انا حسيت بالآية دي النهاردة

السلام عليكم ورحمة الله

مشروع صغير أوي ممكن نعمله سوا على المدونة

من غير ما يكلفنا وقت ولا مجهود ان شاء الله

احنا كلنا الحمد لله بنقرأ وبنختم القرآن في رمضان

والقرآن لإنه كلام ربنا مهما قرينا فيه دايماً فيه جديد

انا بتمني اننا نقدر مش بس نقرأ...احنا كمان هنقرأ بتدبر

زي ما ناس كتيرة مننا بتعمل بفضل الله

المشروع اللي هنعمله هنا ان شاء الله

كل واحد هيمشي في الختمة اللي هو فيها

سواء جزء او جزئين او زي ما ربنا ييسرله

بس يختار لينا أكتر آيه حس بيها في اللي هو قراه النهاردة

آية حس انه بيقرأها لأول مرة

أية ممكن إدته أمل أو خوفته أو حس بيها بطريقة مختلفة

أو يمكن سمع تفسيرها أو قراه وحابب يقولهولنا

او عرف قصة نزولها و حس انه هيفيدنا وهيوضح لينا الآية

او لقى خاطرة جت في دماغه بخصوص الآية دي

ممكن يكتب الآية واللي هو حس بيه وممكن حتى يكتبها بس

ويسيبنا احنا نحاول نحسها زي ما هو حسها

دي دعوة للتدبر اتمنى صدي عند الناس

وأتمنى ماحدش يتردد يشارك فيها واتمنى كل حد يكتب

وهو واثق انه بفصل الله فيه ناس كتيرة بتقرأ اللي هو بيكتبه

وممكن كلمة تغير حاجة جوة حد او تلفت نظر حد لحاجة ماكنشي واخد باله منها

الحمد لله وبفضل الله أولا و أخيراانا أعرف شخضيا أكتر من 200حد

المدونة باستمرارغير الناس اللي انا ماأعرفهاش

صحيح ان معظمهم اختاروا يكونوا من الحزب الصامت وأنا بحترم ده وقدره

بالمناسبة انا عمري ما بزعل لما اكتب قصيدة او قصة مثلا

و أطلب رأيكم فيه وتيجي الردود قليلة شوية

بس بزعل بجد لما يبقى فيه حاجة زي كده

ناس محروجة تشترك او خايفين من الرياء

لإن بحب أحس اننا لسة قادرين نجتمع على الخير

الإجتماع على الخير نفسه نية كبيرة اوي

بناخد عليها ثواب كبير اوي يمكن زيها زي الخير نفسه

وتكثير سواد المسلمين في أي حاجة صح بيعملوها

برضو نية كبيرة أوي بس احنا مش بناخد بالنا منها

اتمنى كل الناس يقدروا يشاركوا معانا كل يوم أو مع كل آية يحسوها

ولو حتى مرة واحدة بس

حتى يمكن احسن يكون من غير الأسامي للي يحب كده عشان

شبهة الرياء تبعد عن أي حد

في الحق قل لا تخش َ شيئا ً...فعلي يديك الآن قد يأتي الهدى

سبأ ٌ هـــــــداها هدهد ٌ لإلهها...أفلا تســـاوي عند ربك هدهدا ؟؟

وهيبقى فيه مسابقة صغيرة كده لإختيار اجمل تأمل او اجمل احساس اتقال في آية

هيكون لجنتها من الشيوخ اللي بتصلي بينا في المساجد ان شاء الله
إبدأ دلوقتي بأكتر آية علقت معاك في الكام يوم اللي فاتوا
ماتحرمشي نفسك ولا تحرمنا من الأجر

...................................................

كل سنة وانتو طيبين مرة تانية

اتمنى ربنا لما ينظر لينا في الايام دي

يلاقينا اتغيرنا أو على الأقل بنحاول نتغير

اتمنى على مدار أكتر من عشرين يوم ان شاء الله نقدر نعمل ده

ويمكن ربنا يكرمني و اقدر بعدها أكتب هيدة ليلة القدر لو ربنا يسر ان شاء اله

ربنا يوفقنا كلنا لما يحبه ويرضاه

الله أكبر...في رمضان

السلام عليكم ورحمة الله
رمضان بدأ
كل سنة و انتم كلكوا طيبين
قبل أي وكل حاجة النهاردة اول ليلة من رمضان
ربنا بينظر لينا الليلادي وبيباهي بينا الملايكة
حاسين دي؟؟؟؟؟
مااعرفشي ليه عز عليا أوي إن رمضان يبدأ من غير ما أكتب فيه حاجة
رغم اني عارف ان معظم الناس اللي متابعة المدونة مشغولين جدا
انا هكتب موضوعين يعني فيه كمان موضوع تحت ده ان شاء الله
اللي خلاني آجي واكتب اني حاسس اننا – اللي في سنة سادتة واللي مأجلين

الدفعات التانية يعني- مضغوطين أوي
كلنا عايزين نعمل حاجات كتيرة أوي في رمضان
بس ظروف الامتحانات والدراسة غصب عننا واخدانا وخصوصا اننا المفروض
نلم السنة كلها في الشهر ده
وحاولت أفكر ازاي احنا وحتى الناس اللي مش معانا
نقدر نستفيد من خير وثواب رمضان واحنا ماشيين في دراستنا عادي
كنت سمعت كلمة قريب من شيخ عجبتني أوي
بيقول فيها ان النيات تحارة العلماء
يعني فيه ناس كتير بتعمل نفس الحاجة بس مش كلهم بيؤجروا عليها
لان فيه ناس بتعمل الصح بس من غير نية صح
عشان كده عايزين نعمل كل حاجة في رمضان بنية صح
يعني هنذاكر وهنروح الكلية بنية اننا ننفع المسلمين ونكون دكاترة كويسين
وعشان نجيب درجة كويسة تودينا لمكان كويس نقدر نخدم منه الناس
حتى الأكل والنوم هنعملهم بنية انها حاجة بتساعدنا على العبادة وعلى المذاكرة
و لو كان الوقت مش سامحلنا نعمل حاجات كتيرة كويسة
فاحنا نقدر من غير ما نضيع وقت نسيب حاجات كتيرة مش كويسة كنا بنعملها
لإن من وجهة نظري اننا لما نسيب حاجة بتغضب ربنا عشان ربنا
بيبقى ثوابها كبير اوي عنده ان شاء الله وخصوصا لما نبقى متعلقين بالحاجة دي
هقوللكم تجربة مريت بيها بس مش عايز الناس تتصدم فيا
انا أكتر حد فيكم كلكم كان بيسمع أغاني وده مش جهر بالمعصية والله
بس انا من تانية اعدادي مش بذاكر ولا بنام غير والردايو مفتوح جنبي
بكل الحلو والوحش اللي فيه لدرجة ان كل الأغاني القديمة
كنت أعرف مين اللي لحنها و ألفها وتغنت امتى وقصتها ايه
الحمد لله ماكنتش بتفرج على اي كليبات بس كنت مدمن أغاني

ومابين فترات ببطل فيها وفترات برجع أسمعها تاني
و انا زي ما بيتهيالي معظمنا كده عارف من جوايا ان الأغاني حرام
و حتى لما سئلت لاقيت ان الموضوع مافيهوش خلاف أصلا
ولاقيت كل العلماء تقريبا ً ما أجازوش الموضوع حتى النسبة القليلة اوي
اللي أجازت الموضوع مااجازوهوش بالشكل اللي هو موجود دلوقتي ده
وكلنا عارفين كده بس كلنا وانا اولكم بنكابر
انا عارف ان كلامي دلوقتي بقى تقيل على قلب ناس منكم والبوست بقى رخم
بس انا عن تجربة بعد ما بطلت أسمع
حسيت ان بجد مافيش حاجة اكبر من رضا ربنا وحسيت
ان ديننا ده كله وعقيدتنا بتتلخص في كلمتين اتنين...الله أكبر
ربنا أكبر من اي ومن كل حاجة
وده اللي خوفني وزعلني اوي من نفسي اني حسيت بتفاهة نفسي
وانا قاعد بسمع كلام انا عارف انه بيغضب ربنا ويوم بعد يوم بتلعق بيه زيادة
وبحب اللي بيعملوه ولولا تثبيت ربنا يمكن كنت بقيت واحد من اللي بيصنعوه
عمري ما هنسي لما كنا في اسبوع شباب الجامعات في المنصورة
وجت حفلة تامر حسني ومارحناش انا واصحابي الحمد لله بس واحنا
رايحين نتعشي لاقينا زحمة ووش وعربيات اسعاف وخدنا الفضول
اننا نشوف ايه اللي بيحصل ورحنا خمس دقايق شفت فيهم كتير أوي
بس اللي مش هنساه اني شفت بنت كانت عايزة تطلع على المسرح بتاعه
والبودي جارد بتاعه كل ما تيجي تطلع يدوس على راسها برجله
وهي عمالة تعافر وبتحاول تحوش رجله عشان تطله
ليه؟؟؟؟؟؟؟؟
ساعتها افتكرت حديث النبي صلي الله عليه وسلم يحشر المرء مع من يحب
واحنا للأسف قلوبنا اتعلقت بالناس دي مع اننا عارفين اننا ما اتخقلناش لكده
احنا قلوبنا اتعلقت بالحاجت دي لاننا علقنا قلوبنا بيها
يعني زي ما احنا بنعودها هي ببتعود
فيه راجل احيانا بيركب معانا في مواصلة السنطة طنطا ومن ساعة مايركب لحد ما ينزل
تلاقيه بيدندن بالقرآن وصوته جميل أوي ربنا يبارك فيه هو عود قلبه على القرآن
فبقى حتى لما ييجي يدندن بيدندن بالقرآن وحتى احنا لما بنركب معاه
بنرمي ودانا عشان نسمعه ونسمع القرآن بصوته
آخر موقف هحكيه عشان انا طولت عليكم بس الموقف ده علمني كتير
وإداني كمية ثبات جامدة جدا في الكلام اللي فوق ده
امبارح رحت الساعة اتنين كده أصلي الضهر في المسجد اللي برة الكلية
اللي قصاد مكتبات الشرقاوي الناحية التانية
ولاقيت راجل كبير اوي في السن ماسك مصحف صغير أوي وبيقرأ فيه
بس بيقرأ بمشقة شديدة ومقرب المصحف لعينه اوي فقلت يمكن مايعرفشي
ان المسجد فيه مصاحف كبيرة وخدتله مصحف كبير.. الراجل طبطب على
وقاللي يا ابني انا مابقراش غير في المصحف ده من تلاتين سنة
ومش هرضي أغيره أبدا لإنه بقى أعز صاحب لي
وحاسس ان المصحف ده بالذات هو اللي هيشفعلي يوم القيامة
بجد علمني كتير أوي وخلاني أخجل من نفسي وخلى الشعور اللي جوايا
ناحية المصحف اللي بشيله يتغير ده مش بس مصحفي ده صاحبي
لو عودنا قلبنا على كلام ربنا هيتعود عليه
زي ما احنا عودناه يسمع أغاني فاتعود عليها وخلى اننا نبطل نسمعها
بقى شئ صعب علينا وشئ كلنا بنكابر فيه مع اننا عارفين انه غلط
حتى لو مش حرام كفاية نسيبها لإنها شبهة والمسلم لازم يتقي الشبهات
انا بتكلم الكلام ده و هو أصعب عليا من أي حد فيكو
بس زي مابنسمع في كل وقت وفي كل أدان....الله أكبر
خلونا نبطل بس التلاتين يوم دول...نجرب...يمكن نحس فعلاً
اننا لما نبقى مع ربنا بقلوبنا مش هيبقى ناقصنا حاجة
معلهشي انا طولت في النقطة دي اوي بس زي ما قلتلكوا قبل كده
ان ربنا كتبلي اني أشوف النبي صلي الله عليه وسلم أكتر من مرة
وكانت كلها في فترات كنت مبطل فيها أسمع الاغاني دي
تخيلوا لو حاجة زي كده ممكن تكون مانعة عننا خير أد ايه
وتخيلوا واحنا محتارين هي حلال ولا حرام وطلعت في الآخر حرام
متخيلين العداد هيبقى عد علينا أد ايه
مش بس الأغاني ... السجاير كمان
اعرف نسبة قليلة أوي من اللي متابعين المدونة بيدخنوا
وعارف انهم لو عايزين يبطلوها هيبطلوها...بس ده لو كانوا عايزين ده
بس لو ماقدروش وما حلموش يبطلوها في رمضان هيبطولها امتى
هما كمان محتاجين يحسوا بنفس الكلمة ......... الله أكبر
احنا كمان نقدر نعمل حاجة مش هتكلفنا أي حاجة
احنا نقدر نخلي رمضان هو أطول فترة صمت في حياتنا
يعني هنسكت على اد مانقدر
مش هنتكلم كتير بنية اننا مش عايزين نقول أي كلمة تغضب ربنا
مش هنجيب سيرة حد بـحاجة هو بيكرهها حتى لو بنقدر نقولهاله في وشه
حتى المتعة اللي بنلاقيها في الكلام ده محتاجين برضو نحس فيها ان الله أكبر
وحتى لو الوقت مش سامحلنا اننا نعمل حاجت كتير في رمضان
كفاية لو قدرنا في الصمت ده وفي الوقت اللي بيعدي مابين الحاجات اللي بنعملها
واحنا في الكلية واحنا في الطريق واحنا في البيت
نملى الوقت ده مله بالباقيات الصالحات
سبحان الله والحمد لله ولا إله إلا الله والله اكبر ولاحول ولاقوة إلا بالله
مش هتكلفنا وقت ولا مجهود بس ثوابها كبير اوي عند ربنا
أنا نفسي أقول كلام كتير أوي بس انا طولت عليكوا أوي
في النهاية كلنا لازم ندخل رمضان واحنا حاسين انه آخر رمضان في حياتنا
لو ما اتعلمناش كده من كل الظروف اللي فاتت يبقى مش هنتعلم ابداً
وفي آخر رمضان في حياتنا ماينفعشي ربنا يبصلنا يلاقينا في حتة
هو مش عايز يشوفنا فيها
ماينفعشي يبصلنا يلاقينا بنسمع أو بنشوف حاجة بتغضبه
مش عايزين نضيع ثانية واحدة في رمضان في اي حاجة غير رمضان
رمضان اللي ربنا اداهولنا هدية عشان يغفرلنا فيه

