النشرة

ميعاد النشرة بيقرب

مذيع النشرة لسة ماجاش

وتايه حضرة المخرج

هيعمل ايه؟؟؟

وبينادي

ماحدش شاف سعادة البيه

دي عاشر مرة أرن عليه

وليه مش راضي يفتح ليييييه؟؟

وحتى مهندسين الصوت

ماجوش لسة؟؟

دي ناس بالدنيا مش حاسة

يفوت الوقت

وكل الناس على الساعة

عيونهم رايحة جاية تبص

يا خبر اسود

خلاص فاضل دقيقة ونص

قلق فوق الوشوش باين

وخنقة بتكتم الانفاس

و فجأة يلاقوا مخرجهم

بيطرد برة كل الناس

ويمشي الكل

وقبل ما يوصلوا بيوتهم

يبصوا لأي تليفزيون

يلاقوا النشرة شغالة

وكل الدنيا ماشية تمام

وتبقى الحيرة قاتلاهم

عشان راسيين على الحالة

منين وصل المذيع فجأة

طب ازاي تبقى شغالة

وكل الكاست مش موجود

وفي اليوم اللي بعديها

بسرعة يلموا بعضيهم

يروحوا بلهفة للمخرج

عيونهم جوة منها سؤال

ويضحك حضرة المخرج

يرد بكل سخرية

عقولكم ضيقة جدا

خسارة بجد

دي نشرة اول امبارح

فضلت أعيدها طول اليوم

وللحظ السعيد.. جداً

وللأسف الشديد.. جداً

ماحسّــش حد

زبادي اسرائيلي

اللسلام عليكم ورحمة الله

................................

اسرائيل دي دولة قوية جدا مش زي ما نتو فاكرينها

وعلى فكرة شعبها شعب ودود جدا بس الفكرة المتاخدة عنه غلط

يمكن تكون دي أقل الجمل استفزازا في حوار طويل

مع واحد يقرب لواحد شغال معايا في الصيدلية شغال في طابا

وكنت قاصد اني ما أردش غير في الأخر عشان اسيبه يقول كله اللي هو عايزه

كان بداية الكلام زي ما قلتلكوا كده

وكان السؤال الطبيعي من الناس اللي شغالين معايا....ازاي يعني

لأا دولة قوية بجد

انا كنت بتمشي يوم على الحدود بينا وبينهم

وخدت شوية صور انما ايه

أنا استئذنته وخدت الصور بلوتوث

بص كده يا دكتور الصورة دي

دي صورة فيها العلمين على الحدود جنب بعض

شايف القوضة اللي الناحيادي دي...

دي أنضف حاجة في الحدود بتاعتنا حتى مافيهاش مروحة من جوة

شايف بقى المبني الكبير اللي قصادها ...ده اوسخ وحدة عندهم

تكييف ومكاتب وتلاجات اكل من كل الأصناف

وتلاقي العسكري بتاعنا واقف يا عيني اتناشر ساعة على رجله في عز الشمس

وهما ورديتهم أربع ساعات بس غير الساعات بتوعنا خالص

وبعدين بص يا دكتور الصورة دي شايف ميناء ايلات عامل ازاي

حاجة تحفة اللي يسمع انا ضربناه يفتكر انه ماعادشي ليه اثر

انما بص...والله العظيم تحفة معمارية

وبعيدن بقى ده فندق هيلتون طابا

ده كان انضرب في التفجيرات الآخرينية واليهود صلحوه على حسابهم بقى حاجة تحفة

حتى السيول عملوا حسابها وعملولها مجاري تحت الفندق

تلاقي المية معدية من غيرحتى ما تبل الفندق في الوقت اللي كان في الناس بتموت في قلب سينا

