مابقيتشي عارف

السلام عليكم ورحمة الله

محمود ..هتكتب ايه النهارده عن غزة

محمود هو احنا ليه ماقريناش ليك حاجه سياسيه جامده كده

محمود مستنين منك حاجه كويسه النهارده

أسئله كتيرة اوي وناس طلبت مني كتير أوي

بس حاولت وفشلت

مش بس اليومين دول ولا في ضرب غزة وبس

أنا حتى حاولت كتير على مدار التلات أيام اللي فاتوا وكنت اللي بكتبه بقطعه

أكيد انا ماليش حق في كده بس اعذروني

يمكن لان وجهة نظري في عدم الكتابة مش هتعجب كتير منكم

انا ماكتبتش عشان من زمان اوي حسيت اننا من زمان

حولنا القدس وبغداد وأفغانستان والبوسنه كل دول حولناهم لمسابقه بين الشعرا

مين بيكتب أحسن..مين بيلقى أحسن..مين جاب صورة أحسن..من وصف أحسن

كله كلام

حسيت ان بقى بينا وبين القدس سور كبير اوي من الكلام

بنخلص كلام عشان نبتدي في كلام

والكلام مابيعملشي حاجه غير الكلام

كله كلام

بحس اني لو كتبت حاجه توجع هكون زي اللي بيضرب حد على رجله المشلوله

عايز يقوم ومش قادر لانه زيي مابقاش يملك حاجه غير الكلام

حسسته بالعجز اكتر ماكان حاسس وفي الآخر احنا الاتنين بكينا لاننا ماعملناش حاجه غير الكلام

حتى لو كتبت كلام فيه أمل

بكتبه وانا مؤمن بيه وعارف انه هيحصل

بس عارف ومتأكد ان انا واللي زيي مش أهله

لما كنت قريب في أسبوع شباب الجامعات نص اللي قالوا كانوا بيكلموا عن فلسطين

وتلاقي الواحد منهم طالع ومبسوط اوي بنفسه ونازل ومبسوط اوي بنفسه

انا بسمعه وبتأثر بكلامه بس هو عمل ايه يستاهل كل الفخر ده..كلام

واحد منهم كان معايا وبعد الحفله راح يشرب حشيش مع أصحابه

أنا كان عندي يسكت ومايشربشي سيجارة عادية حتى

لانه كده هيبقى عمل شئ لدينه على الأقل

أنا مش معني كلامي أبدا ان الناس تسكت والقضية تموت

لازم الناس تفضل تكلم والقضيه تفضل عايشة

أنا بس بحكيلكوا عن الاحساس اللي ماقدرتش أطلعه من جوايا

واللي خلاني مش قادر اكتب أي حاجه النهارده

تعرفوا

هقوللكوا على خاطر غريب أوي بيجيلي لما بشوف المدابح دي

على اد ما بتوجعني كل المدابح دي كلها

على اد ما اتمنيت واحد منهم هناك

على الاقل هما ماتوا في سبيل ربنا مش زينا هنعيش خرفان ونموت خرفان

انا مش عايز أوجع قلبكوا اكتر ماهو موجوع

بس حاجتبن ماعرتفش هما صح ولا غلط وكان لازم أسئل وأسمع منكم

هي مصر كانت صح لما قفلت المعابر بالطريقه دي؟؟؟؟

كتير بيقولوا آه ده من حقها لانها لو فتحتها مش هتعرف تسيطر عليها

وكل اهل غزة هيسكنوا سينا وتبقى اسرائيل عملت اللي هي عايزاه

ولانها لما اتهاودت فيها..فيه رائد اتقتل وغير اتصابوا

وناس تقول لا لازم تفتحها

امال نبقى اخوات ازاي

ازاي يبقوا اخواتنا بينضربوا واحنا قافلين في وشهم الباب

حتى الرائد اللي مات الاعلام كان قاصد أوي يكبر الصورة ويوصلها للناس بالطريقه دي

طب ما اسرائيل قتلت اتنين من جنودنا من كام شهر وماحدش فتح بؤه

حقيقي بجد انا شخصيا مابقيتشي عارف

طب انا لو مطرح حماس وطلبوا ان أوقف أطلاق الصورايخ

ابطل واحم شعبي من كل الضرب ده

مادمت مش هقدر أصده

ولان الصورايخ دي ماتبعملشي حاجه غير انها بتدي حجة ليهم يضربونا

بس يبقى معنى المقاومه ماتت

ولا أصمم عليه مهما حصل

عشان معني المقاومه مايموتشي على الاقل

وحتى ولو كان بصاروخ واحد

حقيقي مبقتش عارف

بس الللي عارفه أوي ان الصمت ده حرام

حرام

واننا كلنا هنتحاسب واحد واحد مش بس كل قطرة دم

انما كل قطرة دمع في عين أم او طفل فلسطيني

هختم كلامي بس بحاجه

يمكن تكون كل الناس هايجه دلوقتي عشان اللي بيحصل

انا فيه حاجه وجعاني من ساعة ما سمعتها من سنتين

حاجه قالها الشيخ في خطبة جمعه وبكى وابكى كل من في المسجد

وخصوصا انا لانها جت كل أكتر حتة بتوجعني

حتة غيرتي على بنات بلدي وعلى بنات ديني اللي هما في حكم اخواتي

الشيخ أقسم ان في السجون الاسرائيليه أكتر من 3 تلاف أسيره

أنا كل يوم قبل ما بنام بفتكرهم

واسئل نفسي ياتري بيحصل فيهم ايه كل ليله

ونفسي كل حد في البلد يسأل نفسه السؤال ده

عشان يعرف أد ايه هو سؤال صعب

انا آسف ان كنت كئبتكوا النهارده

بس أي حاجه كتبتها أكيد مش هتساوي ذرة حزن من اللي في قلبي ولا في قلب أي واحد منكوا

ومافيش أدامنا حاجه نعملها غير اننا ندعي وتنبرع ونقاطع

ده سلاح كبير أوي

بس أهم حاجه قبلها اننا نغير من نفسنا

يمكن ربنا يتقبل دعوة حد مننا

استفتاء طبي جدا

السلام عليكم ورحمة الله

قد لا نلوم الطبيب إذا لم يستطع أن يوفر لمرضاه علاجاً ناجحاً

ولكن من حقنا أن نلومه إذا لم يوفر لهم حياة ً كريمة ً حتى النهاية

ان شاء الله هبدأ أولا بالاستفتاء وبعدين أٌقولكم ليه كتبته لو حد حابب يعرف
السؤال لينا احنا اللي هنكون دكاتره ان شاء الله
وللدكاتره اللي بقوا دكاتره رسمي دلوقتي ولكل حد له علاقه بمجال الطب..
واولهم الناس اللي ربنا بيكتبلهم يروحوا يكشفوا عند الدكاتره
هو ايه الصح؟؟
اننا نقول للمريض حقيقة مرضه زي ماهي و اقول الصورة واضحه و احطه جوة الصورة
ولا اني أهوّن عليه وما اصدموش واقوله انه كويس وانه مافيهوش حاجه
وانه ان شاء الله هيخف ودي شويه مشاكل بسيطه وهتروح
طبعا فيه أمراض عادية مش مستاهله الاستفتاء ده
انما فيه أمراض زي الكبد والسكر والأورام -ربنا يعافينا جميعا- محتاجه نوصل فيها لرأي واحد

أنا طرحت التساؤل ده كتير وسمعت آراء كتير
ناس قالت اني لازم أقول للعيان وأهله لأسباب كتيره
منها انه ممكن لو فهم من كلامي ان الموضوع بسيط ممكن يهمل في علاجه
وانا أبقى كده ضريته ماأفدتهوش
وممكن يروح لحد تاني ويعرف حقيقة مرضه وابقى كده فقدت مصداقيته عنده
والكل هيتهمني اني ماعرفتش اشخـّص..مش عرفت ومارضيتشي أقول
كمان انا كده بهيأه نفسيا -لو انت متوقع طبياً ان الحاله هتسوء-عشان مايتصدمش
وعشان كمان ماحدش يقوللك- واولهم العيان- انت ماقولتليش ليه يا دكتور
فيه كام حد قاللي رأي قاسي شويه بس فيه ناس كتير قالتهولي وناس كتير بتعمل بيه كمان
انه احيانا الحاله -طبيا-وبركز على كلمة طبيا لان الأعمار بيد الله طبعاً
احيانا الحاله بتبقى مافيش أمل طبي في العلاج وبيشوفه انه من الواجب
اني لازم أبلغ أهل العيان بكده لانه ممكن يروح

لدكاترة تانيه مستغله عايزه تاخد اللي أدامه واللي وراه ويبقى زي ما هما قالوا..موت وخراب ديار
ناس كمان قالتلي انه ابلاغ المريض بحالته جزء لا يتجزء من الأمانه الطبيه
و ان واجبنا كدكاترة اننا مانخدعشي العيان ولا نسيبه عايش في وهم عشان ماينصدمش
آراء كتير أوي كانت بالشكل ده
آراء كتيرة تانيه كانت العكس
ناس قالت ان المرضي-خصوصا في مصر مثلا-أهم حاجه في علاجهم الحاله النفسيه
يعني لو المريض طالع على رجليه
وانا قلتله انت عندك وعندك وعندك اكيد هينزل واللي معاه شايلينه
وقالوا كمان ان المريض هيوهم نفسه زياده فوق المرض اللي انت حكيتله عنه
و ده هيخليه هيتعب أكتر