ينفع نرد هدية ربنا عشان أي حاجة

أول حاجة لازم نعملها بسرعة

كل واحد يطلع قايمة الأسماء في محموله ويجيبها من الأول للآخر

يشوف مين اللي هو مقصر في حقه أو مزعله ويعتذرله

أو حد هو زعلان منه ويسامحه

خلنا ندخل رمضان واحنا مش مزعلين ولا مزعلين حد

يمكن ربنا يسامحنا وبعفر لينا تقصيرنا عشان النقطة دي

انا كده طولت أوي

كل سنة وانتو كلكم طيبين

فيه بس هيبقى مشروع صغير كده على المدونة طول رمضان

اتمنى كلكم تشاركوني فيه هنا ان شاء الله

ربنا يتقبل منا جميعا ان شاء الله

كل سنة وكلكم بخير

لمن يهمه الأمر

السلام عليكم ورحمة الله
في البوست ده كان لازم نجاوب على سؤال اتوجهلنا كتير
انتو عملتوا ايه بالفلوس اللي انتو لميتوها مننا؟؟
وده سؤال من أي حق أي حد شارك معانا انه يسألنا وعارفين طبعا ً انه
بيسأل بحسن نية ومافيش أي مشاكل اننا نجاوب السؤال ده
ويشهد الله اننا لا كونا لمينا ولا كونا بنقول دلوقتي عملنا ايه بالفلوس
اننا كده بنرائي لإن زي ماقلت وبقول دايما الموقف مايستحملشي كده
أنا استئذنت زمايلي كمان اني أقول كل حاجة بالمبلغ اللي اندفع فيها
يمكن ناس برة الموضوع ده خالص تحس ان فيه أماكن لسة محتاجة
فتشارك هي كمان في الخير ده بينهم وبين ربنا
فيها حاجة بس قبل ما أكمل
احنا عارفين ان الموضوع فيه خلاف واحنا زي ما قلنا دايما اجتهدنا
واحنا بندعي من كل قلبنا ان الثواب يوصل او على الأقل تبقى شهادة خير
مننا للدكتورة رندة ربنا يرحمها او على الأقل لإنها كانت السبب اننا نعمل كده
ومش معني كده اننا خلاص عملنا كل حاجة لإن هيفضل اهم حاجة
اللي على الأقل مافيش فيها أي خلاف....الدعاء ليها دايما
واحنا حاولنا نقسم الفلوس على كذا حاجة بحيث ان بإذن الله
ييجي الثواب من هنا أو من هنا أو منهم كلهم ان شاء الله
وحاولنا نكمل حلم الدكتورة رندة ونحط الفلوس
في نفس مجالها وفي حاجات هي كانت بتحبها
وحاولنا نبقى على مهلنا بحيث ما يبانشي لينا أدام مصدر انفاق نقول انه كان أولي
وماكنشي فيه فلوس بتنصرف إلا بعد ما نشاور بعض
وبعد ما نلاقيها أولي من الحاجات التانية
وفيه ناس كان ليها اقتراحات فوق راسنا والله وكنا بنفكر فيها كلها
بس هو ربنا في النهاية قدر ان الفلوس تتقسم بالطريقة دي
الفلوس اللي معانا وصلت حوالي خمس تلاف جنيه ونص
نسبة كبيرة منهم كانت منكم ونسبة كانت من زمايل دكتورة رندة برة الكلية
اتقسمت كما يلي
.....................................
اللي هو اسمه دي إسdefibrellitorفيه ألف جنيه راح لجهاز الـ
مع الدكتورة مي سلامة ..هو الجهاز تمنه شبعة وتلاتين ألف جنيه
والألف جنيه دي كان من أول الفلوس اللي اندفعت فيه
والحمد لله حتى دخلت في المقدم اللي اندفع عشان يجيبوا الجهاز على مابقية المبلغ يتلم
ولو اي حد عايز يخرج أي فلوس في رمضان ياريت يشارك فيه
لإنه جهاز مهم جدا وبينقذ حياة بني آدمين كتير
.........................................
فيه خمسميت جنيه راحوا للدكتورة غادة
هي بتجهز بنت فقيرة وهي المسئولة عن تجهيزها
هتشتريلها منهم جهاز يفضل في بيتها دايما
واللي هيتبقى من المبلغ هيروح في القساطر اللي بتتركب لعيانين الكلى
..........................
فيه 570جنيه راحوا لعيان بيمعمل عملية جراحة مخ و أعصاب
وفيه ميتين جنيه دخلوا في بناء مسجد
وفيه أجهزة
laryngoscope& 2 ambo pags
راحوا لقسم الأطفال وماتعرفوش فرقوا أد ايه لما النور قطع عن الحضانات
يادوبك بعد ما الجهازين وصلوا بنص ساعة
كفاية علينا أوي الأطفال اللي جهازين الأمبو باج دول أنقذوهم
suctionوفيه كمان جهازين أمبو باج وجهاز
راحوا لقسم التخدير لإنهم كانوا محتاجينهم جدا
دا كله اتكلف حوالي تسعميت جنيه
وفيه مغسلة اتكلفت 470و خشبة أموات اتكلفت 760جنيه
راحوا لمسجد في قرية فقيرة كانوا محتاجينهم جدا
وفيه مية وعشرين جنيه راحوا لحالة كانت محتاجاهم تعمل بيهم تحاليل
عشان تقدر تصرف بيها علاج على نفقة الدولة
والمبلغ اللي اتبقي اشترينا بيه كراريس وكشاكيل وحاجات لدار أيتام
عرفنا ان الدكتورة رندة ربنا يرحمها كانت بتشارك فيها
......................................................
هو دا اللي حصل بالظبط
وانا كنت بتكلم بصيغة الجمع مش بقصد الجروب اللي كانت مسئولة عن الموضوع
انا بقصدنا احنا كلنا
ملحوظة..اي حاجة اتوزعت او هتتوزع غير الحاجات دي فهي من برة الفلوس دي
ملحوظة كمان
رغم صعوبة موضوع دكتورة رندة علي ناس كتير من دفعتنا
بس كان فيه نعمة يمكن انتو ماحسيتوش بيها
ان الموضوع حصل وهما لية دفعة واحدة
زعلوا سوا وبكوا سوا وحاولوا يعملوا حاجة سوا
لإن لما أصحابي توفوا واحنا كل واحد مننا في حتة
كان كل واحد بيموت فيهم لوحده وكنا بنموت مع كل واحد يعرف فيهم
و فيه ناس عرفت وهي هناك في الغربة....مش هقدر أقوللكم حالتهم عاملة ازاي
آخر حاجة
برة موضوع الدكتورة رندة خالص
لسة الدكتورة مي والدكتورة غادة بيلموا
لو حد عايز يشارك معاهم بأي حاجة يروحلهم او ممكن يوصلهم من خلالنا
ربنا يجازي كل حد شارك معانا
ولو حتى كان مختلف معانا وحاول يرشدنا ناحية الرأي الصح
جزاكم الله خيرا جميعا

مش احنا كمان هنروح عند ربنا؟؟

إنا لله و إنا إليه راجعون
اللهم انا نشهدك أنا رضينا فإرض َ عنا
اللهم انا نشهدك أنا رضينا فارض عنا
اللهم إنا نشهدك انا رضينا فارض عنا
ان العين لتدمع وان القلب ليحزن
النهاردة بعد خمس أيام من اللي حصل حاسس اني محتاج اكتب
رغم احتياجي الشديد ان اكتب من يومها بس كنت مستني
عشان لما أكتب اكتب وانا متماسك وكويس واطمن الناس عليا
انا لسة حاسس اني مخنوق أوي
حاسس زي ما يكون كابوس طويل
ومستني اي حد يخبطني بالرجل ويقوللي اصحي بقى
والله مش قلة رضا ولا قلة صبر بس النبي صلي الله عليه وسلم
كان حاسس بينا لما قال ان القلب ليحزن
ماكانشي شئ سهل علينا انا اصحابي في البلد نلاقي
خمسة من أصحابنا مرة واحدة كده بيتسحبوا من حياتنا
اصحاب ضحكنا سوا زعلنا سوا لعبنا سوا اتخانقنا سوا صلينا سوا
اشتغلنا سوا سافرنا سوا بكينا سوا وقبل دا كله اتربينا سوا
ماكانشي سهل عليا أبدا اني أبص للخمسة دول الاقي منهم ابن عمي
وتلاتة من اعز صحابي حتى الوحيد اللي ما اعرفوش فيهم كنت بحبه جدا
ماكانشي سهل أبدا اني ألاقي منهم اول حد صاحبته في حياتي كلها
محمد ربنا يرحمه ..أعرفه من وانا عندي أربع سنين عشان كنا جيران في الارض

عشرين سنة أصحاب
لسة فاكره وهو راكب الحمارة ادام أبوه لما كانوا زارعين عنب زمان جنبنا
وكانوا جايبنلنا قفص عنب وحطوه ادام الباب ومشيوا

فاكر زي ما يكون لسة النهاردة
انا مش عارف أحكيلكم ايه.. دي عشرة عمر بحاله
بس بعد خمس أيام مادقتش فيهم طعم النوم انا دلوقتي بفتكرهم وبضحك
بفتكر محمد لما رحت اشتغل معاهم في الساحل وفلوسي خلصت ولسة ماقبضتش
واخترته من بين كل اصحابي اللي كانوا هناك
وقلتله انا محتاج خمسين جنيه يا محمد
طلع محفظته واداهالي وقاللي خد اللي انت عايزه وهاتها تاني
بفتكر فرحته بيـّا يوم ماجبت مجموع كبير في الثانوية العامة
مع ان مجموعه هو ماكانشي زي ما هو عايز
بفتكره يوم ما كان بيشل في عزال اختى
لما كان بينقى أتقل حاجة عشان يطلع بيها رابع دور على كتفه
بفتكره لما كان معدي رايح ارضهم قبل فرح اختي و امي نادت عليه
يامحمد عايزاكم تعلموا جو كده في الفرح
وقاللها عيب ما توصنيش دا فرح أختي
بفتكر محمد ابن عمي في آخر مرة شوفته وكنا بنلعب كورة

ولسة صوته بيرن في وداني لما دخلت جون حلو وقعد يقول
هو دا ابن عمي اي جماعه هو دا ابن عمي يا جماعة
وأيام الاتوبيس لما كنت برخم عليه و افضل طول السكة قاعد على رجله
وكامل ..ربنا يرحمك يا كامل.. اللي يمكن مابقيناش أصحاب بجد غير السنادي
بس حبيته جدا وكانت كل الناس بتحبه جدا وهيفضلوا يحبوه جدا
بوسامته وخفة دمه الشديدة جدا وقفشاته اللي ما بتبطلش
وباسم... واحد من اجدع الناس اللي شفتهم طول عمري
انا مش عارف أحكي ايه ولا ايه