وبيجيلنا أكل من قلب اسرائيل بقى...مادقتش زيه

الموظف بتاع الحسابات بتاعتنا بيروح يخلص حسابات جوة اسرائيل كل أسبوع

عشان الفندق كله نزلاء يهود

بنبعت معاه يجيبلنا شوية حاجة من هناك

وبالذات الزبادي بتاعهم...تحس انك بتاكل قشطة

ده كان جزء من كلامه

ما أقدرشي اقوللكم اد ايه كنت بتحرق من جوايا وانا بسمع الكلام ده

أنا بغير على البلد دي اوي

زي ما بيقولوا في المثل أدعي على ولدي وأكره اللي يقول آمين

انا بدعي على بلدي و أكره اللي يقول آمين

النهاردة كنت في طنطا

دخت أربع ساعات عشان اخلص ورقة في معاش والدي

و اروح الكلية يرجعوني المعاشات

وهناك يبعتوني هنا وهنا يبعتوني هناك وطالع نازل ومن ده كتير اوي

ممكن اتخنق ممكن اتعصب بس بلدي هي بلدي

انا هقدملكوا صورة أحسن عندي من كل الصور اللي فوق دي

صورة ام أحمد ومعاها بنت بنتها

ست غلبانة بتبيع درة أدام الصيدلية اللي أنا شغال فيها

الست دي ربت تلات عيال من الدرة دي

جوزت اتنين منهم ووبنتها التالتة في كلية تجارة

ولادها بييجوا يقعدوا معاهم وهي شغالة

عمرهم ما استعروا منها رغم ان بنتها الكبيرة مجوزة جوازة حلوة جدا

ام احمد بتيجي تحوش معانا اللي بتطلع بيه من شقي طول النهار

عشرة جنيه...عشرين جنيه...بكتيره خمسة وعشرين جنيه

كله ده عشان لسة عليها أقساط التلاجة والبوتاجاز وحاجات في جهاز بنتها اللي اتجوزت

يوم ماتش الاهلي والاتحاد الليبي كنت في الصيدلية

لما دخل الجون التالت..دخلت عندنا الصديلية وعيطت

وقالت الحمد لله ماحدش يغلب مصر أبدا

أنا بحب مصر عشان فيها ناس زي ام احمد

انا بقعد كتير أدور على أي حاجة تخص حرب أكتوبر على النت

وانسي كل حاجة بالساعة والساعتين والتلاتة و اقعد اتفرج عليها

يوم ستة اكتوبر مابقومشي من جنب الراديو

اقعد اسمع الابطال دول وهما بيحكوا بطولاتهم

بفتخر ان ابويا وعمي حاربوا في الحرب دي

لينا جارنا كان في الأسري المصريين

حكالي مرة انهم كانو بيجيبوا الأسري ويرصوهم جنب بعض

ويعدوا عليهم بالدبابة

انتو متخييلين؟؟؟؟

ازاي حد قلبه يطاوع حد ياكل حاجة من هناك

حتى ولو زبادي زي ما الراجل ده كان بيقول

ازاي نسامح ناس قتلوا من خيرة شبابنا بمئات الآلاف

ما اعرفشي

انا عندي كلام كتير مش هقوله لإني عارف أنه جوة واحد منكم

انا بس عايز أسئلكم سؤالين اجباريين لكل حد قري البوست ده

تفتكروا لو حرب أكتوبر رغم أي وكل حاجة اتغيرت

تفتكروا لو الحرب دي بكرة الساعة اتنين الضهر

تقتكروا هنقدر نعمل فيها نفس اللي عملنها فيها قبل كده

لو عرضوا عليك

تروح البلد اللي انت بتحبها غير مصر

ويدوك عقد عمل وسكن وكل اللي انت عايزه

بس تسيب الجنسية المصرية وتاخد جنسية البلد دي

وماترجعش مصر أبدا

بصراحة...هتقبل؟؟؟

أبداً لن أكون الأعمي

السلام عليكم ورحمة الله

أنا بعتذر لكل الناس اني ماكتبتش التلات اللي فات

كان بجد غصب عني

وزعلان منكم برضو عشان ماحدش اتصل يسأل عليا ولا يسالني ليه

بوست النهاردة بوست صغير أوي

بس فرق في حياتي كتيييييييييييييييييييييييييييييييييييييييييييير أوي

هي قصة سمعتها من فترة وعلقت معايا جدا جدا

رغم اني مش فاكر مين اللي قالها ولا مصدرها ايه

بس القصة ببساطة بتقول

ان كان فيه احد الصوفية ماشي في الصحرا

هناك لقى عصفور هزيل جدا

قرب منه لقى العصفور ده أعمي ومش قادر يطير

ساعتها سأل نفسه ياتري العصفور ده بياكل منين و ازاي

شوية ولقى عصفور تاني جاي من بعيد والأكل في منقاره

نزل العصفور ده عند العصفور الأعمي وأكـّـله وشربه

فالراجل قال سبحان الله

طب وانا ليه تاعب نفسي في الدنيا

أنا هروح اتعبد في مكان بعيد عن الناس

وأكيد ربنا هيبعتلي رزقي لحد هناك

بعد فترة افقتده احد شيوخه ودور عليه لحد ماعرف مكانه و راح زاره

وسأله عن سبب اعتزاله للناس فحكاله قصة العصفورين دول

الراجل رد عليه و أقنعه بكلمة واحدة

ولمـَا رضيت ان تكون الاعمى؟؟؟؟

........................................

القصة انتهت

بس لما سمعتها حسيت اني في حياتي حاجات كتير أوي

كنت برضى اني أكون فيها أعمي ومستني لحد ماحد يعملهالي

يمكن ده السسب اللي بيخليني اوجع دماغكم هنا في المدونة بحاجات

زي موضوع الصيدلية او موضوع التبرع بالدم مثلا او الحالات وكده

اتعلمت ان الحاجة اللي ناقصة في الحاجة اللي ناويين نعملها

اننا نعملها

يعني ناخد على الاقل أول خطوة

عشان ما أطولشي

حااب بس أقوللكم على فكرة جميلة جدا زمايلنا عاملينها

الفكرة إنهم بيجمعوا الهدوم القديمة اللي عند اي حد مننا

اللي صغرت او ماعادشي بيلبسها لاي سبب

وهيتعاد تاهيهلها بحيث تكون كأنها جديدة ان شاء الله

وهتتباع بسعر رمزي والمبلغ اللي هيتلم منها

هيتعمل بيه صدقة جارية في المستشفي شاء الله

يارب اللي قدر يشارك بحاجة ما يتأخرش لإنه مش هيخسر حاجة

بالعكس دا هيكسب ثواب كبير ان شاء بالنيتيتن دول

اللي حاابب يشارك يا إما يسيب الهدوم عند مسئول الغياب في امتياز

او يتصل بزمايلنا

محمد مغاوري

0124777838

أحمد شوادفي

0144245771

احمد الجوهري

0127540876

او زميلنا هالة رفعت وأميرة الهواري

............................

مش هطول عليكوا أكتر من كده

أشوفكوا مع كام بوست يكونوا مختلفين خالص الكام تلات اللي جايين

مش هعتذر تاني ان شاء الله

الصيدلية

السلام عليكم ورحمة الله

معلهشي البوست ده هو الأهم في بوستين كتبتهم النهاردة
معلهشي يا جماعة النهاردة بس فيه كلام مهم جدا بخصوص موضوع الصيدلية
اللي حكيتلم عنه قبل كده
اولا اهم حاجة لازم أقولها ان دي فكرة اسلام الشاذلي وهو أكتر حد

تعب جدا في الموضوع من اول ما بدأ لحد دلوقتي...ربنا يجازيه كل خير

ثانيا الفكرة باختصار ان فيه أدوية ممكن تكون مركونة عند ناس مننا

سواء كان مثلا واخدها كعينات مجانية...او بتاعة حد كان تعبان عندهم مثلا

وربنا أتم شفاه الحمد لله او ماعادشي بيستخدم الدوا ده والدوا فضل مركون عنده

او دوا كان بيستخدمه حد وربنا توفاه قبل ما يكمل الدوا وحابين ان الدوا ده يبقى صدقة على روحه

فالفكرة انا ننلم الأدوية دي من الناس حتى لو شريط أو أمبول واحد.

وهنعمل بيهم لستة مبدأية نوزعها على زمايلنا ونعرفهم ان الأدوية دي موجودة معانا

بحيث هما لو قابلوا على مدار السنادي حالة هما حاسين انها مش قادرة على تمن الدوا

ساعتها هيبلغونا واحنا نحاول نوفره مادام موجود معانا ان شاء الله

و من خلال الدعاية الصغيرة اللي قام بيها اسلام وساعدناه فيها على أد ما قدرنا

جالنا كمية دوا كويسة جدا واسلام تعب جدا عشان يعملها في لستة


وكانت مهمتي اني أنزل طنطا و احاول أوصل الفكرة لأكبر عدد من زمايلنا

انا حاولت على اد ما قدرت اني أكلم معظم زمايلي اللي لاقيتهم يومها

والحمد لله لاقيت تجاوب كتير من ناس منهم ولاقيت ناس حابة تشارك بكذا صورة

بس لسة فيه عوائق كتير أدام الموضوع محتاجينكوا معانا فيها

أولا لسة الفكرة ماوصلتشي لناس كتير فياريت اللي خد مننا نسخة
يصورها ويحاول يوصل فكرة الموضوع لأكبر عدد يقدر عليه

تاني حاجة و اهم حاجة احنا عندنا مشكلة كبيرة في المكان

الأدوية دلوقتي لسة مع اسلام وهيبقى صعب عليه جدا انه يكون موجود في كل وقت

لو حد عنده أي أفكر بخصوص المكان ياريت يقولنا

احنا محتاجين يكون قريب من الجامعة وسهل الوصول اليه

ويكون فيه حد متواجد فيه يصرف العلاج للعيانين

بحيث ان زمايلنا تلقائيا يبعتوا العيانين على هناك علطول من غير مانبقى احنا في النص
بس ازاي؟؟؟؟؟
كنا بنفكر نعمل ميرج مع جمعية رسالة بس للأسف مقر صيديلتهم في المحلة
وفيه جمعيات تانية بس بصراحة احنا مش عارفين الجمعيات دول هياخدوا مننا ولا هيدونا

فيه فكرة ان الدوا يبقى مع زمايلنا في السكن
بس برضو صعب ان علطول يبقى حد منهم موجود باستمرار
ولو استحملونا النهاردة مش هيستحملونا بكرة

فيه فكرة اننا نأجر مكان في أي سنتر محترم
نقدر نأتمن الناس اللي فيه ونخلى حد من اللي شغالين فيه يبقى مسئول عنه
بحيث ياخد الادوية من الناس المتبرعين و برضو يصرف الأدوية للناس اللي محتاجين
وده طبعا مقابل مبلغ هياخده
بس هيبقى أسهل لينا أكتر و أيسر للجميع