ومادام فيه أمل لو واحد في المليار ليه أحرمه منه

لو حتى صرف اللي أدامه واللي وراه

انا عرضت جزء من وجهتين النظر بدون تحيز

ودلوقتي الكلام ليكوا انتو

السؤال التاني

لو اعتبرت ان الفتره اللي قضيتها في دراسه الطب او في شغله

حلم وانت صحيت منه دلوقتي وأدامك ورقة الرغبات...هتكتب فيها ايه

طبعا احنا كلنا مؤمنين بالقدر وكلنا هنكتب طب تاني طبعا

بس تخيل..مجرد تخيل..من غير أي اعتراض على إرادة ربنا طبعا

السؤال التالت

هو الطب بيقسّي القلب

يعني قلبك دلوقتي زي قلبك قبل ماتدخل طب

على فكرة يمكن السؤال ده يحسوا اكتر الناس اللي خلصت واشتغلت

بحس انه من كتر التعود بقى عادي عندهم ان حد يموت أدامهم

أو ان حد يتألم أدامهم

فيه ناس بتشوف ده حمودية قلب وناس بتشوفه مسألة تعود

دكتور كبير مرة سألته

قاللي انه أول ما اشتغل كان بيرتبط أوي بكل حاله

و بيزعل أوي على كل حاله ربنا يكتبلها الوفاة بالمرض ده

بس يوم بعد يوم لقى نفسه كده مش هيقدر يكمل

وانه شويه شويه بقى الموضوع مش عادي بمعني عادي

بس هو ده شغله اللي لازم يشتغله ويكون أده وقادر على احتماله

مش عارف انتو حاسين بإيه

كده الاستفتاء خلص

لو حد حابب يقري لحد هنا

أما ليه كتبته

أنا بحب الأطفال الصغيره جدا زي ما كلنا بنحبهم

ومش عارف ليه بحب البنات الصغيره اكتر

والسنه اللي فاتت في الأطفال ناس كتير ارتبطت بأطفال مرضي هناك

خصوصا أطفال عنبر الدم..مش عارف ليه كانوا بيخشوا القلب كده علطول

ومنهم بنت صغيره ماكملتشي تلات سنين ونص

انا ارتبطت بيها جدا جدا جدا جدا اجدا

مش عارف ليه..ومش عارف ليه هي كمان ارتبطت بي وحبيتني أوي كده

انا كنت هنزل صورة لينا سوا وهحكيلكوا عنها كتير أوي

بس احتراما ًلخصوصيتها وخصوية المرض اللي كان عندها مش هينفع أعمل كده

هحكيلكوا بس أكتر موقف ربطني بيها

تاني يوم عرفت نتيجة التحليل بتاعها كان الموضوع صعب على جدا

ويمكن الناس القريبه مني تعرف الموضوع أثر على أد ايه

وكنت شايلها على كتفي و بنتمشي وبعدين رجعتها لوالدتها ونزلت

بعد كام خطوه كده لاقيت صوتها جاي من ورايا

انت هتمشي؟؟؟

أيوه-

وهتسيبني؟؟؟

موقف صغير أوي وكلمة صغيره أوي بس أثرت في جدا

لما رحت أسئل عليها قريب ما لاقيتهاش

والله كنت حاسس ان قلبي هيقف

وقابلت الدكتور عادل وسألته.. أول كلمة قالهالي.. قاللي خلاص

و قبل مايجرالي حاجه قاللي..لا ياعم خلاص خفت

كان من أسعد الأخبار اللي سمعتها في حياتي كلها

بجد بجد كنت في قمة السعاده

ربنا يتم شفاها على خير هي وكل الأطفال اللي هناك يارب

وفي الفتره دي قابلت النوعين دول من الدكاتره

بس ماعرفتش مين فيهم اللي صح

أنا مش عايز أطول عليكوا اكتر من كده

بس فيه كمان خبر سمعته وأسعدني جدا

فيه بنت من زوار المدونه أختها ولدت قريب

تفتكروا سموا البنت ايه

؟؟؟؟؟؟؟؟؟؟؟

سموها بلسم..على اسم بطلة قصة بلسم

بجد بجد متشكر ليها أوي

واتمنى ييجي اليوم أشوف بلسم الحقيقه شكلها ايه

في النهايه مستني آرائكم كلكم على التلات أسئله

وكمان ان شاء الله فيه دكاترة من الجامعه هيشاركوا معانا

سواء من متابعي المدونه او انا هنقل رأيهم هنا

وللناس اللي قالت انها مش بتعرف تلعق

هما ممكن يتكوا بالموس على كلمة أو دايرة غير معرف أو أنونيموس

وبعدين لو حابين ممكن يبقوا يكتبوا أساميهم تحت

في انتظاركم جميعا

تهييس مذاكرة

السلام عليكم ورحمة الله

كل سنه وانتو كلكم طيبين مرة تانيه

حاجات كتيرة كان مفروض أكتب عنها النهارده

منها خبر سعيد أوي بالنسبالي واستفتاء كبير بخصوصه بس هسيبه شويه كده

وكان كمان المفروض أكتب عن الجذمه بتاع بوش ..بس اللي كتبته ماحستوش

وماحبيتشي اكتب حاجه لمجرد الكتابه عن الموضوع وبس

مش عايز اطول في المقدمه

بس قريّب كنت بشيل كتب سنه خامسه من المكتب

على أساس قال يعني هذاكر سنه سادته بقى

وقلت قبل ما أشيلهم أبص فيهم بصة صغيره كده

ولاقيت فيهم شوية حاجات بسيطة صغيره كده كنت ناسيها

حاجات كنت بكتبها وانا بذاكر وبسجلها في الكتاب اللي بذاكر فيه

ولاقيت فيها جمل وابيات ..ممكن تكونوا سمعتوا حاجات منها قبل كده

وقلت بدل ما اسيببها هنشرها هنا خلطبيطه على بعضهم كده

شويه منها النهارده شويه في اي تلات جاي ان شاء الله

وفي النهايه لازم كل حد برضو هيدخل النهارده يختار منها تهييسه واحده بس

صحيح ..الأبيات اللي فيه كل طب عملتها بالأحمر عشان الناس اللي مش في طب

الحب الحقيقي..شئ ٌ زاد جماله فزادت ندرته

....................................................

إذا أحببت عينين فعليك ألا تفعل مايجعلهما يوماً ما ينظران إلى الأرض في انكسار

......................................................

أنا هفضل برضو أحبك...مهما على قلبي دست

hostأنا هعمل قلبي ....organismولو إنـت

.................................................

وقتلت غرامك جوايا...ودفنت هواكي في وجداني

أنا مش ندمان اني قتلته...لو عايش كنت أقتله تاني

............................................................

النسيان...شعور ٌ يذبحنا.. بمنتهى الرقة

.........................................

بعز الــناس ومهم يكون...هصون دايما ً معزتها

أنا لو نفــــــــسي ويّايا...ماكنتش عنــكوا عزتها

لكن مالاقيتشي روحي في يوم...ونفسي في نفسي عزيتها

..................................

ليس معني اننا لم نحب حتى هذه اللحظة أن قلوبنا قد ماتت

ربما كان ذلك لأن مشاعرنا الكبيرة لم تقابل إلى الآن من يستطيع ان يحتويها

.............................................

لو انت مش شايف حبى..اسمحلى أقوللك يا خساره

يا إما عــــايز تجرحني....يا إمــــــــــا عايز نضارة

..................................

نحن نحتاج ان نلغي عقولنا مرتين

مرة ٌ إذا قررنا ان نحب..ومرة ٌ اذا قررنا ان نضع نهاية ًلهذا الحب

......................................

أنااا رااايح خلاص في طـريق....وقلبك برضو راح في طريق

ماحدش فينا كان غلــــــطان......دي كانت غلـــــطة التنسيق

..................................

ليس من حق حبيبنا الأخير أن يلومنا على ما كان من قبله
إن ماضينا من العقاب يكفيه...أن من نحبه بصدق ٍ لم يكن فيه

..................................

انني أستطيع أن أتحمل أن يخونني من لا أحبه دهراً بأكمله

ولكني لا أستطيع أن أتحمل ان يخونني من أحبه ولو

للحظة ٍ واحدة

............................

لو قلت جميله بس...كده يبقى بظلمك

endemic يا اللي غرامك في قلبي...بقى حاجه

.......................

من حق الواقع أن ياتي ليهدم كل مابنيناه من قصص حب خيالية ٍ في قلوبنا

فقد كان خطأنا نحن حينما لم نشركه في بنائها منذ البداية

...............................

من غير كده ولا كده....حبك دخل في القلب

انت اللي زيـــك كده...مخلوق عشان يتحب

.......................................

ليس معني أن جرجتك زهرة أن تقاطع كل الزهور

فربما يكون خطأك أنت أنك تسرعت في قطفها منذ البداية

...............................

وبرغم البـــــــعد كنا........قريّبين زمان

دلوقتي ليه بـِعـِـدنا....واحنا في نفس المكان

...........................

.

و أخيراً

إن الله لم يخلق لنا قلوبنا لندفنها ؛ولا عقولنا لنلغيها

,ولا أعيننا لنغلقها,ولا أجسادنا لنعيش من أجلها

ان الله خلق قلوبنا لتحبه

وعقولنا لتفهم لماذا كان هذا الحب

و عيوناً تري هذا الحب على حقيقته فتجلعنا نبذل أجسادنا رخيصة ً في سبيله

في انتظار تعليقاتكم واختيارتكم

كل سنه وانتم طيبين

السللام عيكم ورحمة الله

journy-to-myselfيسر مدونه

أن تعلن عن فتح باب القبول لدفعة جديدة من اللحوم

على ألا يقل حجم اللحوم المقدمة عن نصف كيلو ولا يوجد حد أقصى للتقديم

وذلك بمقر المدونة الجديد بحديقة الخالدين بالدرّاسه

وتهيب المدونه بعملائها سرعة التقدم قبل أن تمتلأ الثلاجة

ولا يشترط أن تكون اللحمه لحمة صافي

فنحن نقبل اللحوم الملبسة والكندوز..ضاني .>بناتي أو بتلو

هذا ويسعد المدونه لأول مرة لهذا العام ان تقدم خدمتها الجديدة

توصيل الأكالين للمنازل

فقط اترك عنوان بيتك وسوف يصلك مندوبنا- اللي هو أنا- ليأكل عندك

كل سنه وانت طيبين وبكل خير يارب

انا بهزر طبعا في موضوع اللحمه دي

واكيد أصحابي عارفين اني مش أكــّـيل ولا بحب الأكل أصلا-استروني ربنا يستركم

انا مالاقيتش حاجه أعيد بيها عليكوا غير اني أدعي لكل الناس امبارح

على الفطار والنهارده في صلاة الفجر للمسليمن كلهم

ولاخوانا المحاصرين في غزه

ولكل الناس اللي بتزورني هنا

ربنا يكرمهم ويحفظهم ويحققلهم كل اللي يتمنوه

ودي قصيدة معلهشي طلعت مش أد كده

بس استخسرت أركنها وقلت اعيد بيها عليكوا

حاجه على ما قدرت والله..يارب يارب تعجبكوا

ضحية الضحية

من مذكرت طـِفـِس

مش أنا والله...أنا بحب الأكل بس مش للدرجادي

يا لحمة ٌ حمــراء طـــــال غيابها.....عـــــــودي لنا ولتمــــلئي ثلاجتي
العيد أضحى عيد أضـــحي حينما......بعث الذين سيــــــذبحون بلحمتي
...و رأيت قوماً في طــريقي جهزّوا.....كل المــــوائد بالتحابيش التي
أجْـرَت لعابي واستباحت خاطري.....والشــوق نحو اللحم أدمى مهجتي
طارت عصافير البطون وزفزقت.....فأجبـــــتها..اليــوم لا ..لن تسكتي
وأخذت أمشي في الطريق أمامهم.....كي يعـــــزموني إن أحسوا حالتي
لم يُبصروني..عدتُ في عجل ٍلهم.....و أمــــــامهم آتي فأبطئ ُ خطوتي
قالوا تفضل..قلتُ لا في عــــزة ٍ....- من خلف قلبي- كي أداري لهفتي
قالوا تفـــــضلْ قلتُ لست بجائع ٍ....مازال أكـــــل الأمس يملأ معدتي
قالوا تسلـّى..قلتُ أتســــلى فقط..... بعض التســــالي كي أجيب أحبتي
شمّرت ُ كـــــمّي.. والحذاء خلعته ُ....وصــرخت فيهم أفسحوا يا سادتي
و جلســــتُ ما بين الرجال مربـِّعا....وخلـعتُ تي شيرتي هناك وساعتي
وضـــــــــعوا أمامي حلة ً مملوءةً.....يا سعد بطــــــني حين تأكل حلتي
ضـاني..بنـــاتي..أو بتلــّو هاهنا......يا حيــــرتي ما بيـــنهم يا حيرتي

ريـَش ٌ وهُبَرٌ ..مــــــوزةً أو فخدة ٌ ...مابينـــــــهم طبعاً سآخذ راحتي
والأرز في منــــــباره ِ متراقصاً......طـــبق الكوارع كم يزغلل مقلتي
مخ ٌ..عكاوي..لحم ُ رأس ٍ..كرشة ٌ....أصحبت أخشى أن أموت بفرحتي
وبسلة ً وبطاطـــساً وطــــــواجناً......سأنال منـــــها لن أضيـّع فرصتي
محشي كرنب ٌ بعده ورق العنبْ....وأمامــــــــــــــهم حتماً سأرفع رايتي
وحمامتين صغــــــــيرتين وبطة ً....و بدأتُ أغرق في صواني شوربتي
وبدات ألهفُ مسرعاً طبـقاً طبق ْ......والناس حـولي يحـــسدون شهيتي
بل إنهم خافـــــــوا على أولادهم..... و مضـــــوا بهم لمّا رأوا وحشيتي
إني جعااااان ٌ فاعــذروني يا بشرْ.....ولــتتركوني الآن أشــــبع رغبتي
اللحم ُ غال ٍ والجيــــــوب نظيفة ٌ.... وشكــــوتُ للرحمن ظلم حكومتي
و العيد فرصـــــتنا لـنـملأ بطننا.......خلــّـوا إذنْ بيـــني وبين وليمتي
واصلت ُ زحفي في الصواني كلها.....وكأنني أســـــد ٌ وتلك فريســـتي
فإذا بمغص ٍ في مصـــاريني أتى...فصرخت آااه..آه ياآبة يا أمّه ياعمتي
كبَسَ الطعام على جميع مراوحي.....وسقـطتُ مرميّا ً صريع طفاستي
و أخــــذت ألف ملــــــين ٍ وملين ٍ....لكـــنّها..لا لم تــــــدواي أزمـــتي
مابين إسهــــــــال ٍ وامساك ٍ هنا......العـــــــيد ُ مر ّ ولم أداوي تخمتي
والآن أرقد ُ في ســـريري هاهنا......وطـــــــفاستي كتبت نهاية قصتي
قد كنت أبغي في اللـحوم أجازة ً.....فقضيتُ في الحـــمّام كل أجازتي

every year..your heart near

على هامش الثلاثاء

ماكانشي ينفع أفوت النهارده من غير ما أحتفل بتلاته من أجمل و أعز زوار مدونتي

فرج
كان عيد ميلاده يوم25/11
كل سنه وانت طيب يافرج
أنا قلت كتير على الجروب
بس كان لازم اهنيك هنا واأدعي كل الناس تشوف رائعتك الجديدة
بلادٌ كلها غرباء
http://qasaed.blogspot.com/
كل سنه وانت بألف خير يافرج

نهي
أو زي ماكانت بتكتب اسمها هنا
NAHNOHA
ألف الف مبروك الخطوبه
وألف مبروك على الدكتورة أسامه عروسه بنت حلال زيك
ويارب ربنا يتمملكم بخير وكلنا نحضر فرحكم ان شاء الله

