صديق ناداه
ويرد بس يقولــّه ايه
كل الحروف متقيدة
هيموت إذا اختار السكوت
ويموت إذا رد الندا
خايف أوي
خايف أداري وييجي يوم
يحكيله حد على اللي كان
يومها الحقيقة هتألمه
شمس الحقيقة ورا الغيوم
خايف عليه لو يوم تبان
تيجي فـ نهاره..تضلــمه
خايف خياله يروح بعيد
لو شك إن ما بنــّا شئ
والشك يزرع نار تئيد
جوة القلوب مليون حريق
مع إننا والله كان
كل اللي بنــّا شعور برئ
بس انتهي و لمّـأ انتهي
راح كل واحد من طريق
لما حكي
شلت الدموع جوة العيون
وحاولت ياما لكن بكيت
وعشان ماتاخدوش الظنون
طلع الكلام مني وحكيت
ما أعرفشي ليه
لكن لاقيت ان الكلام
لو جاله من إنسان غريب
سوء ظنه فينا هيدبحه
والشك هيدمّع عينيه
قصتنا ممكن تجرحه
واحنا أعز اتنين عليه
وحكيت أنا
علشان لاقيت
الصدق أحسن ليه وليها وليّ انا
من غير رتوش
ولا مين ظلم ولا مين جنى
من غير ما اشوّه اسمها ولا رسمها
من غير ما اقول
كلمة تسئ ليها وتجرح قلبها
فهّمته ايه كل اللي كان
وان اللي كان بنــّا انتهي
دلوقتي في ايديه القرار
مع إنه صعب الإختيار
دلوقتي هبعد من هنا
هرحل بليل حزني الطويل
وهسيبلهم شمس النهار
همشي و انا بدعي ضمير
لو كان لقاهم لينا خير
يارب تكتبهم لبعض
يارب تهديهم لبعض

واكتبلنا

اللي انت شايفه الخير لنا

لو حتى كان مش ويّـا بعض
خلى القلوب مهما حصل
اتفرقت
اتجمعت
مش كارهة بعض

ماتخليناش

احنا التلاتة ضحايا بعض

لزمايلي في سنة سادتة

السلام عليكم ورحمة الله
حبيت أنبه على شوية حاجات بس لزمايلي في سنة سادته
ورق ديارجرامات الدكتور خالد عبدالملك اللي بيشرح منه
موجود في مكتبة الشرقاوي ورا الكلية مع ورق الدكتور مندوه
هو لسة مش كامل بس هننزل الأجزاء الجديدة منه ان شاء الله
زمايلنا صالح البقري وشهاب جزاهم الله خيرا جمعوه و وزودا فيه الزيادات
اللي الدكتور بيزودها في الكورس
....................................
فيه ناس من رواندنا خدوا مني اسطوانات النهاردة
هي عليها باور بوينت الدكتورة آمال محفوظ
ونسخة من الكتاب اللي الدكتور طارق قاللنا نذاكر منه
ياريت اللي وصلتهم الاسطوانة يحاولوا يوصلوها لأكبر عدد
يمكن يكون فيها حاجة مفيدة تبقى في ميزان حسناتنا كلنا ان شاء الله
ولو أي حد ماوصلتوش الاسطوانة ياريت يبلغني بأي طريقة
ولو أي حد عايز نسخة من الكتاب
أنا لي واحد صاحبي شغال في موضوع الكتب ده
وممكن يجيب العدد اللي انتو عايزينه
ممكن تبلغوني هنا
أو على الميل
now_tears_smile@yahoo.com
او 0185856476
...........................................
في النهاية لو كانت أي حاجة من دول مفيدة فهي مش مجهودي لوحدي
دي بفضل ربنا أولا وأخيرا وكمان بمجهود زمايلي قبل مني
اذكر منهم
محمد مغاوري
عمرو النجار

محمد عبدالباسط
محمود أحمد سليمان
صالح البقري
وربنا يجعل أي عمل خالص لوجهه إن شاء الله

تامر هو اللي هيكتب التلات ده

السلام عليكم ورحمة الله

من لم يشكر الناس لم يشكر الله

هو دا السبب اللي هيخليني أأجل قصيدة النهارة لسبب تاني

تامر عزت من اكتر الناس اللي شجعتني من أول ما بدأت اكتب لحد النهاردة

وواحد من اكتر الناس اللي متابعة المدونة ودايما بتشجعني

عشان كده لما طلب إنه ينشر حاجة هو كتبها هنا على المدونة

ماكانشي ينفع أبدا إني أقول لأ.. بالعكس دا شئ يشرفني ويشرف المدونة

خصوصا كمان ان كتاباته ليها طعم جميل و مختلف جدا

واخترت اني أنزل موضوع تامر النهاردة وأسيب

قصيدة النهاردة ليوم الخميس ان شاء الله

يعني المدونة النهاردة وبكرة بتاعت تامر

وكل الردود اللي هتيجي تيجي ليه..أنا برة الليلة خالص

أسبكم مع موضوع تامر اللي أكيد هيستني ردودكم عليه

...............................................................

إذا قلت لك صف لي شعورك حين تتولي منصبا وزاريا أو تصبح رئيسا

فإنه سوف ينعقد لسانك عن النطق.لأنها فرحة عارمه ومعيشة مرفهه

،لكن هل تعلم ان معظم الوزراء والرؤساء يملون حياتهم المرفهه لما فيها من رتابة ،

وأنهم قد حرموا من ملذات العيش التي قد ابتليت انت بها

.نذكر منها مثلا:*حين تستيقظ من نومك علي صوت مزعج

سواء كان حيواني او آدمي او صناعي لتجد الحمام بدون مياه وتنتظر

حتي تأتي المياه اليك لتجدها نظيفة إلا من الشوائب والجراثيم

،طيبة رائحتها تعكس صفائها.*ثم تذهب لكي تناضل في طابوووور علي رغيف الخبز

حتي تفوز بدورك في آخر الصف وتنجح في النهاية في

الحصول علي رغيف الخبز المحرووووق أو المصنوع من

قمح يصلح للاستخدام الحيواني بعد تنظيفه من الشوائب فقط.

* ثم تخرج للعمل فتمشي دهرا حتي تجد ما تركب

،وحينئذ تبدأ صراعا مع غيرك علي كرسي اما في اتوبيس مفخخ

أو عربة مترو مزدحمه أو قطار سيحترق او ينقلب.