دول جزء من حياتنا كلنا
ناس منقوشة جوانا

انا بس فيه حاجة وجعاني اوي بس مطمناني اوي
يمكن انا ومحمد بحكم الدراسة بعدنا شوية عن بعض بس فضل اللي جوانا جوانا
وعشان كده محمد ربنا يرحمه ما كانشي سره معايا
بس من حوالي شهرين لاقيت محمد بيخبط على و جالي وقعد معايا تلات ساعات
حكالي فيها كل حاجة عنه ..كل حاجة...
تلات ساعات لسة كلامهم عمال يتردد في وداني من ساعة اللي حصل
تلات ساعات انا قادر اني أًصون كل اللي اتقال فيهم واشيله جوايا
بس ساعتها كنت على أد ما كنت فرحان جدا بمحمد
على اد ما كنت مستغرب جدا ايه اللي خلى محمد يعمل كده وفي الوقت ده ليه
بس دلوقتي فهمت انه كان جاي يودعني وانا مش فاهم ويمكن هو كمان ماكانشي فاهم
بس اللي مريحني اني يومها قلتله انه من أكتر الناس اللي بحبها جدا في الله
واننا يمكن اتفرقنا شوية بحكم الدراسة بس معزته جوايا عمرها ما ااتغيرت
وهو قاللي نفس الكلام
نفس الموقف حصللي مع كامل في آخر مرة ركبنا فيها الاتوبيس
وجه قعد جنبي و خدنا السكة كلها بنحكي على كل حاجة ومش فاهمين ليه
بس انا حاسس ان ربنا عمل كده عشان آجي دلوقتي ادامكم و ادام كل الناس
واشهد شهادة حق اتحاسب عليها ادام ربنا
انهم من انضف و اجدع و اجمل وأرجل الناس اللي شفتهم في حياتي
و انهم نضاف اوي من جواهم وبيحبوا ربنا ومش شايلين حاجة وحشة لحد
وانهم حتى لو فيهم حاجات غلط فكانوا بيحلموا يغيروها للأحسن
ودي مش شهادتي لوحدي
دي شهادة بلد بحالها خرجت من أصغر لأكبر فيها عشان تودعهم وتدعيلهم
شهادة من كل أصحابهم اللي من يوم حادثتهم وكلنا عقلنا مشلول
بس كلنا صابريين وراضيين ومحتسبينهم عند ربنا شهداء ان شاء الله

بس خايفين

عشان عارفين ان السنين اللي ربنا مدها زيادة في عمرنا مش نعمة ولا فضل لينا

بالعكس دا الامتحان بقى صعب أوي

عارفين لما حد بيأجل الامتحان وبعدين يدخل للدكتور يسأله أسئلة صعبة اوي

ويقوله لازم كده مادام خدت وقت زيادة عن زمايلك كان لازم تذاكر فيه

خصوصا وانت شفت الناس بتمتحن قبلك

احنا كمان ربنا أجل لينا امتحانا بس ياتري الامتحان هيبقى عامل ازاي؟؟؟؟
فاضل كلمتين عايز اقولهم
كلمة احمد صاحبي لما عرف بعدها ونزل من مصر ورحنا نزروهم في المقابر
وكنت خايف على احمد اوي من اللحظة دي بس لما رحنا كان متماسك جدا
هو نفسه كان مستغرب من نفسه بس قاللي كلمة عمري ما هنساها
قاللي لما جيت هنا حسيت ان هما أصحاب البيت واحنا اللي مسافرين وراجعين
هما سبقونا على البيت اللي هيبقى بيتنا كلنا واحنا راحيين شوية وراجعين
احنا جايين هنا عشان هما يزورونا مش علشان احنا نزورهم

الأصل اننا نبقى هنا مش هناك
انتو حسيتوا الكلمة دي؟؟؟
الكلمة التاينة كانت كلمة طفل صغير عنده اربع سنين وكنا في عزاء ابن عمي
وهو كان يعرف محمد ابن عمي ربنا يرحمه ولقيناه مرة واحدة سأل أبوه
هو محمد راح فين يا بابا
ابوه قاله محمد راح عند ربنا
ورد عليه..طب يا بابا مش احنا كمان هنروح عند ربنا؟؟؟
كلمة صغيرة من طفل صغير بس هزت كل اللي سمعوها
لانه واجهنا بحقيقة كلنا عارفينها بس بنخاف نواجه نفسنا بيها
أصحابنا راحوا هناك عند ربنا اللي هو أرحم بيهم مننا ومن اهلهم وحتي من نفسهم
بس احنا....احنا فين
احنا ربنا ادانا نعمة النسيان بس طول عمرنا بنفهمها غلط
لاننا بننسي بيها اللي ماتوا وبننسى معاهم اننا هنموت زيهم
اللي ناس كتيرة ماتعرفوش اني انا وناس تانية
كنا المفروض هنروح معاهم نزور صاحبنا ده
بس هما لقوا نفسهم خمسة على اد العربية و ما بلغوناش الميعاد وراحوا لوحدهم
عشان هما ربنا كاتبلهم العربية تتقلب في المية ويموتوا شهداء بإذن الله
بس سابوا لينا سؤال كبير اوي....لو احنا؟؟؟؟؟
انا زعلان من نفسي اوي
زعلان على نفسي اوي
زعلان عشان عايز اتغير ومش قادر
زعلان عشان عارف اني هنسى زي ما طول عمرنا بننسي و مابنتغيرش
زعلان من نفسي عشان من فترة قريبة جدا ياسر الله يرحمه
كان راكب معايا الصبح
على مارجعت من الكلية لاقيتهم بينادوا اسمه في المساجد
وانهرت زي ما ناس كتيرة انهارت وبكيت عليه بحرقة زي ما كل الناس بكت
أنا فاكر واحنا بنشيله من نعشه
كان جوايا وعود كتير أوي لربنا اني هتغير
بس للأسف مااتغيرتش
نسيت زي ما كل الناس بتنسى انهم هما كمان رايحين هناك
حتى بعدها رينا كرمني برؤية ياسر في مكان أي حد فينا يحلم يشم عبيره بس
ورحت بشرت أهله

و كإن ربنا بيقوللي شوف اللي عاشوا عمرهم كله لربنا زي ياسر بيبقوا فين
وبرضو نسيت زي ما كل الناس بتنسى

اوعوا تفتكروا من كلامي هنا أو في أي حتة اني حاجة
أو اني قدرت أعمل حاجة

أنا ولا حاجة ولا أساوي حاجة

انا بقى كل دعايا ان ربنا يسترني أدامكم يوم القيامة

عشان الناس اللي بتحبني ما تتصدمشي فجأة إني كنت أكبر ممثل في حياتهم
كل واحد فينا عارف اخطائه فين.. مش محتاجين لكتب ولا لشيوخ
بس احنا بنخاف نواجه نفسنا

زي ما نكون بنعاند نفسنا
زي ما نكون بدون مانقصد بنعاند ربنا
زي ما نكون ناسيين ...أحصاه الله ونسوه
زي ما نكون ناسيين...واتقوا يوما ً ترجعون فيه إلى الله
زي ما نكون ناسيين...أن تقول نفس ٌيا حسرتى على ما فرطت في جنب الله
زي ما نكون ناسيين...يا أيها الناس أنتم الفقراء إلى الله
زي ما نكون ناسيين...وماقدروا الله حق قدره

زي ما نكون ناسيين...وبدا لهم من الله ما لم يكونوا يحتسبون

زي ما نكون ناسيين...وقدمنا إلى ما عملوا من عمل ٍ فجعلناه هباءا ً منثورا

زي ما نكون ناسيين....ولكن ظننتم أن الله لا يعلم كثيرا ًمما تعملون
زي ما نكون ناسيين... ويحذركم الله نفسه

انا حاسس ان احنا زي ما نكون نزلنا الدنيا دي لاقينا فيه اتوبيس ماشي
ولقينا كل الناس بتركب فيه قومنا راكبين فيه
من غير حتى ما نسأل هو رايح فين
عشان نبقى مع الناس مش اكتر

بنعمل زي كل الناس في الأتوبيس ما بيعملوا عشان ما يتريئوش علينا
حتى لما لقيناه ماشي في طريق غلط ماقدرناش ننزل

لاننا مش قادرين ننزل أو يمكن مش عايزين ننزل

خايفين لو نزلنا نبقى لوحدنا بعيد عن الناس

عشان ما اتعودناش نكون مع ربنا

ولا اتعودنا ان رضاه عنا سلعة لازم يندفعلها ضرايب كتير أوي

بس احنا مش عايزين ندفع...احنا عايزين ناخد....ناخد وبس
ربنا حاسس بينا وعارف أد ايه احنا بنعاني وعايز يرحمنا بس احنا مش عايزين

أنا حااسس ان ربنا لما هيحاسبنا مش بس هيحسب احنا مشينا أد ايه في طريقه

هيحسب كمان احنا تعبنا أد ايه عشان نمشي المسافة الصغيرة دي

عشان هو عارف ان فيه ألف طريق بيشدنا ناحيته

عشان هو عارف ان الدنيا من حولينا صعبة أوي
واننا حتى لما بقينا وحشين.. بقينا وحشين غصب عننا

عشان كده ربنا بيقول ....ففرّوا إلي الله

عشان هو عارف كمية الصراع اللي جوانا عاملة ازاي

عشان كده بيقول ...ويريد الله أن يتوب عليكم

لازم نستحي من نفسنا ان ربنا حاسس بينا وعايز يتوب علينا واحنا اللي مش عايزين

ربنا مش عايز مننا أكتر من اننا نروحله...نحاول نروحله...وهو هياخد بإيدنا بس نحاول بس

خلونا مرة واحدة بس نواجه نفسنا

خلونا مرة واحدة بس نحاول نتغير

خلونا مرة واحدة نعمل حاجة صح للآخر

خلونا نروح لربنا...نروح بس

انا بتأسف ان كنت كئيتكوا معايا كده النهاردة
وبعتذر لأي حد بعتلي عايز شرايط أو عشان موضوع التبرع بالدم
زمايلي هيبقوا مسؤلين عن كل حاجة الفترة دي
وبـتأسف لو كان ده هيبقى آخر بوست على المدونة الفترة دي
ادعولهم يا جماعة عشان خاطري ادعولهم ربنا يرحمهم ويصبر أهلهم
ادعولنا احنا كمان بالصبر وبالثبات
ادعولهم عشان خاطري بالله عليم كل حد يدعيلهم

وبالله عليكم كل واحد يلحق نفسه...ماحدش عارف الدور على مين

ومن أحياها فكأنما أحيا الناس جميعا

أولا الكلام اللي بالأحمر ده زيادة ..اهم حاجة الكلام اللي تحت بالأسمر

أنا سعيد ..سعيد جدا جدا

انا رحت النهاردة انا واصحابي اتبرعنا

اصحابي دول بجد انا لي الشرف اني أعرف ناس زيهم

يمكن النهاردة يادوبك جمعنا حداشر او اتناشر كيس دم

بس في النهاية احنا حاولنا ناخد اول خطوة

يمكن الحملة نفسها كحملة هتتأجل لبعد امتحاناتنا عشان تبقى أكبر وأكبر

بس احنا بنحاول نوصل الفكرة لأكبر عدد من الناس

ونفسنا كل الناس تعرف

ان من كل تلاتة محتاجين لكيس دم في مصر واحد بس بيلاقيه

ومش بسهولة...مابالكم بالاتنين المرضي اللي مش لاقيينه

انا كان نفسي أكتب اسماء الناس اللي كانت معايا النهاردة

بس مش عايز أضيع عليهم الثواب كفاية انا وشي اتحرق عندكم كده

خصوصا وان ناس منهم خافوا يشربوا العصير اللي زمايلنا جايبينه

عشان خايفين ان ده ينقص من أجرهم عند ربنا شئ

فيه ناس راحت اليومين اللي فاتوا ولسة ناس هتروح ان شاء الله

فيه مجموعة هتروح مع زميلنا نادر شبل ان شاء الله

دي نمرته لو حد عايز يروح معاه ان شاء الله

0182687407

يارب بالتوفيق لكل الناس في الفترة اللي جاية

........................................