وفيه فكرة جميلة اوي بس تنفيذها صعب
لو حد من زمايلنا عنده أو يعرف صيدلية تطون حريصة على الخير
هنودي أدويتنا هناك ونبعتلهم العيانين بكارت يصرفوله العلاج
ولو الدوا مش متوفر من اللي احنا اديناه ليهم هيصرفوه من عندهم
وفي آخر كل شهر نحاسبهم على الدوا الزيادة ده

لو حد يقدر يساعدنا في ده أو عنده اي فكرة بخصوص المكان ياريت يساعدنا

كمان يا جماعة احنا محتاجين ناس معانا
اسلام بيتعب جدا لوحده وخصوصا اني معظم الوقت في القاهرة
لو حد حابب يشاركنا بأي شكل يبقى جزاه الله خيرا
سواء مثلا يبقوا من اللي بيستلموا الأدوية من الناس
او اللي هيعملوا جرد ويكتبوا الأدوية في لستة كمبيوتر وهكذا

انا ان شاء الله نازل يوم الخميس عشان هقبض وراجع تاني
كان فيه ناس كتير قالتلي ان عندها علاج حابة تجيبوا لينا
ياريت في اليوم ده أقدر آخده منهم
دي نمرتي
0199849267
ولو أي حد من زوار المدونة عنده دوا أكيد برضو تشرفنا ثقته فينا

دايما لما كتبت هنا عن أي حاجة في الخير
كان رد فعلكوا أكبر بكتير مما كنت بحلم
أتمنى الاقي نفس رد الفعل في الموضوع ده
لإن الواحد قابل ناس بتفرق معاهم الحباية اللي تمنها نص جنيه بس
ربنا يكرمنا ويوفقنا ويطهر نيتنا وينور بصرنا وبصيرتنا

محتاج أسمعكم

السلام عليكم ورحمة الله

انا محتاج منكم انكم تكملوا كلكم البوست ده لآخره

ومحتاج اسمع رأيكمم كلكم بعد شوية فضفضة كده جوايا نفسي أقولهم

من حوالي سنتين كان فيه حفل ختام الأنشطة لإتحاد الطلبة في كليتنا

تم دعوتي للمشاركة بإنى أقول شعر في الحفلة دي....ووافقت

رحت الحفلة وكانوا وزعوا ورق بالبرنامج وانا كنت موجود فيه

وناس كتير من زمايلي ربنا يكرمهم جم عشان يسمعوني

وحتى كان فيهم زمايلنا من أسرة الرأي

بدأت الحفلة .....كان فيها أغاني لناس من برة كليتنا وحضور من برة كليتنا

وجو ماحبيتوش وما اتبسطتش فيه خالص وحسيت انه صعب أقول في الجو ده

كلمت زمايلنا اللي مسئولين وبلغتهم اني هعتذر ومش هقول حاجة

قالولي ماينفعشي انت كده هتحطنا في موقف محرج جدا

ولاقيت زمايل لينا كتير لاحظوا انفعالي شوية وجم قالولي يا محمود

احنا مستيينك ده كله......لازم تطلع تقول...احنا عايزين نسمعك

وطلعت وقلت وربنا وفقني الحمد لله

وقتها حصل خلاف على المدونات بتاعت زمايلنا الس حضروا الحفلة والمنظمين

وابتدت مناقشات حامية جدا مابين الطرفين وطبيعي ان اسمي جه في الموضوع

وفتها سمعت اكتر كلمة اتقالت عني وفرحتني....في كذا كومنت ورا بعض

محمود دا أخونا كلنا واحنا نحب نسمعه في أي وقت و أي مكان وهو برة المووضوع

وجت بعدها نفس الكومنتات من كل الأطراف بنفس الكلام ونفس المعني

كنت فرحان جدا وشكرت الجمبع واعتذرت اني قلت في الحفلة دي

الأسبوع اللي فات تمت دعوتي من أخين عزاز جدا على قلبي

اني أقول شعر في حفلة النقابة اللي منظماها لدفعتنا

ولإن النقابة ماسكها ناس كتير من الاخوان فأسرة الرأي كانت هي اللي منظمة الحفلة

ما اترددتش ثانية واحدة رغم اني كنت مريض جدا ايامها وماكانشي صوتي طالع خالص

وماكنتش بنزل لا المستشفي ولا حتى شغلي في الصيدلية

وكان صعب عليا أوي المشوار من القاهرة للمحلة

واصحابي هنا حاولوا كتير يمنعوني بس صممت أنزل

ونزلت وكنت مبسوط جدا الحمد لله لما قلت اول مرة

رغم حاجات كتير ماكنتش حاببها في الحفلة

وكان فيه اتنين من أعز أصحابي طلبوا مني ان أقول عم بتاع الجوافة

وفيه ناس طلبت مني اني أقول نسي الفوطة

فقلت لزماينا المنظمين اللي رحبوا جدا بالموضوع واستمرت الحفلة

وكنت مبسوط جدا وفرحان بزمايلنا اللي بيتكرموا وبعدها أعلنوا اني هقول

بس بعد مسرحية كده هتتقدم في وقت بسيط....ولاقيت من الذوق اني استني

ولما بدأت المسرحية حسيت ان الجو في القاعة راح في سكة تانية خالص

غير اللي الحفلة معمولة ليه وغير اللي انا شخصيا كنت أتمنى أشوفه

ومابين اني اعتذر ومابين لأ...كانت الكلمة الحاسمة

لمجموعة من زمايلنا جم وسألوني اذا كنت هقول ولا لأ ولما قلت اني عايز أعتذر

قالولي احنا استنينا واستحملنا دا كله عشانك ....تيجي دلوقتي وتعتذر

واحتراما ليهم واحترما لكلمتي وتقديرا لأي حد كان نفسه يسمعني..طلعت قلت

أنا واحد من الناس بتعامل على سجيتي من غير ما أفلسف الأمور

عمري مافكرت اني دي حفلة اتحاد او دي حفلة اخوان

دي حاجة زمايلي عاملينها وقدروني وانا من جوايا حابب اشاركهم تعبهم وفرحتهم

احب أكون سبب بسيط في اني حاجة بيعملوها تنجح

ثم أنا مين أصلا عشان اتنطط واقول هقول هنا ومش هقول هنا

زمايلي هنا وهنا ناس أصحابي بجد..