لكن القطار لم يحترق ولم ينقلب والاتوبيس لم ينفجر ووصلت عملك

لتجد رئيسك في انتظارك بطيب الكلام وعذب الألفاظ فتتجاذبان

اطراف الثياب و.......*بعد انتهائك من العمل تغادر الي شارع مزدحم

ذو شمس محرقه تأكل جلدك كما تأكل النار رغيف خبز الصباح

ثم تجد الأتوبيس فتتركه وتركب غيره لتقف ايضا في الطرقه لأن بانتظارك فيه

رجل يمتاز بخفة اليد ؛يحمل عنك محفظتك بنقودها الكثيره وهم 145 ج راتبك

بعد خصم جزاءات التأخير والمشادات اليوميه.*أخيرا وصلت بيتك بعد معاناة مثيرة

في حر الشارع فوجدت المروحة الوحيده عندك تمشي في عكس السير

فتأبي أن تشغل التكييف لديك لأنك زهقت من هواه طول اليوم.

*بعد مباحثات تقضيها وسط العائله الكريمه ؛تتلقي منهم مطالبهم من لوازم منزليه

ودروس خصوصيه وكتب مدرسيه ومصاريف علاجيه....الخ

تقرر ان تؤجل جميع هذه القضايا لعدم كفاية الأدله(السيوله).

* بعد كل تلك الإثارة اليوميه يقرب يومك ان ينتهي لكنه قبل ان ينتهي

يسرع اليك المرض ليكمل بذلك حكايتك في

مستشفي عام حيث الراحة والأمان والموت بسلام

،لكنك واسرتك تقرران ان تذهبوا الي احدي المستشفيات الخاصه

حيث يتوفر هناك العلاج والشفاء فتجد الموت قد سبقك اليها

وحجز لك مقعدا الي الآخرة.*لكن ما قد يعيق سير موتك

ويؤلمك في حياتك الآخره هو انك ستظل رهينة المستشفي

حتي يدفع أهلك ديون العلاج فيها.

ذلك هو يوم يتكرر في اليوم الف مره

،يوم ملئ بالإثارة والنضال والتشويق والكفاح

،يموت الفرد منا كل يوم حتي يأتي يوم لا مرد له.

فهنيئا لك بيومك وهنيئا لنا بدولة وحكومة توفر لنا كل شيء حتي الموت.

يا جهاز فرج

السلام عليكم ورحمة الله وبركاته
خلينا نخرج النهاردة من جو التلات اللي فات
بوست النهاردة بوست مخصوص شوية
لإني كتبته بناءا ً على طلب حد عزيز وغالي عليا جدا..
صاحبي واخويا محمود فرج اللي جهازالكمبيوتر بتاعه إتاخد مصر
وسابوا محمود من غير جهاز ومن غير نت
هوالموضوع صعب جدا وحاولت أكتب فيه على أد ما قدرت
هو الكلام ماطلعشي أد كده بس هوعارف ان الدماغ مش شغالة اليومين دول
وماكنشي ينفع أقول لأ خصوصا لحد في مقام وغلاوة محمود عندي
قلت أكتب الرسالة دي على لساني أنا لجهاز محمود
.................................
ياجهاز فرج
يا جهاز فرج على فين خدوك....ليه تنسى عشرة عمر فات؟؟

امتي يا غالي يرجـــــــــــعوك....لو حتـــى من غير الرامات

بـَعدك فــرج تسهر عينيه

وسؤال ينام و يقــوم عليه

سايب مكانـــــك فاضي ليه

في القوضة جنب الأنتريه؟؟؟؟
Endدي حياة فرج بَعــدك كابوس....و مـُــناه يكـــــــــون للبعد
don't sendأو End nowوايديه بتاكله عشان يدوس..على
bye من يــــــوم ما رُحت وقلت
stand by وفــــــرج حيـــــاته
من كتر هـــــــــــمـّــه ما زاد بقى
nacked eye ينشاف كده بالـ

من بعد ما سنيــــن عاش معاك.....ازاي هيــــــدخل سيــــــبرات

ازاي في وسط النـــــاس هناك....يلعب ســـــــــــباق السيارات؟؟

فيه حد شافكوا خبطكوا عين؟؟؟

ازاي تسيــــــــــبه ولو يومين؟؟

بس الســـــــؤال أصعب سؤال

بَعدك هيلـــــــــــعب فيفا فين؟؟؟

فين الماوس ؟؟راخر خدوه!!......و الهارد ويّــا السي دي رووم

فين لـــــما أبوه و أمه ينادوه.......سيــــــــب لوحة المفاتيح وقوم

بَعدك فرج دايـــــــــما ً يبـات

يحلم بصــــــــوت السماعات

علشان خدوك ولا سابـوا ليه

لو حتى حـــــــبـّة فيــروسات

ياجهاز فرج

هو انت يعني صحيح مـُسِـن....وبيحكوا عنك في الكتب

وكإننـــــا جايبـيــنه مـــــن.....عـــــهد الوزير أمنحتب

بس انت كــان شغلك سليم

بصــــراحة مشيك مستقيم

وحمارتك العــــارجة أكيد

أحسن ما تحـــــــتاج للئيم

ياجهاز فرج

ياجهاز فرج يا حبيــبنا ليه....سايب فـــرج ومهمّــله

لو طوّلت غيبــــــــتك عليه.....احنا أكـــــيد هنلــمّـله

ازاي تسيب صاحبك فرج

طول عمره مستني الفرج

لو كنت واحـــــد منــنـّـا

لو كنت فاكــــــــر عهدنا

ماتخلينــّاش لايصين هنا

وارجع قوام يا جهاز فرج

أنا كمان قتلت عم المرسي

السلام عليكم ورحمة الله
مش لاقي كلام اقوله قبل الحكاية اللي هحكيهالكم دي غير إني أعتذرلكم

لو كنت هكئبكوا معايا بس على شهر فات حاولت كتيييييير

إني ما أكتبشي في الموضوع ده بس ماقدرتش لإن شبح اللي حصل دايماً

بيطاردني حتى و انا بحاول أضحك وأهزر عشان انسي الموضوع ده

وقلت يمكن لو جيت وحكيت أرتاح شوية من الإحساس ده

وعلى اد ما الموضوع ممكن يكون وطويل بس أتمنى كل الناس تكمله للآخر

وأتمنى يقراه كل حد في طب

القصة بدأت من زمان لما والدي الله يرحمه علمني انه لما يبقى فيه حد في ازمة

مجرد وجودنا جنبه بيبقى شئ كبير بالنسباله حتى لو مش قادرين نعمله حاجة

خصوصا لما يبقى الإنسان ده مريض وحاسس إن الدنيا مقفولة في وشه وإنه

ماعادشي ليه لازمة بعد ماصحته راحت منه وماعادشي حد محتاجه ولما والدي تعب

حسيت بقيمة الكلام ده وحسيت أد إيه والدي كان عنده حق وحسيت بقيمة إن حد جنبك

يسألك مش محتاج حاجة؟؟ حتى وانت عارف إنه مش هيقدر يعمللك حاجة..ولما دخلت

طب حاولت اعمل كده مع أي مريض اعرفه... جارنا أو من بلدنا أو جمعتنا الصدفة

بأي شكل،خصوصا لما لاقيت اخواتنا الكبار في الطب من بلدنا زي الدكتور هاني

والدكتور أحمد حسب الله بيعلموا كده وكمان في الوقت ده قابلت الدكتورة غادة وهي
كمان كانت بتعمل كده وأكتر من كده...ولما ابتديت اقول شعر في مؤتمرات و أعرف