جهاد
أولا كل سنه وانتي طيبه
و ربنا ييسرلك الحج ويتقبل منك ان شاء الله
ومافيش حاجه اجمل من انك تبدأي عمرك بطاعه جميله زي الحج ان شاء الله
ربنا ييسرلك ويوفقك ويكرمك هناك
ورجاءا لا تنسينا من صالح دعائك

واخيرا لو أي حد هيدبح مايبقاش ينسانا بكيس صغير
من اللحمه أو مشتقاتها أو اي حاجه
أي حاجه منكوا حلوة
انا كده شويه وهشحت
كل سنه وانتو طيبين مقدما
عيد سعيد عليكوا كلكم

عام ٌ ..في عمر مدونتي

عام ٌ في عمر مدونتي

عام ..ٌ والعام هنا أعوامْ

عام ٌ ..و أنا أكتب ذاتي

وجعلت ُ دمـِـي حبر الأقلامْ

حلم ٌقد أمسي كالواقع

والواقع أمسى كالأحلامْ

أحكي عن نفسي وأراني

لا أحكي عني بل عنكم

وبأشعاري لا أفخر بل

أفخر أني قلب ٌ منكم

عام ٌ قد مر وبعد العام

ماعدت أنا... فأنا أنتم

السلام عليكم ورحمة الله
المفروض ان الموضوع ده كان ينزل يوم الجمعه
انما معلهشي كل الظروف اتجمعت انه ينزل النهارده
ويمكن تكون اجمل صدفة انه ينزل النهارده...التلات
اليوم اللي بقيت بعشقه وبستناه أكتر من أي حد فيكوا
زي يوم الجمعه اللي فاتت دي مدونتي بقى عمرها سنه
مش عارف سنه كتير ولا شويه....بس انا مبسوط اوي أوي أوي أوي
وكنت مبسوط اوي طول السنه دي
وبعد حيرة كبيرة أوي اكتب ايه النهارده اخترت الموضوع ده
أنا و انتم وهذه المدونه
اللي يمكن أول وأكتر مرة هتكلم عن نفسي وعنكم وعن المدونه بمنتهى الصراحه
ولما قعدت وماعرفتش اتكلم عن ننفي خالص

قلت همشيها أسئله واجابات-مش متحضرين والله- وهجاوب بكل صراحه

أنا
انت مين؟؟؟؟؟

أنا انسان أبسط من اللي ممكن أي حد فيكم يتخيله
انسان بيحلم يعيش الدنيا من غير تعقيد... من غير تكلف
يقول اللي نفس يقوله ويعمل اللي عايز يعمله مادام مش غلط ومادام مايإذيش حد
طب هو انت فعلا قليل الثقه بشعرك زي ما بتقول على نفسك
أنا فعلا قليل الثقه جدا بشعري...ولحد فترة قريبه كنت قليل الثقه جدا بنفسي كمان
مش عارف ايه السبب في ده
زمان من أول الابتدائي كنت بطلع في الاذاعه المدرسيه وكان ابويا الله يرحمه بيكتبلي كلمة الصباح ولما كان عضو مجلس الشعب بتاعنا ابن عمتي ولما يبقى فيه ندوه أو حاجه كانوا بيجيبوني أنا أو حنان وابويا يكتبلنا كلمة ونطلع نقولها
وحتى لما كان بييجي موجّه ولا حاجه في الابتدائي والاعدادي كانوا بيقوموني أقرأ أدامه
انما من أول الثانوي ما بقيتشي بقدر أقوم و أقرأ زي الأول
يمكن عشان كانت بداية تعب والدي اتهزيت أوي من جوايا لما لاقيتني خارج للدنيا كده مرة واحده
بس يوم بعد يوم بدأت أتماسك و أكتسب ثقتي في نفسي تاني
بس فضل شعري بالذات بعيد عن الثقه دي
و يمكن لو الدكتور أحمد الجندي ماطلعنيش غصب عني في لقاء الانف والأّذن

ولولا تشجيع زمايلي لي... يمكن عمري ماكنت هطلع أقول كده
وبرغم اني قلت الحمد لله بعد كده في رواندات ولقاءات وندوات و كليات تانيه
كل مرة بطلع أقول بفقد ثقتي عن المره اللي قبلها مع ان ربنا كان دايما معايا وبيوفقني
بس حاليا وبعد المدونه وبعد كلامكوا الجميل دايما
مش ابتديت أكتسب الثقه دي انما ابتديت أعرف موقعي فين في وسط اللي بيكتبوا
آخر مرة قلت شعر كنا في اسكندريه في ملتقى شعري بمناسبه سته اكتوبر
وطلعت قلت الفوطه وقصيدة كمان عن سته اكتوبر وربنا وفقني جدا الحمد لله
بس كان فيه تلاته من الشعرا اللي كانوا معانا مااعترفوش بي كشاعر أساسا
هما من النوع بتاع الشعر الرمزي و التجديد وبيكتبوا للصفوه من الشعراء والنقاد

وانا بحترم النوعيه دي والله أوي وبحب أسمعهم
وكلامهم مازعلنيش..اذا كان ماكانشي عاجبهم فاروق جويده.. انا اللي هعجبهم
بالعكس أنا كنت مبسوط لاني كنت اول مرة أتكلم و أدافع عن نفسي
وقلتلهم أنا عارف ان انا مش شاعر أوي زي ما هما قالوا
أنا واحد حس بحاجه وكتبها في الصورة دي
مايهمنيش ازاي طلعت المهم انها طلعت...ما يهمنيش ابقى شاعر على أد ما يهمني الناس يوصلها احساسي
عشان كده لما الكلام بيطلع فصحي بكتبه فصحي..عاميه بكتبه عاميه
جمل بكتبه جمل...كلام عادي بكتبه كلام عادي
وان كانوا هما بيكتبوا للي بيحبوا الشعر ..أنا بكتب للي مابيحبوهوش
ومتعتي الحقيقيه اني ألاقي حد مش بيحب شعر وبيقرالي...أو ان اكون سبب انه يبتدي يقرأ شعر حتى لو بطل يقري ليا
وقلتلهم ان كانت متعتكم انكوا تكتبوا شعر الناس ماتفهموش من اول مرة و تفضل تفك في رموزه
أنا مقدر ده بس أنا متعتي ان حد يقوللي شكرا يا محمود انت عبرت عني
دا أكبر من اي جايزة ومن أي وسام ومن أي تاريخ
متعتي اني أقدر أرسم ابتسامه غلى وش حد
اني أطلع دمعه مخنوقه جوه حد

لي موقفين في أسبوع شباب الجامعات هحكي واحد منهم عشان أنا طولت أوي
كان المفروض هتتعمل حفله الختام وتوزيع الجوايز وبعدها هتنعمل الأمسيه الشعريه اللي هنقول فيها
و بعد ما الناس جت... قلبوا النظام وخلوا الأمسيه في الاول
والناس كلها هاجت لان فيه ناس عايزة تاخد جوايزها وتمشي من غير ماتحضر
والمنظمين رفضو وقعدوا الناس والقاعه في حالة مرج وهرج شديده جدا
وطلعوا زمايلي واحد واحد وكنت أنا السادس تقريبا
وكان منهم ناس من اصحاب المراكز الاولي في المسابقه وانا كنت برة المراكز دي
وزعلت أوي ان ماحدش سمعهم لدرجه ان آخر واحد قبلي وكان من شبين رمى الميكروفون ونزل
ولما طلعت مالاقيتش ولا واحد من الناس ودنه معايا ولا مستعد يسمعني
وساعتها بس افتكرت القصيدة دي...نزيف من ندم
http://journy-to-myself.blogspot.com/2007/12/blog-post.html
قصيده مافيهاش صور جماليه ولا محسنات بديعيه ..فيها احساسي..احساسي وبس
وغمضت عيني وبدأت أقول وقبل ما أخلص فتحت عيني لاقيت كل الناس بفضل الله بتسمعني

وكلهم صقفولي بشده لما خلصت
والناقد اللي كان هناك واللي انا عارف انه مش مقتنع بي برضو قاللي
يمكن صحيح ماتكونشي فزت في المسابقه بس انا بشكرك من كل قلبي لانك الوحيد
اللي قدرت تفرض حاله من الصمت على هذه القاعه
دا كان بالنسبالي أحسن من أي جايزة ومن أي مركز
في النهايه قلتلهم اني مش بكتب عشان أكون شاعر...انا بكتب عشان أكون نفسي
كفايه كده على السؤال ده ..أنا طولت فيه اوي

وياتري بتحلم بايه يا حوده
انا أحلامي-في الدنيا- غريبه اوي
احلامي كدكتور كتيرة وكبيرة اوي بس ربنا ييسرلي المكان اللي أقدر أحققها فيه
كل احلامي دلوقتي اني أشوف اخواتي شقوا طريقهم و استقروا في حياتهم واشوف والدتي مرتاحه

وفرحانه بينا واحس بوالدي في قبره مرتاح وراضي عننا وان ربنا يجمعني بيه وبيهم وبكل الناس اللي

بحبهم في ظل عرشه و نعيم جنته ان شاء الله
أما أحلامي كشاعر فغريبه جدا تعرفوا أنا كان أقصي احلامي ايه في الشعر
عارفين امثلة البلاعه وأمثله النحو بتاع كتب العربي والجمل اللي مكتوبه في كراسه الخط دي
وانا صغير ولحد دلوقتي كان نفسي أكتب حاجه يعلموها مثال زي دول كده
أحلام غريبه والله
بس اقصي حلم بحلمه في موضوع الشعر ده اني اختم حياتي الشعريه في الكليه

بقصيدة في حفلة تخرجنا ان شاء الله..انا قلت في حفلة تخرج السنه اللي فاتت

بس نفسي اوي اقول في حفلة دفعتنا لاني بعزهم أوي

أحلامي كانسان انه مايجيش اليوم اللي الناس اللي بتحبني تنصدم فيّ ويفضلوا يحبوني
تعرفوا...انا بما ان البوست ده مافيهوش قيود
أنا هقولكم على سر عمري ماقلته لحد...أنا زي أي حد بيكتب أغاني جاتلي كام فرصه اني اخش موضوع الشعرالغنائي
بس خفت أوي من حرمانيه الأغاني وخفت لو بالفرض انها مش حرام اني أكتب اغنيه تنعمل
كليب وحش او تتنغي ويترقص عليها لان ساعتهاهفضل طول عمري زي اللي لحنها واللي يغنيها هنشيل في الإثم
منهم فرصتين ماحكيتشي عنهم لأي حد لان أي حد كان هيقوللي ازاي تضيع فرصه زي دي
حتى انا ولان اللي جوايا نفس بشريه زي أي حد ساعات الشيطان يقوللي وليه لأ
ماكانشي زمانك دلوقتي كذا وكذا ومعاك أد ايه وكلام من ده
بس خفت أوي من ربنا اللي كرّم شعري برؤيه النبي صلي الله عليه وسلم زي ماحكيتلكوا
أرجع واستغله في حاجه ممكن تغضبه
خفت أكون من الذين يحبون أن تشيع الفاحشة في الذين امنوا
عشان كده بحس ان ربنا عوضني بحب الناس ده
وانه فتحلي طريق لقلوب ناس عمري ماكنت أحلم اعرفهم.. حتى من قبل ما يقروا شعري
وعشان كده بخاف أوي على الحب ده لانه أكبر علامه في حياتي بتقوللي يمكن يكون ربنا بيحبك
رغم اني ماعملتش حاجه أستحق بيها الحب ده
وعشان كده خايف أوي ييجي يوم القيامه ويتقال آدي محمود اللي بتحبوه..شوفوه على حقيقته
كفايه كده على السؤال عشان عيطت والله

اللهم استرني فوق الأرض وتحت الأرض ويوم العرض عليك
اللهم لا تخزني ولا تفضحني بين خلقك ولا بين يديك

طب اختار اجابه...انت بتحب الناس..بتحبهم بس تحب يبقوا هما في حالهم وانت في حالك

لا بتحبهم ولا بتكرههم... ولا بتكرههم

سبحان الله يا أخي على ما أد ماشفت من الناس بس بحبهم يا برضو
انا اليوم اللي بيعدي على من غير ما اكسب فيه صديق جديد بعتبر نفسي كنت انسان فاشل
ولو نزلت من الميكروباص من غير ما اتعرف على حد من اللي جنبي او على الاقل اتلكم معاه ببقى زعلان جدا
ومن امتع الاوقات لما ابقى راكب مواصله والناس مكركبه على بعض وبعدين نقلب الهم ده وتلاقي
الميكروباص كله نازل ضحك وقفشات للصبح ..امال انا تعلمت القافيه دي منين
حِـب الناس كده زي ما همـّا...من غير ماتخش في تفاصيل
عامل الخلق بأصلك حتى ...لو مايكونشي الباقي أصيل
مش لازم يبقوا على مقاسك...دا مافيش بنى آدمين تفصيل