السلام عليكم ورحمة الله
لإني مش عايز أطول عليكوا وعارف ان معظم زوار المدونة داخلين على امتحانات
اخترت للعنوان ..الآية اللي فوق دي..ومن أحياها فكأنما أحيا الناس جميعا
اللي حصل ان لي ابن جاري محجوز في معهد الأورام
وكنت بروح ازوره كل يوم وشفتهم هناك بيصرفوله الدم على التذكرة
يعني من غير مايدفع حاجة بس تالت يوم ما اتوفرشي الدم ده
فشفتهم مسافرين القاهرة مخصوص عشان يجيبوا الدم ده ويشتروه بالفلوس
اتصادف ده مع فكرة زمايل لينا اننا نعمل حملة تبرع بالدم على مستوي دفعتنا
ونحاول نوصل الفكرة لأكبر عدد من الناس برة وجوة الدفعة
اتحمسنا للفكرة وقسمنا نفسنا كل حد يسأل في اتجاه عن المكان المناسب
لحاجة زي دي..ورحت أسأل انا في معهد الأورام واتفاجئت بالوضع هناك
الدكتور هناك قاللي انا مش هقوللك المعهد محتاج دم أد ايه
انا هسيبك تشوف بيان الدم اليومي اللي هييجي دلوقتي..وتحكم بنفسك
بعد خمس دقايق جه البيان
بجد حاجة تخص....حاجة تحرك الجبل
أكتر من خمسين كيس دم مطلوبين ومش موجودين في المعهد
وبنك الدم الرئيسي مش قادر يسد العجز ده لإن هو كمان عليه ضغط جامد
ولما شفت الملفات بتاعت الحالات اتخضيت أكتر
أطفال وناس الهيموجلوبين بتاعها خمسة.وفيه ناس هيموجلوبينها أربعة
يعني تلاتين في المية أو أقل من النسبة الطبيعية
يعني ممكن في اي لحظة عضلة القلب تتشل وتقف
انا شفت حالة هيموجلوينها تلاتة وتمانية من عشرة
تقدروا تقولوا ده بيتحرق من جواه
للأسف هي دي الصورة وهو دا الوضع
وكان نفسي أصور ورقة البيان اللي معايا دي و أحطها هنا عشان تشوفوه بنفسكم
انا خرجت من المعهد ونفسي أبلغ كل الناس
نفسي الناس تعرف ان فيه أطفال مش بتموت ...أطفال بتتحرق من جواها
بيفضلوا عايشين لحد ما يبقى مافيش في جسمهم دم يعيشوا بيه...فيموتوا
متخيلين؟؟؟؟؟
ومش بس هما اللي بيموتوا
أهاليهم بتموت معاهم في كل لحظة وهما شايفينهم بيموتوا أدامهم
و اوقات كتيرة أوي بيصرفوا اللي وراهم واللي أدامهم عشان يشترولهم دم
وحتى بعد ما يعملوا كده أوقات مش بيلاقوا حتى الدم ده عشان يشتروه
ده اللي خلانا انا و زمايلي ربنا يكرمهم نفكر نعمل حاجة
كان جواانا أفكار كتير أوي وبقالنا أسبوع بنحاول ننظم حاجة
وبدانا النهاردة برواند واحد
بس للأاسف عوامل كتيرة ضدنا لإن مافيش دفعات في الدراسة غير دفعتنا
ودفعتنا بتمتحن ومش قادرين نوصل للناس بالقدر الكافي
احنا كان نفسنا نعمل حاجت كتير أوي
بس لحد ما ربنا ييسر احنا هنحاول ننشر الفكرة
بيتهيالي ان مافيش حد ممكن يكون قادر يتبرع بعد الوضع ده ويتردد
بيتهيالي أي حد وصلتله الفكرة
لازم ياخد نفسه في أقرب فرصة على الدور الأرضي في معهد الأورام ويتبرع
دا لو كان قادر على ده ومافيش حاجة تمنعه
لاننا عارفين ومقدرين ان فيه ناس عندها أسباب تمنعها من ده
واحنا بادئين الموضوع ده وقلنا لو كيس دم واحد احنا هنبقى في قمة سعادتنا برضو
بس لو حد قادر يبقى لازم نعمل حاجة
شوية دم صغيرين بنزكي بيهم عن صحتنا اللي احنا مش حاسين بقيمتها
شوية دم بنحمد بيهم ربنا اننا مانزفنهمشي في أي حاجة وحشة ربنا يعافينا جميعا
كفاية لو قدرنا نخلى طفل واحد بس

ينام هو وأسرته ولو ساعة واحدة بس وهما مش شايلين هم بكرة
كفاية لو طفل واحد قدر يفتح عينيه ويشوف الدنيا من جديد
حتى لو هياخد الدم النهاردة وهيموت بكرة
كفاية انه مات مرة واحدة وماماتشي مرة في كل ثانية عدت عليه
كفاية لو خليناه قادر ياخد نفسه لحد آخر لحظة في عمره
رغم ان زعلان جدا عشان ماقدرناش ننفذ حاجات كتيرة كانت في دماغنا
بس سعيد جدا لإن على ماروحت كنت وصلت لعشرة من زمايلي هيروحوا يتبرعوا

هبقي سعيد أوي لو طلع من كل أصدقاء وزوار المدونة عشرة زيهم

وهبقى سعيد أكتر لو الناس قدرت توصل الفكرة لناس تانية

يعني نفسي كل حد هيدخل المدونة يختار كومنت من اتنين

يا اما أنا رايح ان شاء الله

يا اما أنا هنشر الفكرة ان شاء الله

حتى لو هو من برة طنطا كل مكان في مصر محتاج لحاجة زي كده

وانا والله برضو مش هزعل لو ماجاتشي ردود على البوست ده

احنا حاولنا نعمل حاجة

اجتهدنا وان شاء الله ربنا هيوفقنا

وعلى فكرة انا رحت سألت على تطعيم الفيروس الكبدي بي اللي معظمنا واخدينه

هو مابيمعنشي التبرع غير ست شهور بس بعده

يعني كلنا ممكن نتبرع دلوقتي من غير مشاكل

رجاءا كل الناس تدعيلنا

حتى اللي مش هيقدروا يشاركوا معانا بأي حاجة

كفاية يدعولنا ويدعوا للأطفال اللي بتموت دي

دعواتكم كلكم يا جماعة

دي نمرنا عشان لو حد حابب يييجي معانا

محمود أبوالعزم 0185856476

أحمد الجوهري 0127540876

محمد مغاوري 0124777838

أحمد سعيد بسيوني 0106812072

اسلام الشاذلي 0103880858

والبنسبة لأي فيميلز حابين يشاركوا او يستفسروا عن أي حاجة

د/أميرة الهواري

tabib2010@yahoo.com د/رنا دغيدي

lolo_82000@yahoo.com د/هالة رفعت

moon.whisper22@yahoo.com دانها اليماني

احنا كمان هيكون معانا دكتور احمد عبد الستار ودكتورة غادة ان شاء الله

ودي نمرة دكتور جمال خضر مسئول ببنك الدم بمعهد الاورام بطنطا

0103410129

يارب بالتوفيق للجميع ان شاء الله

مش لاقي حاجة أختم بيها غير زي ما بدأت

بسم الله الرحمن الرحيم

ومن أحياها فكأنما أحيا الناس جميعا

صدق الله العظيم

بنحاول نعمل حاجة..تحديث

السلام عليكم ورحمة الله
يارب تكون كل الناس بخير
فيه حاجات جديدة بخصوص زميلتنا د/رندا ربنا يرحمها
حبيت أنوه عنها
فيه ناس اتصلت بي ونفسها تشارك معانا في مشروع الصدقة
وكانت مش موجودة يوم ما كنا بنلم او مش عاملين حسابهم
احنا فاضلنا لسة يوم الحد ويوم الاتنين
ولو حد عايز يوصل لينا حاجة
في رواند واحد موجود أحمد الجوهري وأحمد سعيد بسيوني
وفي وراند اتنين وستة
موجود دكتورة هالة ودكتورة ايناس ودكتورة أميرة الهواري ودكتورة نها اليماني وتامر عزت
وفي رواند تلاتة موجود دكتورة رنا دغيدي او صالح البقري
وفي رواند خمسة موجود محمد مغاوري ومحمد شلبي و أنا
فاضل مجموعة اربعة لسة مادخلنهاش خالص وان شاء الله الناس اللي مااتبرعتشي فيها
هنكون هناك قبل ما تبدأ محاضرة العظام بتاعتهم
...........................................
فيه زمايلنا بيحاولوا يختموا القرآن من جديد هنا على المدونة
تبقى حاجة جميلة لو قدرنا نكرر الموضوع مرة تانية

........................................
فيه اقتراح اتقاللي كام مرة وحد بعتهولي برضو
اننا نخلي الدكاترة يشتركوا معانا في مشروع الصدقة
مش عشان المبلغ يكبر انما عشان المعني يكبر
يعني بحيث الموضوع يبقى اهداء ليها من زمايلها ودكاترتها في نفس الوقت
بس الموضوع ده محتاج مساعدة من زمايلنا معانا
يعني ياريت لو حد قدر يبلغ دكتورة آلاء مندور أو شريف رخا ويبلغنا يبقى جزاه الله خيرا
لأنهم لو معانا هيسهلولنا نستئذن الدكاترة في اجتماعهم ونعرض عليهم الفكرة
.......................
فيه فكرة كويسة جدا بس عايزة نظام عشان تتنفذ كويس
لو خدتو بالكم هتلاقوا ان كل الشرايط اللي بنسمعها
للدكترو المطري أو المندوه
كانت مسجلة بحيث انها تبقى صدقة على روح زميل ليهم
توفي في سنة سادتة برضو
احنا نقدر نعمل حاجة زي كده حتى لو في حيز ضيق
يعني أنا مثلا كان معايا نسخة من شرايط الدكتور أسامة محمود الجديدة
منظمة جدا وصوتها جميل جدا وكاملة الحمد لله
هنطبع منها نسخ ونوزعها على اللي داخلين سنة خامسة جديد
ومعايا النسخة بتاعت دكتور ابوالأسرار بس هو رافض نشرها
هحاول أوصله و أستئذنه ان شاء الله
و مثلا كمان لو زمايلنا في أسرة الرأي قدروا يجعوا أسئلة الشفوي
اللي كنا مسجلينها على مدونتهم السنة اللي فاتت في الباطنة والأطفال
وينزلوها للناس اللي هتمتحن دي في أقرب وقت.
و كمان تعيش للدفعات اللي بعد كده يبقى كويس جدا
كمان لو حد مثلا ربنا وفقه و خد باور بوينت كويس من دكتور قبل كده
أو كتب محاضرة كويسة ورا دكتور
او كان ملخص ورق او عامل دياجرمات مفيدة
أو وصله أي شرايط أو تسجييلات في سنة سادتة
او كان عامل حاجات زي كده في سنة خامسة
ممكن نجمعها كلها على اسطوانات
وتبقى لينا وللدفعات من بعدنا
ويبقى في ميزان حسناتها ان شاء الله
دي فكرة واكيد انتو ممكن تضيفولها كتير من أفكاركم
وتبقى احسن من كده بكتير
...............................
في النهاية حابب أقول ان كل ده اجتهاد
ممكن نخطئ فيه وممكن ربنا يوفقنا ونصيب فيه
بس حق الزمالة علينا رغم ان كتير مننا مايعرفشي الدكتورة رندة
يخلينا نعمل اكتر من كده
وده والله مش رياء ولا سمعة لإن الموقف أصلا ما يستحملشي حاجة زي كده
بس هو زي ماقلت محاولة اننا نعمل أي حاجة
ولان أي حد مننا ممكن يبقى مطرح الدكتورة رندة ربنا يرحمها

