انت....بتقدر تسامح؟؟؟؟؟

السلام عليكم ورحمة الله

ازيكم يا جماعه

يارب يكون الجميع بخير

وماتكونشي الامتحانات بدأت تعمل عمايلها

الفرح عدي على خير الحمد لله

أنا دايماً بشوف الفرح مش طبل ورقص وأكل وكده

الفرح انك تحس ان كل اللي حواليك فرحانينلك بجد

وهي دي أكتر حاجه أسعدتني في الفرح ده

الفرحه اللي شفتها في عيون زمايلي وقرايبي

وزمايلي اللي عمر ماهنسى وقفتهم معايا

والناس اللي سابت امتحانتها وجت

والناس اللي نقطتني ورفعوا راسي أدام أهلي

ماعدا بتوع المحله.....بالعند في فرج..اللي كان منور الفرح يعني

لا بجد انا بشكرهم كلهم

وبـتأسف لكل حد غصب عنب في وسط الزحمة اللي أنا كنت فيها غصب عني نسيت أدعيه

وكنت ناوي أنزل صورة لي من الفرح

بس قلت بلاش

أنا من أول ما عملت المدونه وانا قلت بلاش موضوع الصور

عشان ما أخسرشي الناس اللي بتحبني

أصل أنا بطلع وحش في الصور

"قال يعني الواد حلو في غير الصور"

دا مصطفي علام اللي هيقول كده

عقبالكوا كلكم يا جماعه

بس تبقوا تدعونا هنا على المدونه واحنا كلنا نيجي ان شاء الله


البوست بتاع النهارده أنا فشلت اني أكتبه

مش عشان الوقت بس لاقيت نفسي مش هقدر أكتبه لانه صعب جدا

واحد من أعز أصدقائي طلب مني اني أكتب عن التسامح

بس ماقدرتش

يمكن عشان انا رأيي في الموضوع ده هيكون عكس ما ناس كتير متوقعه

هو سألهالي واضحه وصريحه

لو حد جرجك جرح جامد أوي وخصوصا لما تكون بتحبه أوي

وبعدتوا بعدها وبعدين رجع هو بيطلب منك تسامحه وترجعوا زي زمان

هتسامحه وترجعوا زي زمان
؟؟؟؟؟؟؟؟؟؟؟؟؟؟

انا اجابتي برضو كانت واضحه وصريحه

أسماحه آه

نرجع زي زمان لأ

هو كان رد قاسي شوية

بس ده من كتر التجارب اللي عشتها واللي سمعتها في الموضوع ده

فيه أنواع من الجروح كده بتلتئم آه بس بتسيب أثر على جلدك

يعني مابتزفشي بس دايما بتفكرك باللي جرحك

هو ده الي كنت أقصده

انك ممكن تسامحه....انما ترجعوا زي زمان لا

عشان هيفضل الجرح ده سايب حساسيه ما بينكم مهما حاولتوا تنسوه

أنا مثلا حكيت حاجه لواحد من أعز أصحابي

وبعدين هو حكاها لناس تانيه

زعلت منه شويه....وبعدبن سامحته واتصالحنا

بس غصب عنب لحد دلوقتي مابقيتشي بقدر أحكيله ولا أفضفض معاه زي زمان

غصب عني مع اني واثق فيه تمام الثقه

أنا كمان جرحت حد بدون ما أقصد

وزعل مني واتاسفتله كتير لحد ما اتصالحنا

بس غصب عننا ماقدرناش نرجع زي الاول

عارفين لما قميصك اللي مدفيك ينقطع

وبعدين تجيب حته قماشة من قميص تاني وتكملها بيه

القميص هيرجع يدفيك انما مش هيرجع زي الاول

هيفضل شكل الحته الغريبه دي يفكرك ان القميص اتقطع

هو ده رايي اللي انا حاسس انه صعب شويه

عشان كده أنا سايب البوست ليكم انتو اللي تكتبوه

وتقولوا رأيكم وكلنا نسمعه

يمكن كلنا نوصل للرأي الصح

ماشي؟؟؟؟؟؟؟؟

أنا في النهايه بس حابب أهدي أربع أبيات كانوا مكتوبين في أول المدونة

حابب اهديهم لكل أصحابي وكل الناس اللي على المدونه هنا

ياما ناس بتكون قرايبك.....عمرهم مايشيلوا همك
ياما اكتر حد ظالمك.........يبقي خالك ولا عمك
ياما فيه انسان غريب.....تلقى حضنه بسرعه ضمّك
و أما يبقى ما بيكوا عشرة......يبقى من لحمك ودم

دعواتكوا يا جماعه أصل أنا مزنوق في المذاكرة زنقة الحرامي اللي اتمسك في المولد

ربنا يوفق الجميع

الدعوة عامة

بسم الله الرحمن الرحيم
الحاج عزام ابراهيم عطا الله..................الحاج عبد الباري عبد الوهاب أبوالعزم
                                         الدكتور محمود سليمان أبوالعزم(أنا يا جماعة)واخدين بالكم

يتشرفون بدعوة سيادتكم والعائله الكريمة لحضور حفل عقد قران وزفاف

نجل الأول......................وكريمة شقيق الثاني وشقيقة الثالث
الدكتور أحمد..............................................الدكتورة حنان

وذلك بمشئية الله تعالى في الساعه التاسعة من مساء يوم السبت الموافق14/6 بقاعة السعد
امتداد طريق الغزل طنطا
والعاقية عندكم في المسرات
تلغفرافيا..أبوالعزم وعطا الله
ودامت دياركم عامرة بالأفراح
مطبعة دار الصحوة بالسنطة

كلمة أمل

يا خالقي

ماكــــــنت يوما يائساااااا

رغم الضنى..رغم الأسى

رغم الجـــــــراح الماضيهْ ْ

مادام نــــــــــــورك داخلي

مادام حـــــــــــــبك شاغلي

والنفــــــــــس نفسٌ راضيهْ

سيــــــظل قلـــــــبي باسماً

وتظـــــــــــل روحي دائماً

في درب حبّــــك ماضيهْ



يمكن يكون الاسبوع اللي قات ده من اصعب الأسابيع اللي أنا عشتها
شفت فيه مواقف كتير كانت صعبه جدا علي
كان آخرها امبارح بوفاة جوز عمتي
يس كنت مصمم آجي و اكتب النهارده
لاني محتاج جدا اني اتكلم
محتاج اقول لحد هنا وكفايه حزن
محتاج اعيش اليومين دول وفرح اختي اكتر حد بعزه واكتر حد قريب مني بعد امي وابويا وانا بكامل قوايا النفسية
محتاج ابعت كلمة امل لنفسي قبل أي حد
و أبعتها لكل ولأي حد

كتير بتمر علينا لحظات صعبة
لحظة بتحس فيها ان الدينا هتقف
لحظة تبقى خايف من الحظة اللي بعدها لانك مش عارف الللحظة الي بعدها هتبقى زيها ولا اوحش منها
لحظة يعصرك فيها ندمك على اللحظة اللي قبلها
ويعصرك خزنك في اللحظة الللي عشتها
ويقتلك خوفك من اللحظة اللي بعدها
يمكن تكون في اللحظة دي معذور لما تفقد ثقتك بنفسك
بس مش هتبقى معذور أبدا لو فقدت ثقتك في ربنا

لو أن حياتنا تقف عند كل جرح لما عشت أنا حتى أكتب هذه الجملة وماعشت أنت حتى تقرأها

كلمة امل لكل الناس
ماحدش عارف الخير فين
ماحدش عارف الحد اللي اتخلى عنك وسابك لو فضل في حياتك كان هيعمل فيها ايه
وماحدش يعرف الحاجه اللي ضاعت منك لو كانت فضلت معاك كانت هتبقى نعمة ولا نقمة
ويمكن يكون الحد اللي سابنا حد كويس ويمكن يبان لنا ان احنا مش هنقدر نعوضه بس ما دام ربنا اختار ان احنا نفترق دلوقتي يبقى اكيد الفراق ده كان فيه خير لينا وللحد ده

قد نفترق لا لعيبٍ فينا ولا لخطأ ٍ منا ولكنها إرادة القدر التي علينا أن نرضي بها ونسلم بحكمتها فقد نكون
كالخطوط المتوازية التي سارت وسوف تسير الى جوار بعضها الي الأبد ولكنها أبداً لن تلتقي

أما لو كان الحد ده حد قريب مننا بجد زي ايويا الله يرحمه بالنسبالي فأكيد ان الحد ده هيفضل جوانا
وهتفضل ذكراه هي اجمل شئ في حياتنا حتى لو كانت الذكري بتالمنا لانه مابقاش معانا
بس هتفضل الذكري هي اجمل شئ ممكن أي حد يسبهولنا...وخصوصا لما يبقى حد غالي علينا اوي

الذكري... هي الشئ الذي كلما ابتعدنا عنه اقترب منا أكثر
الذكري ..بقايا من الحنين في حنايا الروح وبقايا من الروح في ثنايا الحينين
الذكري...لقاء ٌ لن تمنعنا كل الحواجز عن الحضور في موعده....حتى ولو كان ذاك اللقاء في الماضي
الذكري..طريقٌ قطعناه حتي النهاية فاكتشفنا أن أمتع ما فيه كان خطواته الأولى
الذكرى...شجرة ٌ استطاعت أن تحتفظ بخضارها بعد أن استسلمت كل أشجاره لتيار الخريف
الذكري...هي الوجع الممتع...الذكري...هي الألم الجميل


في يوم كنت في السنطة ومتأخر جدا على الرواند
و كنا الصبح بدري أوي والعربيه بتاخد وقت على ماتحمل
وحاجه حصلت عطلتني عن عربيه كان فاضلها واحد وتمشي
واستنينت العربيه اللي بعدها وقعدت تحمل كتيييير اوي
وانا قاعد الوم في نفسي..ماكنتش خرجت بدري شويه..ماكنتش مشيت بسرعة شويه ولحقت العربيه الللي قبل دي
ومشيت العربيه اللي انا فيها لاقينا العربيه الاولانية عاملة حادثه في الطريق
ياااااااااااااااااه....بقى ربنا كان رحيم بي اوي كده وانا بتبتر على نعمته؟؟؟