طيب لازم تجاوب على الأسئله اللي يمامة البلوجر رنا دغيدي سألتهم لينا في مدونتها الجميله
http://degheidy.blogspot.com/2008/11/blog-post_19.html


هو عشان الأسئله كتيره اوي أنا هختار اهم سؤال دلوقتي
ماهي السعاده من وجهة نظرك
السعاده بالنسبالي اني أكون سبب في سعادة الآخرين
اني أسمع حد بيفضفض ويحكيلي والأكتر لوقدرت أساعده برأيي
اني اطلع اقول حاجه والاقي كل الناس بتضحك ومبسوطه
اني أساعد حد محتاج وانا مش محتاج منه اي حاجه
السعاده الحقيقه ..اني أحس ان ربنا راضي عني
ربنا يرضى عننا جميعا ان شاء الله

وأنتم
مادام وصلنا لأنتم بقى اسمحلى أسألك انت ليه بتحب الناس هنا أوي كده
مع انك ماتعرفشي معظمهم ومش هتعرفهم

عشان هما روح المدونه دي..هما اللي عملوها لحد ماوصلت للدرجه دي

فيه حاجات كتير كنت ناسيها وافتكرتها وحاجات كنت سايبها وما كملتهاش وحاجات كنت شايفها لا تستحق النشر

وكلها كملتها نشرتها هنا....هما اللي كانو دايما بيشجعوني اني أكتب كمان وكمان

هما اللي استحملوني وانا عمال اوجع دماغهم انا هكتب ..لأ مش هكتب..اصل أنا مخنوق شويه النهارده..أصل مش عارف مين قاللي ايه...أصلي تعبان شويه..وبس ولكن و معلهشي ومزهقهم معايا

بس هما كانوا دايما يردوا احنا مستيينك يا محمود..اكتب يا محمود... انشر ومالكشي دعوه

حاجات كتير كنت كابتها بقالي سنين وناسيها او مش مكملها جبتها وكملتهاو نشرتها وبقت من أنجح الحاجات

زي نظرتك معناها ايه وارجعلها ورساله الي قلبي و موعد بغير موعد وحاجات تانيه كتير

يمكن أخص بالذكر الناس الللي بتعلق لانهم نبض هذه المدونه

وان كان اللي بكتبه هو الدم فكلامهم هو القلب اللي بيدفعه

ومش هعدهم عشان ما انشاش حد منهم
وكان كل تعليق ويمكن كل كلمه بتنكتب
بتصحي جوايا حاجه وبتديني قدرة اكبر على الكتابه
وبحمد ربنا كتير اوي انه وقف في طريقي ناس زيكم
وبفرح اوي بالناس اللي بلاقي ردها على كل بوست
يمكن اكون ما اعرفشي معظمهم..بس المدونه قربتني ليهم اكتر
وبقيت بحس كل واحد منهم هيكتب ايه
ولو الموضوع مطلوب فيه اختيار جزء بقيت براهن نفسي كل واحد منهم هيختار ايه
وبفرح اوي لما الاقي الناس اللي شجعت المدونه في اولها زي
ناتشورال ماجيك ودوك ميرو و الحلم الجميل وهمسات داعيه وعندمانحب ورحيل و
SMILE&snowwhite
بيرجعوا ينوروها من تاني
وبزعل اوي لما احس ان حد بقى واحد من اهل المدونه وبعدين مالاقيش اسمه فجأه هنا
زي فجر آخر
امضاء انسان
اسيرة الصمت
طيور الجنه
دكتور احمد ماضي

د:سمر
أجدع بنوته
eng _eman
nan
H
doc_mony
n_e_m
sluvswho
emi_doc
الناس دي والناس اللي انا ناسي اساميها دلوقتي
نفسي اوي يرجعوا للمدونه تاني
وتعليقاتهم تنورها
وحتي الناس اللي بتبعتلى رايها على الميل والناس اللي بتقوللي رايها شفوي
نفسي تبقى المدونه هي المكان اللي تجمع كل الناي اللي لي في قلبها مكان

انا والله يعلم الله وحده كم أحبكم فيه

طب بمناسبه أنتم...مين اكتر ناس تحب تقول أدامهم شعر

بدون تفكير وبدون حيرة وبدون مجامله...دفعتي طبعا

انا بحب الدفعه دي جدا جدا جدا ومهما رحت ولا جيت انا في النهايه فخور اني واحد منهم

لانهم هما اللي عملوني...من أول مرة طلعت ولحد دلوقتي دايما واقفين جنبي وبيشجعوني حتى لو ماكنتش كويس

أنا يمكن قلت في مركز المؤتمرات وكان فيه معظم هيئة تدريس الكليه من اول العميد وربنا وقفني جدا

وفي مرة قلت في حضور حوالي ألف شخص وربنا برضو وفقني جدا

وفي كليات وبلاد تانيه وربنا كان دايما معايا

بس عمري ما حسيت بالدفء والسعاده زي يوم ما بقول في وسط زمايلي

حتى لو رواند صغير مافيهوش ييجي عشرين واحد

لاني بجد بحبهم جدا وكنت وهفضل فخور دايما اني واحد منهم

وهذه المدونه؟؟؟

المدونه عالم صغير ربنا سبحانه وتعالي عملهولي عشان أرتاح فيه من وش العالم بتاعنا ده
تعرفوا...انا كنت أسعد واحد بتدوينات التلات دي
كنت ببقى في قمة سعادتي وأنا بحط البوست
وفي قمة الانتظار وانا مستني ادخل نت تاني يوم عشان اشوف تعليقاتكم
وافضل من التلات للتلات افكر واحضر في بوست التلات اللي جاي
تعرفوا كمان ..انا لحد ما المدونه اتعملت
ماكنتش اعرف يعني ايه مدونه
بس أمير صاحبي عملهالي ..وفرج وعلام جزاهم الله كل خير كملوها
ولما دخلت على المدونه زيي زي اي حد منكم
لاقيت فيها الحلم اللي بحلم بيه من اول معرض دخلت فيه الكليه
لما حسيت اني بكتب حاجه ممكن حد يحب يقراها
ولما لاقيت فيه ناس بتشجعني وتقوللي اكتب تاني يا محمود
ولما لاقيت يوم بعد يوم زمايلي يبفتحولي قلوبهم وبيعتبروني واحد منهم
وبيبقوا فرحانين وانا طالع اقول في محاضرة او في رواند
كان نفسي يبقى فيه مكان واحد يجمع الناس اللي بحبهم وبيحبوني
اقدر من خلال المكان ده اقدملهم اللي بكتبه
وهما يقولوا انت كده كويس يا محمود
او انت كده غلط يا محمود
او انت ماكنتش كويس المرادي
والاهم
انهم من خلال الشئ اللي انا كاتبه يقدروا يسمعوا بعض ويعرفوا بعض
ويبقى المكان ده مكان لقاء ليهم كلهم
لحد ما اتعملت المدونه
ولاقيت فيها جزء كبير اوي من الحلم ده

وده اللي بيخليني حريص جدا اني اكتب وانشر

واني ممكن ييجي على تلات ومش لاقي نت في بلدنا مثلا اركب واروح السنطه

او ادخل نت معفن ريحة السجاير ملياه ومليان دوشة

عشان اكتب بوست التلات لاني بجد بقيت مابرتاحشي غير هنا...علي صفحات المدونه دي

تعرفوا كمان..اني حافظ معظم الردود اللي هنا ...حافظها صم

واني لما بكون محنوق بجيب المدونه من اول بوست فيها واقعد أقرا التعليقات من تاني

يارب تفضل دايما كده ويارب تفضلوا انتو كمان تحبوها

وتلاقوا فيها ولو كلمة صغيره تكون سبب في سعاده اي حد

ويارب ان شاء الله ماتكونشي آخر سنه في آخر عمر المدونه

وتفضل زي همسات داعيه اطلفت عليها أجمل اسم

رابطة الحب

انا لسه جوايا كلام كتير أوي بس انا طولت عليكوا أوي

ودلوقتي هسيب الكلام ليكو انتو

وزي ما كان الكلام النهارده من غير قيود

اتمنى تكون التعليقات برضو من غير قيود

واي حد نفسه يقول حاجه يقولها

والاختلاف النهارده كمان ان كل واحد منكم له الحق انه يسئلني سؤال

وانا ان شاء الله هجاوب عليه

كل سنه وانا وانتم والمدونه طيبين وبكل خير دايما يارب

أخوكم /محمود أبوالعزم

مذكرات حوكشة

السللام عليكم ورحمة الله

حوكشه شخصية مش واقعية ومش خياليه
فيه كتير مني بس مش أنا
وكتير من المواقف اللي حصلتله حصلتلي انا كمان
وبالمناسبه حوكشه ده اسم دلع كانت أختي حنان احيانا بتقولهولي
والنهارده اول حلقه ولو عجبتكم هنزلها تاني على فترات كده ان شاء الله
بالمناسبه قبل البوست بوست النهادرة تقريبا كله حصللي بما فيها موقف المدرج