وبيتهيألي باشمهندس بسام وضحلنا الصورة شوية

وجزي الله خيرا كل اللي لفتوا نظرنا لحكم الموضوع

لانهم برضو قصدهم خير ونفسهم اننا نعمل الصح

أنا مابعرفشي اتكلم في المسائل الفقهية لان بحس ان اللي

يتكلم فيها ياإما يتكلم عن نور وعلم صحيح يا إما مايتكلمش

وانا أجهل من اني أصدر أحكام او آراء

انا حتى لما والدي توفي وهو أغلى انسان عندي

وأول شهر بعد وفاته ختمنا القرآن أنا وزمايلي مرة

وقلنا يبقى كل سنة مرة

ولما حسيت ان مسألة القراءة والصدقة فيهم اختلاف

قلت خلاص هكتفي بالدعاء المتواصل مادام مش عارف الحكم

ولما زميلتنا رندة توفت سألت ودورت من تاني

والموضوع طلع فيه خلاف فعلا مابين آه ولأ

وقلت احنا هنجتهد وان شاء الله ربنا يتقبل مننا

حتى لو الموضوع زي ما بعض الناس قالت

ان شاء الله الدكتورة رندا برضوتاخد ثواب انها

كانت سبب في اننا نفكر في الخير ده

و على الأقل يبقى مجهودنا واشتراكنا كلنا شهادة خير ليها مننا عند ربنا ان شاء الله

أنا كنت جايب معايا أحاديث وأدلة وآراء علماء فيها اختلاف كتير

بس أنا هحكيلكم ايه الحاجة اللي خلتني أشترك مع زمايلي

بعد ما استخرت ربنا واستفتيت قلبي اننا نبدأ المشاريع البسيطة دي

رغم اني ماكنتش حابب أحكي الموقف ده

أنا كنت أعرف الدكتور رندة شكلا بس

ومن حوالي تلات أسابيع كنت في نت في المكتبة المركزية

وقدراً ببص جنبي لاقيت الدكتورة رندة فاتحة صفحة المعادلة الأمريكية

وعمالة تنقل منها حاجات وحسيت انها بتدور وبتخطط لمستقبلها

وانا بقدر وبحترم الناس الطموحة اللي بتبص لأدام كده

لما توفت الدكتورة رندة افتكرت الموقف ده

وحسيت ان الحكاية تخص حد من زمايلنا كان بيرسم مستقبله

وبيبص لبكرة بأحلام وحاجات جميلة أوي

بس الوقت ما أمهلوش- واحنا مش معترضين أبدا ومتأكدين ان ربنا ليه حكمة في كده-انه يكون ليه

علم ينتفع بيه أو صدقة جارية او ولد صالح

حسيت ساعتها ان احنا زمايلها واخواتها اللي يمكن هي ماتعرفهمش

بس كان لازم نبقى مطرحها ونحاول نعمل أي حاجة تنفعها

ولاني بحس ان الميت بيحس بينا وبيفرح بدعانا وبأي حاجة نعملها عشانه

حتي كنت بقول لزمايلي بعد ما لمينا مبلغ كويس امبارح

انه ياريت تكون الصدقة دي تكون في حاجة في الطب

بحيث تكون في نفس مجالها ويمكن نحققلها حلم من أحلامها

يارب تكونوا فهمتونا وقدرتوا مشاعرنا
لو فيه أي أفكار أي اقتراحات أو أي اشتراكات في الأفكار دي
أنا تحت أمركم
محمود أبوالعزم
0185856476
now_tears_smile@yahoo.com

..................................................

السلام عليكم ورحمة الله

مش عارف أبدأ منين...الكلام صعب جدا

أنا هبدأ من النهاية لإن تقريبا دلوقتي كل الناس عرفت الخبر

وان زمليتنا د/رندة عماد ربنا توفاها امبارح

ربنا يرحمها ويغفرلها

ولإن كلنا النهاردة كنا حاسين بحاجات كتيرة أوي وعايزين نعمل حاجات كتيرة أوي

سواء كنا عارفين دكتورة رندة او لا

فيه ناس كان نفسها ان احنا نختم القرآن ونهدي الثواب لروحها

ودي ان شاء الله هقوللكم نعملها ازاي

والحاجة التانية ان كلنا نصوم بكرة الخميس ونهدي الثواب لروحها

وندعيلها كلنا بالرحمة والمغفرة وقت الفطار ان شاء الله

يارب نبد أ الأول بالخطوتين دول

بالنسبة لختم القرآن احنا ممكن نعمله هنا بحيث اننا نقدر نكمله ان شاء الله

بشكل منظم من غير مانتلخبط يعني كل حد يدخل المدونة يدخل على الكومنتات

ويسجل هو هياخد أنهي جزء بالترتيب

بس لازم يكتب كومنت من غير مايقول اسمه حتى.. بس يقول انا هقرأ الجزء رقم كذا

يعني ان شاء الله هكتب في أول كومنت انا هاخد الجزء الأول

واللي بعدي ياخد الجزء التاني وهكذا

بالنسبة لكتابة الكومنت لو حد مش بيعرف..يدخل على الكومنتات

يكتب كومنت في المربع الموجود

anonymousويتكي بالماوس على دايرة غير معرف أو

puplish comment وبعيدن يتكي

أتمني تساعدوني نجمع تلاتين حد بتلاتين جزء النهاردة

ده على المدونة

وعشان الناس اللي نفسها تعمل كده بس مافيش نت

انا جبت مصحف متقسم تلاتين جزء

بكرة ان شاء الله في مجموعة تلاتة- مجموعة دكتورة رندة- ربنا يرحمها

مابين الشفتين يعني حوالي تسعة ونص أو عشرة... الأجزاء هتتوزع

و بعد كده ممكن نعملها في رواندات تانية ان شاء الله

ياريت نقدر نعمل خطوة القرآن والصيام دول النهاردة وبكرة ونوصلهم لأكبر عدد

والدعاء بعدهم بيبقى

اللهم هب مثل ثواب ما قرأت أو ماعملت لروح فلان

ومن بكرة ان شاء الله هببدأ نلم عشان نعمل صدقة جارية على

روحها زي ما زمايلنا قالوا النهاردة

فاضل حاجتنين عايز اقولهم

اولهم كلمة قالها زميلنا محمد مغاوري

ان الموضوع مايبقاش دلوقتي وبس

وان زمايل رندة يفضلوا فاكرينها دايما ويعملوا أي حاجة

ولو صغيرة بنية الثواب ليها

وثانيا موقف حصللي النهاردة وانا جاي

لما زمايلنا قالوا عايزين طريقة نختم بيها القرآن كلنا.. فكرت في المصحف المتقسم ده

بس ماكنتش عارف أجيبه منين

وانا معدي في المحطة بالصدفة سمعت حد بيقول

لو سمحت عندك مصحف متقسم أجزاء ؟؟وحد رد عليها قالها آه

بصيت جنبي لاقيت مكتبة هدايا ودخلت اشتريت المحصف من هناك

والله ده اللي حصل بالظبط

.......................

ياريت كل حد يدخل المدونة النهاردة يستحضر قلبه

دقيقة واحدة بس ويدعي بإخلاص لرندة

ان ربنا يرحمها ويغفرلها

ويحتسبها عنده شهيدة ان شاء الله

ربنا يرحمها ويصبر أهلها ويشملها بفضله وعفوه ومغفرته ان شاء الله

دعبس سمير وانفلونزا الحمير

ياااااااااااااه...أربعتاشر ساعة نوم
آدي آخرة اللي يتعشي فول بعيش بلدي
خدت الوضع المناسب للتمطيعة الصباحية واتمطعت
ايه اللي جري ...التمطيعة دي مش تمطيعتي أبدا
تمطيعة مافيهاش حماس ولا جدية ولا لعب على الجون
أنا مال جسمي مكسر كده وعامل زي لاعيبة المنتخب في ماتش أمريكا
يكونشي عشان ذاكرت ساعة ونص جراحة قبل ما أنام؟؟؟
هما صحيح ساعة ونص كتير بس مايعملوش كده
طب ما فيه ناس – اللهم حسد – بيذاكروا ساعة واتنين وتلاتة وعادي
أنا مش عايز اأقوللكم ان فيه ناس بتخلص المنهج مذاكرة
ده فيه ناس ولا يعاذ بالله بتدخل لجنة التحريري ويحلوا الورقة كلها
مابيسيبوش ولا سؤال...وناس بتجيب النهاية في امتحان الإم سي كيو
بتحصل والله
لأ لأ أكدي التعب ده مش من الجراحة
آآ..آآ...آتسي ...ايه العطسة الجامدة دي أنا شكلي جالي برد
يكونشي عشان استحميت امبارح؟؟بس لأ برضو الحما مايعملشي كده
وبعدين أنا لازم أستحمي ... التجديد مطلوب برضو..
أع...أع...ايه ده أنا كمان رجعت
والأكل مااتهضمشي كمان ...الفول لسة بسوسُه
يكونشي جالي برد على فم المعدة..هو صحيح احنا ماخدناش
في الكلية يعني ايه برد على فم المعدة بس ماحدش عارف
الطب بيتطور وممكن لما أخلص طب انا اللي اكتشف المرض ده
أهو حتى ابقى أسميه على اسمي أو اسم حد من اخواتي
على العموم انا هقوم اصلي وافطر واروح الكلية يمكن ربنا يفرجها
قمت وصليت وفطرت و لبست وركبت ميكروباص يوديني طنطا
وعشان العطس كان شديد جدا قلت أركب جنب السواق
و أبعد عن زحمة الركاب في الكراسي اللي ورا وطلعت خمسة جنيه
لو سمحت واحد من الحمسة يا أسطي آآ...آآ...آآتسي
يرحمكم الله يا أستاذ حاضر .. شوية على ما الفكة تيجي من ورا
يرحمنا ويرحمكم الله ... ماشي يا أسطي
وبعد شوية
لو سمحت يا اسطي باقي الــ ....آتسي
يرحمكم الله
يرحمنا ويرحمكم الله بس عايز باقي ال..آتسي
يرحمكم الله
يا اسطي عايز بقى الـــ... آتسي
يرحمكم الله
آتسي
يرحمكم الله
آتسي
يافتاح يا عليم يا رزاق يا كريم ما خلاص بقى يا أستاذ
آتسي
والله دي آخر مرة أقوللك يرحمكم الله اعطس براحتك بقى
آتسي
انت كده هتخليني أقوللك...يأخدكم الله
آتسي
طب خد الحمسة كلها أهي بس بطل عطس
آتسي
طب خد أجرة العربية بس ماتعدنيش بالله عليك
آتسي..آتسي ....أع ....أع
كمان بترجّع في حجري..طب والله ما انا مكمل انزلوا يا جماعة
ونزلنا السواق قبل ما نوصل وعشان كنت خايف أعدي حد كملت

السكة مشي لحد ما وصلت الكلية والعطس مش راضي يبطل
هناك قابلت صاحبي شرارة ولقاني عمال أعطس جامد و سألني
مالك يا دعبس بتعطس كدليه
المشكلة مش في العطس..المشكلة أنا حاسس اني..اني
إنك ايه؟؟؟؟؟قول ما تتكسفش
أنا حاسس ان أنا عايز آكل حشيش
قصدك تشرب حشيش
لا أنا عايز آكل حشيش من الأخضر مش من بتاع الأفراح
حشيش..دا كده الموضوع خطير جدا
أمال لو عرفت اني اشتريت علبة مناديل
مناديل؟؟؟؟...للدرجادي
العيا بيذل يا صاحبي
تقوم تشتري علبة بحالها؟؟؟
أعمل ايه مالاقيتشي دكاكين بتبيع مناديل فرط
بس انت كده لازم تسلم نفسك
أسلم نفسي..ايه يا عم جو أفلام الأبيض والاسود ه..اسلم نفسي ليه
عشان مصر يا دعبس...انت كده ممكن تضر مصر
لازم تسلم نفسك عشان نعرف نوع الانفلونزا دي ايه
دي ممكن تبقى عادية أو طيور أو خنازير أو بالشطة والليمون
دي هتبقى خدمة كبيرة لبلدك ..انت مش أقل من أحمد زويل
ولا أسامة الباز ولا محمد البرداعي ولا محمد ابوتريكة
فعلا أنا مش أقل من اللاعيبة اللي انت قلت عليهم دول
أنا هسلم نفسي .....‘عشانك يا مصر
طلعت على مستشفي الحميات وانا سامع النشيد الوطني بيزن في وداني
ودخلت عليهم هناك بروح غانا 2008 وقلتلهم

انا عايز أقابل المدير
المدير مرة واحدة ...ليه
عشان مصر
طب ما فيه نواب هنا في المستشفي
بقوللكم مصر ..انتو ايه ماشربتوش من نيلها..هو ماعادشي انتماء أبدا
المدير في عيادته برة وزمانه جاي اقعد استناه بقى
والحمد لله المدير ما اتأخرش زيادة عن تلات ساعات ودخل ودخلت رواه
إلحقني يا دكتر أنا عندي انفلونزا
ألف سلامة يا ننوس عين ماما ...طب ما أنا كمان عندي انفلونزا
لأ يا دكتور دي احتمال تكون انفلونزا طيور أو خنازيز
طيوووووور ...خنازير...؟؟؟انت متأكد؟؟؟
ايوة
طيور ...خنازير...ياااااااااااااه أخيرا هطلع في العاشرة مساءا
دكتر يا دكتر حضرتك رحت فين
لأا يا ابني مافيش حاجة ثانية واحدة يا عبده-