دخلوا بيتي ودخلت بيوتهم وكلنا مع بعض عيش وملح

عمري ما تعاملت مع حد علي حسب انتمائه ..بحاول أتعامل معاه بشخصه

وتقتلني كلمة بسمعها من اصحابي القريبين

يامحمود الناس دي بتستغل موهبتك وحب الناس ليك في أغراض تانية

بس عمري ما فكرت بالطريقة دي ولا عمري حكمت على نية حد

ولا عمري على مدار الكام سنة اللي قلت فيهم شعر اتعاملت بمبدأ

بلاش تكون مع الناس دي لا تتحسب عليهم

ولا كنت باجي اقول هنا اني قلت مع الاتحاد بس انا مش منهم

ولا قلت مع الاخوان بس انا مش منهم

لإني ما كنتش بشوف الموضوع تهمة لازم آجي أبرأ منها نفسي أدامكم

أنا نفسي أعيش الدنيا أبسط من كده...من غير الحساابات دي

بس بييصادف كلام كتير من ناس حواليا المفروض يخليني أعيد حساباتي مع نفسي

أولهم والدتي اللي قالتلي آخر مرة وانا مسافر

يا محمود انت طيب و برئ بس زيادة عن اللزوم

الدنيا دي محتاج لمظاهر كتير انت ما بتاخدشي بالك منها

وكذلك من زمايلي

من اسبوع كنت واقف في استقبال العضم وكان متوزع معايا بنتيتن من عين شمس

جت حالة لراجل كبير عاجز رجله مكسورة وبيتوجع جدا...اتعطافت معاه جدا

وكشفت عليه وطلبتله أشعة وكنا يوم جمعة قبل اللصلاة

ومش لاقي كرسي متحرك أنقله عليه

شلته على كتفى لحد الأشعة وبعدين شلته وديته لحد قوضة الجبس واتجبس

وبعدين طلعته برة لحد ما ركب ومشي

لما رجعت قوضة الاستقبال واحدة من زمايلنا دول قالتلي

ايه ده يا دكتر اللي انت عملته ده.....انت دكتور ماينفعشي تعمل كده

ماعرفتش أرد....يمكن هي عندها حق بس انا من جوايا مقتنع باللي عملته

مقتنع اني لو ماكنتش دكتور كنت هعمل كده ومش حابب أبدا

اني كوني بقيت دكتور يمنعني من حاجة خير كنت هعملها

عمرش ما شفت مانع اني أساعد عيان عشان يقلع هدومه نكشف عليه

او اني أستره و أغطيه لما نخلص وأعدله شبشبه بعد ما يكشف

بس بحس الناس بتبصلي باستغراب أوي لو عملت حاجة زي كده

واكتشفت أخيرا لما جيت ألم فلوس عشان موضوع الصندوق الخيري

لاقيت ناس كتير بتحذرني وبشده من حاجة زي كده لإنه غير مسموح امنيا

مع اني طول عمري بلم فلوس وماحدش قاللي حاجة

ومن حوالي شهر ونص كنت بقول شعر في قلب كلية الشرطةوكسبت الحمد لله

والعميد بتاع الكلية كرمني بنفسه ....يعني لو فيه أي

مشاكل مع الامن أو كده ماكنوش دخلوني من الباب أصلا

أقرب موقف فاكره كان لواحد من ولاد عمي شغال في هيئة قناة السويس

قالللي بسأل عليك والله والناس بيشكروا فيك جامد بس حد قاللي

دا دماغه مهوية يا عم ...دا بيروح الكلية بالصندل

ضحكت جدا لإني برضو ماعرفتش أرد ومش شايف حاجة في الموضوع

طول عمري لما بتعزم عند حد بقعد وباكل لحد ما اشبع

زي ما باكل في بيتنا ولو نفسي في حاجة كمان بقول عليها

والاقي حد يقوللي يا محمود لما تاكل عند حد كل ربع أكله كده ولا نص أكله

ماينفعشي تاكل عادي كده

وخدوا على كده مواقف كتير أوي مش هوجع دماغكم بيها

انا بجد محتاج أسمعكم

هو أنا كده غلط

ولو غلط طب ايه الصح

هما فعلا الناس محتاجين اللي يمثل عليهم

محتاج أسمع كل حد يعرفني وكل حد عاملني عن قرب

وماحدش يفتكر اني مكبر الموضوع لان الموضوع ده مسببلي أزمة

انا ماكتبتش البوست ده عشان حد يقوللي يا محمود انت كويس

انا كتبته لإنه محتاج نصيحتكم....ومحتاج تقوموني لو فيه أي حاجة

ماحدش يبخل عليا بالرأي ده

ومحتاج كل آرائكم هنا على المدونة

اعتذار

السلام عليكم ورحمة الله

انا بعتذر يا جماعة والله عن الكتابة

i have severe upper respiratory tract infection

جيت هنا النت بالعافية والله

والمفروض ان هنزل بكرة أقول بكرة شعر في حفلة النقابة بكرة

بس لسة ماكتبتش ومش عارف هقول ازاي لاني صوتي مش طالع أصلا

ربنا يستر

يارب تكووا كلكم بخير

دائما....على أمل اللقاء

أنا ..في الجملة دي

السلام عليكم ورحمة الله
بجد متشكر اوي لرد الفعل الجميل جدا على البوست اللي فات
ادتوني أمل اني لسة قادر أكتب حاجة
مش هطول عليكوا
بوست النهادرة اختبار ليكم انتم
انا هكتب جمل منها جمل جديدة ومنها جمل كتبتها قبل كده
المهم ان كل واحد هيختار جملة مش حاسس انها حلوة او كده
جملة هو حاسس انه موجود فيها
أتمنى تكون عندكوا الجرأة تعملوا كده
وانا أول واحد هعمل كده ان شاء الله
.................................................

سيعيش في ألم من يخطأ الآخرين في حقه فلا يستطيع أن يسامحهم
وسيعيش قي قمة الألم من يخطأ في حق الآخرين فلا يستطيع أن يسامح نفسه
.............................................................
ما أصعب أن تعيش عمرك كله في حرب ٍ مع ذاتك...
لأنك حتى لو انتصرت فإن الطرف الخاسر سيكون...ذاتك
..........................................
في حياتنا بشر تؤلمنا ذكراهم إلي الدرجة التي تجعلنا نتمنى أن تمر الايام لكي ننساهم
وفي حياتنا بشر تؤلمنا ذكراهم إلى الدرجة التي تجعلنا نتمنى أن ننساهم لكي تمر الأيام
................................................................
أخطأ في حقي كثيرا من أبقى كراهيته لي سراً
فقد كنت أحتاج أن أعلمها لكي لا تقتلني صدمتي فيه
و اخطأ في حقى أكثر من أبقى محبته لي سرا ...فقد كنت أحتاج أن أعلمها
لأشعر أني لازلت أستحق الحياة حتى ولو امتلأت حياتي بالنوع الأول
...............................................................
إن أكثر ما أخشاه على قلبي
أن تأتي اللحظة التي لا يجد فيها من يحبه فيحب مضطراً من سيجده
...........................................
في حياتنا بشر لم نفعل لهم شيئا لنستحق منهم كل ذلك الحب
ولكن علينا أن نفعل الكثير لكي لا نفقده
............................................
اذا لم تستطع ان تكون مستقبلا باسما باسما في حياه من تحب
فعلي الاقل حاول الا تكون ماض ٍ مؤلم
.....................................................
إن القلوب التي تحب تستطيع أن تغفر كل الخطايا التي أرتكبت في حقها

إلا الخطايا التي أرتكبت نحو ما بداخلها من حب
..................................
كلما زادت نظرة الناس لنا احتراما ً كلما كان صعباً ان نحافظ عليها
وذلك لأن الخط الأسود يظهر بسهولة كلما زادت الصفحة بياضاً
.............................
ان أصعب أنواع الحب ان تحب من لا يحبك..ولكن الأصعب أن
يحبك من لا تحبه بعد أن تكون قد تذوقت مرارة النوع الأول
.........................
إذا رأيت في عيون من تحب حباً لغيرك فليك أن تبتعد
وذلك لأن الحب أذا قسم على ثلاثة قلوب ٍ فلابد لأحدهم ان يأخذ صفراً
............................................