دكاترة حاولت على أد ما قدرت أسخر ده في خدمة الناس اللي اعرفها دي واكون واسطة

مابين ناس معاها العلاج وناس محتاجاه وكان ربنا معايا دايما وكان بيوقفلي ناس

احسن مني هما كمان نفسهم يعملوا حاجة بس مش لاقيين الفرصة

الللي حصل المرادي إني من شهرين كنت رايح أركب أتوبيس بلدنا و عم ناجي سواق

الأتوبيس قاللي اللي قاعد في تاني كرسي ده عمك المرسي ورايح يعمل عملية في القلب

خلى بالك منه...رحت اتعرفت على عم المرسي وكانت معاه مراته
ناس من الناس الطيبة جدا اللي لسه على فطرتها...وعرفت إن عنده

ضيق شديد في الصمام الأروطي ومحتاج تغيير صمام في اسرع وقت،ولما نزلنا

رحت وصلتهم لمستشفي مبارك مطرح ماهيعملوا العملية وقلت وانا راجع هبقى أبص

عليهم تاني وانا راجع قالولي انهم خلصوا قرار العلاج وهسيتنوه يتمضي من مصر

وكنت ببص عليهم كل يوم وانا مروح لحد ما القرار طلع بعد حوالي عشر أيام
,, وخدت عم المرسي للدكتور

وطلب منه أشعة عشان يعملوا لعملية على أساسها وخدنا في موضوع الأشعة ده أسبوع كمان

كل يوم يروحوا يعملوا اشعة شكل... وفات أسبوع عشر أيام أسبوعين وعم المرسي

ماخدشي ميعاد بالعملية وانا زيي زي عم المرسي مستني الدكتور

يحن علينا بميعاد العملية وخصوصا إن حالة عم المرسي يوم عن يوم بتسوء جدا

وبعد أسبوعين رحنا سألنا وسمعت ردغريب جدا...

مافيش صمامات في الجامعة...يعني ايه مافيش صمامات...الصمامات اللي مقاس
عمك المرسي خلصت ولسه مستيين الجديدة تيجي

وخصوصا ان مافيش فلوس....بس يومين ولا حاجة

والصمامات هتيجي ماتستعجلوش ورجعت لعم المرسي

وقعدت أصبر فيه وكل يوم أروح اقول نفس الكلمتين

معلهشي يا عم المرسي إستحمل شوية ما أددمناش حل تاني إن شاء الله
الصمامات قربت تيجي مع اني حاسس من جوايا انها مش هتيجي...

فات كمان عشر أيام والصمامات ماجاتشي...وكان عم المرسي
بقى مش قادر ياخد نفسه ولا قادر يدوس على الأرض

وفي اليوم العاشر مسكني عم المرسي زعقللي وكان من حقه

وكنت مقدر خنقته وانفعاله عليا وحااطط وشي في ألأرض أدامه
وهو بيقوللي ياتشوفلي حل يا تخرجني من هنا.. انا عايز أورح

تعرفوا الحاجة الوحيدة اللي ماخليشتي عم المرسي يروح ايه
خاف لو روح وجه يشد العجلة الصغيرة اللي عنده
تشده هي و توقعه والناس تضحك عليه....

روحت من عند عم المرسي
وفي الوقت ده الموضوع بقى تحدي بيني وبين نفسي
ان عم المرسي لازم يعمل العملية
ولو ماعملهاش هنزل من نظر نفسي كتير أوي

و يبقى كان لازمته وأنا الدكاترة واخدني كل يوم أقوللهم شعر في مؤتمرشكل
وابتديت أكلم ناس ممكن يدخلوه معهد ناصر ان شاء الله

وبعتلهم الورق ورحت بشرت عم المرسي .. بس الورق اترفض
لأنه قرار العلاج مكتوب فيه تغيير صمام الأورطي بمستشفى مبارك الجامعي
و حاولت وكلمت ناس هنا وهناك بس ماكانشي فيه فايدة
ورجعت لعم المرسي وانا باصص في الأرض
وقلتله اننا غصب عننا هنستني الصمامات ...ولما فات يومين تلاتة
وماجاتشي الصمامات ...رحت للدكتورة فتحية رئيسة قسم القلب

وهي بتحبني جدا وحكيتلها على اللي حصل قالتلي ان الموضوع
مش بإيدها لإنها مسئولة عن العلاج انما جراحة القلب قسم لوحده

بس قالتلي ممكن تروح تغير القرار وتخليه مفتوح

وتكتب ان مافيش صمامات في طنطا و ساعتها ممكن يدخل
أي حتة وفرحت جدا ورحت بشرت عم المرسي وأهله

بس لما رحت أغيره... الدكتور قاللي ان ساعتها عم المرسي هيخرج

من اللسته هنا ومش هتعرف تحطه في اللسته هناك غير بعد شهر على الأقل

وان الصمامات كلها كام يوم وتيجي ورجعت لعم المرسي وانا وشي في الأرض

وقتلته هنستني الصمامات معلشهي غصب عني يا عم المرسي

وماجاتشي الصمامات ولما زهقت ولما صورتي أدام نفسي

ومعاني كتير جوايا ابتدت تتهز طلعت للدكاترة فوق وانا متعصب جدا

وقلتلهم هو بكام الصمام اللي احنا مستيينه ده...قالولي بخمس تلاف جنيه
ياااااااااااااااااااااااااااااااااه.....كل ده عشان خمس تلاف جنيه....
عيان بيموت في كل لحظة عشان خمس تلاف جنيه... وبمنتهى الحماس

قتلتهم يكتبولي اجيبه منين وانا هجيبه بأي طريقة
وكتبولي رقم الشركة وعنوانها في مصر ونزلت لعم المرسي و بشرته

رغم انه كان فقد الامل في كل حاجة ولاقيت معاهم نص المبلغ
وماكنتش عارف هعمل ايه في النص التاني بس لازم الصمام ييجي...
وكلمت مدير الشركة قاللي طب وليه تكلف نفسك وتكلف العيان
أنا كل اللي عايزه ورقة من القسم عندكوا تطلب تغيير
المقاسات اللي عندكوا ومش محتاجينها بالمقاسات دي وانا قلتلهم