لازم الساعي يبقى اسمه عبده خلي السكرتيرة

تجمعلي أكبر الدكاترة عندك وبسرعة
وماتنساش تجيب كمامات وانت جاي يا عبده
قوم انت با دكتور مجدي خد منه عينة

ودردش معاه واعرف منه الحالة بالظبط
هيص يا عم الدكتور مجدي نكتة دا اظرف دكتور عندنا

وجه الدكتور اللي من أول ماقعدنا وهو عمال يضحك مش عارف ليه

انت اسمك ايه
دعبس سمير أبوالفتوح تامر
ايه الاسم الغريب ده .هههه.ِانت بتسمع المفتش كرومبو هههه ..و سنك؟؟؟
أربعة وعشرين سنه
و الجنسية؟
مصري
يبقي أكيد المستوي الاجتماعي برضو مصري هههه..وشغال ايه
طالب طب
يبقى أكيد الحالة الاجتماعية برضو طالب طب ههه ..وفي سنة كام
سادتة
هو انت من اللي سنة سادتة اتطبقت عليهم.....حلوة هههههههههه
حضرتك ظريف أوي فعلا
ربنا يخليك...وبتشتكي من ايه

عندي عطس شديد وجسمي مكسر وسخن جدا

وترجيع شديد واشتريت علبة مناديل

طب قوللي يا ابني انت ليك أي تعامل مع الطيور
لأ والله يا دكتور
مع ان شكلك مريش ...ههههه....حلوة.....هههههه
طب ولو من بعيد؟؟؟
آه عندنا في الحتة لما بيطبخوا فراخ بيرموا الريش في الشارع
عشان الناس تعرف انهم طابخين فراخ ..بيكيدوا بعض يعني
طب ليك أي تعامل مع الخنازير
أعوذ بالله لأ طبعا
ولا ليك أي تعامل مع حد لسة راجع من برة
لأ
أكيد لا دا انتو اللي اتغرب في بلدكم راح طنطاهههههه
طب ماعندكوش أي حيوانات في البيت؟؟؟
كان عندنا بهايم وبعناها مش فاضل عندنا غير حمارة غلبانة كده
وياتري أخبار علاقتكوا ايه
علاقتنا ؟؟ماتحترم نفسك بقى يا دكتر من الصبح نازل تريقة عليا
وانا ساكت وفي الآخر تقوللي علاقتنا
لا يا ابني هههه أقصد ههههه أقصد بتقرب منها
أيوة دا حتي امبارح وانا بحطلها عطست في وشي
عطست في وشك ؟؟؟انت متأكد؟؟؟؟
ايوة
وتعبت بعدها
أيوة..........
يبقى هي اللي نقلتلك الفيروس
هي دي الفرصة اللي كنت مستنيها طول عمري
مصر هتتشهر وسط العالم من غير مانوصل كاس العالم
والعالم كله هيتلكم عني وهيتفوا بإسمي
الدكتور مجدي نكتة مكتشف انفلونزا الحمير
الدكتور مجدي نكتة مكتشف انفلونزا الحمير
الدكتور مجدي نكتة مكتشف انفلونزا الحمير
.................................

قريب ان شاء الله بقية القصة

في انتظار تعليقاتكم

أقصر بوست

قديما كنت أري أصعب لحظات الحياة....
هي اللحظات التي نشعر فيها بقمة الحزن
ولكنني اكتشفت أخيرا ان أصعب لحظات الحياة
هي اللحظات التي لم نعد نجد فيها فرقا ً بين الفرح والحزن
..........................
قديماً كنت أتلهف لأنظر خلفي لكي أري ذلك الذي طعنني في ظهري
أما الآن فلم أعد أملك هذه اللهفة ... وذلك لأنني أعلم جيدا
أنني لن أموت بنزيفي من الطعنة ولكنني سأموت بصدمتي في من طعنني

بتحبها؟؟؟؟؟

السلام عليكم ورحمة الله

يارب تكون كل الناس بخير

بدون مقدمات هكتب القصيدة علطول

زمايلي في سنة سادتة ليهم بوست اضافي تحت ده

وطلبي من الناس اللي هتقرا القصيدة

تحطوا نفسكوا مكان الانسان اللي كتبت على لسانه ده

ياترى هو كان صح في اللي عمله ولا لأ

..........................................

بتحبها؟؟؟؟
طلع السؤال منـّي بمرارة طفل بيخبّي الدموع
لما حكي
ما أعرفشي ليه قلبي اتقبض

مع إني عارف من زمان

إن اللي كان جوانا... كان

وإن الطريق اللي مشيناه...مافيهوش رجوع

كان جوة قلبي سؤال غريب

إزاي يعيش فيّا اللهيب

من بعد ما طفيت الشموع

شئ صعب لو تيجي الرياح

وتهد عش جميل بانيه

وتلاقي طيرك ساب فروعك وافترق

وتعيش سنين العمر بتدور عليه

فجأة تلاقيه

واقف على ...أقرب فروع
وبرغم شوقك ناحيته

هتخاف تقرب ناحيته

وساعتها بس هتكتشف

إنه عشان تشبع قلوب بنحبها

احنا ساعات ..لازم نجوع

لما لمح في عيوني شوقهم للبـُـكا

شفت في عيونه الهاربنين

نظرة ندم...إنه حكي

ورسمت فوق وشي إبتسامة بطعم خوف

وبدأت ألملم في الكلام

وكإني طفل يتيم نزل

للدنيا بس ماكانشي حد
ويّـاه يعلم قلبه ايه معنى الحروف
وكإني أعمي قالوله شوف لكن عشان
كان خايف النور يحرقه
غمّض عينيه الدبلانين ورفض يشوف
طب أقولّه ايه
احكي على الماضي اللي كان؟؟؟
طب هحكي ليه؟؟؟؟
أفتح طوفان الماضي ليه ؟والماضي راح
ليه لو هيبدأ قصته
يبدأها من وسط الجراح
ليه أحرم الليل الطويل
اللي بروحي غرقت فيه
يطلع عليه صبح يداويه
حتى ولو على ارضهم طلع الصباح
إيه ذنبه..طب ايه ذنبها
مش غلطته ولا غلطتي
ولا حتي غلطة قلبها
لو كنا – كنـّا – من سنين
بتحبني.....وبحبها
وحلمنا نبقي لبعضنا
وحاولنا لكن حبـنا
أدّام واقعنا المر تاه
والحزن داس على حلمنا
وحلفنا نبعد من سكات
من غير دموع...من غير آهات
لو حتى أجمل حب مات
ساب لينا أجمل ذكريات
ومشينا في دروب الحياة
تايهين وبنحاول نفوق
ونشوف لليلنا القاسي ضي
وبرغم إحساسنا اللي تاه
كان لسة جوة قلوبنا شوق
دافنينه جوة في روحنا حي
لما حكي ..فجأة اكتشفت
ان اللي عاش جواه حبيب
مهما حصل مابينسهوش
وكإن عمري طريق طويل
مشيت سنين العمر فيه
والقلب لسة ..مامشيهوش
وكإني ميـّـت سابوا روحه تعيش معاه
ولا طال يموت ولا طال يدوق طعم الحياة
وياريت قدر حتى يعيش بالشكل دا
فجأة لقى..وردُه بيغرق بين نداه
لما أعز صديق ناداه
ويرد بس يقولــّه ايه
كل الحروف متقيدة
هيموت إذا اختار السكوت
ويموت إذا رد الندا
خايف أوي
خايف أداري وييجي يوم
يحكيله حد على اللي كان
يومها الحقيقة هتألمه
شمس الحقيقة ورا الغيوم
خايف عليه لو يوم تبان
تيجي فـ نهاره..تضلــمه
خايف خياله يروح بعيد
لو شك إن ما بنــّا شئ
والشك يزرع نار تئيد
جوة القلوب مليون حريق
مع إننا والله كان
كل اللي بنــّا شعور برئ
بس انتهي و لمّـأ انتهي
راح كل واحد من طريق
لما حكي
شلت الدموع جوة العيون
وحاولت ياما لكن بكيت
وعشان ماتاخدوش الظنون
طلع الكلام مني وحكيت
ما أعرفشي ليه
لكن لاقيت ان الكلام
لو جاله من إنسان غريب
سوء ظنه فينا هيدبحه
والشك هيدمّع عينيه
قصتنا ممكن تجرحه
واحنا أعز اتنين عليه
وحكيت أنا
علشان لاقيت
الصدق أحسن ليه وليها وليّ انا
من غير رتوش
ولا مين ظلم ولا مين جنى
من غير ما اشوّه اسمها ولا رسمها
من غير ما اقول
كلمة تسئ ليها وتجرح قلبها
فهّمته ايه كل اللي كان
وان اللي كان بنــّا انتهي
دلوقتي في ايديه القرار
مع إنه صعب الإختيار
دلوقتي هبعد من هنا
هرحل بليل حزني الطويل
وهسيبلهم شمس النهار
همشي و انا بدعي ضمير
لو كان لقاهم لينا خير
يارب تكتبهم لبعض
يارب تهديهم لبعض

واكتبلنا

اللي انت شايفه الخير لنا

لو حتى كان مش ويّـا بعض
خلى القلوب مهما حصل
اتفرقت
اتجمعت
مش كارهة بعض

ماتخليناش

احنا التلاتة ضحايا بعض

لزمايلي في سنة سادتة

السلام عليكم ورحمة الله
حبيت أنبه على شوية حاجات بس لزمايلي في سنة سادته
ورق ديارجرامات الدكتور خالد عبدالملك اللي بيشرح منه
موجود في مكتبة الشرقاوي ورا الكلية مع ورق الدكتور مندوه
هو لسة مش كامل بس هننزل الأجزاء الجديدة منه ان شاء الله
زمايلنا صالح البقري وشهاب جزاهم الله خيرا جمعوه و وزودا فيه الزيادات
اللي الدكتور بيزودها في الكورس
....................................
فيه ناس من رواندنا خدوا مني اسطوانات النهاردة
هي عليها باور بوينت الدكتورة آمال محفوظ
ونسخة من الكتاب اللي الدكتور طارق قاللنا نذاكر منه
ياريت اللي وصلتهم الاسطوانة يحاولوا يوصلوها لأكبر عدد
يمكن يكون فيها حاجة مفيدة تبقى في ميزان حسناتنا كلنا ان شاء الله
ولو أي حد ماوصلتوش الاسطوانة ياريت يبلغني بأي طريقة
ولو أي حد عايز نسخة من الكتاب
أنا لي واحد صاحبي شغال في موضوع الكتب ده
وممكن يجيب العدد اللي انتو عايزينه
ممكن تبلغوني هنا
أو على الميل
now_tears_smile@yahoo.com
او 0185856476
...........................................
في النهاية لو كانت أي حاجة من دول مفيدة فهي مش مجهودي لوحدي
دي بفضل ربنا أولا وأخيرا وكمان بمجهود زمايلي قبل مني
اذكر منهم
محمد مغاوري
عمرو النجار

محمد عبدالباسط
محمود أحمد سليمان
صالح البقري
وربنا يجعل أي عمل خالص لوجهه إن شاء الله

تامر هو اللي هيكتب التلات ده

السلام عليكم ورحمة الله

من لم يشكر الناس لم يشكر الله

هو دا السبب اللي هيخليني أأجل قصيدة النهارة لسبب تاني

تامر عزت من اكتر الناس اللي شجعتني من أول ما بدأت اكتب لحد النهاردة

وواحد من اكتر الناس اللي متابعة المدونة ودايما بتشجعني

عشان كده لما طلب إنه ينشر حاجة هو كتبها هنا على المدونة

ماكانشي ينفع أبدا إني أقول لأ.. بالعكس دا شئ يشرفني ويشرف المدونة

خصوصا كمان ان كتاباته ليها طعم جميل و مختلف جدا

واخترت اني أنزل موضوع تامر النهاردة وأسيب

قصيدة النهاردة ليوم الخميس ان شاء الله

يعني المدونة النهاردة وبكرة بتاعت تامر

وكل الردود اللي هتيجي تيجي ليه..أنا برة الليلة خالص

أسبكم مع موضوع تامر اللي أكيد هيستني ردودكم عليه

...............................................................