ما أصعب أن يكون لك حبيبا ً يختار فراقك

فلا تتألم لأنه لم يترك لك قلبه...ولكنك تتألم لأنه لم يترك لك قلبك

..................................................................
قد يتهموك بقسوة القلب عندما يعتذر لك من جرحك ولا تسامحه
دعهم فإنهم لا يعلمون كم تألمت
ولا يفهمون أن ليس من طيبة القلب أن تسامح من قتلك

لأنه بعد أن قتلك استدعي لك الطبيب

..................................

ليس معني اننا لم نحب حتى هذه اللحظة أن قلوبنا قد ماتت

ربما كان ذلك لأن مشاعرنا الكبيرة لم تجد إلى الآن من يستطيع ان يحتويها

في الشارع الضيق أوي

في الشارع الضيق أوي
يمكن تحس ان البيوت
هي ّ اللي ولدت بعضها
وتلاقي شباك كل بيت
ماسك في شبابيك البيبان بيعضــّها

مكسوفة من بعض البيوت
لو في السما....حبة سحاب اتجـّـمعوا
شكل السحاب بيخضـَـها
جدرانها تبدأ ترتعش
وتداري طولها في عرضها
خايفة المطر....ينزل يدوّب سترها
ويبيـن الحزن اللي هاتك عرضها
في الشارع الضيق اوي
فيه ناس كتير
هربانة..أو...متهرّبة
مدّربة
إزاي تعيش وسط انكسار...وماتنكسرش
إزاي تعيش في الذكريات....وما تفتكرش
و إزاي بترضي بلقمة ناشفة وحتتين طرشي جزر
ولا إنــّها
من مال غلابة تربّي كرش
و إزاي وهي ّ مافيش في جيبهااا.. قرش ساغ
لازم يعيش جوة القلوب معني الشرف
مع إنه مابيعملشي قرش
و إزاي يسوقهاااا كل شئ
علشان تموّت نفسها....وما تنتحرش
في الشارع الضيق أوي
صوت طرطشة مية حـُما الواد ابراهيم
يخرق ودان كل الجيران
والكل فرحان ليه عشان
الأخ هيما من زمان
كان ناسي ايه طعم الحـُما
كان كل يوم
يرجع من البنزينة لابس بدلته....متشحمة
كالعادة دايما ً ينسى يقلع جذمته
يدخل ينام زي القتيل
أو ربما

فعلا ً قتيل
يصحي من النوم الطويل
من غير مراية يحط جل على العمي
بس المهم يحط جل
مع إنها نفس الهدوم...متشحمة
يمشي بعينيه المكسورين
و كإنها ...ممنوعة تحلم بالسما
وبرغم دا
بيعلـّـمك معني الرضا
ساعة ما ما مرسيدس جديدة تفوت عليه
ساعة ما يملي تانكها
دخانها بيعفــّر عليه
لحظتها بس عيونه تضحك للسما
ويلاقي صوت جوّاه يقول

أرزاق وفوق....متقسمة
في الشارع الضيق أوي
حنفية واحدة للجميع
حمام موّحد للجميع
والضحكة واحدة للجميع
والدمعة واحدة للجميع
الهم واحد في القلوب
فيه شئ غريب بيصعبّه ...ويهوّنه
إنه بيسكـُـن.... في الجميع
في الشارع الضيق أوي
هتشم ريحة غريبة جداً تدهشك