مش هنقول بلاش تزعل على شئ راح مننا
بس على الاقل نبقى معترفين من جوانا بحكمة ربنا في كده
و يبقى فضل كبير اوي من ربنا لو عرفنا ان أي شئ يضيع مننا من متاع الدنا دي..فاكيد ربنا شايل لنا حاجة احسن ...ولو حتى الحاجه دي ماكانتشي في الدنيا
فاكيد ربنا هيعوضلها بكرمه وفضله في الآخرة

ما أوسع تلك الدنيا اذا عشت بداخلها ..وما أضيقها إذا عاشت بداخلك

حب حياتك من غير ماتحب دنيتك
يمكن تكون معادله ضعبة
بس تقدر تحققها

حب الدنيا هو أن تعيش لكي تعيش.. أما حب الحياة فهو أن تعيش كما تريد أن تعيش

كلمة أمل لكل حد حلمه ضاع وفضل بقية عمري بيكي عليه
الحلم اللي يهزمك يبقى مش حلم

الحلم يد ٌ تأخد بأيدينا نحو النور.... سواء حققناه أم لم نحققه
احنا مانعرفشي الخير فين
احنا دايما باصين تحت رجلينا
دايما بنلوم القدر

لا تلوم القدر إذا أضاع حلمك..فإن كان حلمك هو ما اخترته لنفسك...فان القدر
هو ما اختاره الله لك...فكيف لقلوبنا الجاهله أن تلوم الله على ما اختاره لنا؟


كلمة أمل لكل حد حزين
انت تقدر ماتبقاش حزين بثقتك في ربنا وقربك منه
سيدنا موسى كان البحر أدامه وفرعون من وراه و وبكل ثقة قال جملة المفروض تبقى شعارنا كلنا في الدنيا دي.....كلا إن ّ معي ربي سهيدين
احنا كمان لازم يكون عندنا الثقة دي في الله
ومهما كان الموقف اللي احنا فيه صعب فمافيش حاجه صعبة ولا مستحيلة على ربنا

في قوانين البشر – ممكن..صعب...مستحيل.- اما في قانون الله فلن تجد غير كن فيكون

احنا نقدر نبقى أقوى من أي جرح ومن أي حزن
لو احنا عايزين نكون كده فعلا

انك لا تستطيع أن تمنع الحزن أن يكون صيادا ًولكنك تستطيع ألا تكون الفريسة


كلمة أمل لكل الاطفال اللي قابلتهم في رواند الاطفال

ما اظنش ان ماحدش معانا في سنه خامسه ما اتأثرشي بالرواند ده

واظن انه لو كان جبل كان هيتاثر

قد يعجز الطبيب أن يعطي لمرضاه علاجا ناجحا ولكنه لن يعجز أن يعطي لهم أملا في حياة ً كريمة حتى النهاية

نفسي أقولهم ان اللي هما فيه ده اختبار وابتلاء من ربنا

يمكن ربنا عايز يختبر بيهم آبائهم ويكفر بالمرض ده عن ماضيهم

او يمكن بيكفر ذنوب المستقبل بتاع الأطفال دول

أكيد ربنا ليه حكمه في كده


حتى لو احنا عجزنا عن ان اننا نشوف الحكمة دي لازم نسلم بوجودها

سيدنا موسى رغم كل علمه ماقدرشي يعرف الحكمة اللي ربنا وضعها في افعال سيدنا الخضر

ويمكن تكون الجكمه دي لينا احنا
اللي معانا الصحة ومش حاسين بنعمة ربنا علينا
كلمة أمل على لسانهم
يمكن يبقى صعب عليهم يفهموها
بس اكيد حسوها في الايدين الممدوه ليهم والقلوب اللي بتحلم ليهم والعيون اللي كلها أمل في شفاهم
ماقيمة الدنيا اذا قلبي غـــــدا... يحيا بها صفراً على أقصى الشمالْ
لا بل سأحيا زهرة ً بين الندا....مهما يكون الحُــــلم قد أمسي محالْ
كلمة أمل يارب تصحي ذرة أمل في كل قلب نسي الأمل


لأنـّها الحياة
ياقلب مالك قد بخــــلت َ ببــسمتي.........وأراك وقت الدمــــــع يا قلبي تجودْ
لا شئ في الدنيا يســــــاوي دمعة ً........قد صاغها طول الاسى فوق الخدودْ
دع ما مضى...ما راح راح وربما........يوما ً من الأيــــــام ثانـــية ً يعــــودْ
حر ٌ أنا وتـــركت حــزني قادني!!...... عجبا ً لنا والقائد الاعــــــــــمي يقود
ان كان في الازهار شوكا ً جارحا .......فلما تراهُ ولا تــــــري عطر الورودْ
من كان يســـــكن فيه قلب ٌ أسود ٌ.......فعيونه ُ دومـــــــــا ً ترى الايام سودْ
و إذا صفي صَفـَت الحياة ُ جميعها.......و كأنها لـــــحـن ٌعلى أوتـــــار عود
يا درة ً رغم الجــــــــــمال وحيدة ً...... تحلو اللآلئ حين تــُـنظم ُ في العقود
لولا شرود الظـــــــبي ُ عن خلانه........ماكانت اغـــــتالته أنــيـــاب الاسود
لا تطلب التخــــــــليد في دنيا الفنا........بل عـِشْ لتـفـنـى..إنّ ذاك هو الخلود
الفرح داخلنا يعــــــيش مع الاسي........الفــرق – كل الفرق- أيّهــــما يسود
لا للدموع وألـــف لا...ملــــــيار لا...... لا للحـــواجز والفواصـــل والحدود
وعد ٌ سأحيا يا فـــــــــؤادي باسماً....... وعد ٌ ولن أرضي بتغيير الوعــــود
عهد ٌ سأقتل دمعتي ومـــــرارتي....... إنّ الفؤاد الحــــــر لا ينسى العـــهود
و اذا أتى حزني لفـــــرحي غازيا ً...... ووجدت كلاً ً منهـــــما حشد الحشود
لا ترفع الرايات فـــوق مــدينتي...... واجعل حصون الحب عن روحي تزود
لن يستطيع الحزن حــــكم قضيتي ......مادام حلــــمي وابتســـــاماتي شهود
وإذا غدا كل الوجـــــود مُعــــادياً....... يكفيك أنـّــــك في حمى رب الوجود

ابتسامتك

السلام عليكم ورحمة الله

ازيكم يا جماعه

اتمنى الجميع يكون بخير

ابستامتك

يمكن تكون القصيده مكتوبه على لسان حبيب لحبيب

بس انا حاولت على اد ما قدرت اكتبها على لسان كل واحد مننا لكل حد هو بيعشق ابتسامته

فيه ناس في حياتنا مجرد رؤيتهم بيبتسموا بتخلى كل حاجه في حياتنا تبتسم

انا شخصيا بهدي القصيده دي لوالدتي كاول حد في الدنيا يهمني اشوفه بيبتسم

ولاخواتي وزمايلي وكل الناس اللي بحب ابتسامتهم واللي ابتسامتهم بتديني امل

وخصوصا الاطفال الصغيرين...وخصوصا البنات الصغيرين

وانا حاولت كمان ان ..ابستامتك...تتقري بقتح التاء الاخيرة او فتحها....عشان تقدر

تهديها لاي حد في حياتك

ورغم ان القصيده طويله شويه انما انا تقريبا نسيت ربعها

بس قدر الله وماشاء فعل

لي طلبين بقى

الطلب الاول اجباري تقول ايه اكتر مقطع عجبك...مقطع واحد بس

والطلب التاني اختياري تقول هتهديها لمين

ماشي؟؟؟؟؟؟؟؟

ابتسامتك
ابتسامتك نبع صـــــــافي
مهما يدّي ماينــــــــتهيش
ابـــــــتسامتك بحر دافي
اللي يغرق فيه...يعيش!!
ابتسامتك
ابتسامتك حاجــــه نادرة
في البراءه وفي الطـفوله
واللي أجمل كونها قادرة
تدخل القلب بســـــــهولة
ابتسامتك
نجمه بتنــــــــور سمايا
لو نجومها هيســــتخبوا
نهر سايل بين دمــــــايا
منبعه في قلبي ومصـبه
ابتسامتك
ابتسامتك جــــت تقوللي
مهما كان الحـــزن طال
افتح الأبواب تمـــــــللي
لسه فيه في الكون جمال
ابتسامتك
ابتسامتـــــــــك نار تدّفي
بس مابتحـــــــرقشي حد!!
يوم ما بلــــــــمسها بكفي
يوم ما اكـــون انسان بجد
ابتسامتك
سر من أســــــرار جمالك
اللي من كــــــــتر البراءه
كان ضروري يحطوهالك
قبل اســــــمك في البطاقة
ابتسامتك
ابتـــــــسامتك بيت ندهلي
نفسي أعــيش بكياني فيها
تبقى عنـــــــواني و أهلي
يبعتوا الجـــــوابات عليها!!!
ابتسامتك
تيجي شمس الكون وترحل
خاصم القــــــــمر النــــهار
وابتسامتك مهـــــما يحصل
نورها طـــــالع لــــيل نهار
ابتسامتك
ابتسامـــــتك وردة حلوه
ماليه كل الكـــــون زهور
زارعه جـوة القلب غنوة
مهما كــــــان القلــب بور
ابتسامتك
في ابتســامتك محتارين
هي ليه ما اتغــــيرتشي؟؟؟
زي ما تكون الســــنين
لسه فيكي ماحيـــرتشي!!!
ابتسامتك
قطر راكب فيه لــــوحدي
بس عامل زحـــــمة فيه!!
بنسي فيه كل الجراح دي
والأمل دايـــــــــــما ماليه
ابتسامتك
رجّعتلي القلـــــب يفرح
بعد عمر بحاله منــسِــي
خلـّـته للكون بيـــــشرح
يعني ايه كلمة رومانسي
ابتسامتك
لغر كل الــــناس تشوفه
بس حلــّـــــه معــايا بس
لما تتجمع حـــــــــروفه
تدّي كلــمة "قلبي حس"
ابتسامتك
ابتسامــــــتك قصه حلوة
قمت انا بـــــدرو البطوله
قلبي فيها ماخدشي غلوة
واتقتل من ضـــربه اولى
ابتسامتك
كل صــــــــبح وكــل ليل
بسمتك تبـــــــعت رساله
لسة فاضل شـــــئ أصيل
يا زمان مافيهوش أصاله
ابتسامتك
هي دايـــــــما خط سيري
لو تتــــــــــوه بي ّ الحدود
مهما تهت في يوم مسيري
لابتسامـــــــــتك يوم هعود
ابتسامتك
ابتسامتك خـــــيط بيربط
عمر فات مـــع عمر آتي
ابتسامتك شــــــئ بيظبط
عالأمل دايمـــا ساعـــاتي
ابتسامتك
كنت قبل ما اكون عارفها
عيد ميلادي يادوب ميعاد
بس بعد ماقلــــــبي شافها
كل يوم... بقى عيد ميلاد
ابتسامتك
ابتـــــــــسامتك نور منوّر
في طريق عمري الطويل
مهما عاش قلــــــبي يدوّر
ضحكتك مالهاش مثيل!!
ابتسامتك
جوة أحاسيـــــــسي الوفية
ابتسامتك نــــــورها عاش
مهما بكرة هيـــــجرى ليّ
هنسي روحي وماأنسهاش
ابتسامتك
عملت استعــــمار يا زهرة
جوة روحــــــي وقلبي مال
عملت الاحاسـيس مظاهرة
أيدّت في الاحتــــــــــــلال
ابتسامتك
علمــــــــــــــتني ان الإراده
شمعـــــــــها مابينــــــطفيش
اني أعيش عمري في سعاده
فيه فلوس.... أو كان مافيش
ابتسامتك
مش هلـــــومك عمري تاني
لو يطــول في الحـب صمتك
قلبي شاف كـــــــل المعاني
باينة من نــــــور ابتسامتك