إذا قلت لك صف لي شعورك حين تتولي منصبا وزاريا أو تصبح رئيسا

فإنه سوف ينعقد لسانك عن النطق.لأنها فرحة عارمه ومعيشة مرفهه

،لكن هل تعلم ان معظم الوزراء والرؤساء يملون حياتهم المرفهه لما فيها من رتابة ،

وأنهم قد حرموا من ملذات العيش التي قد ابتليت انت بها

.نذكر منها مثلا:*حين تستيقظ من نومك علي صوت مزعج

سواء كان حيواني او آدمي او صناعي لتجد الحمام بدون مياه وتنتظر

حتي تأتي المياه اليك لتجدها نظيفة إلا من الشوائب والجراثيم

،طيبة رائحتها تعكس صفائها.*ثم تذهب لكي تناضل في طابوووور علي رغيف الخبز

حتي تفوز بدورك في آخر الصف وتنجح في النهاية في

الحصول علي رغيف الخبز المحرووووق أو المصنوع من

قمح يصلح للاستخدام الحيواني بعد تنظيفه من الشوائب فقط.

* ثم تخرج للعمل فتمشي دهرا حتي تجد ما تركب

،وحينئذ تبدأ صراعا مع غيرك علي كرسي اما في اتوبيس مفخخ

أو عربة مترو مزدحمه أو قطار سيحترق او ينقلب.

لكن القطار لم يحترق ولم ينقلب والاتوبيس لم ينفجر ووصلت عملك

لتجد رئيسك في انتظارك بطيب الكلام وعذب الألفاظ فتتجاذبان

اطراف الثياب و.......*بعد انتهائك من العمل تغادر الي شارع مزدحم

ذو شمس محرقه تأكل جلدك كما تأكل النار رغيف خبز الصباح

ثم تجد الأتوبيس فتتركه وتركب غيره لتقف ايضا في الطرقه لأن بانتظارك فيه

رجل يمتاز بخفة اليد ؛يحمل عنك محفظتك بنقودها الكثيره وهم 145 ج راتبك

بعد خصم جزاءات التأخير والمشادات اليوميه.*أخيرا وصلت بيتك بعد معاناة مثيرة

في حر الشارع فوجدت المروحة الوحيده عندك تمشي في عكس السير

فتأبي أن تشغل التكييف لديك لأنك زهقت من هواه طول اليوم.

*بعد مباحثات تقضيها وسط العائله الكريمه ؛تتلقي منهم مطالبهم من لوازم منزليه

ودروس خصوصيه وكتب مدرسيه ومصاريف علاجيه....الخ

تقرر ان تؤجل جميع هذه القضايا لعدم كفاية الأدله(السيوله).

* بعد كل تلك الإثارة اليوميه يقرب يومك ان ينتهي لكنه قبل ان ينتهي

يسرع اليك المرض ليكمل بذلك حكايتك في

مستشفي عام حيث الراحة والأمان والموت بسلام

،لكنك واسرتك تقرران ان تذهبوا الي احدي المستشفيات الخاصه

حيث يتوفر هناك العلاج والشفاء فتجد الموت قد سبقك اليها

وحجز لك مقعدا الي الآخرة.*لكن ما قد يعيق سير موتك

ويؤلمك في حياتك الآخره هو انك ستظل رهينة المستشفي

حتي يدفع أهلك ديون العلاج فيها.

ذلك هو يوم يتكرر في اليوم الف مره

،يوم ملئ بالإثارة والنضال والتشويق والكفاح

،يموت الفرد منا كل يوم حتي يأتي يوم لا مرد له.

فهنيئا لك بيومك وهنيئا لنا بدولة وحكومة توفر لنا كل شيء حتي الموت.

يا جهاز فرج

السلام عليكم ورحمة الله وبركاته
خلينا نخرج النهاردة من جو التلات اللي فات
بوست النهاردة بوست مخصوص شوية
لإني كتبته بناءا ً على طلب حد عزيز وغالي عليا جدا..
صاحبي واخويا محمود فرج اللي جهازالكمبيوتر بتاعه إتاخد مصر
وسابوا محمود من غير جهاز ومن غير نت
هوالموضوع صعب جدا وحاولت أكتب فيه على أد ما قدرت
هو الكلام ماطلعشي أد كده بس هوعارف ان الدماغ مش شغالة اليومين دول
وماكنشي ينفع أقول لأ خصوصا لحد في مقام وغلاوة محمود عندي
قلت أكتب الرسالة دي على لساني أنا لجهاز محمود
.................................
ياجهاز فرج
يا جهاز فرج على فين خدوك....ليه تنسى عشرة عمر فات؟؟

امتي يا غالي يرجـــــــــــعوك....لو حتـــى من غير الرامات

بـَعدك فــرج تسهر عينيه

وسؤال ينام و يقــوم عليه

سايب مكانـــــك فاضي ليه

في القوضة جنب الأنتريه؟؟؟؟
Endدي حياة فرج بَعــدك كابوس....و مـُــناه يكـــــــــون للبعد
don't sendأو End nowوايديه بتاكله عشان يدوس..على
bye من يــــــوم ما رُحت وقلت
stand by وفــــــرج حيـــــاته
من كتر هـــــــــــمـّــه ما زاد بقى
nacked eye ينشاف كده بالـ

من بعد ما سنيــــن عاش معاك.....ازاي هيــــــدخل سيــــــبرات

ازاي في وسط النـــــاس هناك....يلعب ســـــــــــباق السيارات؟؟

فيه حد شافكوا خبطكوا عين؟؟؟

ازاي تسيــــــــــبه ولو يومين؟؟

بس الســـــــؤال أصعب سؤال

بَعدك هيلـــــــــــعب فيفا فين؟؟؟

فين الماوس ؟؟راخر خدوه!!......و الهارد ويّــا السي دي رووم

فين لـــــما أبوه و أمه ينادوه.......سيــــــــب لوحة المفاتيح وقوم

بَعدك فرج دايـــــــــما ً يبـات

يحلم بصــــــــوت السماعات

علشان خدوك ولا سابـوا ليه

لو حتى حـــــــبـّة فيــروسات

ياجهاز فرج

هو انت يعني صحيح مـُسِـن....وبيحكوا عنك في الكتب

وكإننـــــا جايبـيــنه مـــــن.....عـــــهد الوزير أمنحتب

بس انت كــان شغلك سليم

بصــــراحة مشيك مستقيم

وحمارتك العــــارجة أكيد

أحسن ما تحـــــــتاج للئيم

ياجهاز فرج

ياجهاز فرج يا حبيــبنا ليه....سايب فـــرج ومهمّــله

لو طوّلت غيبــــــــتك عليه.....احنا أكـــــيد هنلــمّـله

ازاي تسيب صاحبك فرج

طول عمره مستني الفرج

لو كنت واحـــــد منــنـّـا

لو كنت فاكــــــــر عهدنا

ماتخلينــّاش لايصين هنا

وارجع قوام يا جهاز فرج

أنا كمان قتلت عم المرسي

السلام عليكم ورحمة الله
مش لاقي كلام اقوله قبل الحكاية اللي هحكيهالكم دي غير إني أعتذرلكم

لو كنت هكئبكوا معايا بس على شهر فات حاولت كتيييييير

إني ما أكتبشي في الموضوع ده بس ماقدرتش لإن شبح اللي حصل دايماً

بيطاردني حتى و انا بحاول أضحك وأهزر عشان انسي الموضوع ده

وقلت يمكن لو جيت وحكيت أرتاح شوية من الإحساس ده

وعلى اد ما الموضوع ممكن يكون وطويل بس أتمنى كل الناس تكمله للآخر

وأتمنى يقراه كل حد في طب

القصة بدأت من زمان لما والدي الله يرحمه علمني انه لما يبقى فيه حد في ازمة

مجرد وجودنا جنبه بيبقى شئ كبير بالنسباله حتى لو مش قادرين نعمله حاجة

خصوصا لما يبقى الإنسان ده مريض وحاسس إن الدنيا مقفولة في وشه وإنه

ماعادشي ليه لازمة بعد ماصحته راحت منه وماعادشي حد محتاجه ولما والدي تعب

حسيت بقيمة الكلام ده وحسيت أد إيه والدي كان عنده حق وحسيت بقيمة إن حد جنبك

يسألك مش محتاج حاجة؟؟ حتى وانت عارف إنه مش هيقدر يعمللك حاجة..ولما دخلت

طب حاولت اعمل كده مع أي مريض اعرفه... جارنا أو من بلدنا أو جمعتنا الصدفة

بأي شكل،خصوصا لما لاقيت اخواتنا الكبار في الطب من بلدنا زي الدكتور هاني

والدكتور أحمد حسب الله بيعلموا كده وكمان في الوقت ده قابلت الدكتورة غادة وهي
كمان كانت بتعمل كده وأكتر من كده...ولما ابتديت اقول شعر في مؤتمرات و أعرف

دكاترة حاولت على أد ما قدرت أسخر ده في خدمة الناس اللي اعرفها دي واكون واسطة

مابين ناس معاها العلاج وناس محتاجاه وكان ربنا معايا دايما وكان بيوقفلي ناس

احسن مني هما كمان نفسهم يعملوا حاجة بس مش لاقيين الفرصة

الللي حصل المرادي إني من شهرين كنت رايح أركب أتوبيس بلدنا و عم ناجي سواق

الأتوبيس قاللي اللي قاعد في تاني كرسي ده عمك المرسي ورايح يعمل عملية في القلب

خلى بالك منه...رحت اتعرفت على عم المرسي وكانت معاه مراته
ناس من الناس الطيبة جدا اللي لسه على فطرتها...وعرفت إن عنده

ضيق شديد في الصمام الأروطي ومحتاج تغيير صمام في اسرع وقت،ولما نزلنا

رحت وصلتهم لمستشفي مبارك مطرح ماهيعملوا العملية وقلت وانا راجع هبقى أبص

عليهم تاني وانا راجع قالولي انهم خلصوا قرار العلاج وهسيتنوه يتمضي من مصر

وكنت ببص عليهم كل يوم وانا مروح لحد ما القرار طلع بعد حوالي عشر أيام
,, وخدت عم المرسي للدكتور

وطلب منه أشعة عشان يعملوا لعملية على أساسها وخدنا في موضوع الأشعة ده أسبوع كمان

كل يوم يروحوا يعملوا اشعة شكل... وفات أسبوع عشر أيام أسبوعين وعم المرسي

ماخدشي ميعاد بالعملية وانا زيي زي عم المرسي مستني الدكتور

يحن علينا بميعاد العملية وخصوصا إن حالة عم المرسي يوم عن يوم بتسوء جدا

وبعد أسبوعين رحنا سألنا وسمعت ردغريب جدا...

مافيش صمامات في الجامعة...يعني ايه مافيش صمامات...الصمامات اللي مقاس
عمك المرسي خلصت ولسه مستيين الجديدة تيجي

وخصوصا ان مافيش فلوس....بس يومين ولا حاجة

والصمامات هتيجي ماتستعجلوش ورجعت لعم المرسي

وقعدت أصبر فيه وكل يوم أروح اقول نفس الكلمتين

معلهشي يا عم المرسي إستحمل شوية ما أددمناش حل تاني إن شاء الله
الصمامات قربت تيجي مع اني حاسس من جوايا انها مش هتيجي...

فات كمان عشر أيام والصمامات ماجاتشي...وكان عم المرسي
بقى مش قادر ياخد نفسه ولا قادر يدوس على الأرض

وفي اليوم العاشر مسكني عم المرسي زعقللي وكان من حقه

وكنت مقدر خنقته وانفعاله عليا وحااطط وشي في ألأرض أدامه
وهو بيقوللي ياتشوفلي حل يا تخرجني من هنا.. انا عايز أورح

تعرفوا الحاجة الوحيدة اللي ماخليشتي عم المرسي يروح ايه
خاف لو روح وجه يشد العجلة الصغيرة اللي عنده
تشده هي و توقعه والناس تضحك عليه....