عندكوا في طنطا بس ماحدش بعت حاجة.
ورقة؟؟....كل العيانين اللي عايزين صمامات وبيموتوا ..بيموتوا عشان ورقة؟؟
لييييييييييييييييييييه؟؟..احنا بقينا فين... وايه اللي حصل لضماير الناس ..
كل ده عشان ورقة؟؟؟
ورحت للدكاترة وقلتلهم انتو مابعتوش ليه ؟؟؟؟
قالوا احنا بعتنا والتوريدات بعتت فاكس ومش مشكلتناإنه ماوصلشي
و اتحايلت عليهم يدوني الورقة في إيدي و أنا هروح بيها القاهرة بس رفضوا
أصل كل حاجة لازم تمشي قانوني
ولما لاقيتهم بيشقطوني لبعض حلفت لأروح بعد امتحان التخدير
واجيب الصمام بأي شكل بورقة بفلوس بأي حاجة بس لازم ييجي.
بس الساعة حداشر وربع يوم الامتحان اتصل بي ابن عم المرسي
وقاللي إنهم روحوا لإن الدكتور لما شاف آخر سونار على القلب
قاللهم إن خلاص العملية ماعادتشي تنفع لإن كل الصمامات باظت
وضغط شريان الرئه دلوقت بقي مستحيل يسمح بالتدخل الجراحي
وروح عم المرسي...ابنه شاله على كتفه وروحه...
روحوه وقعدوا جنبه مستيينه يموت..أصعب شعور ممكن
تحسه في الدنيا إنك تقعد جنب اعز الناس عندك..مستنيه يموت

عم المرسي روح لإن الفلوس اللي فاضلة معاه يادوبك هتقضي خارجته

يوم امتحان المسالك...عم ناجي قاللي ان عم المرسي مات امبارح واندفن

و كان راكب معانا ابن عم عم المرسي...قاللي هو انت بقي الدكتور محمود

قلتله آه وسألته ليه...قاللي لإن الكلمة اللي عمك المرسي فضل يقولها

وكانت آخر كلمة قالها قبل ما يموت.....أنا عايز أشوف الدكتور محمود

وياريته ما كان حكالي لإن الكلمة مش عايزة تسيب وداني
حتى و انا بحاول أضحك وأهزر و أروح و آجي
بس بالليل لما آجي انام الكلمة ترن في وداني
وصورة عم المرسي مش بتروح من بالي

أنا مؤمن بقضاء ربنا وعارف ان عم المرسي كده كده كان هيموت
بالقلب او من غيره....بس انا حاسس ان عم المرسي مات مقتول...
لما حد يبقى بيموت أدامك وفي إيدك الدوا
وماتديهوش الدوا يبقى انت كده قتلته
تعرفوا ..ساعات بحس عن عم المرسي كان عايز يشوفني عشان يسلم عليا
وساعات بحس إنه كان عايز يتف في وشي
أنا حاسس إني كنت واحد من اللي قتلوا عم المرسي
قتلته لإني رضيت واستسلمت زيي زي أي حد
وفضلت مستني الصمام وانا عارف إنه مش هييجي

كنت دايما بختار الحل السهل و أرجع واقوله نستني يا عم المرسي
قتلته لإني كنت بديله الأمل و بمنتهى الإستسلام آخده مني تاني
قتلته لإني حاسس أني كنت بخدره وبديله مسكنات لحد ما يموت
قتلته يوم ما سكت على حقه وقلت ما باليد حيلة نستني
ولو كان الصمام جه من يومها ولو بالفلوس
كان عم المرسي هيموت برضو في الوقت اللي ربنا كاتبه
بس كان هيقدر ياخد نفسه ويقدر يدوس على الأرض ويقدر يروح البلد
ويسحب عجلته الصغيرة من غير ما يخاف .إنها تشده وتوقعه والناس تضحك عليه
قتلت عم المرسي لإني من سنتين اتعرفت على دكتور قلب من
اكبر دكاترة القلب في القصر العيني واداني رقم موبايله وايميله
و آخر مرة كان مجدي يعقوب في مصر شفته في الفريق اللي معاه
ولما جت حالة عم المرسي قلت يااااه معقول دكتور زي ده يفتكرني
وكإني كنت بدور على حجة عشان ما احرجشي نفسي
و في آخر محاولاتي اليائسة بعتله ولما وصلتني رسالة منه
قاللي فيها انا في مصر دلوقتي.هاتلي الحالة وانا هعملها اللازم
بس للأسف...كان عم المرسي مات
احساس فظيع بالذنب
انا عارف إني قاسي على نفسي اوي بس أنا للأسف من الناس
اللي بتقضي نص حياتها تلوم نفسها على اللي عملته في نص حياتها التاني
بس لما عيان يموت عشان ورقة يبقي فيه حاجة غلط
لما عيان يموت عشان صمام بخمس تلاف جنيه يبقى فيه حاجة غلط
لما كلبة زي هيفاء وهبي تعلمها فرحها بملايين وتعمل فيلم تاخد عليه ملايين
والعيانين دول بيموتوا عشان مامعهمش حق الدوا يبقى فيه حاجة غلط
لما يندفع لتامر حسني ومحمد منير وايهاب توفيق ملايين عشان ييجوا يغنوا
في جامعات زي المنصورة وعين شمس يبقى فيه حاجة غلط
لما لاعيبة الكورة يندفعلها ملاييين والناس دي بتموت عشان ممعهاش حق الدوا
يبقى فيه حاجة غلط
يبقى احنا مش مجتمع مسلم ولا احنا حتى مسلمين..الإسلام عمره ما كان كده
لما الناس تموت أدامنا واحنا مش قادرين نعمللهم حاجة يبقى
فيه حاجة غلط ويبقى كل الطب اللي بندرسه مالوش لازمة
لما نشوف كل ده ونسكت يبقى فيه حاجة غلط
أنا حاسس ان كل واحد في البلد دي من أول رئيسها لحد أصغر واحد فيها
هنتحاسب على عم المرسي و آلاف زي عم المرسي
حاسس ان كل بيت في بلدنا بقى عبارة عن غزة صغيرة
..ناس محاصرها الفقر والمرض وبيصرخوا ماحدش بيسمعهم
والناس اللي المفروض انهم اخواتهم بيتفرجوا عليهم ومابيعملوش حاجة
حاسس إننا شوية خرفان جابوا عليهم شوية ديابة يحرسوهم
وطبعا الديابة بتاكل أكلهم بحجة ان هما بيحرسوهم
بس الخرفان ساكتة ...لإنها خرفان
ومش بس كده دا لما الديابة بتجوع زيادة بتدبح واحد مننا وتاكله
لما بشوف الملايين اللي بتتصرف على تحسين شكل المستشفيات
والناس الللي جواها بتموت بحس ان احنا زي واحد زرع شوية ورد
وكل يوم يجيبوله شوية مية على أدهم بس هو يقوم
راششهم أدام الشارع عشان الناس تشوف الشارع كويس
مع إنه شايف الورد بيدبل أدامه بس المهم الشارع يبقى شكله كويس
على أد ما موت عم المرسي علم فيا بس علمني حاجت كتير
وخوفني من حاجات اكتر..خوفني على نفسي وعليكوا من الدايرة المفرغة دي
خايف ان الدايرة دي هي اللي تغير طموحنا إننا نكون دكاترة بجد
ومانقدرشي احنا نغيرها ونخليها زي ما احنا عايزين
موت عم المرسي علمني إننا لازم نجتهد على اد ما نقدر عشان
نوصل لمكان نقدر نخدم منه الناس اللي زي عم المرسي
مكان نقد منه نغير من غير مانتغير
عم المرسي علمني إنه مادام رضينا نبقى دكاترة يبقى لازم نبقى أد المسئولية دي
لإننا هنتحاسب عليها.................. أدام ربنا
عم المرسي علمني اني لما أبقى دكتور ويجيلي حد زي عم المرسي مرضه ليه علاج