ابتسامتك
لو قعــــــدت سنين بطولها
برضو مــــــش هقدر أعبّر
أي كلــــمه أكــــيد هقولها
ابتسامتك برضــــــــو أكبر!!
ابتسامتك
هي كلــــــــــــمة سر قلبي
اللي من غيــــــــرها بتوه
واللي لمّا بتبــــــقي جنبي
تبــــــتسم كــــــل الوجوه
ابتسامتك
ابتـــــــسامتك زي طـيف
جوة روح الــروح ماليها
جوة قلب القــــــلب عاش
زي نسمة في عز صيف
حسوا روحي وقلبي بيها
رغم اني ماشفـــــــتهاش
ابتسامتك
ابتسامتك طـــــير مرفرف
مهما طار أســـمى و أسمى
باني جوة القــــــــلب عش
في ابتسامتك نفسي أعرف
هو فـــــــوق الوش بسمه؟؟
ولا فوق البســـــــمة وش؟؟
ابتسامتك
يا اللي حــــبك نور عينيّ
ياللي جوة الروح رسمتك

دعوة من قلبي وعيــــنيّ
ربنا يخلـّي..... ابتسامتك

بلسم

ما أصعب أن تعيش عمرك كله تبحث عمّن تعلم جيداً أنك قد فقدته إلى الأبد

بلسم

قصة كانت في دماغي من أول السنه بس اترردت كتير أوي في نشرها

يمكن عشان هي عن الحالات اللي بتنزل في الرواند

واحنا- وانا واحد منكم- بقت كلمة حالة مرتبطة في دماغنا

بعز وصابر وعم السيد والحالات دي

بس دول مش حالات يا جماعة..دول ناس عندهم بضاعه وبيحاولوا يبيعوها باغلى تمن ممكن

بس أكيد الناس في الخاصه شافت الوجه التاني من الحالات

في رواند الخاصة ورواند الاطفال

وعرفوا يعني ايه معني ان حد يسلمك جسمه عشان تفحصه أدام ميت عين باصة عليه

وان أم تديك ابنها عشان تفضل ساعتين تفعص فيه زي ما ام في الاطفال

قالتهالي بنفس اللفظ

انا كتبت القصه دي بعد موقف في رواند الجلديه في اول السنه

دخلت بنت في نفس سننا تقريبا وشكلها كانت في الجامعه

وكان في ايديها بدايه بهاق

مدت ايديها أدامنا ...وبكت من غير نا تكلم ولا ترفض

خلتنا كلنا غصب عننا نحط وشنا في الارض

على فكرة بس انا مش قصدي اجرّم الموضوع

احنا فعلا مش هنقدر نتعلم غير كده

بس ماحدش يقدر ينكر ان الموضوع أحيانا بيكون بطريقه غير آدمية

قصة ياسين وبسلم أتمنى يقراها كل حد في طب

واتمنى كل الناس تقول رأيها في االقضيه قبل القصه

على فكرة انا اول مرة اجرب انشر قصه ومش عارف ان كنت نجحت ولا لا

بس زي مابقول دايما مش مهم كلامي يوصل كحد بيكتب..المهم الفكرة توصل

أنا آسف لوكنت القصه صعبة شويه في القرايه عشان الميديكال ترمز

انا حتى ماقدرتش اكتب المصطلحات دي بالانجليزي لانها بتلف وتيجي في اول السطر

انتو اكيد هتفهموها لوحدكم وحتى لو مافهمتوش فهي مش هتأثر على مجري القصة

بس لكا الناس اللي مش من طب الشيت ده حاجه بيبقى فيها كل حاجه عن الحاله بنعمله

ونناقشه مع الدكتور ادام الرواند

واسف ان كان فيه اخطاء املائيه انا كنت كاتبها كويس على الوورد ولما نقلتها باظت

واضطريت اقعد اظبط فيها كتير اوي

يارب تكونوا قادرين تقروها

أسيبكوا دلوقتي مع بلسم

انا ماخدتش شيت السنادي خالص...مش عارف ان كان
خوف ولا قلة ثقة ولا ايه بالظبط...بس المرادي قلت أنا لازم
آخد الشيت و أناقشه بنفسي ...ورحت شيّت الحاله....يوم الشيت
رحت بدري عشان آخد الحاله معايا و انا رايح الرواند ، رحت ل
اقيت الحاله دخلت في سخونيه شديده اوي وبترتعش ومش
قادرة تمشي أصلا...رحت للنايب وقلتله ان الحالة مش هتقدر
تنزل معايا كده...جه شافها وقال انها فعلا مش هتقدر
تنزل....وقاللي استئذن من الدكتورة وهي مش هتقول
حاجه ان شاء الله.... رحت الرواند و استنيت الدكتورة
على الباب...اتفاجئت بدكتور تاني خالص جاي بدالها...كنت
أول مرة أشوفه...وكان متعصب اوي ما أعرفشي ليه
أنا...السلام عليكم ورحمة الله
الدكتور ..أيوة عايز حاجه
انا...الحاله اللي كنت مشيّتها تعبت ومش هتقدر تنزل الرواند

الدكتور..-يعني ايه تعبت يعني.....
انا....تعبت يا دكتور..تعبت
الدكتور...يعني ما اتشلتشي يعني...يعني انت تقدر تجيبها نعمل عليها
اكساميناشن وترجع تاني..احنا مش هنعمل حاجه تتعبها يعني
انا...بس هي السخونيه عندها جامده شويه و النايب قال انها مش هتقدر تنزل
الدكتور...انت هتفهمني شغلي بقوللك روح هات الحاله يا تروح تناديلي النايب

رحت للنايب وحكيتله على اللي حصل ورغم خوفه الشديد من الدكتور ده جه معايا وقال انه هيشرحله الوضع
دخل النايب وهو بيرتعش
الدكتور...ايوه يا دكتور يعني ايه الحاله تعبت
النايب....معلهشي والله يا دكتور الحاله دخلت في ريموتك اكتيفيتي و تعبانه وراقده في السرير
الدكتور...يعني اشرحلهم على ايه انا دلوقتي.. ادخل اكلم نظري...ماهم المفروض سمعوه في المحاضرا اللي ماكلفوش خاطررهم وجم يحضروها حتي روح يا دكتور يا تجيبلي الحاله يا تجيبلي حاله تانيه عشان نشرح عليها
النايب...حاضر يا دكتور

مشي النايب وقعدت انا في اول صف مستني الحاله التانيه تيجي وابتدي الدكتور يشرح أويمعني أصح ابتدي يأنب فينا
الدكتور... احنا طبعا في آخر السنه ومن الواضح انكوا خلاص شبعتم من الكلام ..انا كان عني محاضرة امبارح و كنت في القاهرة ونزلت مخصوص ودخلت لاقيت تمانيه في المدرج...على العموم انتو من حقكم ماتحضروش بس من حقنا نتحاسب في الامتاحانت..ها...الامتحانات اللي بتبقوا واقفين تترعشوا وتحمروا وتصفروا...احنا لما كنا أدكم كده...كنا بنعمل ....وكنا وكنا
فضل الدكتور يأنب في ضمارينا كتير أوي ويحسسنا بالذنب على حاجات احنا مالناش ذنب فيها لحد لما لاقيت الباب بيخبط....فتح النايب ودخل
أنا جبت حاله تانيه يا دكتور
الدكتور...ماشي يا سيدي على الله بس تكون حاله كويسة
النايب....هي لسه محجوزه من أسبوع
الدكتور....طيب دخلها كده

اتفتح الباب
كانت أصعب لحظة في حياتي كلها
مش معقوله تكون هي
طب ازاي... وامتى.. وليه
للحظة غبت عن الوعي ..زي ما يكون عقلي فضل انه يبطل تفكير عشان الصدمة ماتشلهوش..يمكن لاول مرة تبقى أدام عيني ومش قادر أفتح عينيّ عشان أشوفها