وتخربشك

ريحة عرق

على ريحة الحبر اللي مسجون في الورق

على ريحة الحلم اللي مـ ِالقلب اتسرق

مع صورة عايشة على الجدار

لمحمد اللي اختار يسيب

الشارع الضيق أوي

ويروح بعيييييييييييييييييد

لكن محمد للأسف

الحلم في البحر اتنسف

علشان محمد لمّا خاف

مـ ِالجوع يموت ...مات بالغرق

في الشارع الضيق أوي

فيه ناس غلابة كتير أوي

بيسَنــّدوا اليوم الطويييييييل....علشان يفوت

ويعلموك

إزاي تموت من غير ما احساسك يموت

و يخلوا قلبك يسألك

ساكنة البيوت جوة البشر

ولاّ البشر جوة البيوت؟

و إزاي جميع كتب الحساب والهندسة

فشلت تحل إزاي يعيش ألفين نفر

في بيوت آخرها 200 يادوب

ومايعرفوش إن البشر

في الشارع الضيق أوي

فعلا ً بيوتهم ضيقة

بس الوَسـَع جوة القلوب

في الشارع الضيق أوي

الناس بحالها بيسألوا

فيه زحمة ليه واستعدادات

فيه إيه جري....ليه شقوا جدران السُـكات

طلع الرئيس و ذوي الفخامة والسّمُــو

هيعدّوا بكرة من هنا

رايحيين هناك...في الشارع الواسع أوي

فيه افتتاح متحف جديد

وقصور قديمة اتجددت

وهتتفتح من تاني في العصر الرشيد

لكن أكيد

لو عدّوا ممكن يلمحوا

الشارع الضيق أوي

أو ريحته ممكن تزكم الجمع السعيد

إيه يعلموه

في الشارع الضيق أوي

علشان عن العين يحجبوه

أو يدفنوه

ملعون أبوه

لو كان يوحـّـش اسم مصر

يصْحَـي البشر

في الشارع الضيق أوي

يلقوا على ناصية شارعهم سور كبير

عالناحيتين

مكتوب في وشه بخط يبْسط كل عين

الحي بيرحب أوي بالزائرين

مكتوب في ضهره بخط يجرح كل عين

من بكرة لازم كلكم تـِخلـُــوا البيوت

من بكرة فيه..قرارات إزالة لكل بيت

و ابكي براحتك لو بكيت

لو لسه فيه في عيونكوا دمع

أو لسة فيه لدموعكوا عين

طب ليه وإمتي...إزاي...منين

ومافيش جواب

و يصرّخوا

ليه تحبسونا فـ حلمنا

طب فهمونا عملنا ايه

خلاكوا سيبتونا في عذاب

والله ما سرقنا البلد

ولا جينا ناحية حلمها

مع إنه بإيدينا اتولد

متأسفين

على ايه ما نعرفشي إنـّما متأسفين

يا موكب الجمع السعيد

يااللي جايين تتفرجوا

على مصر مصر ماهيش هناك

مصر اللي عايزينها هنا

محبوسة ويانا هنا

الصبح تاكل لقمة حاف

بالليل تنام من غير لحاف

و نقع تشيلنا في قلبها

وتقع نشيلها على الكتاف

ونخاف عليها من الهوي..مع إنها

ما بقيتشي دلوقتي علينا خلاص تخاف

يا موكب الجمع السعيد

إمتي تهدّوا السور هنا

وتهدوا وياه ألف سور

بانيينه من طوب حزننا

عايزين نعيش زي البشر

أو حتى مش زي البشر...لكن نعيش

راضيين بمصر بحزنها

وبدمعنا...وبدمعها

لو فيها قوتنا....أو مافيش

يمكن حياة الحلم جوانا انتهت

لكن أكيد

حلم الحياة مابينتهيش

ياموكب الجميع السعيد

حوّد هنا

يمكن مافيش

في شارعنا متحف ولاّ قصر

لكن قلوبنا بتوعدك

في الشارع الضيق أوي

هتلاقي مصر

الموضوع ما انتهاش

السلام عليكم ورحمة الله

يارب تكونوا كلكم بخير

انا عارف الني قصرت في حق المدونة جدا

وعارف اني حتى لما برجع أكتب زي دلوقتي بكتب مواضيع بايخة ومملة

بس البوست ده بالذات رغم انه كله كلام...بس مهم جدا جدا

ًخصوصا لزمايلي في امتياز ولكل حد عنده حلم في حياته عامة

ورجاءا عشان خاطري كل الناس تكمل معايا البوست للآخر

اللي حاابب أقوله النهاردة انه بعد ظهور نتيجة السنادي كنت محطم نفسيا جدا

حتى لو بينت غير كده لكل اللي حواليا الللي عارف ان معظمهم هما كمان

جواهم حاجات كتير اتهدت...وده موضوع مالوش دعوة خالص بمسألة الرضا

الحمد لله انا والله راضي وعارف ان منعظم أصحابي هما كمان راضيين

االلي حصل اني قعدت مع نفسي شوية بعد النتيجة وحسيت اني لازم أعمل حاجة

ماكنتش عارف أبدأ منين بس كان لازم أبدأ أفكر من جديد

ربنا هداني اني أحول مع أصحابي اللي جايين ياخدوا امتيازهم هنا في القاهرة

والموضوع مشي سبحان الله وانا مش حاسس لحد ما لاقيت نفسي هنا دلوقتي

والحمد لله مبسوط جدا وفي تلات ايام بس اشتغتلعهم هنا حاسس بنقلة جديد في حياتي

وهو ده اللي خلاني عايز أكتب دلوقتي وأنقللكم شعاع الأمل ده

احنا قابلنا دكاترة ماكانشي ليهم نيابة جامعة ولا غيره

بس هما ماوقفوش عند الحد ده... ماقالوش ان كله محصل بعده

فيه بعد نيابات الجامعة مكانين قبل وزارة الصحة

فيه الأمانة العامة للمستششفيات والمعاهد التعليمية

وفيه الأمانة العامة للمعاهد والمراكز المتخصصة

وربنا ييسر في الأسبوعين اللي فاتوا اني زرت المستشفيات التعليمية واحنا بنقدم فيها

ورحت كمان معهد ناصر لحد قريبي هناك

أماكن نضيفة جدا ودكاترة نضيفة جدا ومستوي تاني في كل حاجة

دكاترة حضروا راسايل وخدوا زمالات وعملوا معادلات

علموا نفسهم من أول جديد وفرضوا نفسهم على كل الأماكن الكويسة هنا وبرة

اول امبارح كانت واقفة بتشرحلنا دكتورة ربنا يحميها ويبارك فيها

معاه دكتوراة وزمالة من برة رغم انها لسة صغيرة

وواقفة على رجلها خمس ساعات بتشرحلنا

وبتعاملنا زي ما نكون اخواتها وكذلك رئيس قسم التخدير اللي أنا بادئ فيه

وكل الناس هنا استفزوا حاجات كتير كان ممكن تموت جوايا

حسسوني ان الموضوع ما انتهاش وان لسة فيه أمل في حاجات كتير

الموضوع بجد مش انت فين الموضوع هتعمل ايه

نايب في الجامعة برة الجامعة مش هتفرق ...اللي هيفرق انت عايز ايه

انا شخصيا بحاول أبدأ حياتي من جديد

جيت هنا عشان اتعلم صح وعشان اعرف

لو عايز أبقى دكتور كويس مش اقل من اي حد اعمل ايه وا روح فين

ونفسي كل الناس اللي أعرفها تحاول من جديد

نحاول نتعلم صح مهما كان المكان اللي احنا فيه...احنا في يوم هنبقى

مسئولين عن حياة انسان وهنتحاسب لو ما قدمناش العلاج

حتى لو مش عارفينه هنتحاسب اكتر لإننا كان المفروض نعرف

خلوا بس النية تكون جوانا ونحاول وان شاء الله ربنا هيكرم

على الاقل عشان لما نقف أدام ربنا نقوله اننا حاولنا نعمل حاجة

....................................

رجاءا معلهشي تكملوا معايا

صاحبي اسلام الشاذلي ربنا يكرمه كلمني عشان فكرة خير جميلة جدا

ومعاه محمد مغاوري وناس تاينة كلهم ناس كويسين جدا جدا

الموضوع انهم عايزين يجمعوا الدوا اللي عند الناس ومش محتاجينه

ومن خلال الناس اللي هنقابلهم ونحس انهم محتاجين الدوا نديهلهم

وكذلك لو حد عنده صيديلة فيها دوا فايض

برضو يجيبه لينا واحنا هنتحمل مسئولية اننا نوديه للحالات اللي تستحق

الفكرة جميلة جدا وبتتعمل في أماكن كويسة كتير وانا شاركت فيها قبل كده

وعرفت أد ايه شريط دوا واحد بيفرق مع الحالة

ده رقم اسلام 0103880858

وده رقم محمد مغاوري0124777838

وده رقمي 0199849267

وبالمناسبة انا خطي الموبينيل ضايع مني واديت الرقم ده لمعظم الحالات

بس فاضل الست بتاع التحاليل معاها الرقم القديم

لو حد من اللي جم معايا قبل كده شافوها بالله عليكم يدوها الرقم ده

عشان انا حاسس جدا بالذنب وخايف انها تكون بتتصل والرقم مش بيرد

ورجاء ماتحرموش اسلام ومحمد وماتحرمونيش انا كمان

اننا نكون سبب في الخير بموضوع الأدوية ده

وقريب كمان هتبقى فكرة الصندوق الخيري هقوللكم على تفاصيلها

بس لما نظبط الموضوع ويبقى واضح أدامنا

وبفكر عشان ما أوجعشي دماغكم على المدونة ان ننعمل جروب على الفيس بوك

نقول من خلاله اللي احنا عايزينه وانتو تقولوا لو أدامكم حد محتاج لأي حاجة

ربنا يكرم باللي فيه الخير ويجعل نيتنا خالصة ليه

..................................