يبقى لازم ياخده
لإنه لو فيه علاج وماخدهوش يبقى انا مقصر وهتحاسب على تقصيري
ولو فيه علاج وانا ماعرفهوش يبقى هتحاسب على تقصيري برضو
لإني كان المفروض أتعلم واكون اد المهنة اللي ربنا اختارها ليا

احنا اختارنا مهنة مافيهاش وسط

يا إما في ميزان حسناتنا يا إما في ميزان سيئاتنا

يإما المريض هيدعيلنا يا إما هيدعي علينا

بفضل الله المدونة بيتابعها ناس من دفعتنا ومن دفعات أكبر و اصغر مننا

يعني بعد خمستاشر عشرين سنه هنبقى احنا المسؤلين عن المستشفيات دي

ياتري هنقدر نعمل حاجة ولا الدايرة هتاخدنا

احنا مش تجار ومش جزارين

بس انا دايما مؤمن ان اللي عايز يغير بيغير

الفرق مابين قسم الاطفال وقسم الباطنه عندنا مش امكانيات ولا فلوس

الفرق في نية التغيير مش اكتر

وماكنشي قصدي أبدا اني أقول ان الصورة وحشة اوي كده

انا قابلت دكاترة تانية اد المسئولية زي الدكتور احمد لطفي

والدكتور أشرف الدسوقي والدكتور عادل حجاج

كفاية أقولكم ان حد بحجم وقيمة الدكتور أسامة عبد رب الرسول

استقبلني انا والحالة في مكتبه ولحد دلوقتي هو بيعمل كل حاجة للحالة شخصيا

من غير ماحد يطلب منه كده

الفرق في نية التغيير ونية العمل لوجه الله أولا وأخيرا

أتمنى النية دي تكون موجودة جوة كل حد مننا
على الأقل عشان ماحدش فينا يعيش طول عمره
وهو حاسس انه ظلم ناس مالهاش أي ذنب زي عم المرسي

جزاكم الله خيراً

السلام عليكم ورحمة الله

أي كلام كنت هقوله لازم يتأجل

عشان أشكر كل التهاني والكلام الحلو اللي الناس قالته البوست اللي فات

وكمان كل الناس اللي بعتت على الميل او اللي كلمتني شخصيا

حقيقي تعجز الكلمات عن شكر الجميع

وكمان جالي هديتين غاليين على أوي

الأولى كان من اخويا عمر النجار اللي فاجئني بكلمات جميلة جدا

و بعيد عن المجاملة والمبالغة اللي في الكلام ..ماكنتش اعرف ان عمر بيكتب حلو كده

يعني قريب جدا هينافسنا

بجد مشتكر أوي أوي يا عمر

ومش تواضع ولا قلة ثقة.. بصدق أنا ما استحقش واحد على مية من كلامك ده

http://bahebelnor.blogspot.com/

جزاك الله خير يا عمر

...........................

الهدية التانية كانت غاية في الروعة

فيديو هدية اشترك فيه ناس ربنا يكرمهم

لينك اليوتيوب

http://ana-elbahr.blogspot.com/

اتفاجئت بيه بصراحة بس فرحت بيه جدا..كفاية انهم فكروا في المبدأ بس

وكفاية ان كلهم اشتركوا فيه..وكمان اختاروا كلمات غالية عليا جدا عشان ينشدوها

http://journy-to-myself.blogspot.com/

كمان صوت ابراهيم جميل أوي ربنا يحميه ويبارك فيه

و اكتر حاجة هزتني مشاركة أحمد حسب الله في الفكرة دي

وانا بصراحة دي اول مرة اشوف احمد(في الفيديو ده) ولما سألت أحمد بسيوني قاللي

من فضل ربنا عليك ان ناس كتيرة بتحبك من غير انت ما تكون تعرفهم

اتمنى يكون ده حقيقي فعلا وماتكونشي الناس دي مخدوعة في الواحد

ومشتكر اوي ليهم كلهم

ابراهيم مطاوع

أحمد بسيوني

أحمد حسب الله..يارب تبقى بداية معرفة خير

تامر عزت

احمد سمير

ربنا يكرمك كلكم يارب ...مش عارف أقول ايه

.............................

كان فيه حد اقترح(أنا للأسف مش عارف الاسم) انه يبقى فيه بوست

و أي حد عايز يوجهلي أي سؤال فيه وانا أجاوب

أنا ماعنديش أي مشاكل و إن شاء الله إسالوا واناهجاوب بمنتهي الصراحة والأمانة

كل واحد ليه سؤال أو اتنين...بس ماتشدوش عليا أوي

مستني أسئلتكم

بالمناسبة كمان أنا متأسف لإني مش برد على الكومنتات كومنت كومنت

انا بنكسف لما أدخل على المدونات وألاقي المدونين بيردوا على كل كومنت

بس انتو مقدرين الظروف بقي

بس البوست ده ان شاء الله هرد على كل الكومنتات اللي فيه

لو حد عايز يطلب أو يقول أو يسأل على أي حاجة أنا تحت أمركم

..................................