بلسم
كان اسمها كده...بلسم
الحلم اللي فضلت أحلمه و أرسم فيه و أحاول انه أنزله من أرض الأحلام البعيدة أوي للدنيا اللي احنا عايشين فيها
كانت قريبتي من بعيد شويه
كانت دايما والدتي تحكي عنها وهن أدبها و أخلاقها وعن أبوها و أمها اللي تعبوا أوي لحد مادخلت كلة الهندسه
ناس من اللي على أد حالهم زي حالاتنا كده..الناس اللي مايملكوش من الدنيا غير كرامتهم
اللي مش مستعدين يتنازلوا عنها أبدا مهما حصل
كانت أصغر مني بسنتين.
أول مرة شفتها كانت في فرح بنت عمي..مش هقدر أقول اني حبيتها من اول نظرة
بس لاقيت جوايا احساس وكإن اعرفها من مليون سنه.. الاحساس اللي ماحدش يقدر يعرف له سبب ولا يلاقيله تفسير...ولاقيتني غصب عني رايح أتعرف عليه بحكم القرابه اللي كانت بنا
ولاقيت في عيونها الباصين في الأرض الحياء الممزوج بطعم الراحه
انا....انتي بلسم ...مش كده
هي...ايوه انا ..هو حضرتك تعرفني
أنا....انا ياسين قريبكم في رابعة طب
هي...أيوة...أنا سمعت عن حضرتك كتير
أنا.....أنا كمان سمعت عنك اكتر

عشر دقايق كانوا من أجمل اللحظات اللي عشتها...اللحظة اللي تحس ان حاجه ناقصه جواك لقت اللي يكملها
وان الطير اللي جواك لاقي جناحين وخلاص بقى قادر يرفرف ويطيرلاي مكان في الكون
وان عطش المشاعر اللي جواك اللي كان يادوبك بيدور على شربة ميه لقى قصاده نهر مشاعر قادر يروي عطشه للأبد

ومرت الأبام
وماشفتش بلسم تاني
لحد ما بالصدفة قابلتها في المواصلات واحنا رايحين الكليه
ويومها كل الأحاسيس اللي جوايا اتأكدت...,وكل المشاعر التايهة رسيت
أيوة هي بلسم....الحلم اللي كنت بحمله لنفسي

بعدها بأسبوع ماسيبتش الموضوع للصدفة أنا اللي استنيت عشان عارف انها هتروح الكليه في نفس الميعاد..وجت بلسم..بس المرادي لما شافتني اضايقت..ماكانتشي حابة تحس إنها بتعمل حاجه من ورا اهلها ويومها صارحتها باللي جوايا وإني بحلم انها تكون لي واني هحاول أكون انسان ناجح وانسان كويس عشان أكون جدير بيها و اني مش هحاول أكملها تاني غير لمّا أبقى قادر أدخل البيت من بابه واني هبقى سعيد أوي لو استنتني بس هفرحلها لو جالها حد أحسن مني
بس هي قالت انها على أد ماتقدر هتحاول تحافظ على العهد ده و انها على استعداد تستناني العمر كله مادمت حاولت أتقي ربنا فيها
ومرت سنة ماشفتش فيهم بلسم..... بس دايما كانت معايا...كنت بحس بدعاها لي وخوفها على
كانت دايماً بحس انها جنبي..وبحلم باليوم اللي هيجمعنا سوا على سنة الله ورسوله

الدكتور..دكتور..انتي يا دكتور يا اللي عليك الحالة...انت ياابني..ايه مش سامعني
انا... أنا آسف يا دكتور ماخدتش بالي
الدكتور.. طب قوم خد الحالة وخد منها هستوري في عشر دقايق وتعالى قوله عشان نعمل اكساميناشن

وخرجت برة لاقيت بلسم مستنيه وبتبكي
مالاقيتشي كلمة في كل الكلام اللي اتعملته طول حياتي اقولها
بس ماكنتش طايق منظر الدموع اللي في عينيها

انا...بلسم...ماتحطيش وشك في الأرض كده..انتي ماعملتيش حاجه غلط...بلسم..ردي على بالله عليكي ماتسيبينيش كده..أنا دموعك دي بتقطعني من جوايا
بلسم ..عايزني اقول ايه يا ياسين...انتي دلوقتي دكتور و أنا مريضه
أنا.....لا يا بلسم... أنا عمري ما أكون دكتور عليكي انتي
بلسم....بس هو دا الوضع اللي احنا فيه دلوقتي واللي لازم نتعامل على أساسه...اسالني على اللي انتي عايزه يا ياسين أنا تحت أمرك
أنا....لا يا بلسم ماتقوليش كده
بلسم...أنا مقدرة وضعك دلوقتي يا ياسين ومش زعلانه منك دا شغلك وانت وعدتني انك هتكون دكتور ناجح..أنا عايزة أشوفك وانت دكتور ناجح حتى لو كان على حسابي يا ياسين
أنا....بس انا مش عايز النجاح ده مادام على حساب كرامتك
بلسم...كرامتي متصانه يا ياسين..أنا دلوقتي مريضه و في مستشفي تعليمي ومن حقكم تتعلموا على ومادام مش هقدر أدخل مستشفي خاصة يبقى لازم أرضي بكده والحمد لله على كل شئ
أنا....طب وليه ماقولتليش يا بلسم...يمكن كنت قدرت أتصرف
بلسم....ماحبيتشي أحرجك يا ياسين...حتى لما حجزوني هنا حلّفتهم في البيت ان ماحدش يقوللك عشان ما أحرجكشي أدام أصحابك أو أشوف نظرتك لي وانتي حاسس بي بس مش قادر تعمللي حاجه
انا....أتحرج منك انتي يا بلسم..جد يتحرج من نفسه...دا أنا أبيع الهدوم اللي علىّ ولا اني أشوفك في عينك نظرة انكسار
بلسم....ماكانشي ينفع يا ياسين ماكنشي ينفع أحملك فوق طاقتك..خصوصا ان أنا دلوقتي مريضه..ويمكن ...يمكن خلاص ماعدناش ننفع لبعض وانت لازم.....
انا....ماتكمليش يا بلسم...انتي شكلك ماتعرفيش أنا بحبك أد ايه..أنا بحبك ...عارفه يعني ايه بحبك
بلسم...عارفه يا ياسين وعشان كده بقوللك انه ماعادشي ينفع
أنا.....انا مش هرد عليكي دلوقتي..انا هدخل دلوقتي للدكتور وهشرحله الموضوع
بلسم...لا يا ياسين ماتحرجشي نفسك...شوفه عايز ايه واعمله ..انتي عايز تعرف قصة المرض مش كده..انا هحكيلك
أنا..لا يا بلسم.. ماتحكيش... أنا عايزك لما تحكيلي ماتحكيش على اني دكتور ..عايزك تحكي لحد انتي عارفة انه اكتر حد بيخاف عليكي..انا داخل للدكتور
بلسم...انت لو حكيتله على الوعد اللي بنا تبقى بتحرجني أنا
انا.....أنا هتصرف

ودخلت للدكتور
أنا.. معلهشي يا دكتور الحاله اللي برة دي قريبتي وانا مش عارف اسئلها عشان هي قريبتي أنا ممكن حضرتك لو ضروري تورينا على حد وريهم على انا
الدكتور....ايه الهبل اللي انتب بتقوله ده..هي فين الحاله

خرج الدكتور و جاب بلسم من على الباب ودخل بيها الرواند

الدكتور...ايه ده من حق الدكتور مش عارف يسألك وياخد منك هستوري
بلسم...لا يا دكتور أنا اللي كنت رافضة أتكلم معاه...معلهشي أصلها أول مرة لي في الموضوع ده

ورسمت على وشها ابتسامه كنت عارف انها مش قلبها بس كانت بتحاول تحافظ علىّ وعلى احساسي لآخر لحظة

الدكتور – اسمك ايه
- بلسم
الدكتور...بلسم بس ولا شامبو وبلسم اتنين في واحد..هاهاهاهاهاهاهاهاها

ضحك الكل بس أنا لاقيت دمعي غصب عني بينزل بس حاولت أداريه عن الكل وأولهم بلسم
ماكنتش عايزها تحس انها سبب في دموعي أبداً وبدأ الدكتور ياخد منها هستوري
و أنا واقف.. نفسي آخدها في حضني وأداريها عن كل عين شايفاها... نفسي آخد الحب اللي في قلبي وأبني بيه سور حوليها يحميها من أي نظرة ممكن تجرحها...........نفسي... بس مش قادر

الدكتور- سمعتوا الهستوري يا دكاترة..دلوقتي بقى الدكتور هيورينا الاكسمانيشن كله جنرال ولوكال..اظن مالكش حجة..دا آخر أسبوع في السنه
أنا....بس أنا مش هقدر يا دكتور..أنا قلت لحضرتك
هو....يعني ايه مش هتقدر..لأ بقى هتقدر
أنا...مش هقدر يا دكتور...حط نفسك مطرحك..دي قريبتي
هو....يعني ايه قريبتك ..يعني هي أحسن من الحالة اللي كانت هتيجي قبلها وكنت هتعمل عليها
انا....لا مش احسن..بس حضرت قدر موقفي
هو....بض يا دكتور..انت هنا عشان تتعلم طب، قريبتك والكلام ده عندكوا في البيت ..انما انت هنا دكتور..يعني هي لو جاتلك في عيادتك هتقوللها مش هكشف عليكي..انتي قريتي!!!
انا....صدقني مش هقدر
هو....بص يا دكتور أنا مش هضيع وقتي معاك انت لو ماعملتش زي مابقوللك انا على استعداد اشيلك المادة

وقبل ما اقول وايه يعني كان صوت بلسم أعلى مني ومنه
بلسم...لا هيعمل..عشان خاطري أنا يا ياسين
الدكتور...أهي الحاله موافقه أهي...أظن مالكشي حجه..اقلعي اشربك كده يا بلسم..يلله بقى اعملنا اكسامنيشن للهيد والنيك