يااااااااااااااااااااااه
أخيرا هدخل طب
والله كبرت يا واد يا حوكشه وهتخش طب وتبقى دكتور أد الدنيا
وقلت مادام طب يبقى ماينفعشي عم عبد العظيم الترزي تاني بقى
بالبناطيل الواسعه الي كان بيفصلهالي دي اللي عامله زي بناطيل الصيادين
معلهشي بقى يا عم عبد العظيم...أنا في طب
خدت الست الوالده ورحت على شارع البورصه
هي معروفه كده مادام طب يبقى شارع البورصه
انا كنت واخد الحاجه عشان أنا أنقي وهي تفاصل
أنا ماينفعشي أفاصل ...انا في طب
و روحت بعد مانقيت الطقمين والجذمه السمرة ام بوز من أدام دي
اللي عامله زي مصباح علاء الدين
ويوم الكلية صحيت من النوم..شفتوا الاصرار...صحيت من النوم
لبست و روقت نفسي ولأول مرة احط القميص في البنطلون
ماهو لازم أحط القميص في البنطلون...أنا في طب
وشلت الكشكول أبو سلك أبو أربعه جنيه ونص و حطيت القلم أبو تكتيكه
في جيب القميص وشلت البالطو على ايدي
أنا عارف ان البالطو أكيد مالهوش لازمه من أول يوم بس أنا في طب
ولازم كل الناس تعرف ان أنا في طب ..ومشيت أتغندر و أنا شايل البالطو
عشان اللي ماعرفشي في حتتنا يشوفني وانا شايل البالطو
والناس شغاله اتفضل يا دكتر..مع السلامه يا دكتر....ربنا يوفقك يا دكتر
شفتوا.. دكتر من اول يوم كده..دا الواحد على سنه رابعه ممكن يعمل عمليات لوز بقى
و مراعاة ً لمشاعركم أنا مش هقدر أحكي عن مواصلة البلد بتاعتنا
انا بس هقولكم هي عباره عن عربية ربع نقل وعليها كبّوت ومحطوط فيه دكتين قصاد بعض
والمفروض انها يادوب بتاخد أربعه في كل دكة بس عمرها ما بتمشي غير سته وسته
هو كدا.... سته هنا وسته هنا
و في أول يوم- وكل يوم- كنا خمسه ولاقينا ست كبيرة جت رمت نفسها في النص
وقالت معلهشي نساع بعضنا والمطبات هتنزلني.....دول خمس دقايق كلنا نازلين ..
أنا أصلا نازله في السكه
و طلعت العربية لحد ما وصلنا السنطة ونزلت لاقيت خلق مالهمش اول من آخر
يادي السواد يا بلح...دي جمله اعتراضيه بيقولوها عندنا في البلد لما يستغربوا
يا دي السواد يابلح كل دي ناس عايزة تركب...أنا عمري ماشفت زحمه كده
بجد بجد ربنا يعين بابا حسني وماما سوزان
و ييجي الميكروباص من دول وتلاقي كل الناس بتجري وراه
بس أنا ماينفعشي أجري...أنا في طب
لكن لما عدى تمن تسع ميروباصات قلت لأ أنا كده لازم أزاحم وأجري وسامحني يا طب
ولازم الواحد يبقى يشترك في صالة جيم عشان الموضوع شكله هيطوّل بعد كده
و رحت أزاحم و أزق و اقاوم وعمال أصرخ بالراحه يا بشر
ماينفعشي كده أنا في طب..بالراحه دا أنا جايب الهدوم من شارع البورصة
لكن مافيش فايدة ونتج عن هذا التزاحم تمزيق واحد كشكول فئة أبوسلك
وفقد قلم أزرق جاف فئة أبوتكتيه و تمزيق واحد بالطو ماركة اللي ماشافشي يشوف
وبعض الجروح السطحيه...المهم ركبت في آخر كرسي
ويومها حصلت الخناقه اللي الحمد لله دلوقتي اتعودت عليها بتاع أربعه ورا
بس الراجل التباع – بكل ذوق وادب احترام- طلعنا غصب عننا واحنا أربعه ورا
وقال جملته الشهيرة برضو.. يا جماعه ساعوا بعضكم دول خمس دقايق وكلكم نازلين
وفيه واحد نازل في نص السكه
لكن للأسف الشديد جه في نص السكه وركــّب واحد خامس معانا
المهم بسم الله ما شاء الله يعني اللهم لا حسد وصلت الجلاء
ووصول الجلاء ده حاجه صعبة جدا زي العيش المدعم واللبن
المدعم مش كل الناس بتوصلـّـها ولازم تضحيات كتيرة عشان توصل هناك
و جه الدور اني أركب السرفيس اللي رايح الجامعه وللأسف كانت نفس الزحمه
بجد بجد ربنا يعين بابا حسني وماما سوزان
والمرادي ما استنتش رحت زاحمت علطول وعملت ناصح وقلت بلاش أركب في الكراسي
اللي ورا اللي فيها اربعات دي وقمت راكب في ضهر السواق لوحدي
و فجأه لاقيت ست كبيرة طالعه ..خد مني يا ابني..هاتي يا حاجه
و حطت الطشط فوقي على ما تركب بس لما ركبت ماخدتشي الطشط
ويا دوبك قدرت أنادي..ياحاجه يا بتاعت الطشط خدي الطشط بالله عليكي
أيوة يا ابني انت فين...أنا تحت الطشط يا حاجة
وخدت الطشط بعد ما كان ساب ريحة جميله من الحاجات اللي كانت فيه
جبنه حادقة على سمنة بلدي على حاجات مش عارف ايه هي
بقيت خايف بعد ما انزل يكتبوا على ضهري
حوكشه ...بطعم وريحة السمنه البلدي...وتحدّي
بس المهم اني وصلت الجامعه ودا بقى في حد ذاته انجاز كبير لا يقل في حجمه
عن تحقيق ميداليه أولمبية أو كأس الأمم الافريقية
ودخلت جري لإني أتأخرت أوي ولما دخلت تهت..أروح فين..أروح فين
ونقيت واحد زي حالاتنا كده و سألته هما بتوع أولي طب بياخدوا فين
بصّلي بصة غريبة أوي و اللي أغرب من البصه دي ان لحد دلوقتي كل ما
حد يعرف اني في طب يبصلي البصة الغريبه دي
المهم الراجل مشكورا شاورلي على المدرج..ودخلت وباندفاع الشباب
دخلت على المدرج اللي تحت علطول
دخلت...مالاقيتشي دكتور بيشرح ولاقيت كل واحد قاعد مع واحده
يادي السواد يابلح...هو أنا اتأخرت أوي كده
ياخسارة الطقمين بتوع البورصة و جذمة علاء الدين
قعدت و أمري لله و فضلت أدور على أي حد أعرفه مش لاقي
شويه ولاقيت حد بيسأل اللي جنبه... ايه يا ابني عملت ايه
قاله الحمد لله طلعت بمادة واحدة
انا شكلي اتأخرت أوي أوي
وقبل ما ألحق أسئل لاقيت واحد جاي جري أنا جبت جدول المحاضرات
اتملـّوا معايا...من تمانيه لعشرة أحوال شخصيه
ومن عشرة لاتناشر قانون مدني
يانهار ابيض...قانون مدني واحوال شخصية
انا فين يا جماعه..قالولي انت في مدرج حقوق
امال بتوع الطب بياخدوا فين....في المدرج اللي فوق
طلعت جري...لاقيت المدرج مليان على آخره
والرجاله في جنب والحريم في جنب ونسبه كبيرة لابسين نضارات

وكل الناس بتكتب ورا الدكتور
قلت بس...أيوه كده... هو دا الطب
وقعدت أدور على حته أقعد فيها مالاقيتشي
قمت جاي على جماعه كده وحاشر نفسي في وسطهم
ولما سألوني ايه يا كابتن اللي بتعمله ده
قلتلتهم معلهشي ياجماعه نساع بعضنا... دول خمس دقايق وكلنا نازلين
أنا أصلا ً ...نازل في السكه

موعد ٌ..بغير موعد

القصيدة اللي هكتبها النهاردة هتبقى أقدم حاجه كتبتها هنا على المدونه
ويمكن تكون من اول اربع خمس محاولات لي في كتابة الشعر
ويمكن اتنين بس اللي شافوها قبل كده
واحد من اصحابي مااظنش انه يفتكرها
وحنان اختي اللي حبت القصدية دي اوي واختارتها من بين كل الحاجات
اللي كتبتها لحد دلوقتي عشان تحتفظ بيها دايما معاها
وكنت نسيت القصدية خالص لحد فرح حنان
لاقيتها و احنا ببنقل الحاجات و حسيت ان فيها قصدة لذيذة
وقلت ليه ماانشرهاش هنا يمكن تعجبكم
ويمكن تكون بداية لفتح الأدراج ونشر حاجات كنت بشوفها ماتستحقش النشر
لاني زي ماقلت اني هكتب وهنشر هنا كل اللي انا حاسس بيه
وهدّي فرصه للحاجات اللي دفنتها زمان انها تشوف النور من جديد
أسيبكوا دلوقتي مع القصيدة اللي اتمني بجد انها تعجبكم
موعد ٌ.. بغير موعد
كلما حاولـــــــتُ أنْ أنسى هواها.....أنْ يفارق عش عصفوري سماها
يستعيد القلب ذكـــراها فــــــيرنو....أنْ يــعود لكي يرفرف في ضياها
كيف أرحل من أحاسيسي وعيني....تــُغـمـض الجفنـــين لكـــني أراها
كل درب ٍ مـن دروب البعد عنها....يسكن التــَـذكار دومـــــا ً منتهاها
كلما حاولـــتُ أن أبــــدو قــــويا ً....تغرس الأشــواق في قلبي رُحاها
كنت أحسـب أن آلامـــــي جميعا ً.....سوف تأخـذها الليالي في خطاها
لم يداوي بعدها آهـــــــــات قلبي.....فالفـــــــؤاد كـــأنه يأبى شــــفاها!
والتقينا..دون وعــــد ٍ جمّــــعتنا......روضــة ٌ كانت تلمــــلمنا ضياها
كنت جئت لكي ألمـــلم ذكرياتي.......كي أعيد على أحـاسيسي صداها
لم أكـن أدري بأن حبيــــبتي في .....قلبها شــــوق ٌ يؤجــــــجه هواها
انها جـائت تزور الروض مثلي.......تشــــتكي قلبي الذي أدمى مناها
فاقتربـت ُ أجرّ أقدامي ..رأتـْـني.......والـــــفؤاد بأبـــحر الأفكار تاها
فانتظرت ُ لكي أري ماذا ستفعلْ......أذهلـَـتــْني حين مدت لي خطاها
والخطى سارت إليــها في حنين ٍ.....صــــار يقسم أنّ قلبي ما سلاها
والتقينا...ساد صمت ٌ ..فابتسمنا.......,و الفـــؤاد كـــــأنه مــــاذاق آها
ثم قالت يا حبــــيبي لا تلــــمني.......قلت كــيف ألوم من قلبي هواها
ثم قالت هل تتوق إلى قصـيدي........قلت هاتي..تاق قلــبي أن يراها
فانتقــْـتْ لي من دفاترها قصـيد ٌ...... والقـــصائد كـــان أول مبتداها
كلما حاولت أن أنـسى هــــواه ُ.......أنْ يفارق عش عصفوري سماهُ
يستعيد القلب ذكــــراهُ فـــيرنو.......أنْ يعـود لكي يرفرف في ضياهُ

..................................كيف أرحل من أحاسيسي

حين اقشعرّ جسدي

السلام عليكم ورحمة الله
انا بتأسف لكل الناس اللي طلبوا مني اي بوست غير اللي هنزله النهارده
انا شخصيا كنت جاي بموضوع مختلف...
بس جوايا شئ بيدفعني بشدة اني اكتب البوست ده

المواقف اللي هحكي عنها النهارده مواقف ماتخصنيش بصفه شخصية

بس علمتني وعلمت جوايا ومش هبالغ لو قلت

انها ممكن تكون رسمت و غيرت كتير في شخصيتي

انا هحكيها زي ماهي
وهدّي لنفسي فرصه- واتمنى كلكم تشاركوني- اني أتأمل فيها
ومواقف النهارده جزء من أجزاء تانيه كتير ممكن أنزلها لو
الموضوع عجبكم وساب جواكم أثر
واتمنى كل الناس تشارك سواءا برأيها او بمواقف زي دي

سايت جواهم أثر نفسهم يوصل لكل الناس

كانت حادثة انهيار عقار زي اللي بقينا بنسمع عنها كل يوم
كنت لسه في الاعدادي وكنت بتفرج على التليفزيون
وكان المذيع واقف في وسط الانقاض وبيتكلم
و الناس بتدوّر على الناس اللي تحت الانقاض
والمذيع بيقول الجمله المشهورة ان فرصه العثور على أحياء أصبحت ضئيلة جدا
وبالصدفة والمذيع بيكلم لقوا جثة ست نايمه على بطنها
بس كانت نايمه نومه غريبه اوي
لو شفتها تحس انها محوطـّة بجسمها على حاجه
وبيتهيألي الاحساس ده اللي خلى الناس كلها تجري ناحيتها
ويشيلوها
عشان يلاقوا بنتها الصغيرة ملفوفه في لقتها البيضه لسة فيها الروح وبتبكي
أم بتحمي بنتها من الموت بجسمها

لحظة عمري ما هنساها وبيتهيألي ان اي حد شافها مش ممكن ينساها
يمكن عشان كنت محتاج أشوفها أوي
كنت محتاجها لاني من وانا صغير كنت بكره اوي المثل اللي بيقول
ان جالك الطوفان حط ابنك تحت رجليك
كنت بحس انه بيظلم اجمل حب في الدنيا ..حب الام والأب لابنهم
و عمري ما هنسى ابويا الله يرحمه لما قاللي
اوعي يا ابني تصدق المثل ده..يكرة لما يبقى ليك ابن هتعرف
ان لو جه الطوفان هتدور على حياته قبل حياتك
ولو طلت تحط جوة منك وتداري عليه بكل حته في جسمك هتعمل كده واكتر

يمكن عشان كده الموقف ده بيمثل كبير شئ اوي بالنسبالي
و يمكن عشان كنت اول مرة اشوف في حياتي في لحظة واحده..
لحظة موت وهبت لحظة حياة
.........................................................