أنا طولت عليكوا

ان شاء الله هحاول من يوم التلات الجاي أرجع للمدونة بقوة

يمكن ماعادشي وقت اني اعمل حاجة بس مش هي دي المشكلة أبدا

المشكلة اني حااس ان فقدت قدرتي على الكتابة

دعواتكم دايما

على لقاء

ألسلام عليكم ورحمة الله

انا بعتذر عشان ماكتبتش التلات اللي فات

انا بقالي هنا في مصر تلات أيام على ما ماموضوع اسكن اتظبط الحمد لله

انا نازل طنطا بكرة ان شاء الله اسلم على اصحابي

وهنقل موصوع الفلوس والحالات لناس انا أثق جدا فيهم

واتمنى ان الخير اللي كنا بنعمله سوا في طنطا يفضل ماشي حتى وانا في القاهرة

وتليفوني معاكم وربنا ييسر واكون حلقة وصل بين الحالات وبينكم وانا هنا

وبمناسبة فيه حالة بتاخد حقن للكلي

هما كانوا عشر حقن بفضل الله فاضل حقنتيتن بس

الحقت تمنها 115 جنيه والست بتقول انها بترتاح عليهم جدا

لو حد حابب يشيل تمن حقنه ولا اتنين يبعتلي وانا هديله رقم الست دي

أستودعكم الله يا جماعة ولقائنا دايما كل تلات ان شاء الله

ماتسونيش من دعاكم دايما

هام جدا

السلام عليكم ورحمة الله

انا هنا انا وكتير من أوي من زمايلنا في مؤتمر كارديو ايجيبت

ربنا كرمني وعرفت أوصل لنت في المنطقة الغريبة دي

يمكن مش هعرف أكتب بس فيه حاجتين مهمين جدا لازم أقوللكم عليهم

يمكن مش هعرف أكتب بس فيه حاجتين مهمين جدا لازم أقوللكم عليهم

اول حاجة ان ربنا كرمني واتفقت مع واحد من شيوخ الجمعية الشرعية

ان لو اي حد مننا قابلته حالة محتاج تعمل أشعة رنين مغناطيسي فهمـّـا ان شاء الله

هيعملوهالها في مركز الأشعة في مدينة نصر

من كلامهم المركز مجهز جدا وموثوثق بيه جدا بس انا بصراحة مارحتش بنفسي

هو فيه كل الأشعة بس أشعة الرنين غالية جدا على ناس كتير

فلو الحالة مش حالة مستعجلة ومطلوب منها ده ومستعدة تستحمل مشاور مصر

حد يكلمني وانا هتفق مع الحالة وهقابلها في القاهرة وهروح معاها ان شاء الله

وهما هيعملولها الأشعة بالمجان ان شاء الله

............................................

تاني حاجة هي فكرة التبرع الدوري بالدم

الموضوع ده كنا اتكلمنا فيه قبل كده والحمد لله كنا وصلنا لأكتر من عشرين كيس دم

بس ربنا قدر ان الموضوع يتعطل لما حادثة أصحابي اللله يرحمهم حصلت

اللفكرة انطرحت من جديد في تجمع صغير كده كنا عاملينه

والفكرة دلوقتي ان الموضوع يبقى بشكل دوري كل أربع شهور

والحمد لله دلوقتي معايا عدد كويس من الأسامي

ولسة هينضاف عليه ناس ان شاء الله

واجمل حاجة في الموضوع ااننا هنتجمع على الخير وهنشجع بعض

ومش عايز الشيطان يدخل لحد من باب ان ده رياء أو أي مدخل تاني

مادام نيتنا خير ان شاء الله ربنا هيكرم

اللي عايز يشترك معانا بأي صورة يتصل بيا على نمرة من دول

0185856476

0199849267

أو على الميل

now_tears_smile@yahoo.com

وانا هكتب اسمه وهبلغه امتى هنروح ان شاء الله

.......................................................

حاجتين خاصين بيا

أنا ان شاء الله بنسبة تسعة وتسعين في المية هاخد امتيازي في القاهرة

الموضوع ليه أسباب كتير اوي وحاجات كتير اتدخلت فيه

المهم ان ربنا قدر ليا في ألآخر كده وانا حابب كده

ومش معني كده أبدا ان هسيب اخواتي واصحابي وزمايلي في طنطا أبدا

انا كان جوايا حلم بحاول انفذه ليهم وكنت زعلان اوي وانا ماشي

بس لقيت الجوهري وزمايلنا في أسرة الرأي بدأوا في تنفيذه وان شاء الله

هيعلموه أحسن مني مليون مرة وهو مشروع الفريق الطبي

اللي هو باختصار انهم هيحالوا يستفيدوا من فترة الامتياز ومن كل الدكاترة

ربنا يكرمهم وانا ان شاء الله هحاول أكون معاهم

ولسة برضو جوايا حاجات تانية نفسي أعلمها ليهم حتى وانا هنا

بس مستني أما المواضيع تكمل واقوللكم ان شاء الله

..............

آخر حاجة متشكر جدا لكل الناس اللي هنتني بذكري ميلادي على الفيس بوك

ربنا يكرمهم ويفرح قلبهم زي مافرحوني بمشاعرهم دي

.....

آخر حاجة مش عايز حد يتصدم في تقديري التراكمي....كفاية صدمتي

يمكن سنة اولي وسنة سداتة نزلوني كتير بس الحمد لله

وهو ربنا شاء كده عشان يوديني في مكان هو شايفه أحسن ليا...الحمد لله على كل حال

وألف مبروك لكل زمايلي اللي ربنا كرمهم

فرحتي ليهم تضيع اي حاجة

وزمايلي اللي زي حالاتي كده ان شاء الله نصبر ونحتسب وربنا هيعوضنا خير ان شاء الله

...........................................

دعواتكم

تهييس مذاكرة

السلام عليكم ورحمة الله

السلام عليكم ورحمة الله وبركاته

اني أكتب تاني يوم التلات دا شئ كنت مفقتده جدا

وعندي كلام كتير نفسي أقوله بخصوص مشاعري دلوقت

بس بلاش عشان انا عارف ان فيه ناس بتتضايق من المقدمات الطويلة

فكرت ازاي و ايه اول حاجة ممكن أكتبها بعد الغيبة الطويلة دي

لاقيت ان أنسب حاجة إني أكتب كل حاجة...لو تفتكروا موضوعين كنت

كتبتهم فيهم تهييس مذاكرة سنة خامسة,,,الحاجات اللي بقعد أهذي فيها وانا بذاكر

ولو إنه كان صعب عليا أوي أفتح كتبي في الوقت ده بس جمعت حاجة كام كده من شوية كتب

وامبارح وانا في الجامعة ضيعت الكشول اللي كنت كاتبهم فيه وضيعت معاه

نسخة كنت محتفظ بيها لحاجات كتير من اللي كتبتها رجاءا يا جماعة لو حد لقاهم

يجيبهم لإنهم غالييين عليا اوي...بس عشان ما أطولشي أكتر من كده

انا هحاول اكتب من الذاكرة على ما الاقي الكشكول وأكتب بقية الحاجات ان شاء الله

ومعلهشي هي حاجات مش على أد المستوي ...هي مجرد حاجات بطلع فيها همي وانا بذاكر

لحد هنا ممكن الناس تنزل تقري البوست وتفوّت الكلام اللي بألأحمر تحت ده

أنا بس حابب أعتذر مرتين يمكن أستريح شوية

بعتذر لناس كنت المفروض هنزلهم من اصحابي في بلاد تانية ومانزلتش

لأني اتجبست تاني امبارح...انا والله حاولت أتفادى مووضوع الجبس ده

وقلت هسيب صابعي ده يلم مع نفسه مع انه ماكانشي بدأ يلم لسه

حتى عشان ماحدش يسألني السؤال الي بيضيقني بتاع....كل ده عشان صابع

بس كنا في مصر أول امبارح و واحنا طالعين نركب على باب المترو

واحد من الناس اللي نازلة نزل على صابعي بكعب جذمته هرسه

والله حسيت بصابعي وهو بيتفلق وعلى ماورحت لاقيت كل رجلي من أدامي مورمة

وحتى وانا رايح الجامعة في الميكروباص

واحد فتح الكرسي اللي أدامي عشان يقعد وقام منزله على رجلي

أنا حسيت إن صابعي مستهدف ولاقيت انه مافيش حل غير ان رجلي تتجبس تاني...واتجبست

وتاني اعتذار لناس كتير منكم

في سنة تالتة كنت ناشر قصيدة الآن تيتسم الدموع في معرض الكلية

وربنا كرمني بنجاح كبير الحمد لله

ساعتها اختي الكبيرة قالتلي كلمة عمري ما بنساها...