تعبت كتير عشان ألاقي رجليّ اللي ماكنتش حاسس بيهم واتحركت ناحية بلسم
وبدأت اتكلمم...وحطيت ايدي على وشها عشان لاقيت دموعها بلت ايديا
بس كان لازم أكمل غصب عني.. وعشانها هي مش عشان أي حد تاني يمكن تكون بتكي لانها افتكرت ازاي لو كانت حست ان شعرايه واحده بانت منها في الكام مرة اللي شفتها فيهم كانت بسرعه بتداريها وشافت نفسها دلوقتي وشعرها كله باين أدامي....ومش أدامي لوحدي
الدكتور ..أيوه كده يا دكتور طب ما انت شاطر اهو ...يلله يا جماعه واحد واحد كده بالراحة نعمل اكسامانيشن لليمف نودز
كان نفسي أصرخ..ماحدش يلمسها بس مش قادر... و قفت بعيد عشان احساسي بالعجز كان قرب يقتلني..كنت حاسس اني هتخنق...ان الزمان هيقف عن اللحظة دي

أنا ...ممكن انزل بقي يا دكتور
الدكتور...لا تنزل ايه...اكشف صدرها كده وبص على الآبكس
مالك يا دكتور..اتكتفت ليه..اطلع انت يا دكتور وريله يعمل ايه

ماكنتش عارف اعمل ايه... أعريها بايدي؟؟...ولا أسيب حد تاني يعمل كده؟؟...شئ صعب أوي تختار اللي ادامك هيموتك بايه

أنا ...لأ يا دكتور أنا هشوفها أنا
الدكتور....طب بسرعه

كانت بلسم مغمضه عينيها..يمكن ماكانتشي عايزة تشوف دموعي..أو يمكن ماكانتشي عايزاني أشوف دموعها

وشفت الآبكس زي ماطلب الدكتور
الدكتور...طب حط سماعتك بقى وقوللنا سامع ايه
جبت السماعه وحطيتها
أنا ...أنا مش سامع حاجه يا دكتور
الدكتور...مش سامع مرمر؟؟؟؟؟؟؟
انا...لا مش سامع حاجه خالص
الدكتور..يعني ايه مش سامع..وريني كده...يا القلب فعلا مش شغال... شيلوها بسرعه على مستشفي الطوارئ يا جماعه
أنا....مش شغال...يعني ايه مش شغال..بلسم.....بلسم......بالله عليكي ردي على...بلسم

ماتت بلسم...ماتت بين ايديا...
يمكن يكون قبلها الضعيف ما استحملشي يشوفني وانا بعريها أدام الناس
يمكن كرامتها ما استحملتشي حد يمسها لمجرد انها ماكانشي معاها فلوس تتعالج بره
يمكن ما استحملتشي تشوفني وانا ضعيف أدامها و أدام نفسي
يمكن مشاعرها الريئه اللي كانت بترسمنى الحبيب ماقدرتش تستحمل تشوفنا الدكتور والمريضة

ماتت بلسم..لكن عايشه جوايا وهتفضل عايشة جوايا وزي ماهي صانت العهد واستنتني لحد آخر لحظه في عمرها القصير ..أنا كمان هحافظ على العهد وهفضل أدعي ربنا انه يجمعني بيها على خير....هناك...بعيد عن عيون الناس كلها..هناك ..في الجنة..عشان اقوللها كلمة واحده
سامحيني يا..بلسم



قد يكون الوعد أمسى

مستـــــحيلاً أن تفيهْ

رغم ذاك فإن قــــلبي

لن يضيع و أنتَ فيه

رسالة ٌ...الي قلبي

الدنيا...بحر ٌ نغرق فيه دون أن ندري...وتظن قلوبنا خطئا ً أننا قد وصلنا لبر النجاة

ازيكم يا جماعه

يارب تكونوا كلكم بخير

يمكن تكون القصيده اللي هنشرها النهارده مافيهاش شعر اوي

يعني ماحدش يدور على الصور الجماليه والمحسنات البديعيه والحاجات اللي ماكنتش بحبها ايام الثانوي دي

هي رساله صغيرة جدا

حاولت اكتبها لقلبي ولكل قلب زي قلبي

القلوب اللي الدنيا وخداها وابتدت تنسى وسط زحمة الدنيا اللي احنا عايشينها

والقلوب اللي بقالها كتير اوي بعيدة عن ربنا بس للأسف لسة مش حاسة

اللي مش لاقي ليها تشبيه غير تشبيه النبي صلى الله عليه وسلم انها قلوب صدّت

كثيرون منا يطيلون البعد عن الله لمجرد انهم استحوا أن يطرقوا باب عفوه من بعد طول العصيان ولا يعلمون أنهم لو أخلصوا نية الرجوع فسوف يجدون باب الله مفتوحاً من قبل حتى أن تمتد أيديهم لتطرقه

أنا المرادي اللي بطلب من كل حد هيقري القصيده انه يبعت اللينك لكل الناس اللي يعرفهم ...يمكن يكونوا شويه الكلام البساط دول حاجه تنحط في ميزان حسناتنا

ان قمة البعد عن الله ليس أن تشعر أنك بعيدا عنه ولكن أن تشعر انك أصبحت غير قادر ٍ على العودة اليه مرة أخرى وقمة القرب من الله ليس أن تشعر أنك قريبا منه ولكن أن تتأكد أنك لن تستطيع الحياة لحظةً واحدة ً بعيدا عن رحابه

رسالة ٌ...إلى قلبي
فؤادي.. لــمْ تعـــــد أبدا فؤادي........... أمـــا آن الأوان لكي تفـــــــــيقْ

طـــــــريق الله قد نادي علينا...............فمالك لست تأخـــــــــذه ُطريقْ

لما أشعـــــــلت ذنباً بعد ذنب ٍ ............ولست تجــــــــيد إطفاء الحريق

وتطلب في الدُنا عوناً فتمسي ............غريقا ً مستـــــــعيناً بالغــــــريق

أغرّك أن للــــــــــــدنيا بريقاً ؟...........غداً يا قـــــــلب سيـزول البريق

أغـــــــرّك أنني حــــرٌ طليقٌ ؟...........غدا في القـــــبر لن أمسي طليق

أغرك كثرة الخلان حــــولى؟.............غدا يا قلـب يتـــــــركنا الصديق

فمن يبقى إذا ما أفــــــردوني ............. أسير الذنــــب في لحــد ٍ عميق

وضاع المال وانتهت الأماني..............وصار الأهل وانصرف الشقيق

قلـيل الزاد.... ممتلئ الخطايا...............كثير الذنب..معــــــدوم الرفـيق

و قد نشرت صــــحائفنا وكلٌ...............لــه ُ دارٌ بما يجــــــني تلـــــيق

وسيق المتـــــــقون إلى جنان ٍ ............ و وفد ٌ نحــــو درك النار سيق

فريقٌ في اللظى وفـــريق طه...............فهل ترضي بأيــــــــهما فريق؟

أفق يا قلـــبُ من طول التمني..............فــَقــَـيْدُ الذنب قــد أمسي وثيق

أفق يا قلبُ إنك لــــست تدري ............زفيرك هل سيتــــبعه ُ شهـــيق؟
أيا قلبي

لنـــا ربٌ سيـــــكــــفينا

ولا ينســـــاك ان تنساهْ

لنـــا ربٌ ينــــاديــــــنا

لما لا تستـــــجيب نداهْ

وان ضـــــاعت أمانينا

لما لا تحـــــتمي بحماهْ

وكل الفـــــخر يأتيــــنا

إذا سجـَـــدَتْ إليه جباهْ

و ما زاد ٌ بأيــــديــــنا

إذا حــــــــانت لنا لقياهْ

تذكــــــــر أن ّ بــارينا

يراك وأنـت لست تراهْ

وان زاد الأســـــى فينا

فقط...لا تنس َ ذكرَ الله

مجروح..ولكن

السلام عليكم ورحمة الله

الجرح...هو أشد أنواع العلاج ألما ولكنه....أقواها أثراً "

أنا فرحان أوي يا جماعه اني هنزل القصيده دي النهارده

لان ناس كتير اختارتها ولانها آخرحاجه كتبتها ولانها خدت مني وقت طويل اوي

خدت مني وقت لان اول ما حاولت اكتبه كنت بكتبه على لسان حبيب لحبيب

بس ماقدرتش اكمله بالاحساس ده

فحاولت اكتبه على لسان كل حد اتجرح

من حبيب...من صديق ..من قريب من اي حد

خصوصا الحد اللي يكون ليك فيه عشم

الجرح مش مجرد حد كان بيحب حد وسابه

يمكن ده يكون اقل انواع الجروح

الجرح لما تستني اللي بتحبه يقف جنبك ويمدلك ايده وماتلاقيهوش

ايا كان اللي بتحبه ده مين.. اخوك... صاحبك......المهم انه سابك في عز ما انت محتاجله

الجرح ممكن يكون كلمه واحده

نظره واحده حد بصهالك من فوق

ممكن يكون حتى من غير اي كلام

عارفين..انا كنت ناوي انزل القصيده دي بصوتي

بس حبيت ان كل واحد منكم يقراها باحساسه هو

حاجه واحده فاضل اقولها عشان ماتوقفكوش وانتو بتقروا القصيده كلمة"و لا"اللي هتلاقوها كتير

اللام عليها فتحه مش شده

عشان بس ماتكسرشي الوزن وتخليكوا تقفوا وانتو بتقرو القصيده

أخر حاجه قبل القصيده

انتي اقوي من جرحك ومن اللي جرحك

بس الحاجه الوحيدة اللي ناقصاك انك تعرف انك اقوى

" الماضي هو المعلم الذي علينا ان نتعلم درسه جيدا ونقبل يده...ثم ننساه الي الأبد"

مجروح ولكن

يا قلبي محــــــــتاج للــــــدوا .........لكــــــــن ماتنساش النصيب

مش كل بلــــــــــسم في الهوا ........ يتــــحط فوق جرحك يطيب

ولا كل قلب نكـــــــــون سوا...........يبــــقى خلاص هوّ الحبيب
ياما ناس كتــير بتـحب بعض

مش مكـــــتوبــين أبداً لبعض

ياما ناس كتـــــــــــير متفرقه

وهييجي يوم.. ويقـابلوا بعض
ايّـــاك تلـــــوم فـِعـْــل القدر..........ولا يـــــــوم تشك في حكمته