ساعات الناس بتيقى غريبة اوي
ممكن يطلبوا منك تعمل حاجه معينه ولما تعملها كلهم يلوموك
انا شفت ده كتير...بس اكتر مرة لاحظته كان في الموقف ده
اللي حصل من سنتين تقريبا
كانت قريبتي بس من بعيد شويه..
ماتت الله يرحمها بعد ماولدت وكان عندها طفلين غير المولود ده
كان كل الناس زعلانين عليها وعلى ولادها وعلى جوزها
اللي كان منهار جدا
يمكن من بعد مالجنازه خلصت واحنا مروحين كانوا كل الناس بيقولوا
انه المفروض يتجوز عشان ولاده
والله كل الناس كانت بتقول كده
وسمعت الكلام ده بودني من ناس كتير اوي وكانت كل الناس عاذراه لو عمل كده النهارده قبل بكرة
بعدها بشهرين سمعت انه اتجوز وسمعت كل الناس بتلوم عليه واولهم الناس اللي كانت شايفاه
لازم يتجوزفي اسرع وقت..وكل الناس نظرت للموضوع على انه قلة وفاء وقلة اخلاص
وماحدش فكر ايه ذنبها الاطفال اللي مش لاقيه حد ياخد باله منهم ومش لاقيه
من الناس غير نظرات شفقة وشويه كلام مالهومشي اي لازمه

يمكن لحد هنا تكون القصه عاديه
بس اللي ماكانشي عادي بالنسبالي اني بعد الموضوع ده كنت بزور المقابر
وكان من ضمن المقابر قبرها الله يرحمها...ودخلت ..لاقيته هناك
كان ماسك مصحف بس مش قادر يقري فيه من كتر الدموع
عمري ماشفت بكاء بالطريقه دي
تحس ان كل ذرة في جسمه بتبكي
لدرجة انه ماشافنيش وانا داخل ولا وانا خارج ولا حس بوجودي
تفتكروا كان بيبكي ليه
احساس بالذنب ولا احساس بالظلم
ولا من شدة الصراع اللي جواه
انا كنت بحس انه لما اتجوز خد دوا بطعم الجرح
و انه اتظلم من ناس بتقيس الحزن بكمية الدموع وكام واحدة صوتت
و كام سنه اتلبس فيها اسود
لا ...اللي بيحزن على حد لازم يكون زي ما هو ما كان بيتمناله يكون
هو كان لازم يعمل كده عشان الحلم اللي كانوا بيحلموه لولادهم يقدر شوف النور
يمكن الموقف ده كان نفسي اكتب عنه اوي بس ماقدرتش
ساعات من كتر ما بنيقى حاسين بالحاجه مابنعرفشي نعبر عنها
بس فاكر اني كتبت فيه البتيتن اللي كلكم قريتوهم
فد يكون الوعد أمسى...... مستحـــيلا ً أن تفيهْ
رغم ذاك فإن قلــــبي......لن يضيـع وأنت فيهْ
ودلوقتي وانا بكتب افتكرت الجزء اللي كتبته ايامها وماقدرتش اكمله
كل الـــناس فاكرنـــّي نسيـتك.....وخلاص هرجع أعيش من تاني
كل الناس بتلـــــــومني عشان.......دمــــعي داريته ما بين أجفاني
و ياريت اللي يلـومني يقوللي........يعـــمل ايه لو كان في مكاني
الناس شايفة لكن مش حاسّــة........سامعة كلامي ومش سمعاني
الناس جنبي ومش حاســــــين......و انتي بعيدة لكـــــن حاسـّاني
أنـــــا والله ماخنـــــتش حـبك.......ولا صـورتك فارقت وجداني
سايبه الكون حـــــــوليّ فراغ...... بس بنـــــــــور الروح ملياني
قلبك مهــما بتوه.. حـــــــولىّ.......روحك وقت الخوف ضامّاني
زي ماعشت معاكي الماضي.......عشت كمان الجاي في زماني
بقى عندي الاحساس بوجودك.......أكــــبر من احساس حرماني
حبك جـــــــــــــوّايا وحكايتنا....... لو هنـــــــساها ازاي تنساني
نـِفسي تعيش أحــــلامنا وتايه....... بين أحلامنا ...وبين أحزاني
لكن شفت وفائي لـــــــروحك........إني ..أكون زي ما عايزاني
لازم ...لازم حلمنا يكـــــــمل........حتى ان قــــالوا على ّ أناني
لكن عايــــــش جوة مشاعري ......احساس زي الـنار في كياني
حاسس ألف صـــــراع جوايا........نار بطـْــفيها بنـار حارقاني
حاسس.. اني بقــيت نــُصين.......نـــُصي بيدفن نـُـصي التاني

..............................................

مريم
مريم بنت واحد جارنا
بنت لسه صغيره...تمن او تسع سنين
مريم من الناس اللي ربنا وسبحانه وتعالي ما أنعمشي عليهم بنعمة العقل
ويمكن عدد الكلمات اللي مريم بتعرف تقولها اقل من عدد سنين عمرها
مش هتكلم كتير عن مريم لاني مش عايزها تصعب على حد
لانها احسن مننا كلنا..على الاقل هي ماعملتشي حاجه تغضب ربنا
مريم ليها اخ صغير اسمه مصطفي عنده دلوقتي حوالي تلات سنين
من اول مامصطفي قدر يمشي وكنت دايما بشوف مريم ماسكه ايده وماشيه جنبه
وكنت لما بخرج فترة المتحانات اللي فاتت دي اذاكر في البرنده بتاعت بيتنا
كنت بلاقيهم قاعدين على السلم بتاعنا
وكنت بقعد اتفرج على مريم وهي بتلاعب مصطفي
وتفضل تروح وتيجي وتتنطط وتشقلب
كل ده عشان مصطفي يضحك!!
سبحان الله
و في يوم وانا راجع من الامتحان
لاقيت مريم ومصطفي مقابلني في اول الطريق
كانوا ماشيين ادامي بشويه و مصطفي كالعاده ماسك في ايد مريم
ومشيت وراهم اتفرج على عاطفة حب خالية من أي أغراض او اي شوائب
و فجاة لاقيت شويه عيال من الحته عندنا قاموا جايين بسرعه ناحية مريم
ومصطفي وقاماو شادين مصطفي و قعدوا يغيظوا مريم ويقولولها
هناخد صاصا...هناخد صاصا
ويجروا وهي تصرخ وتجري وراهم
يمكن مافيش كلمة في الكلام اللي بتقدر تقوله كان ينفع تقوله
بس كانت جريتها و دموعها ولهفتها على اخوها وكل حاجه فيها بتتكلم
منظر خلاني غصب عني اج ري ورا العيال دي واضربهم واخد مصطفي و أديه لمريم في ايدهم
و خليتهم يمشوا وانا امشي وراهم
ومشيت مريم مع مصطفي وهي ماسكه ايده بقوة ومحوطه عليه وعمالع تتلفت شمال ويمبن
ومن ساعتها لحد دلوقتي بسأل نفسي السؤال ده
هي ليه مريم بتحب مصطفي
ايه اللي يخلي بظروف مريم تزعل اوي كده لما ياخدوا اخوها
مه انها يمكن ماتعرفشي عني ايه اخ
وايه اللي بتخلي مريم تجري من بيعد لما تشوف ابوها جاي من بعيد
عشان عارفه انه بيزعقلها وبيضربها
والنتيجه اللي وصلتلها
اننا اتخلقنا ...بنحب
و ان الأصل في فكرتنا الحب مش الكــُره
وان ربنا خلقنا وخلق الحب جوانا لكل الناس
بس ابو مريم هو اللي علمها ماتحبوش
و حبت اخوها وارتبطت بيه اوي لمجرد انه ما أذاهاش في حاجه
يمكن فيه ناس في حياتنا مش هنحبهم لانهم اتغيروا او لاننا اتغيرنا
بس في النهايه
احنا اتخلقنا... بنحب بالفطرة


الحب كالمطر يروي كل القلوب ولكن هناك قلوباً كالبساتين تنبت

زهراً وقلوياً كالصحراء لا تعرف قيمة هذا الحب

على وعد ٍ باللقاء

الثلاثاء القادم ان شاء الله

محمود ابوالعزم

أولاً...ألف مبروك

السلام عليكم ورحمة الله
بما ان النهارده أول تلات أكتب فيه من مدة طويله
فالنهارده يكون فيه تلات مواضيع ان شاء الله
الموضوع ده وبعده البوست الرئيسي بتاع النهارده
وتحت هتلاقوا بوست خاص اضافي للناس اللي بتعز محمود
و لأي حد نفسه يعرف رأيي انا كمان في المدونه

أهم حاجه النهارده اننا عرفنا من كومنتات البوست اللي فات
ان أختنا هنا وفي الفرقه الخامسه همسات داعية اتخطبت وده كان من أسباب انقطاعها
عن التعليق طول الفترة اللي فاتت بس عذرها معاها بقى

صحيح انا ما اعرفشي مين همسات داعية لكن يكفي ان انا وانتم
عرفناها عن قرب من تعليقاتها هنا واعتبرناها واحده من اهل المدونه
اللي هي نفسها سميتها أجمل اسم..رابطة الحب
عايزين كلنا نبارك ليها حتى الناس اللي باركت البوست اللي فات
واتمنى انها تطبع تهانينا دي وتحتفظ بيها زي الدكتوره غاده
عشان مهما حصل تفضل فاكرانا وفاكرة فرحتنا بيها وليها

واتمنى كل يوم يبقى فيه حد مننا نباركله
ألف مليون مبروك وماتنسيش تدعينا في الفرح...خصوصا لو فيه أكل

اشمعنى

بوست النهارده محاولة مستميته لرسم البسمة على وشوش كل الناس هنا
خصوصا زمايلي في سنه خامسه اللي الأجازة جت معاهم بأثر عكسي شويه
وعملت عندهم حالة من الملل والزهق
بس تعرفوا..أنا أكتر واحد كنت محتاج الأجازه دي وبشدة..تفتكروا ليه
لان الناس في الحتة عندنا افتكروني ساقط ورايح جاي بمتحن الملاحق
وليهم حق يعني..ماهو ماحدش هيروح في شهر تمانيه وتسعه يمتحن
الا واحد بملاحق
خصوصا بقى لما كانت رجلي مسكورة وكنت بركب الحمارة لحد الموقف
وببقى لابس ومتنهدم عشان الشفوي وحاطط الكتب أدامي و الجبس باين من تحت
بصراحه كان منظر يموت من الضحك
وكنت ببقى حاسس بيهم بيقولوا الواد ابوملحق الواد راح ابو ملحق جه
المهم القافيه حاجه كانوا بيعملوها زمان..يعني بيختاروا حاجه
ويعملوها فيها قافيه لبعض بحيث الموضوع يبقى منه فيه
يارب تكونوا سمعتوا عنها قبل كده
انا كنت كتبت واحده عن سنه خامسه وبعتها للجروب
انما قافيه النهارده عن الطب كله
كنت معدي مرة ولاقيت اتنين دكاترة امتياز قاعدين سوا
وجه في بالي لو دخلوا قافيه لبعض هيقولوا ايه
وكتبت القافيه دي في ساعتها كده مرة واحده
وكانت دي هتبقى العيديه بس قدر الله وما شاء فعل
يارب يارب يارب ولو سطر واحد بس من اللي تحت يخليكوا تبتسموا
لان ساعتها هحس اني عملت حاجه كبيرة اوي

انت بين الدكاترة.... اشمعني.....يا كبدي عليك
وانت دمــّـك..........اشمعني....كله سكر

انت الهــــــم اللي في حـــياتك...اشمعني...ممتد المفعول
وانت المشاكل اللي في حياتك...اشمعني...زايدة

هيزفــّوك انت ومراتك...اشمعني..على ترللي
وانتو هتاخدوا صور الفرح...اشمعنى...في معمل أشعة
وانت يوم الفرح هتلفــّوا البلد...في عربية اسعاف
هيكتبوا كتابكم....اشمعني...بعد الأكل
المطربه اللي هتغني في فرحكم.. اشمعنى..جفاف راضي
و يدخــّـلولكوا تورتة الفرح....اشمعنى...على شزلونج
وانتو هتقطعوا تورتة الفرح بتاعتكم...اشمعنى...بمشرطين
انتو هتقعدّوا المعازيم في فرحكم.....اشمعنى..بأرقام الجلوس
وانتو الناس هتيجي تزوركم...اشمعنى...في مواعيد الزيارة
هتقضوا شهر العسل...اشمعنى...في العناية المركزه
هتقسموا ا الشقه بتاعتكم.....اشمعنى....عنابر
وانتو هتقسموا شغل البيت بتاعكم... اشمعنى..طبنشيات
مراتك هتركب في البوتاجاز... اشمعنى..أنبوبة أوكسجين
وانت مراتك بعد ما تخيط الهدوم....اشمعني.. كل شويه تغيّر عالجرح
انتو ابنكوا هينزل بعد سبع شهور...اشمعنى..أصله قاطع مستعجل
وانتو ابنكوا هيزل بعد عشر شهور...اشمعني.. هيأجل
انتو قبل ما تبوسوا ابنكم...اشمعنى...هتعقمّوه
وانتو لما تخلفوا عيل مش هتهشتكوه...اشمعنى ...هترجّــوه

انتي مراتك هتنكد عليك...اشمعنى...على ريق النوم
وانت مراتك قبل ما تخلعك....اشمعنى..هتـبنـّــجك

يأكولك في شم النسيم... اشمعنى....ســــرنجة
وانت بتحب مرات السبع.....اشمعني ..عشان سبعة زيك
انت المفروض تتخصص نسا وولاده...اشمعني..عشان يبقى ليك وضع
البالطو بتاعك هياخد مخالفة...اشمعنى ..أصله من غير حزام
وانت هتحط في التانك بتاع عربيتك...اشمعنى..بيتادين تسعين

لما تخلــّـص هيعينوك.. اشمعني...في مستشفي الوداع الأخير
وانت لما تخلص هيعينوك...اشمعنى...في مستشفى شيّعني شكراً

في النهاية يارب تكونوا ابتسمتوا ولو ابتسامه صغيره
وانا مش قصدي أبدا أتريأ على الدكاترة اللي أنا منهم
بس حاولت أرسم ابتسامه منهم فيهم
وعلى فكرة انا مستني تعليقاتكم طول الاسبوع مش التلات بس