قالتلي ذاكر يا محمود عشان كل حد هييجي يبص على شعرك هييجي يبص على نتيجيتك

بعتذر لاي حد جه يبص على نتيجتي ومالاقهاش زي ما بيمتتني ليا

أنا والله حاولت بس ربنا شاء كده و انا راضي الحمد لله

أسيبكوا مع النهييسات...ولازم كل واحد يختار واحدة أو اتنين

انا عارف ان فيه ناس بتستغلش موضوع الاخيتار ده بس هو بيمثلي معني محتلف

وانا كمان هختار بعد ما أكتبهم ان شاء الله

.............................................

عندما تكتشف في النهاية أن كثيرا ً ممكن تحبهم خانوك

ستحزن لأنك كنت تحبهم

وستحزن أكثر لأانهم خانوك

وستحزن أكثر...لأانك لم تكتشف هذا إلا في النهاية

...............................................

ايه يعني هنكسر

ما الكل بينكسر

مين فينا ما انكسرش

همشي و أكمل طريقي

دا اللي انكسر حقيقي

اللي انكسر ما ثارش

........................

سيعانون في حياتهم طويلا ً من لا يفهمون كل اللغات إلا لغة الكلام

................................

الهدية الوحيدة التي يمكن ان يقدمها لك من جرحك

هي ان يصل بك إلي الدرجة التي تجعلك لا تندم عليه أبدا

..........................................................

ما أجمل ان تملك حبيبا يجعلك تندم على كل الأيام التي عشتها من قبله

ولكن الأجمل ان تملك حبيا يجعلك لا تتذكر هذه الأيام مطلقاً

...............................................

نفسي أحب

بس أحب في يوم ما احب

اني أحب عشان بحب

مش بحب عشان أحب

................................

الشئ الأصعب من النجاح بعد الفشل....هو النجاح بعد النجاح

...........................................

لكي تنجح الحياة الزوجية لابد ان يكون الزوجين

نفس المبادئ ونفس الأفكار ونفس شبكة المحمول

.....................................

قمة الغباء ان تكون اأنت الوحيد الذي لا تدرك قيمة نفسك

.........................................

إن الله لم ينعم عليك نعمة ً اكبر من إنه تركك حيا ً حتى هذه اللحظة

فهو يعطيك مع كل ثانية ٍ يمدها في حياتك فرصة ً جديدة لكي تتوب

........................................................................

مش هطول عليكوا....مستني رأيكم

ومستني أشوفكم بتساعدوا المدونة عشان تقف على رجليها من تاني

أحبكم في الله

اللهم لك الحمد

كم من سنين ٍ في الذنوب أضــعتـُـها

وحويتُ في صدري فؤادا ً لا يـَـرقْ

وبرغم ذاك ستـــرتني و رزقــــتني

أعطيـــــتني يارب ما لا أستـــــحقْ

..........................

اللهم لك الحمد

اللهم لك الحمد

اللهم لك الحمد كما ينبغي لجلال وجهك وعظيم سلطانك

إن القلوب التي لاتعرف الله تري حتى في عطائه حرمانا ً من النعمة

اما القلوب التي تعرفه فتري حتى في حرمانه من النعمة عطاءاً

أنا الحمد لله يا جماعة جبت جيد جدا

1128

مش هكدب عليكوا وهقوللكم إن ده اقل بكتير من اللي كنت بتمناه واللي كنت مستنيه

ومش هكدب عليكوا أنا كان نفسي أوي أجيب امتياز السنادي بالذات

بس ربنا شاء كده وانا والله الحمد لله راضي ومتأكد إن ربنا ليه حكمة في كده

وكلمة قولتها قبل كده بس نفسي أفكر نفسي وافكركم بيها

خصوصا وانا شايف حالة الحزن اللي مسيطرة على ناس كتير من زمايلي وانا منهم

يمكن كان كل واحد مننا نفسه يجيب درجات معينة عشان توديه في مكان معين

هو مختاره لنفسه

بس ربنا إدي لكل واحد مننا ردجات معينة عشان توديه

في مكان معين ربناا مختارهوله

اكيد اللي ربنا مختاره لينا أحسن بكيتر من اللي احنا مختارينه لنفسنا

حتى لو احنا بنظرتنا الضيقة شايفين غير كده

وفيه ناس انا عارف انها تعبت اوي وماخدتش حقها في النتيجة دي

بس دايما بفتكر في الاوقات اللي زي دي موقف عمري ما بنساه

حصللي من حوالي خمس سنين

كنت على الكوبري في بلدنا وكان في جيبي اتنين جنيه ونص

وافتكرت إن عليا اتنين جنيه ونص للست بتاعت العيش لإني رحت اشتريت

منها مرة بإتنين جنيه ونص من شهرين وماكانشي معايا فكة وقتها

رحت إدتها الاتنين جنيه ونص رغم إنها ماكاتتشي فاكراهم

وروحت بس وانا في الطريق بعد الكوبري بحوالي ميت متر لاقيت

اللي شغال في محل بقالة هناك بينادي عليا يا دكتر استني يا دكتر

بصيت لاقيته جايبلي اتنين جنيه ونص وبيقوللي ان دول

بقية عشرة جنيه كنت خدت منها خدت حاجة منه بيها

والفكة معاه ماكملتشي الباقي

خدتهم وأنا فرحان جدا مش عشان الاتنين جنيه ونص ....عشان حسيت

ان كل حاجة في حياتنا ممكن تبقى زي الاتنين جنيه ونص دول

ممكن نعمل حاجة ونبقى مستنين مقابل وما نلاقيش المقابل ده ونزعل اوي

واحنا مش عارفين إنه ممكن ربنا يبى شايلهولنا في حاجات تانية

في صحتنا في مالنا في راحة بالنا في حب الناس لينا في بركة في رزقنا

حتى لو ماكانشي في ده ...اللي عملناه هيتشال لينا هناك في الآخرة

في اكتر وقث هنكون محتاجين فيه لكل حاجة حلوة عملناها

انا شخصيا كان ليا حلم في دماغي في الطب ليه قصة طويلة

يمكن الحلم ده بعد عني دلوقتي جدا

بس الحمد لله حتى لو الواحد راح في وحدة صحية في أبعد حتة

مادام الواحد نيته خير إن شاء الله يحاول يعمل حاجة وكل اللي ربنا كاتبه خير

فاضل كلمة نفسي اقولها رغم إني ماكنتش حابب اكتبها هنا

فيه حد عزيز عليا قاللي كلمة جرحتني اوي مع إني عارف إنه بيتكلم من خوفه عليا

أصل انت شاطر تشغل نفسك بالمشرحة والمراجعات والاسطوانات والحالات

وفي الآخر مافيش حد نفعك ولا إداك درجة

انا مش زعلان ولا ندمان على اي حاجة عملتها دا لو كنت عملت حاجة أصلا

ولو الأيام اتعادت وقدرت أعمل أكتر من كده ميت مرة هعمل

وحتى لو دفعتنا ستين وحشة رغم انهم مش كده أبدا برضو كنا هنحاول نعمل حاجة

انا بحب الدفعة وبعزهم جدا وبعتبر كل من فيها زي اخواتي

وهفضل دايما فخور اني واحد منهم

في النهاية ألف مبروك لكل زمايلي...إني أحبكم في الله

ومن يوم التلات اللي جاي ان شاء الله هترجع تدوينات التلات

يارب نتقابل دايما في الخير وعلى كل خير