ولا تبكي يوم على مين غدر.........ولا تمــــــشي تاني في سكته

قبـــــل أما دمعي يسيل هدر..........صـــــــــبر الفـــؤاد هيسكته

مهما هكون مـــجــروح اوي

والجرح منــــقوش في الزمن

أنا خــــــدت درس كبير أوي

ومافيش دروس من غير تمن

لـمـلـم مشاعــرك لو شـَكـِت .........جرحـــــك بنار جرحك داويه

غـمّــض عيـونك لـو حـَكِت..........عـن طـول حنينها وشوقها ليه

ولو العـــــيون مـِـنـّـك بَكِت...........فبـــلاش يكون.... أدام عينيه

يمكن تكون نــــــارك وحيد

أهون من النـــار في اللـُـقــا

مش كل شئ يلــــــمع بعيد

دايما بيطــــــــــلع... لؤلؤه

مجروح ولكـــــن مش هقول.........ان الجـــــراح هتـــــــــهزّني

و هداوي جـرحي ولو يطول.........وههدّه مــــــش هيــــــــهدّني

وسفينتي قادرة على الوصول....... لو ألـــــف ســـــــــد هيـنبني

يا قلبي رفرف في السما

إيـــاك جـــــناحك ينكسِر

ماحناش هنخـــــسر انما

كل اللي باعـنا أكيد خسِر

مجروح ولكـــن مش هموت........ و لا هنـــــدفن وسط الجراح

لا هيتكتم جــــــــوايا صوت ........و لا هبكي عالعمر اللي راح

ومسير زمان الخوف يموت.........والقلب يطــــــلع للبــــــراح

مش فارقه أبــــداً جرحنا

في القلب يــــوجع أد ايه

بس اللي يفــــــــرق اننا

من جرحنا اتعلــــمنا ايه

Your heart can return back

السلام عليكم ورحمة الله

أنا كنت محضر موضوع تاني خالص احطه النهارده

بس الموضوع ضاع مني

ومش هلحق أكتبه تاني

وقعدت اقول اكتب ايه ...أكتب ايه

مش هسيب التلات ده يعدي كده

مش لاقيت غير قصيده كنت كتبتها عشان اقولها

في حفلة حملة حمايه

بس الحفله اتلغت

ونسيت القصيده دي خالص

ودلوقتي افتكرتها

واللي هيخليني انشرها النهارده انها مش بس للناس اللي بتشرب

هي لكل حد فيه عقبه في حياته مش بس عقبة الادمان

ياب تعجبكوا

Your heart can return back
صدقني..مش بنـــلوم عليك.........الوقــــت ده مش وقت لوم
جاييــــن نـــــمد ايدينا لـيك.........ونقول بلاش تيأس في يوم
قالوا عليك انســـــان وحش ........وقلـــــــــوبنا قالت ألف لأ
يمكن تكون غلطان صحيح.........بس الرجـــــوع للحق حق
حقك تعــــــيش ...حقك تعود
ولو الطــــــريق مليان سدود
فيه ألف إيـــــد ممــــدوة ليك
مهما يكون طال النــــــزيف
صدقني قلبك مش ضـــعيف
وهيبقى أقـوى وأقـــوي بيك

انســــــان وزيّـــك زيّــــــنا
أو يمكن احـــــــــــسن مننا
بس احنا رافضين السكوت
والحلم فارد ميــــت شراع
بينادي عالعمر اللـي ضاع
ويقول بلاش حلـمك يموت

بيتك.. حيــــاتك... أسرتك
أهلك ..زمايلك.... صحتك
ليه كـــل ده ترضاه يروح
ليه تـرضي غلطه صغيرة
ويـّاها متــــــــعة قصــيّرة
يملوا حـــــياتك بالجـروح

ربك خلـــــــقنا بشر سَوِي
وإدّانا فضـــــل كبير أوي
ازاي ايدينــــا تضـــــــيعه
ربّــك فاتحــلك باب رضاه
لو كنت حاسس صوت نداه
لازم كيـــــانك يســــــمعه
Dayes when come and go
They make our hearts suffer
God send to us somebody
Who can remove eyes cover
We want not to leave drugs
To turn the future black
Even when you are away
Your heart can return back
ليه تقتل الحــــلو اللي فيك.........ليه الوِحِـــــش يفضل يبان
واجه قوام......فتح عينيك............ضدقني قلبك مش جبان
مين اللي قال حبة حـــبوب ........بتـــــهدّي أو تعــمل دماغ
بالعكس دي مجـرد هروب ........وبتنبي فيك بيت من فراغ
جربت تشرب؟!...يجري ايه لو جيت تجـــــــــرّب عكــسها
ومادمت مخلـــوق حر ليه..........تبقى أســــــيرها وعبدها
فيه ناس بتــــفتح بابها ليك.........علـــــــشان ترجع صحتك
بقلوبها هتحـــــــافظ عليك ........ويهـــــمّـــهم ســــريــــتك

ربك عليك دايــــــــماً شـــــهيد.......هتقولـّه ايه يـــــــــوم الحساب
والنار بتــــــسأل عن مــــــزيد......خايف نكــــــــون احنا الجواب
ولا تحـــــــــب تكـــــون سعيد......والجـــــنه تفــــــــــتح ألف باب
وتشوف هناك رب العبـــــــيد.......ولا يبـــــــــقى فيه بينكم حجاب
انطق وقــــــــولها وعيد وزيد.......أنا مش هـــــعيش وسط العذاب
أنا مش هعيــــش انسان وحيد.......وكــــــــــفايه في الدنيا اغتراب
هتدوبي يا جبال الجــــــــــليد.......هتموتي يا سنــيييييييين السراب
لازم يكون عزمك أكـــــــــيد........وما فيش مطر من غيـر سحاب
صدقني هيلــــــــين الحــــديد........من غير لاضـعف ولا انسحاب
قوم رجــــــــــع الطفل الوليد........اللي اتحــرق جــــــواك وشاب
رجّـــــــع شموع قلــــبك تئيد.......وارجـــــــع لأحــــــلام الشباب
جرّي الأمل جـــــــوة الوريد.......وافــــــتح في بنك النور حساب
ممكن يكــــــــــون قلبك بعيد........بس الأمــــــل ولا لحظة غاب
طول مااحنا جنبك ايد في ايد.......هتــــــــــلاقي حزن القلب داب
خليـــــــــنا نبدأ من جـــــديد........مهما يكـــــــــــون كال الغياب

ومادمت من جواك نضـــــيف.......شئ مستـــــــحيل أبدا تضيع
مهما الورق مات في الخريف.......لازم بيـــــــــرجٍع في الربيع

لازم تســـــــــيب دنيا الدموع........وترجّــــــــــع العمر الجميل
ممكن يكون صــعب الرجوع.........لكن أكــــيد... مش مستحيل
لكن أكيد مش مستحيل
لكن أكيد..........مش مستحيل

شموعٌ ..لا تنطفئ

السلام عليكم ورحمة الله
اقترحتْ علىّ احد أصدقاء مدونتي الأعزاء"هبهوبه"ألا أكتفي بالصمت تجاه وفاه والد أحمد صديقي
ولم أجد بين قصائدي ما اانشره في هذا الموقف
الا هذه الابيات
اللي كتيتها دون قصد
فقد أردت أن أضع بعض كلمات ٍاهداء لوالدي رحمه الله على قصائدي قي معرض اكليه
ووجدت قلمي يكتب هذه الكلمات دون وعي
لذاك الفلاح البسيط الذي كان يهوى الأدب رغم أنه فارق المدارس من الصف االأول الاعدادي
وزرع في قلبي حب كتابة الشعر
ولكن لم يمهلني الوقت لأقرء عليه أولي قصائدي الكامله
ولكني.. أحسبها جميعا تصله
اليه....هذه الكلمات البسيطه
التي ربما قد لا تعبر عن واحد من مليار من احساسي ناحيته
وانا انشر القصيده واعلم أن أحمد لن يقرأها
ولا أريده أن يقرأها
فأنا أعلم كم هو صعبٌ ذلك الفراق
وكم هي مريرةٌ تلك الدموع
وكم هو قاسٍ ذلك الوداع
ألهمنا الله جميعا الصبر


أبتي ..أراك الآن تقرأ ما كتبت
أبتي أراك الآن تسمع ما أقول

فرسائل الروح التي ما بيننا

لا شئ يمنعها الوصول

إن القلوب تضم في طياتها

ما ليس يمكن أن تصدقه العقول

إن تذبل الأزهار رغم جمالها

فعبيرها يبقى بها..رغم الذبول

أربعة أعوامٍ مضت

لا... ما مضت

فكأنما أيامنا ...وقفت بثانية الفراق

هم ودعّوك بدمعتين و أسرفوا

في سرد كلمات العزاء

لا يعلمون بأنهم

وضعوك في قلبي وساروا كلهم

و بقيت أنت بداخلي
كي نلتقي... رغم افتراق

ان لم تسعنا الأرض في رحبائها

فغداً تلملمنا السماء
ليس اعتراضا يا أبي

ما ذاك يا أبتي رثاء

فالقلب بعدك يا أبي...سيظل يؤمن بالقضاء

أنت الذي علمتني..إن نبتلي

فالصبر لا يكفي الفؤاد و إنما

سنكون أيضا شاكرين على البلاء
لكنني...أبغي مجرد أن أقول

حين ابتسمت و لم أجدك بجانبي

لمّا بكــــــيت و لم أجدك بجانبي

أدركت ما معني..........." أبي

اعتذار

السلام عليكم ورحمة الله
أنا آسف أوي يا جماعه
أنا بعتذر عن بوست النهارده
والد واحد من أعز أصدقائي توفي وحاسس ان انا مش في الحاله اللي تأهلني اني أكتب أو أنشر اي حاجه
كل اللي طالبه منكوا
دقيقه واحده كلنا ندعيله
ربنا يرحمه ويغفرله ويصبر زميلنا وأسرته
لانه بجد الله يرحمه كان من الشخصيات الطيبه جدا اللي تستاهل الدعاء