الثلاثاء القادم ان شاء الله....احنا مش جيل هفيّة

تالت بوست

في البدايه بعتذر لناس كتير نسيت اذكر اساميها في البوست اللي تحت
مع اني كنت محتاج جدا اسمع رايهم
زي رحيل و فرج
N_e_m
Smile
وناس كتير تانيه
ماحدش بزعل مني وبرضو هستني آرائكوا
انا متشكر جدا لكل كلمة حلوة اتقالت في البوست اللي فات
كان نفسي جدا أرد بس مش عارف أرد أقول ايه

حاجه بس نفسي أقولها في موضوع قلة الثقة ده
حقيقي انا مش عارف اذا كنت فعلا قلة ثقة زي ما ناس كتير منكم قالت
وانا عارف انهم بيقولوا من خوفهم على
ولا الموضوع مش موجود زي ما احمد سعيد وجهاد قالوا
انا كان نفسي اقول كلام كتير اوي في الموضوع ده
بس عشان انا طولت النهارده اوي
كل اللي اقدر اقوله
اني زي ما محمد الخطيب قال
هكتب كل اللي نفسي فيه
او بمعني أصح هكتب كل اللي انا حاسس بيه
وهتكلم على طبيعتي ومايهمنيش لو أي حد فهم حاجه من كلامي انا مااقصدهاش

أما بالنسبه لطلب هبهوبه اني انا كمان اشارك معاكوا في الاستفتاء ده
فحقيقي انا حيرتي اكبر من حيرتكوا بكتير اوي

اكتر بوست حبيته هنا على المدونه ده سؤال مش هقدر أجاوب عليه
بس أقدر أقول ان لما حد يطلب بوست معين واكتبه
دا بيبقى اجمل حاجه بالنسبالي
وعشان كده فيه هديه في آخر البوست ده

أكتر بوست ماحبيتوش
هو زي ما انتو قلتوا بوست قفل المدونه
انا يمكن ماوضحتش اوي انا كنت هقفلها ليه
بس صدقوني اي حد مطرحي كان هيعمل كده
بس اللي خلاني أرجع وقفتكتم جنب الواحد
واني اكتشفت ان فيه ناس كتير انا لا اعرفها ولا عمري شفتها
ولا حتى بيعلقوا هنا
بس المدونه بتمثل ليهم حاجه
وكان اكتر كلام بيأثر في لما حد يقول ان بابا او ماما بيقولولك ماتقفلشي المدونه
واكتر كلمة أثرت في أوي مش عارف ليه
بنت ما اعرفهاش بعتتلي على الميل وقالتلي اخواتي الصغيرين بيحبوك اوي
وحافظين جاموستنا ولدت وبيقولولك ماتقفلشي المدونه
عشان كده وعشان حاجات كتير تانيه ماكانشي ينفع أقفلها

ايه الجمله او البيتين الللي ممكن ييجوا على بالي
حقيقي سؤال صعب اوي
كل الجمل اللي كتبتها طالعه من جوايا اوي
بحس ان كل اللي شفته وسمعته واتحكالي وحسيت بيه
كل حاجه في حياتي بتتعصر عشان تتطلع جمله من دول
بس لو هختار اول جمله بتيجي على بالي
هختار التلات جمل دول

اذا لم تستطع أن تكو ن مستقبلا باسماً في حياة من تحب
فعلى الأقل حاول ألا تكون ماضي مؤلم

ما أصعب أن يأتيك الحب الحقيقيْ بعد أن تكون قد استنفذت
كل مشاعرك في حبٍ لم يكن لك

إذا كانت أعمارنا تقاس بلحظات السعادة الحقيقة التي عشناها فأنا عمري أقصر من المدة التي قرأتم فيها هذه الجملة.........وإذا كانت أقدرانا تقاس بما قدمناه من خيرٍ حقيقي ٍ في هذه الدنيا فأنا أقل حجما من النقطة التي وضعتها في نهاية هذه العبارة .



ولو هختار ابيات
اكيد هحتار القصديه اللي كانت يبب في اني اشوف النبي صلي الله عليه وسلم
وهختار أول بيتين في الآن تبتسم الدموع
أسْلمْت ُ روحـــي والجوارح كلها ...لك يا إلهي فانتهت بك غربتي
لما سجدت ٌ ولامس الوجه الثرى..أحسست أني قد ملكت ُ كرامتي

يمكن لاني كتبتهم بعد توقف سبع شهور عن الكتابه وكانوا سبب في اني ارجع واكتب من تاني

وهختار الفوطه لانها أنجح حاجه كتبتها

ايه الحاجه اللي شايفها في المدونه ونفسك تفضل موجوده
انتم
يمكن كتير من الناس اللي بتعلق هنا انا ماعرفهمشي شخصيا
ولا شكليا حتى...بس بقيت بحس اني اعرفهم اوي
لدرجة ان لو الموضوع فيه اختيار جزء مثلاً بقيت
بتحدى نفسي كل حد منهم هيختار ايه...وكل انسان بيبقى ليه طلة
حتى لو من شوية كلام مكتوبين في صفحة نت
وبزعل لو لاقيت حد منهم ماعلقشي المرادي وبزعل اكتر لما حد ينضم لينا هنا
وفجأة ماألقيش اسمه ويبعد عن المدونه

ايه الحاجه اللي موجوده ونفسك ماتبقاش موجوده

نفسي ماحدش يبقي

anonymousغير معرّف
انا بدي العذر لأي حد مش عايزنا نعرف هو مين
لان ده من حقه
بس بيبقى نفسي يسيب ولو اسم مستعار ليه هو وماحدش يعرفه غيره
نعرفه بيه هنا ونسأل عليه لو غاب عننا




ايه الحاجه اللي مش موجوده ونفسك تبقى موجوده
هي الحمد لله موجوده
بس انا بحلم تكبر اكتر واكتر
الروح الحلوه الموجوده هنا
المدونه حققتلي حلم كبير اوي بحلم بيه من زمان
ان مكان واحد يجمع كل الناس اللي بعزهم وبيعزوني
ونفسي كل الناس دي تكتب رايها مش فيّ كمحمود
في اي موضوع وكلهم يسمعوا بعض و يعرفوا بعض
حتى الناس اللي بتبعتلي على الميل والناس اللي بتقوللي مني ليها
نفسي كل دول يبقوا هنا ويبقوا مش زوار المدونه ولا قراء المدونه
ولا حتي أصدقاء المدونه...نفسي يبقوا أهل المدونه

بيهيألي كده رضيت على معظم الأسئله
وعايز اقول كلام كتير اوي
بس خلوه لبوست أنا ..وانتم.. وهذه المدونه
اللي نويت اسيبه لعيد ميلاد المدونه ان شاء الله
اللي هيبقى

21/11ان شاء الله
ومش مشكله تعلقوا هنا
كفايه علي اوي تعلقوا فوق
انا كده تعبتكوا اوي النهارده
وعلى فكرة انا هدفع لبتاع النت كتير اوي النهارده

عشان اكتب التلات بوستات دول

واحتمال كبير اكنس السيبر وامسحه

بس فداكوا

اه صحيح..كنت هنسي الهدية

"هكذا تمنيت أن أحب"
يا رب...
إنت عارف..
اني ياما حاولت أبعد
بس كنت في كل مرة
ألقى شئ بياخدني ليها
و أمّا أشوفها
يبتدي الإحساس في قلبي
يجري ناحية نور عينيها
ييجي مليون حاجه تايهة
منّي... بس لاقيتها فيها
بس خايف حبي ليها
يبقى شئ يشغلني عنك
يبقى حاجه تاخدني منك
و ألقى شئ جواي يصرخ... ليه تسيب نفسك لحـــــبّك
ماتحاولش تحب......إبعد.....و إقتل الاحساس في قلبك
و أبدأ ابعد... و أبدأ أنسى
بس مهما تدور سفينتي
عمرها ما تلاقي مرسى
و أبدأ أسال نفسي تاني
ليه بتبعد؟؟.. ليه بتهرب؟؟
ليه تقول عَالحب ذنب
رغم ان الحب شمسُه
مالية بالنور كل قلب
ليه بتهرب مـِ المواجهة
رغم ان الكون دا كله
مملكه... و الحب تاجها
و أبدأ أسأل نفسي تاني
أكتم الاحساس في قلبي... ولاّ أقوله
لأ هقوله

مش هسيب إحساسي بيها... أي شئ يمنع وصوله

أيوة لازم ....تبقى حاسه بحبي ليها
أيوة لازم تبقى عارفه
إني فعلا مشتريها
إنما برجع و أخاف
يتخدش توب العفاف
و البراءة اللي في عينيها
و أبدأ أسأل نفسي تاني
ليه أعلق قلبها بقلبي اللي لسه
زي حلم مالوش ملامح
لسه واقفة الدنيا ضده
لسه مش عارف طريقه
أيوة أنا بهواها لكن
حبها اللي في قلبي ساكن
بيناديني يقوللي ابعد
ماتحاولشي تكون أناني...لو صحيح بتحب.. سيبها
سيبها يمـــكن حـد تاني... يستـــــحق يكون حبيبها
أيوه هبعد.....لازم أبعد
مش هقف في طريق حياتها
مش هحاول حتى أكون
ذكري من بين ذكرياتها
بس صعب

صعب جدا
صعب يملى مكانها عندي .... مهـــما يحصل أي واحده
فيه بــشر مــــــش بنقابلهم... في الحياة غير مرة واحده
يا رب
خوفي مـــــــنك.. حبي ليها
حبي ليك والخـــوف عليها
كل دول أحاسيس في قلبي
عايشة فيّ وعشت فيها
و أمّا تاه القلب بينها
سبت كـــــل الناس.... وجيتلك
جيت ومن غير خوف حكيتلك
إنت أكــتر حد عـــارف... انها أحــــاسيس بريئة
بس تايهه في قلب قلبي.... لسه مش لاقية الحقيقة
يارب
مش هضيع لو مني ضاعت.... بس هبــقى أنا أقوى بيها
اهدى روحـــي يا رب دايما.... انت وحـــدك أدري بــيها
للي فيه الخــــــير لقــــــلبي.... لو مــــعايا .. أو ناســيها
و اللي يبـــقى يا رب برضه...خير في نفس الوقت.. ليها

على وعد ٍ باللقاء

السلام عليكم ورحمة الله

لسه فاضل ناس كتير نفسي اوي اسمع رايهم في البوست اللي تحت
مش عايز اقول اسامي عشان ما انساش حد
بس اللي في بالي دلوقتي

عمر
أحمد سعيد
بيور بلو
اكوا بلو
دوك ميرو
مصطفي علام
اسلام هجرس
امضاء انسان
سنووايت
جهاد
سماح
همسات داعية
فجرٌ آخر
H
SLUVSWHO
ELROUSHA
انا خلاص ان شاء الله مش مسافر الأجازه دي
ناس كتير خوفوني من شبهة الشغل في شرم
ان شاء الله من التلات الجاي هترجع تدوينات التلات
بس اتمنى كل الناس تعلق على الموضوع اللي تحت اولا
انا قريت كل التعليقات
وكل كلمة فيها سابت جوايا حاجه
و رغم ان كلامكوا اكبر واجمل من اني أرد عليه
بس انا هخلي كل اللي نفسي اقوله
في بوست اسمه أنا ..وانتم ..وهذه المدونه
بس عايز اسيبه شويه لاني عايزاقول فيه كلام كتير اوي

اقابلكوا الاسبوع الجاي ان شاء الله
ولو انتو حابين تختاروا بوست التلات الجاي باذن الله

ممكن تختاروا من بين الاربع مواضيع دول

حين إقشعرّ جسدي
لما هنكون دكاترة
تدخلى قافيه في الطب كله
موعدٌ بغير موعد

حتى يعود الثلاثاء

السلام عليكم ورحمة الله
اتأخرت كتير أنا عارف
معلهشي اصلي كنت بحضر موضوع للمدونه عن المدونه
اسمه الثلاثاء يعود
كانت وقفه طويله مع نفسي ومعاكوا قبل مرحلة جديده في عمر المدونه
وكانت هتبقى بدايه لعودة تدوينات الثلاثاء ان شاء الله
بس اليومين اللي فاتوا جاتلي فرصة شغل في شرم الشيخ
واحتمال اسافر ان شاء الله
هو لسه احتمال صغير
بس قلت أأجل الموضوع حتى يقضي الله أمرا ً كان مفعولا
خصوصا اني مش عارف هلاقي في الحتة اللي هشتغل فيها نت ولا لا
ولحد ما ما الموضوع يبان
هنشر اخر جزء من البوست ده
هو مش استفتاء بمعنى استفتاء
بس رايكم هيفرق معايا كتير جداجدا جدا جدا جدا...من هنا لحد الصبح