فاضل بس حاجتين أاني أشكر أستاذي وأستاذنا كلنا أستاذ أشرف

حد من الناس اللي علمتني وربتني بجد و أثروا في شخصيتي جد

او كانت مفاجأة جميلة أوي لي اني أكتشف انه متابع المدونة

شكرا يا أستاذ أشرف

تاني حاجة فيه ناس انا قصرت في السؤال عن سبب غيابها

انا خايف أقول أسامي عشان ما أنساش حد

أميرة الحزن..هبهووبة..الحلم الجميل ...رحيل.همسات داعية...أنا

rose flower

shaimaa

elrousha

smile

butterfly

sluvswho

aqua blue

nahnoha

pure blue

emi_doc

little angle

mahoud_solliaman

يارب بس يكونوا بخير ومش مهم اي تعليق خالص

واتمنى انهم بس يفضلوا متابة المدونة دي ومدونات كل زمايلنا ان شاء الله

شكرا للجميع وفي انتظار أسئلتكم و تعليقاتكم

وبالتوفيق لكل الناس اللي بدأت واللي هتبدأ امتحانات ان شاء الله

في البوست المائة..رثاء محمول..و..الضحكة المرة

السلام عليكم ورحمة الله

مش هطول في المقدمة ولا هقول اعتذارات كتير

انا هدخل في الموضوع علطول أهو

النهاردة البوست رقم مية على المدونة

ودي مناسبة دايما بيبقى ليها احتفال خاص على المدونات

انا هحتفل بس احتفال صغير بعملين اتنين بحيث يرضوا كل الأطراف ان شاء الله

عمل للناس كلها والتاني للناس اللي في طب بس

يارب يارب يعجبوكوا

........................................

رثاء محمول

يا جماعة هنــّـــــوني...يا اخوانــّا باركولي

يا جماعة لو تسمحوا...من بعــض لمـّــولي

أنا أصلي من لخــمتي...ضيـّـــعت محمولي

كااااااااااان حلو وبكاميرا.....ليه بس لـــــــيه سرقوه

دا انا بـَــعد منــِّـه خلاص.....تحــْـرم عليّــا ألــــــــوو

على بعد ميـــــــت كيلو.....كان يبـــــدأ البــــــلوتوث

كان فيه تلات كامــيرات.....و رفـــــرفين و فـــانوس

كان ميموري ميت جيجا.....والشاشة نوع مـِ الـ top

ناقصه يادوب رامــــتين......و يتـــــــــــقلب لاب توب

بيخش نــــــــــت وفـــيه.....راديــــــو وتليــــــــفزيون

كان ناقــــــــصه تلاجـة........ونـــروح نجيب مأذون

طول عمره عاش طاهـر......كــان بــركة في جيوبي

علشان لا حاطـــــط فيه......ولا هيــــــــفا ولا روبي

من بعد ما منـــــــبهّــه......سابني مافيش صــــحيان

وليــلاتي بتحـــــسـّـــر......على لعــــــــــــبة التعبان

ولا عمره بهـــــــــدلني......وتعـــــــــــبني بمـشاكله

ولا نوكيا ولا سامسونج.....راح يعملوووا شكــــــله

يااللي سرقـــته هعيـش..... طول عمري بَدعي عليك

مع كل طلـــــــعة صبح..... روح ياك يفــــــرقع فيك

ليه تســـــرقه وانا بــيه..... مالحقــــتش أتهـــــنــّى

وتسيبني قاعــــــــد هنا......لا رســـــالة ولا رنــــة

ياللي عــــشان تمَـــــنه.......بعـــــــناله نص قيراط

بـــــعدك هقـــضـــــّيها.......طول عمري سنــترالات

دلوقتـــــي ايه حـــــالك .....في غــُــــــربتك عــني

اوعي يكون فســـــدوك......وصبــــــــــحت بتغـنـي

يااااخــــوفي وانت هناك......مبــــــادئــنا تـنــساها

ويكونوا حطـّوا علـــــيك.....أفــــــلام مــــــــن اياها

ارجع يا محـــــــــمولي........يا مجـــمع الأحـــــباب

ازاي تسيـــــب عشرتي.....وتعــــيش في أي جراب

أنا هفضل أستنـــــــــاك.....ترجع في يوم يا أصـــيل

أنا مش هجيب غـــيرك....لو فتـــحوا ميت تــــوكيل

ولحد ماااااااااا تــرجع.....أنا مش هشيل محــــاميل

.......................................

على فكرة الموبايل ماضاعشي..أنابس كنت نسيته في الأتوبيس

وفاتت ساعة على ما لاقيته كنت كتبت فيها القصيدة دي وانا قاعد مستني

وقلت أنشرها كمشاركة وجدانية لكل حد موبايله ضاع أوهيضيع إن شاء الله

وهي فيها مبالغة شعرية شوية لإن أنا معايا عدة ألف مية واتناشر من بتاع الغلابة

...................................................

الضحكة المرة

"آفية الطب السياسي"

المشكلة اللي عندنا في مصر....اشمعني....upper motor

Auto immuneاحنا السرقة اللي فينا.....اشمعني....

Past history المصريين لسة ماشيين....اشمعنى....بالـ

Adecuate supplyلو مواردنا ما بتنسرقشي كانت عملت....

الفقرعامل مع المرض ......اشمعنى...co-infection

adaptationبس الشعب المصري عمل عليهم.........

diuretics آبار البترول بتاع العرب...اشمعنى......واخدة

Invitro بس للأسف كل فلوسها بتروح.........

By inspectionالفقر بقى باين في الشعب المصري...اشمعني...

Major criteriaلدرجة إنه بقى...............

Progressive courseوالمشكلة إنه واخد.......

Phagocytosis أحمد عز عامل للحديد.....اشمعنى…

gastric lavageالشعب المصري محتاج بعد كل أكلة....اشمعنى...

shunt الغاز الطبيعي بتاعنا.....اشمعني...عملوله

aphonia…اشمعنى…نواب مجلس الشعب عندهم

Graft rejectionحتى الناس الكويسة اللي فيهم حصللهم....

Clinically undiscoveredالتدخل الأجنبي في شئونا.....اشمعني...

inhibatory effecy .....عشان الحكومة بتعمل عليهم

Draining lymph nodesعندنا ناس كويسة بس مش لاقيين.......

ectopic ومعظمهم ماسكين في حتت....اشمعنى...

Artificial stenosisالشوارع بتاعتنا واسعة بس فيها....اشمعني..

Non contaminatedجيوب الشعب المصري.....اشمعني....

Continous drainingعشان بيحصلها.......

Short actingعشان مرتب الحكومة.....اشمعنى....

False pregnancy حتى الكادر الجديد طلع.......

Recanalizatoinمواسير المية و الصرف عندنا محتاجة...اشمعنى...