ولحد الأسبوع الجاي
يمكن تكون فرصه تبصوا على المواضيع القديمه كلها
انا كل مرة بفتح المدونه ببص عليها كلها
أتمنى تقروها تاني
لان فيه مواضيع كتيره منها اتظلمت
عشان حطيتها مع بعضها اول ما المدونه اتعملت

على وعدٍ باللقاء

طه

السلام عليكم ورحمة الله
من سنتين لما نشروا الرسومات المسيئه للنبي صلى الله عله وسلم
كتبت القصيده دي
و بعدين نسيتها ومانشرتهاش

لاني حاسس انها مش كفايه على الاحساس اللي جوايا
بس دلوقتي حاسس ان عايز انشرها
لان على الاقل فيها معني بحلم أقوله
يا رب تعجبكم وتسيب في قلوبكوا أثر

بعد أمّـــــا حسّينا بـأسى
يومين..تلاته ....واتــــنسى
والدنيا ليه داســــــــــــت عليه؟؟؟
إحنا نفوسنا اتغيـــــرت
ولا قلوبنا اتحــــجرت
ولا إحنا بس جــــــــــرالنا إيه ؟؟؟
لمّا بيسيئوا لنبـــــــــينا
و يهينوه أدّام عينــــينا
يبقى فاضــــــــــل لينا ايـــــه؟؟؟
فيه سؤال دايما ًقاتلني
لما طه هيقــــــــابلني
لو سئلني أقولـّــــــــــــــه ايه؟؟؟
يعني بس أقوله ســــــــــبتك......... للكلاب ووقفـــت ساكت
ولا اقولّه ان المــــــــروءه......... جوه قبر القــــــلب ماتت
ولا بس اقوله ايه؟؟؟
ولا أقولّه اني مســــــــــــلم......... بس مسلم في البــــــطاقه
المظاهر حلوه لكـــــــــــــن........ ما تلاقيش في القلب طاقه
ولا بس اقوله ايه؟؟؟
ولا أقول غمضت عيــــــني....... واعتـــــــــبرتك أى واحد
أصْلي شلت ما بين ضلوعي....... نفس ظالمــه وقلب جاحد
ولا بس أقوله ايه؟؟؟
اقوله بقيت ضعيف مــــــكتوف
رميت نفسي في حضن الخـوف
و أغمّض عيني لمّا بشـــــــوف
رسول رب العباد ينـــــــــــهان
بقيت زي السراب زايـــــــــف
و بعمل نفسي مش شايــــــــف
و أخاف مـ الناس ومش خايف
على طه النبي الــــــــــــعدنان

قلوبنا الدنــــــــــــيا وخداها
هموم الدنيا ملــــــــــــــياها
سامحنا....سامحنا يا طـــــهَ
ما تبقاش مننا غضــــــــبان
تعالوا خلاص كفايه هروب
ولو جوّانا لسه قلــــــــــوب
تعالوا للحظه واحده نتــوب
ونرجع تاني زي زمـــــــان
حتى لو كان كله واحــــد......... قـــــلبه ثار علـشان نبينا
بس برده دا مش كــــفايه........ إحنا فيه واجــــــب علينا

اعتراضنا مش بكلــــــمة........ تنتهي بعد المــــــظاهره
احنا مصحفنا في ايــــدنا........ والنبي ساب سنه طاهره
سنة المعصوم مـــــــحمد........ سنة للدنيــــــادي شامله
سنة لازم تبــــــقى نورنا........ في العباده وفي المعامله
لو صحيح بنــــحب طــه....... اللي في الإسلام جمـــعنا
يبقى لازم نبــــقى وجهة........ مشرفة للدين بتاعـــــــنا
كل واحد فينا قلــــــــــبه........ لو صحيح بالحـزن حس

يبقى بالأفعال نـــــــــعبّر....... مش كلام ينـــــقال وبس
همّا فعلاً لو شافـــــــونا........ مسلمين إســـلام بــــــجد
يعرفوا إن الدين بتاعـنا........ دين سلام مش موت وهد
لو صحيح بنحب طه
تبقى أخــــلاقه رايتنا
و سنته منهـــج حياتنا
لو صحيح..... بنـحب طه

الحب والفوارق

الحب لا يعترف بالفوارق...ولكن الناس تعترف بها...فلا تنسي عندما يعيش في قلبك الحب...أنك تعيش بين الناس

جمله كتبتها
ساعات لما بقراها بحس انها صح اوي
احنا لما بنرتبط بحد
مش بنرتبط بيه لوحده
بيه و بأهله واصحابه وبيئته وكل حاجه في حياته
ممكن نكون بنحبه ..بس ياتري ممكن نفصله عن كل الحاجات دي
قصص حب كتيره اوي وكبيرة اوي شفتها فشلت لما واجهت الواقع
لان اللي بيحب مش بيبقى شايف غير اللي بيحبه وبس
دايما اقول ان الاله الحاسبه بتاع الحب فيه جمع بس
لكن الآله الحاسبه بتاع الحياه فيه جمع وطرح وقسمه وضرب
وساعات برجع واقول انه ليه لأ؟؟؟؟؟؟؟
ليه كل اتنين حبوا بعض مايكونوش لبعض
ليه دايما محتاجين نحسبها بالورقه والقلم
ليه يبقى ذنب قلبين مجرد انهم عايزين يعيشوا حياتهم ويكملوا طريقهم سوا
ليه عشان الناس وكلامهم نحرم قلب من قلب تاني كان هو اكتر حد ممكن يحافظ عليه واللي لو كل الحنان اللي في قلب الناس دول اتجمع مش هيعوضه عنه؟؟؟؟؟؟؟؟؟؟
انا جويا كلام كتير اوي مش عارف اقوله

على فكرة الفرق اللي اقصده مش الفرق اللمادي بس

فيه فروق اجتماعيه وثقافيه كتيره اوي

اعرف دكتور اتجوز ممرضه وكانت النتيجه انه اهله قاطعوه

واعرف مسلم كان بيحب مسيحيه وانتهت القصه بالفشل ادام الواقع اللي رفض الفرق ده

حاجات كتير بالشكل ده
يمكن اخترت القصيدتين اللي تحت سوا عشان يمكن يعبروا عن الفكرة اللي جوايا
قصيده كتبت فيها عن حد فضل انه يبعد لانه حس انه لو قرب
يبقى كده بيظلم اللي بيحبه وهيكون سبب في حزنه لو مش دلوقتي..فيمكن يكون أدام شويه
أما التاني فقرر انه يكمل في قصته وينفض لكل كلمة اتقالت وكل لسان اتكلم
أنا شخصيا مش عارف مين الصح
مستني رأيكم



معني الوفاء

مستـــحيل أبــــــدأ حكايه
و أبقى عارف مـ ِ البدايه
إنه مكـــــتوب في النهايه
القلـــــــــوب تبــــعد بعيد

رغـــــــم ان أنا وانتي كنا
في الهـــــــوي بنحلم بجنّه
بس في الحــــــب اللي بنّا
الفراق بـــــــــقى شئ أكيد

رغم اني في بعدي عنك ...مش هطيق لحــظة فراق
رغم اني هعـــيش وحيد.....بين دموع الاشـــــــتياق
بس عنك لازم أبـــــــعد.....هو دا... معـــــــني الوفاء

مـــــش هينـــــفع صدقيني
أعشقك.....أو تعشــــــقيني
والسبب..مش كرهـي ليكي
السبب.....هو حنـــيني!!!!

لو هكون دمعه في عينيكي...يبـــقى أنا هبعد و أسيبك
لو زرعت الحـــزن فيــــكي...ما أستاهلشي أكون حبيبك
صعب بعــــــدك بس أصــعب......لما حزني يكون نصيبك

أيوه فيّ خلـــــفت ظنك
بس مش بتخــــلّي عنك
حبنا ...كان حــــلم ضايع
سيبته لي... وخدته منك

أيوه هبــــــعد بس بُعــدك.......مش بإيدِي ولا بإرادتي
ممكن انسى الفـــرق بنا .......و أبقى جنبك لو أردتي
بس هبقى ساعتــها بهدم...فرحتك علشان سعادتي

أيوه هبعد.... بــس لازم.........تبقى عارفه بجد إني
قلبي حَب بصدق لــــكن....الظروف كات أقوى منيّ


بالعند فيهم!!
في بُــعدك عـــني يا حبــــيبتي....... لاقيت قلــــبي في بعــدك داخ
وبَــــــــــعد الدوخـــــة بعـلنها....... مافيش لغــــــــرامك استنساخ
يروح قلبي في هواكي فطيس......... لكن قلـــــبك يكــــــــون بيتي
عشان لازم ..أكـون رمسـيس..........في قلــــــبك....... يا نفرتيتي
ولامـــوا علىّ يــــاما الـــناس.........وقالـــــوا عليّ واد مــــغرور
قــالولي ازاي بقى يا ""........