مستعدين؟؟؟
ياتري ايه اجمل بوست قريتوه هنا على المدونه؟؟

وايه البوست اللي ماكنتوش تحبوا تقروه هنا

ياتري من الحاجات اللي كتبتها هنا لو جت سيرة المدونه ادامك
ايه اول بيتين او اول جمله هتيجي في دماغك
اللي ممكن تكون علقت معاك اوي

ايه الحاجه اللي شايفها في المدونه ونفسك تفضل موجوده

وايه الحاجه اللي موجوده ونفسك ماتشوفهاش

اكتر حاجه بتحب تقراها هنا
الشعر الديني اللي زي الآن تبتسم الدموع وقلوب في طريق النور
ولا الفكاهي شويه اللي زي الفوطه وبتوع آداب
ولا اللي بيقولوا(بيقولوا)عليه رومانسي زي أرجعلها و كوني أنا
ولا الجمل اللي زي زي همسات من رحيق الماضي
ولا الجمل الهزليه شويه زي فيكتيمز

ياتري انت بتشوفني بكتب كويس فصحي ولا عامي ولا مابعرفشي اكتب خالص

رجاء خاص
ماحدش يقول انت كل اللي بتكتبه حلو يا محمود
خلوا الاستفتاء ده بجد يكون دليل لي في الفتره اللي جايه
ولو اي حاجه مضايقه اي حد يقول بصراحه وانا مش هزعل والله
ورجاء كل الناس تشترك في الاستفتاء ده
حتى الناس اللي انا عارف انهم مش بيحبوا يعلقوا
ومش شرط يكتبوا اسمهم لو مش حابين
هتستنى رايكم بصراحه ومن غير ذرة مجامله
ولو حد عنده اي اقتراح بخصوص المدونه يقوله
او حاجه غلط شايفها في المدونه ياريت يقولها
اتفقنا

البقاء لله

السلام عليكم ورحمة الله

قدر الله وما شاء فعل

انا آسف جدا ني مش هقدر اقدم العيديه اللي وعدتكم بيها النهارده

امبارح بعد الفطار توفي جوز عمتي

ربنا يرحمه

واحد من الناس اللي كنت بحبها وبحترمها جدا

الجنازه لسه خلصانه دلوقتي

وجيت دلوقتي عشان سببين

عشان اعتذر عن بوست النهارده

وعشان اطلب من كل حد كان داخل يقراه انه يدعي ولو دعوه واحده

ان ربنا يرحمه ويغفرله

وان ربنا يصبر عمتي

اللي هي اقرب حد لي بعد والدي ووالدتي واخواتي

واللي هي احن واطيب قلب عرفته في الدنيا دي

وعشان ما اابقاش قطعت موضوع العيديه اللي بحب اعمله كل سنه

هعيد عليكوا بآخر تلات ابيات كتبتهم

اختــرت ُ الله َولن أرضى...للقـلب إلهاً غير اللهْ

عيني لم ترَهُ ولكـــــني...قلبي بعيون الحب يراهْ

إن ْ فخر َالناس بما ملكوا...فسأفخرُ أني عبد اللهْ

هدية ليلة القدر

السلام عليكم ورحمة الله

اترددت كتير جدا قبل ما انزل البوست ده

ولما احكيلكوا ليه هتعذروني

وما خدتش القرار ده الا بعد ما استخرت ربنا سبحانه وتعالي

ويمكن دا اطول مقدمه كببتها بس في نفس الوقت هي اهم مقدمه

كتبتها وهكتبها هنا ان شاء الله

والاختلاف النهارده مش في القصيده ولا في كلامها

الاختلاف في قصة القصيده

انا يمكن ما كتبتش شعر بجد غير وانا في اولى كليه

في المسجد اللي حكيتلكوا عن قبل كده

كتبت اول بيتين في شعر المناجاه

أيا من قد تـــــــفرد بالبقاء....دعوتك..هل ستقبل لي دعائي؟

جنيتُ من الذنـــــــوب كملء بحر ٍ...وجئت أجر آثامي ورائي

والحمد لله كملت وبقت قصيده مش فاكرها بصراحه

واشتركت بيها في معرض سنه اولى

وربنا كتبلها قدر كبير من النجاح الحمد لله

بعدها فضلت حوالي شهرين مش قادر اكتب اي حاجه

وكان عندي اعتقاد اني مش هقدر اكتب حاجه زي كده تاني

لحد ما كتبت القصيده اللي تحت دي

فاكر اني كتبتها في ليله

كان الاحساس بالذنب هيقتلني

واحساسي بالتقصير هيخنقني

في فتره كنت تايه فيها ومش عارف ولا شايف اي حاجه

خصوصا بعد وفاة والدي الله يرحمه

وسجلت الكلمات البسيطه دي

في اول ورقه في مذكرة الupper limb

ودخلت نمت وليلتها اجمل هديه واجمل تكريم في حياتي كلها

لاني لما نمت رأيت النبي صلي الله عليه وسلم بيقرأ القصيده دي

ومش بس كده دا كان بيقرأها للصحابه من حوليه

ومن نفس المذكرة اللي كتبت فيها القصيده

عمري ماكنت سعيد في حياتي اد اللحظه اللي صحيت فيها من نومي

يمكن بفضل الله ماكانتشي اول مرة اشوف النبي صلي الله عليه وسلم

بس النبي يقرا شعري أنا

شئ استكترته ولسه مستكترته على نفسي وعلى شعري

عارفين لما حد يطلب حاجه منك وتعملهاله

و تعملها بتقصير كمان

وبعد كده يديك مليون جنيه قصاد اللي عملته

هو دا كان احساسي

كان احساسي انه فضل من ربنا لا ولن أستحقه

حتي القصيده نفسها
ماكانشي فيه حاجه زياده
حتى وقتها ماكنتش اعرف لا أوزان ولا قوفي ولا اي حاجه
وحتى ما كنتش لسه كملت تمنتاشر سنه
عشان كده السبب الوحيد للرؤيه دي كان كرم ربنا ليس أكثر

وبعد كده عنت القصيده لحد اللحظه اللي احنا فيها دي

رغم ان عدد قليل جدا من زمايلي واصحابي هما اللي كانوا قروها

والنهارده
وانا بدور في كل دفاتري على هديه اقدمهالكوا
في ليله نتمنى من الله انها تكون ليله القدر
ما لاقيتشي غير الهديه دي غير الهديه دي
اني اقدم حاجه النبي صلى الله عليه وسلم قرأها

نفسي أقول درس اتعلمته من القصه دي
رضا ربنا حاجه قريبه مننا اوي
بس احنا مش حاسين
او يمكن حاسين اننا مش هنقدر

انا ماعملتش حاجه زياده ومافبّاش حاجه زياده عن اي حد منا
بالعكس لو الذنوب بتتعد فانا هكون للأسف اكثركم ذنوبا واكثركم تقصير
ولا أجد في نفسي شئ أزكي بيه نفسي على الله
غير شئ من الرضا وشئ من الصبر
و فيه بيتين بحبهم اوي لمحمد توفيق زميلنا وواحد من اقرب الناس لي بيقول فيهم
يارب
لو قلت أن جميع خلقك أصبحوا ...في فيض نورك كالسرا المستنيرْ
لم يبقَ منهم غير عبد ٌواجد ٌ..لعلمت أن القول حتما ً لي يشيرْ

اهو انا حاسس بالاحساس ده دايما
وطول الليل والنهار بيرن في وداني حديث النبي صلي الله عليه وسلم
عن المرائي اللي بييجي لربنا سبحانه وتعالي بعمل كتير جدا
ورنا يقوله فعلت ليقال وقد قيل
خايف يكون كل اللي عملته كده
بس في نفس الوقت كلي ثقه في عفو ربنا ومغفرته
وعندي دايما احساس ان فيه حاجات صغيره في حياتنا
ممكن نرضي بيها ربنا لما نعملها ابتغاء وجهه
زي اننا نساعد حد يعدي الطريق مثلا او نحمي حد من الناس الغلابه
اللي العيال الصغير بيزقلوهم بالطوب في الشارع
حاجات صغيره زي دي بحس انها كبيره او عند ربنا
وأكبر دليل شقته على كده
كان في آخر مرة شفت النبي صلي الله عليه وسلم
كانت في اجازه سنه تانيه
كانت الرؤيه فيها بشري لواحد من اصحابي العزاز جدا
كنا شغالين انا وهو في الساحل الشمالي
وكنا ملتزمين جدا الفتره دي الحمد لله
وانا نزلت عشان الدراسه وسبته هناك آخر يومين
بعد اليومين دول شفته في الرؤيه دي
ولما رحت أبشره سألته اذا كان عمل حاجه زياده اليومين دول
قال لا بس قبل ما ينزل البلد

لقى محفظه فيها مبلغ كبير جدا

كان ممكن يحطها في جيبه وينزل من غير اي مشاكل

بس هو اختار ربنا
ودور على صاحبها ورجعله الفلوس

ربنا قريب مننا اوي يا جماعه
في آيه جميله اوي اوي في القرآن
ويريد الله أن يتوب عليكم
مافيش كرم ولا فضل أكتر من كده

حاجتين نفسي اقولهم
معلهشي طولت عليكم
اول حااجه انا كان صعب على اوي اني احكي كل الكلام ده
دايما اسمع ان بلاش الحاجات دي تنحكي الا للناس اللي بنحبهم وبيحبونا
وانا استخرت ربنا قبل ما احكي الحمد لله
وكمان انا بحب كل الناس هنا

وأظن ان لي قدر ولو صغير اوي من المعزه جوه قلوبهم
وهو ده اللي خلاني احكي وقلبي مطمن

و آخر حاجه نفسي اقولها
الليلادي ممكن تكون ليله القدر
ربنا يغفر لنا كلنا
بس ربنا مش هيغفر لنا الا اذا كنا مسامحين بعض

انا أشهد الله واشهدكم اني مسامح اي حد جرحني او ظلمني او زعلني
وبطلب من اي حد زعلته او ظلمته في اي حاجه
انه يسامحني عشان ربنا يسامحني
دا رجاء خاص لكل الناس
لو كنت زعلت اي حد او قصرت في حقه يسامحني

اسيبكم مع الهديه
اللي سيبتها زي ماهي من خمس سنين
بكل كسورها ولخبطتها وكلامها البسيط
واحساسها اللي نفسي يوصل للكل

في رياض التائبين

إلهي جئت بابك في خـــــشوع ٍ.....أبوح إلــــيك بالماضي الأثيمْ

بغير القصــد يا مــــــولاي إني....ضللت عن الصراط المستقيمْ

أفـــــــكر بالـــــتي لا ريب فيها......فيعـــــــصرني لها هم ٌ أليمْ

إذا ما انهــال فوقي تراب قبري.....وتركــوني مع عملي الهشيمْ

أحاسب عن ذنــــوب ٍ ماضيات ٍ....وأسئل عن صغير ٍ أو عظيم

أجيب بأنني جئت المعاصي؟؟!!....وأنــي كنت في الدنيا مُــلــيم

و أبعثُ من دجى ظلمات قبري.....وإن كانت عظــامي كالرميم

ليوم ٍ يجعل الولـــــــــدان شيباً......فليس المـــــلك إلا الحكــيمْ

فلن أنجو بمـــــالٍ أو بنـــــون ٍ ... فلــن يجدي سوى قلب ٌ سليمْ

وقدمي ترتجفْ فوق الصراط......فلا أجـــــد الولي ولا الحميم

فهل انجو الي طيب الجــــنان ِ...وهل أهوِي آلي غلـْى ِ الحميم؟؟

ألم أعلم بأن المــوت حـَــتـْـمٌ......وأني لســــــت في الدنيا مقيم

أعوذ بنور وجهــــك يا الهي.....و أطرق باب حلـــمك يا حليمْ

و أرجو من لدُنك َ إلهي عفواً.....يداوي دفـــــــئه القلب السقيم

لنفسي يا إلـــــهي لا تكــِـلني..... فترميــــني إلى سوء الجحيمْ

فكم أهفو لمــــــيلاد الأماني.....ولكـــن ْ للـــدنا رحـــــمٌ عقيم

إلهي لن أصِفْ ذلي وضعفي......فإنك يا إلــــــهي بي علـــيمْ

ذنوبي ما لها حصــــرٌ ولكنْ......إلـــهي أنت رحــــمنٌ رحيم

إلهي في رحـــابك فاحتويني......و أكـــرمني بعفوك يا كريمْ

لتهدأ أبحـــــرٌ من حزن قلبي......ويصبح ريحها العاتي نسيمْ