روحت من عند عم المرسي
وفي الوقت ده الموضوع بقى تحدي بيني وبين نفسي
ان عم المرسي لازم يعمل العملية
ولو ماعملهاش هنزل من نظر نفسي كتير أوي

و يبقى كان لازمته وأنا الدكاترة واخدني كل يوم أقوللهم شعر في مؤتمرشكل
وابتديت أكلم ناس ممكن يدخلوه معهد ناصر ان شاء الله

وبعتلهم الورق ورحت بشرت عم المرسي .. بس الورق اترفض
لأنه قرار العلاج مكتوب فيه تغيير صمام الأورطي بمستشفى مبارك الجامعي
و حاولت وكلمت ناس هنا وهناك بس ماكانشي فيه فايدة
ورجعت لعم المرسي وانا باصص في الأرض
وقلتله اننا غصب عننا هنستني الصمامات ...ولما فات يومين تلاتة
وماجاتشي الصمامات ...رحت للدكتورة فتحية رئيسة قسم القلب

وهي بتحبني جدا وحكيتلها على اللي حصل قالتلي ان الموضوع
مش بإيدها لإنها مسئولة عن العلاج انما جراحة القلب قسم لوحده

بس قالتلي ممكن تروح تغير القرار وتخليه مفتوح

وتكتب ان مافيش صمامات في طنطا و ساعتها ممكن يدخل
أي حتة وفرحت جدا ورحت بشرت عم المرسي وأهله

بس لما رحت أغيره... الدكتور قاللي ان ساعتها عم المرسي هيخرج

من اللسته هنا ومش هتعرف تحطه في اللسته هناك غير بعد شهر على الأقل

وان الصمامات كلها كام يوم وتيجي ورجعت لعم المرسي وانا وشي في الأرض

وقتلته هنستني الصمامات معلشهي غصب عني يا عم المرسي

وماجاتشي الصمامات ولما زهقت ولما صورتي أدام نفسي

ومعاني كتير جوايا ابتدت تتهز طلعت للدكاترة فوق وانا متعصب جدا

وقلتلهم هو بكام الصمام اللي احنا مستيينه ده...قالولي بخمس تلاف جنيه
ياااااااااااااااااااااااااااااااااه.....كل ده عشان خمس تلاف جنيه....
عيان بيموت في كل لحظة عشان خمس تلاف جنيه... وبمنتهى الحماس

قتلتهم يكتبولي اجيبه منين وانا هجيبه بأي طريقة
وكتبولي رقم الشركة وعنوانها في مصر ونزلت لعم المرسي و بشرته

رغم انه كان فقد الامل في كل حاجة ولاقيت معاهم نص المبلغ
وماكنتش عارف هعمل ايه في النص التاني بس لازم الصمام ييجي...
وكلمت مدير الشركة قاللي طب وليه تكلف نفسك وتكلف العيان
أنا كل اللي عايزه ورقة من القسم عندكوا تطلب تغيير
المقاسات اللي عندكوا ومش محتاجينها بالمقاسات دي وانا قلتلهم

عندكوا في طنطا بس ماحدش بعت حاجة.
ورقة؟؟....كل العيانين اللي عايزين صمامات وبيموتوا ..بيموتوا عشان ورقة؟؟
لييييييييييييييييييييه؟؟..احنا بقينا فين... وايه اللي حصل لضماير الناس ..
كل ده عشان ورقة؟؟؟
ورحت للدكاترة وقلتلهم انتو مابعتوش ليه ؟؟؟؟
قالوا احنا بعتنا والتوريدات بعتت فاكس ومش مشكلتناإنه ماوصلشي
و اتحايلت عليهم يدوني الورقة في إيدي و أنا هروح بيها القاهرة بس رفضوا
أصل كل حاجة لازم تمشي قانوني
ولما لاقيتهم بيشقطوني لبعض حلفت لأروح بعد امتحان التخدير
واجيب الصمام بأي شكل بورقة بفلوس بأي حاجة بس لازم ييجي.
بس الساعة حداشر وربع يوم الامتحان اتصل بي ابن عم المرسي
وقاللي إنهم روحوا لإن الدكتور لما شاف آخر سونار على القلب
قاللهم إن خلاص العملية ماعادتشي تنفع لإن كل الصمامات باظت
وضغط شريان الرئه دلوقت بقي مستحيل يسمح بالتدخل الجراحي
وروح عم المرسي...ابنه شاله على كتفه وروحه...
روحوه وقعدوا جنبه مستيينه يموت..أصعب شعور ممكن
تحسه في الدنيا إنك تقعد جنب اعز الناس عندك..مستنيه يموت

عم المرسي روح لإن الفلوس اللي فاضلة معاه يادوبك هتقضي خارجته

يوم امتحان المسالك...عم ناجي قاللي ان عم المرسي مات امبارح واندفن

و كان راكب معانا ابن عم عم المرسي...قاللي هو انت بقي الدكتور محمود

قلتله آه وسألته ليه...قاللي لإن الكلمة اللي عمك المرسي فضل يقولها

وكانت آخر كلمة قالها قبل ما يموت.....أنا عايز أشوف الدكتور محمود

وياريته ما كان حكالي لإن الكلمة مش عايزة تسيب وداني
حتى و انا بحاول أضحك وأهزر و أروح و آجي
بس بالليل لما آجي انام الكلمة ترن في وداني
وصورة عم المرسي مش بتروح من بالي

أنا مؤمن بقضاء ربنا وعارف ان عم المرسي كده كده كان هيموت
بالقلب او من غيره....بس انا حاسس ان عم المرسي مات مقتول...
لما حد يبقى بيموت أدامك وفي إيدك الدوا
وماتديهوش الدوا يبقى انت كده قتلته
تعرفوا ..ساعات بحس عن عم المرسي كان عايز يشوفني عشان يسلم عليا
وساعات بحس إنه كان عايز يتف في وشي
أنا حاسس إني كنت واحد من اللي قتلوا عم المرسي
قتلته لإني رضيت واستسلمت زيي زي أي حد
وفضلت مستني الصمام وانا عارف إنه مش هييجي

كنت دايما بختار الحل السهل و أرجع واقوله نستني يا عم المرسي
قتلته لإني كنت بديله الأمل و بمنتهى الإستسلام آخده مني تاني
قتلته لإني حاسس أني كنت بخدره وبديله مسكنات لحد ما يموت
قتلته يوم ما سكت على حقه وقلت ما باليد حيلة نستني
ولو كان الصمام جه من يومها ولو بالفلوس
كان عم المرسي هيموت برضو في الوقت اللي ربنا كاتبه
بس كان هيقدر ياخد نفسه ويقدر يدوس على الأرض ويقدر يروح البلد
ويسحب عجلته الصغيرة من غير ما يخاف .إنها تشده وتوقعه والناس تضحك عليه
قتلت عم المرسي لإني من سنتين اتعرفت على دكتور قلب من
اكبر دكاترة القلب في القصر العيني واداني رقم موبايله وايميله
و آخر مرة كان مجدي يعقوب في مصر شفته في الفريق اللي معاه
ولما جت حالة عم المرسي قلت يااااه معقول دكتور زي ده يفتكرني
وكإني كنت بدور على حجة عشان ما احرجشي نفسي
و في آخر محاولاتي اليائسة بعتله ولما وصلتني رسالة منه
قاللي فيها انا في مصر دلوقتي.هاتلي الحالة وانا هعملها اللازم
بس للأسف...كان عم المرسي مات
احساس فظيع بالذنب
انا عارف إني قاسي على نفسي اوي بس أنا للأسف من الناس
اللي بتقضي نص حياتها تلوم نفسها على اللي عملته في نص حياتها التاني
بس لما عيان يموت عشان ورقة يبقي فيه حاجة غلط
لما عيان يموت عشان صمام بخمس تلاف جنيه يبقى فيه حاجة غلط
لما كلبة زي هيفاء وهبي تعلمها فرحها بملايين وتعمل فيلم تاخد عليه ملايين
والعيانين دول بيموتوا عشان مامعهمش حق الدوا يبقى فيه حاجة غلط
لما يندفع لتامر حسني ومحمد منير وايهاب توفيق ملايين عشان ييجوا يغنوا
في جامعات زي المنصورة وعين شمس يبقى فيه حاجة غلط
لما لاعيبة الكورة يندفعلها ملاييين والناس دي بتموت عشان ممعهاش حق الدوا
يبقى فيه حاجة غلط
يبقى احنا مش مجتمع مسلم ولا احنا حتى مسلمين..الإسلام عمره ما كان كده
لما الناس تموت أدامنا واحنا مش قادرين نعمللهم حاجة يبقى
فيه حاجة غلط ويبقى كل الطب اللي بندرسه مالوش لازمة
لما نشوف كل ده ونسكت يبقى فيه حاجة غلط
أنا حاسس ان كل واحد في البلد دي من أول رئيسها لحد أصغر واحد فيها
هنتحاسب على عم المرسي و آلاف زي عم المرسي
حاسس ان كل بيت في بلدنا بقى عبارة عن غزة صغيرة
..ناس محاصرها الفقر والمرض وبيصرخوا ماحدش بيسمعهم
والناس اللي المفروض انهم اخواتهم بيتفرجوا عليهم ومابيعملوش حاجة
حاسس إننا شوية خرفان جابوا عليهم شوية ديابة يحرسوهم
وطبعا الديابة بتاكل أكلهم بحجة ان هما بيحرسوهم
بس الخرفان ساكتة ...لإنها خرفان
ومش بس كده دا لما الديابة بتجوع زيادة بتدبح واحد مننا وتاكله
لما بشوف الملايين اللي بتتصرف على تحسين شكل المستشفيات
والناس الللي جواها بتموت بحس ان احنا زي واحد زرع شوية ورد
وكل يوم يجيبوله شوية مية على أدهم بس هو يقوم
راششهم أدام الشارع عشان الناس تشوف الشارع كويس
مع إنه شايف الورد بيدبل أدامه بس المهم الشارع يبقى شكله كويس
على أد ما موت عم المرسي علم فيا بس علمني حاجت كتير
وخوفني من حاجات اكتر..خوفني على نفسي وعليكوا من الدايرة المفرغة دي
خايف ان الدايرة دي هي اللي تغير طموحنا إننا نكون دكاترة بجد
ومانقدرشي احنا نغيرها ونخليها زي ما احنا عايزين
موت عم المرسي علمني إننا لازم نجتهد على اد ما نقدر عشان
نوصل لمكان نقدر نخدم منه الناس اللي زي عم المرسي
مكان نقد منه نغير من غير مانتغير
عم المرسي علمني إنه مادام رضينا نبقى دكاترة يبقى لازم نبقى أد المسئولية دي
لإننا هنتحاسب عليها.................. أدام ربنا
عم المرسي علمني اني لما أبقى دكتور ويجيلي حد زي عم المرسي مرضه ليه علاج

يبقى لازم ياخده
لإنه لو فيه علاج وماخدهوش يبقى انا مقصر وهتحاسب على تقصيري
ولو فيه علاج وانا ماعرفهوش يبقى هتحاسب على تقصيري برضو
لإني كان المفروض أتعلم واكون اد المهنة اللي ربنا اختارها ليا

احنا اختارنا مهنة مافيهاش وسط

يا إما في ميزان حسناتنا يا إما في ميزان سيئاتنا

يإما المريض هيدعيلنا يا إما هيدعي علينا

بفضل الله المدونة بيتابعها ناس من دفعتنا ومن دفعات أكبر و اصغر مننا

يعني بعد خمستاشر عشرين سنه هنبقى احنا المسؤلين عن المستشفيات دي

ياتري هنقدر نعمل حاجة ولا الدايرة هتاخدنا

احنا مش تجار ومش جزارين

بس انا دايما مؤمن ان اللي عايز يغير بيغير

الفرق مابين قسم الاطفال وقسم الباطنه عندنا مش امكانيات ولا فلوس

الفرق في نية التغيير مش اكتر

وماكنشي قصدي أبدا اني أقول ان الصورة وحشة اوي كده

انا قابلت دكاترة تانية اد المسئولية زي الدكتور احمد لطفي

والدكتور أشرف الدسوقي والدكتور عادل حجاج

كفاية أقولكم ان حد بحجم وقيمة الدكتور أسامة عبد رب الرسول

استقبلني انا والحالة في مكتبه ولحد دلوقتي هو بيعمل كل حاجة للحالة شخصيا

من غير ماحد يطلب منه كده

الفرق في نية التغيير ونية العمل لوجه الله أولا وأخيرا

أتمنى النية دي تكون موجودة جوة كل حد مننا
على الأقل عشان ماحدش فينا يعيش طول عمره
وهو حاسس انه ظلم ناس مالهاش أي ذنب زي عم المرسي