lada

بتعشق واحـدة"فور باي فور"
أنا قلـــــــتلهم ان احـــــــــــنا.........هنقدر نمــــــــشي لو عايزين
ونقدر في الهــــــوى نكــــمّل ........مادام جــــوة القلــــوب بنزين
قالولي يا حـــلو محــــمولها...........خمــس كاميرات وجيل تالت
وعدة حضـــــرتك كــــانت .......... بتــــــاعت أحـــــمس التالت
وقلــــت مادُمـــتي ويّـــــايا............فشــركة نوكــــــيا دي ملكي
مادام بين القلـــــــوب شبكة...........نـــدوس لــو حتي بـِـلاسلكي
قالــــــــولي دي راكبه عربية........حاجات جبارة صـــنع باريس
وراكب حضــــــــــرتك رابع........في آخر كرسـي في السرفيس
أنـــا قلــــــت اللي بيــــــحبوا.........أكيـد بهـــــــواهم اتــــــغروا
مادام بيحـــــــبوا ايه يعــــني ........يروحوا الشـــــغل على كارو؟
قالولـــــي يا حلو في دولابها..........هـــــــــدوم أد اللي في بلدكم
ولو حــــــــــوشت في تمنهم..........يكون جه عـــــزرائيل خدكم
أنـــا قـــلت الهـــــــدوم ديّــة...........حاجـات مالهاش أكيد عوزة
عايــزها يادوب كده بطولها...........بجـذمة.. وجيــــبة... وبلوزة
قالوي طبيــــــخها أي كلام...........هتحــــرق في الطبــــيخ دمك
لا تعملك في يوم محـــــشي .........وبامــــــــــية زي طبـــخ أمك
وقلتــــــــــلهم وايه يعني ؟؟؟.........كفــــــاية بـِـقلـــــبها طـــابخاه
ولو تطبـــــــخلى سـم فيران......... هآكل منـّــه و أقــــــــول الله
قالولي هتعــــشقك على ايه...........يادم تقــــــيل..... يا تلــــقيحة
دا حُبـــــــــك أكل مستشفي............لا لون ولا طعم ولا ريـــحة
أنا قلتــــــلهم......... اتفلقوا............عاجـــبها يا نـاس وعاجباني
عينيها الســــود أكيد أحلى............من أحــــمد عـــز شايـــفاني
قالولي بتشــــــــتغل نفسك..... .... ياراجــــل بطـــل استـــــهبال
عشان القرد يا حلــــــــيوة.............في عين مــاماه بيبقى غزال
وقلتـــــــلهم عــيون القلب ...........أكــــيد مختلفه في الحسابات
مادام القــــلب عينه تشوف...........بنـنسى نـــبص في المرايات
قالولي بلاش تعيش في غرام.........نهــــــايته الســــودة محتومه
مســيركوا في يوم هتختلفوا..........وتبــــــقوا معارضه وحكومه
وقلـــــــت الحب مهما يكون..........ألــم وفـــــراق ونار ودموع
يزيد الحـــــــــــب في قلوبنا......ودي المتعة اللي في الموضوع!!
يقولوا ... ومهـــــما يقولوا...........كلامـــــهم مـــش هيـــفرسـنا
ولو مااتعلـــــــموش الحب.......... نعلمــــــــهم في مــــدارســنا
كفــــــاية عليـــنا لو عشة........... ننام لو حتى كـــان على بُرش
ومهما يقولـــــوا يا حبيتي........... نطنــــشهم..... ونعمل طُرش

همساتٌ..من رحيق الماضي

معلشهي بقى زي ماقلت قبل كده
لازم كل واحد يختار جمله واحده
اتققنا؟؟؟؟؟؟؟


· لا تبني شعورك أبداً على كلماتٍ قرأتها في عيون الآخرين.....فقد تكـون ممن لا يجيدون القراءة أو ربما ممن لا يجيدون الترجمة !
· لا أدري لماذا تعودنا ألا نرى أيامنا جميلة إلا بعدما نضع قبلها كلمة "كانت" .

· أجمل أحاسيس الدنيا أن يولد بداخلك حباً حقيقيا.. وأصعبها أن تضطر لدفنه حياً .

· أصعب أنواع الدموع هي الدموع التي لم تستطع رغم حزنك أن تفارق عينيك .
·
لاتغُرّك كلمات الثناء حتىوان كانت صادقة،فالناس تصفق للساحرلأنه استطاع أن يخدعهم

· ما أجمل أن تجد نفسك في عيون ٍ كانت هي الأخرى تبحث عن نفسها في عينيك .

· إنّ حباً بدأ وانتهى بداخلك هو خيرٌ بالتأكيد من حب ٍ بدأ بداخلك ..وانتهى أمام الناس .

· لكل تري الأشياء واضحة... فلابد أن يخرج ضوءاً منها إلي عينيك
أما لكي تـــراها جمـــــيلة ..فلابد أن يخرج الجمال من عينيك إليها .

· الحب لايعترف بالفوارق ولكن النـاس تعترف بها........فلا تنسى عندما يعـــيش في قلــــبك الحب.. أنك تعيش بين الناس

· أحلامنا هي البر الذي تستريح عليه قلوبنا..ولكن لكي نشعر بطعم الراحه على هذا البرلابد أن تتعب من الإبحار نحوه أولاً .
·
قالوا انظر إلى نصف الكوب المـــمتلئ ..فلم أستطع
قالوا لا تنظر إلى نصف الكوب الفارغ... فلم أستطع
فالحكمة في نظري أن نرى أن الكوب به نصفٌ فارغٌ ... وآخرٌ ممتلئ .
·
إذا سكن في قلوبنا الحب فنحن دائماً نعاني،إما لأننا غير راغبين في كتمانه..أولأننا غير
قادرين على إعلانه.
·
أعمارنا تبدأ ألف مرة..مرة حين نولد..ومرة حين نفهم..ومرة حين نحب.... ولكنها
تنتهي مرةً واحدة فقط .
·
مشاعرنا هي البيوت التي نبنيها ونتعب في بنائها...لكي يسكنها الآخرون .

· لكي تقطع المسافه الطويلةالتي تفصلك عن الناس ..لابد اولا أن تقطع المسافة الأطول التي تفصلك عن نفسك
.

True love is hard to get …and more hard to forget *
Wounds are the more near..the more severe *
In our hearts any one may be the first…. but only one can be the last*
Some times we can't answer.. even when we now the answer *
Because our hearts are able to forget the pain, we are always able to love again *

· في زماننا هذا..قد يكون حظك سعيداً لتجد من تحبه..وقد يكون سعيدا جداً لتجد من يحبك .
·.
· قليل ٌمن العواطف وقليلٌ من التفكير،قليلٌ من العواطف وكثيرٌ من التفكير،كثيرٌ من العواطف وقليلٌ من التفكير...كل هذه بذور حب..فشجرة الحب الحقيقية يلزمها كثيرٌ من العواطف وكثير جدا من التفكير
·
كل شئ ٍ في الدنيا يستطيع أن يعطيك التعاسة والسعادة
فالدموع تكون غايةً في الجمال عندما تسيل من عينين سعيدتين
والبسمة تكون غايةً في القسوة حينما نضطر أن نرسمها على وجوهنا لحظة الوداع .
·
الحب دواءٌ لكل ما تشعر به من حزن..ولكن عذراً فليس هناك دواء بدون آثار جانبية .
·
لابد أن تكون كرامتنا في قلوبنا كالكهرباء في الأسلاك..تضئ لك وللآخرين ولكنها تصعق كل من حاول لو مجرد أن يلمسها .
·
إذا لم تستطع أن تكون مستقبلاً باسماً في حياة من تحب...فعلى الأقل حاول ألا تكون ماضي مؤلم
·
ان أبسط رد اعتبار ممكن ظلمك..ممن خانك ..ممن جرحك ألا تبكي عيونك ولو دمعة ً واحدة حزناً عليه
·
قمة الحب أن تضحي بسعادتك لكى تري الحب في عيون من أحببت
وقمة الوفاء أن تضحي بحبك لكي تري السعاده في هذه العيون
·
قمة ما أنعم الله به علينا هو أن جعلنا نحمده على ما أعطانا من نعم
وقمة الفضل أن أثابنا على ذلك الحمد!!!!!
·
قمة الحيرة أن تشعر بالظلم في حين أثبت لك الجميع أنهم أبرياء
و قمة الحزن أن تكتشف في النهاية أنك قد ظلمت نفسك بنفسك
·
الحب هو الشئ الوحيد في الدنيا الذي يزيد كلما زاد عاد المتقاسمين فيه
·
لا تجعل لنفسك حلما صغيرا تحققه فتشعر أنك قد فعلت كل شئ
ولا تجعل لنفسك حلما كبيرا لا تحققه فتشعر أنك لم تفعل أي شئ
ولكن دع أحلامك الصغيرة تتجمع لتعطيك في النهاية حلمك الكبير
·
لا تحكم على الناس أبدا من مظاهرهم فنحن لا نستطيع أن نفرق الماء العذب من المالح إلا إذا تذوقناه
·
دائما ما يذكرني عالم الحب بعالم المحمول
فبعضنا يملك بين ضلوعه حباً ولكنه لا يملك الصلاحية لاستخدامه
و بعضنا يملك هذه الصلاحية ولكنه لم يقابل الى الآن رصيده من الحب
وبعضنا يملك رصيدا وصلاحية ولكن هموم الدنيا استنفذته ففصل شحناً
وبعضنا قرر أن يلغي مشاعره ويغلق قلبه ويعيش في هذا العالم بلا شريحة!!!
·
إن الاختبار الحقيقي لإيماننا أن نترك الذنوب لأنها ذنوب ..ليس لمجرد أن بعدها عقاب أو لأننا لم نجد فرصه لنفعلها .
·
ليس من حقي أن ألعن جراحي...يكفي أنها بقدر ما آلمتني.. بقدر ما علمتني
·
إن طريقاً رسمته وسرت فيه نحو الله لا يضرك أين فاجئك الموت فيه
·
حينما تكون قادراً على وضع نهاية ٍ لحبك فهو بالتأكيد لم يكن حباً حقيقياً
·
أحزاننا الطويلة هي الثمن الذي ندفعه لكي نشعر بجمال ابتسامتنا التي غابت عننا طويلاً
·
لا أتعجب أبداً من أي شئ ٍ اخترعه أو اكتشفه أو أبدعه الإنسان..إنني دائماً أتعجب ممن وهبه القدرة والعقل ليفعل كل ذلك
·
ليس الحب بحاجة ٍ الي استئذان ٍ او قطع تذاكر قبل أن يدخل قلوبنا ..وذلك لأنه يعلم أنه مهما كان الزحام بداخلنا فهو دائما سيجد مكاناً
·
كثيرٌ من المشاعر نظلمها حينما نحاول أن نضع لها أسماء..بعض المشاعر جمالها أن تبقى دائماً مشاعر
·
إذا كانت أعمارنا تقاس بلحظات السعادة الحقيقة التي عشناها فأنا عمري أقصر من المدة التي قرأتم فيها هذه الجملة.........وإذا كانت أقدرانا تقاس بما قدمناه من خيرٍ حقيقي ٍ في هذه الدنيا فأنا أقل حجما من النقطة التي وضعتها في نهاية هذه العبارة .