Under weightرغيف العيش المصري......اشمعني....

increased uptake......عشان السوق السودة عملت على الدقيق

metastasisالعصافير باعتين في كل حتة ...اشمعنى...

immuno comromisedاحنا سايبين حتة مهمة أوي في بلدنا.......

susiptible to infectionمع إنها............

opportunistic organismعشان جنبها..........

similar attackوحصل فيها قبل كده.......

unsteady gaitالديمقراطية عندنا ماشية...اشمعني...

against resistanceلإنها بتتحرك..........

neonatal deathوخايفين يحصلها......

apperantly well لما المسؤلين بينزلوا الشوارع بيشوفوها....

false testمع إنهم عارفين إن ده......

rising titer....... يوم عن يوم الأسعار عندنا بتعمل

sporadicالناس المبدعين عندنا بيطلعوا.......

Suitable cultureمع إنهم كتير بس مش لاقيين......

Surgical removalالحكومة بتاعتنا محتاجة.........

Rest in bedوبعد كده نديهم......

Reblacement therapyونعمل......

Inner septums للأسف كل العرب مهتمين....بالـ

Referred pain لوحتى حد بينضرب فيهم ما بيحسوش.....بـ

Hyporeflexiaو بيحصل عندهم............

Broad spectrumمع إن العدو بتاعهم........

Immune complexوالغرب عامل عليهم........

retention.....أنا بعد الكلام ده ممكن يعملولي

behind the walls......ياريت تبقوا تسئلوا علي

....................................

كفاية كده عشان ايدي وجعتني من الكتابة

يارب يكون العملين عجبوكوا

ويارب تكون المدونة قدرت تقدم حاجة تسعدكم في الميت بوست دول

على فكرة انا حطيت ورق فيه كل الجمل اللي كتبتها قبل كده

في مكتبة الشرقاوي اللي جنب مكتبة الرسالة

هيبقى موجود من بكرة ان شاء الله

دا هدية مني لكل زمايلي اللي كانوا سبب في استمرراري في الكتابة

لما فتحوا قلوبهم للكلمات البسيطة دي رغم انها كانت في كثير من الاحيان لا تستحق

ملحوظة...الناس بتوع المكتبة مراهنيني ان ماحدش هييجي يصور الورق بتاعي ده

اوعوا تحرجوني

أخوكم/محمود أبوالعزم

متأسف جدا

ولالسلام عليكم ورحمة الله

أنا متأسف جدا لكل زمايلي في مجموعة خامسة على اللي حصل النهاردة في المسالك.

أنا والله كان نفسي أعمل حاجة تكون في مصلحة الجميع

ولما لاقيت معظم الناس مش هتنزل يوم الحد عشان مراجعة العظام

وهما في القسم لاقيت مش في نيتهم يعملوا مراجعة يوم الحد عشان الناس مش هتنزل

ولاقيت انه كده كده مافيش مراجعة عضم ولا مسالك خالص

فقلت مادام كلنا نازلين الخميس نحاول نستفيد على أد ما نقدر من اليوم ده بصورة ودية مع الدكاترة

واتكلمت مع الدكتور ممدوح والدكتور رشيد على الاساس ده

وحاولت يكون الوقت مناسب للكل

بس الوقت إتأخر غصب عننا ودكتور المسالك مشى ومارضيش يشرح

وخدت كلمتين في جنبي من دكاترة المسالك عشان اتاأخرنا عن ميعادنا

بس اللي مزعلني جدا ومخليني في قمة الخجل منكم ان المراجعة راحت على زمايلي

يارب بس تكون مراجعة العظام كانت كويسة

انا بجد متأسف جدا

وربنا معانا كلنا في الامتحانات اللي جاية دي

افتكاسات دكتور مفروس

السلام عليكم ورحمة الله
يارب يكون كل الناس بخير

انا بجد متشكر اوي لكل الناس اللي حضرت بدري النهاردة

بجد الواحد مش عارف يشكرهم ازاي صحيح ان الوقت ما امهلناش نكمل

بس متعوضة ان شاء الله...و اتمنى الناس اللي فضلت بعد الرواند

يكون عجبها صوت زميلنا ابراهيم مطاوع اللي بجد كان يستاهل

ان شاء في اقرب فرصة هقول في المدرج لإن الناس هناك

أحرجوا الواحد بحسن استقبالهم الجميل ده...جزاهم الله كل خير

أسيبكم مع بوست النهاردة

نست اقول ان كل واحد لازم يختار جملة...رخامة كالعادة يعني

................................................

افتكاسات دكتور مفروس

.....................................
لدخول الطب فرحة ٌ لا تتكرر ..إلا عند التخرج منه

...................................................
لأن أشياءاً كثيرة ً في حياتك ستتأجل بسبب الطب

فهم يدربوك على ذلك من الفرقة الأولى

..................................................
يستطيع الطبيب أن ينتقل إلى أي مكان في العالم بتكلفة ٍ أقل من التكلفة

التي تنتقل بها الدبلة من يده اليمني إلى يده اليسرى

.............................................
" تحب تتسأل في ايه؟"...هو أسهل سؤال من الممتحن.. ولكنه أصعب سؤال على الطالب
............................................

يتكفل الآباء بإحضار الأقلام والكراريس والكشاكيل لأولادهم حتى

يدخلوا كلية الطب..فيتركوا ذلك لشركات الأدوية

......................................................
في الطب تصنّف تقديراتنا كالتالي
امتيــاز...حد أقصى

جيـــــد ...حد أدنى

مقبـول....حد ضحك عليك

.........................................
في لجنة الشفوي غالباً ينسي الطالب كل ماذاكره قبل ذلك

وغالبا ما ينسى الدكتور انه كان طالباً وكان ينسي أيضاً
................................................

الروشتة الناجحة هي محاولة مستميتة لعقد اتفاقية سلام

بين جيب المريض وفاتورةالصيدلي

...............................
امتحان التحريري هو محاولة مضنية من الطالب للخروج بأقل الخسائر

من الحرب الضارية بين كتب القسم ومذكرات الدروس

..........................................
امتحان العملي هو محاولة مستحيلة من الطالب للخروج بأكبر قدر

من الدرجات من الدكتور مقابل أقل نقود يدفعها للحالة

..........................................
نحن في الطب كالسمكة في الماء ..كلانا يموت على البر

الفرق أننا نموت في البحر أيضاً
..........................................

أحيانا يضطر الأطباء للتحدث مع بعضهم باللغة الإنجليزية ليعلم المريض أنهم

قد توصلوا لتشخيص حالته وأحياناً كثيرة لكي لا يعلم أنهم لم يستطيعوا
............................

امتحانات بعد التخرج
mcqهتتخصص ايه...أصعب سؤال

give account بتاعك... أصعب سؤالc.v الـ
أول مريض تكشف عليه...أصعب لجنة عملي
أول مرة تقعد مع أبوالعروسة...أصعب لجنة شفوي

..................................................
الفرق بين عدد الحضور في مدرج الفرقة الأولى ومدرج الفرقة السادسة

هو نفسه الفرقبين عدد الحضور في مباراة نهائي كأس العالم

وبين الحضور في مبارة انبي مع الترسانة

...............................................
غالباً ماتفضل الطبيبة أن تتزوج طبيبا مثلها وذلك

لأنها تعلم أنه لم يعد في عينيه بقايا نظر ينظر به إلى غيرها

........................................................
يحاول أساتذة الطب أن يرضوا المرضى.. ويحاول الطلاب أن يرضوا الأساتذة

ويحاول النائب أن يرضي الطلاب والمرضي والأساتذة معاً

................................
بعد دراسة مادة النسا في الفرقة السادسة ستكتشف

"لماذا يخشى كل الناس من كيد "النسا
....................

بعض دكاترة الشفوي يسألونا لكي يسمعوا اجاباتنا

والكثير منهم يسألونا لكي لا يسمعوها

...................................
إذا أردت أي مساعدة من طالب طب فاطلبها منه قبل لجنة الشفوي مباشرة

فهو على استعداد أن يساعدك بأي شئ ليساعده الله داخل اللجنة

....................................
كثير ٌ من الأطباء لا يراعي أن الناس لا يملكون نقوداً

ولكن كثيراً من الناس لا يراعون أن الاطباء لا يملكونها أيضاً

................................
كتب القسم والضرائب..كلاهما اجباري...كلاهما تدفع له على مضض..كلاهما

"يرفع ضغطك حينما يأخذوا نقودك بإبتسامة ٍ عريضة تحت شعار "مصلحتك أولا
............................................

اقتداءاً بجذمة بوش لو قذفنا كل مسئول عن الإهمال في المستفيات بجذمة

فقد نحل أزمة المستشفيات ولكن بالتأكيد ستحدث أزمة في الجذم

.........................

معظم الأطباء الذكور لا يهتمون بتصفيف شعرهم

إما لأنهم لا يملكون وقت..أو لأنهم لا يملكون شعر

كدبت عليك

السلام عليكم ورحمة الله

بعد قصيدة النهاردة اتمنى الناس بعد ما تقراها وتعلق عيها

و انا نفسي اسمع رأي كل الناس فيها

تقري الدعوة الصغيرة في البوست الصغير اللي تحت

.................................................

الكدب في حياتنا عمره ما كان انك تقول انك معاك وانت مامعاكشي

ولا انك تقول انه ما معاكشي وانت معاك

الكدب ممكن يكون في حاجات كتيرة اوي واشكال كتيرة اوي

الكدب ممكن يكون بكلمة واحدة.. بنظرة واحدة.. بوعد واحد وعدته

وانت عارف من جواك انك مش هتقدر توفيه

يمكن الانسانة اللي كتبت على لسانها القصيدة دي مالهاش وجود غير في خيالي

وماكانشي في ذهني تخيل معين للكدبة اللي هي كدبتها

بس هي كدبت وماعرفتش ترجع ولا تعترف بالكدبة دي غير دلوقت

انا نفسي كل الناس تعيش مشاعرها دي وتحط نفسها مطرحها

بس نفسي كمان كل حد بعد ما يقرا الكلام يحط نفسه مطرح الحد

الي اتقال ليه الكلام ده...يا تري لو كنت مطرحه

تقدر تسامح حد كدب عليك...وخصوصا لو كنت ..بتحبه

.........................................................................
كدبت عليك

كدِبــــت علــــيك وماقدرتش.........أقــــــــوللك قلبي كان كداب
مشيت ويّـاك مابـــــــين حبك.........وبـــــين حيرة و ألم وعذاب
لإني مــــــاكنـــــتش أتصور........هيـــــيجي اليوم ..نكون أحباب
كدبت عليك
كدبت عليك ومـــــش عارفة ........في إيــه خـــــلاني أكدب إيه
ماكانـــشي ساعتــــها جوايا.........أمـــل بيحــــــــابي قلبي عليه
ومن طـــــــــبع البشر تغلط .........وبعد الغــــــلطة تســــأل ليه
كدبت عليك
سـرَقــت بكـــــدبتي حــبــك.........لاقـــــيت حـــبك بيــــسرقني
بقيت بكــــــــدب وبتـــــألــّم .........ونــــار الكـــــــدب تحرقني
و أصـــــــعب مـِــن كده إني........بشــــــوف قلــبك...مصدقني
كدبت عليك
شربت الحــــــــب من إيدك.......عطـــــشت زيادة لمـّـــا شربت
وقلـــبك حـُــــبّـه خــــــلاني......عشان أفضل في حضنه..كدبت
وخـَبـّـيت في الدمـوع نفسي.......ومن نــــــار المواجـهة هربت
كدبت عليك
بقيت عايشة بضمير مشقوق.......ونــــــــار مزروعة جوة الشق
مابين احساس يقــــــول أيوة...... وبين احـــــساس بيصـــرخ لأ
وأحــــس بإني كـــــــــــدابة...... ولــــــو حـــــتى ...بقول الحق
كدبت عليك
لاقيتني مشيت معاك في طريق….ماكــــــــانشي رجوعه بإيديّا
وخفت أحكي الحقـــيقة في يوم…. ولو كــــــــان حـــتى بعيــنيـّا
أموت من شـــوقي ليك و انــتَ......تمـــــــوت من صدمتك فيـّا
كدبت عليك
وخفت وخــــــــــوفي خـــلاني......أعــــــيش العمر كله سكوت
وقلت إزاي نهـــــــــــون واحنا......بنــــينا في قلب بعض بيوت
وخفت اللي اتبنى في سنـــــــين......في لحظة ضعف كله يموت
كدبت عليك
ياتري عشـــــــرتنا هتخليك……..تســــــــــامح قلب بيــغشـّـك
ياتري نار كــدبي هتقسـّـيك……..و تــُطرد قلـــــبي من عشك
وهيموت الحنين في عينيك…….. ويـُســـــكنها الدموع والشك
كدبت عليك
بلاش تقــــتلني نــــار شكك..........وخـــبّـيني.. في نـــــور حبك
كفـــاية عليّا لــــــــــوم ذاتي..........و انا عايشة .. بــــنار ذنبك
لكن محتاجة مــــــــنك وعد..........لقلبي ...مهــمااا كــان دربك
سواء قــــــــــررت نتفـــارق……..سواء هتســيبني أعيش جنبك
ولو سبت في مشــــاعـرك نار.........برغـم النـــار ياريــت قلبك
يسامح قلــــــبي في الحالتيـــــن …....لإنــــه بجــــــــد ...بيــحبك